1 AƆ́CƐ́ 22 - Ubáyíbu kú Idɔma

Ɔ̄comɛ́ɛbɛ Umikáya pi Áhābu ahɔ̄

¹ Ɛbɔ́ yɔ̄ ɔtāhɛ̄ kú Ísrɛ̄lu mɛ́mla Usiríya ipú iháyí ɛtá ce īyī uwā.

² Ipú iháyí ɔ́mɛtá ā, Ujɛhóssāfāti, ɔcɛ́ kú Ujúda le yɛ nyɔ̄ í le Áhābu, ɔcɛ́ kú Ísrɛ̄lu má.

³ Anɔ́ɔ Áhābu da aígabɔ̄ kú nū ɔ̄kā kahíníī, “Ɔdí yá nɛ̄ alɔ í yá ɔdā dúúmā ka ālɔ̄ mīyɛ Urámɔtu nōo yɔ̄ ipú Ugílɛ̄di ŋmá abɔ̄ kú ɔcɛ́ kú Usiríya ŋ́ mā? Ó kē wɛ ákú alɔ.”

⁴ Anɔ́ɔ Áhābu da Ujɛhóssāfāti ɔ̄kā kahíníī, “A géē nyɔ̄ mɛ́mla um í kpɛ́fú tá ācɛ kú Urámɔtu nōo yɔ̄ ipú ajɛ kú Ugílɛ̄di ā?” Anɔ́ɔ ó ta Áhābu ohi kahíníī, “Eko dúú nɛ̄ a le tútū ká ā nyɔ̄, n géē nyɔ̄ mɛ́mla awɔ. Aícɔ́ɔja mɛ́mla ācɛ okpɛ́fú ɔnya kú um géē nyɔ̄ mɛ́mla awɔ dúú.

⁵ Amáŋ alɔ lɛ ɔ̄kā da Óndú ā ɛ́ɛ́.”

⁶ Anɔ́ɔ Áhābu lɛ ācomɛ́ɛbɛ bɛ̄ɛka ācɛ úlā (400) ā kpó hīgwú. Anɔ́ɔ ó da uwá ɔ̄kā kahíníī, “N̄ nyɔ̄ gaá kpɛ́fú tá Urámɔtu kú ipú ajɛ kú Ugílɛ̄di, kɛ̄ɛ kā n̄ nyɔ̄ ŋ́?” Anɔ́ɔ é tá ɔ̄ ohi kahíníī, “Nyɔ̄, Óndú ā géē cɛ̄ gā uwɔ yá uwā lé.”

⁷ Anɔ́ɔ Ujɛhóssāfāti klla da Áhābu ɔ̄kā kahíníī, “Ɔ̄comɛ́ɛbɛ ɔhá dúúmā í yɔ̄ nɛ̄ alɔ gē da Óndú ā ɔ̄kā ŋmá ɛgiyí nū gɛ ŋ́ ŋ̄?”

⁸ Anɔ́ɔ Áhābu da ɔ́ kahíníī, “Ɔ̄cɛ éyi yɔ̄ kpɔ́ ɛ́ɛ́. Umikáya, ɔyí kú Ímla. Amáŋ ó gē tū um eyījii, ó gē mɛ́ɛbɛ olɔhi dúúmā lɛyíkwu um jéjéē ɛ́ɛ́ ŋ́. Ɔdōbɔ̄bí kú um nōó gē má piyóó á. Anɔ́ɔ Ujɛhóssāfāti da ɔ́ kahíníī, “Ā ka lɛ ā ɛ́ɛ́ ŋ́.”

⁹ Anɔ́ɔ Áhābu le éyi kú aígabɔ̄ kú nū tɛ̄hɔ̄ gaá lɛ Umikáya hīgwú bōōbū á.

¹⁰ Ujɛhóssāfāti mɛ́mla Áhābu, aɔ́cɛ́ ɛpa ā le awulú kú ɔcɛ́ kú uwá wiiyē cīce ɛga nēé gē wú īkpɔ̄dā kú okónu igá kú Usamérīya ā, anɔ́ɔ odúúdú ācomɛ́ɛbɛ ohile ā bá í kacɛ̄ iyɔ̄bū uwā.

¹¹ Éyi kú uwā, nēé hī ka Usedekíya, ɔyí kú Ukénāana le ajī kú ɛbɛ́ kú oje yá, anɔ́ɔ ó da Áhābu kahíníī, “Óndú ā ka a géē bī ajī nyā le kpɛ́fú tá ācɛ kú Usiríya klla géē yá uwā lé.”

¹² Odúúdú ācomɛ́ɛbɛ ohile ā ka ɔdā ékpónú ɔ́ɔmā dúú. É da Áhābu ka, “Nyɔ̄ í kpɛ́fú tá ācɛ kú Urámɔtu kú ipú ajɛ kú Ugílɛ̄di, a í yá uwā lé. Óndú ā géē cɛ̄ ga uwɔ yá uwā lé.”

¹³ Anɔ́ɔ éyi kú aígabɔ̄, nōo nyɔ̄ í hī Umikáya igwú wā ā da ɔ́ kahíníī, “Odúúdú ācomɛ́ɛbɛ ohile ā le ɛlā olɔhi kú ɔcɛ́ ā ka ɛɛ́ n. Ó kē cíkā ká ā ka ɛlā ékpónú ɔ́ɔmā dúú.”

¹⁴ Amáŋ Umikáya tā ɔ̄ ohi kahíníī, “Oŋmá lɛ iyē kú Óndú nōo yēeyī ā, ɔdā dúúmā nōó ka gā um ā, nɛ̄ n géē ka á.”

¹⁵ Eko nōó gā iyɔ̄bū Áhābu, ɔcɛ́ ā, Áhābu da ɔ́ ɔ̄kā kahíníī, “Umikáya, ami mɛ́mla Ujɛhóssāfāti, ɔcɛ́ ā, ká alɔ̄ nyɔ̄ gaá kpɛ́fú tá Urámɔtu kú ipú ajɛ kú Ugílɛ̄di kɛ̄ɛ ka ālɔ̄ nyɔ̄ ŋ́?” Anɔ́ɔ Umikáya tá ɔ̄ ohi kahíníī, “Nyɔ̄, aá géē yá uwā lé gbóó.”

¹⁶ Amáŋ Áhābu tá ɔ̄ ohi kahíníī, “Eko dúú nɛ̄ a bī iyē kú Óndú ā gē kɛlā gā um, ɛlā ɔkwɛ̄yi nɛ̄ a í ka gā um á. Igbɛɛmulá nɛ̄ n cíkā ō da uwɔ ɛlā ɔ́ɔmā āa?”

¹⁷ Anɔ́ɔ Umikáya tá ɔ̄ ohi ɔ̄kwɛ̄yí ā kahíníī, “N má aícɔ́ɔja kú Ísrɛ̄lu le pahīla klá ɛyí ɛfu bɛ̄ɛka aálá nēé lɛ ɔ̄cɛ ō gbō uwá ŋ́ mā ā. Anɔ́ɔ Óndú ā ka, ‘Ācɛ nēe bá nyā í lɛ ɔ̄cɛ o gbō uwá ŋ́, kéē kwúcē ga ɔlɛ́ ɛbɔ́.’”

¹⁸ Anɔ́ɔ Áhābu da Ujɛhóssāfāti kahíníī, “Ń le da uwɔ koó géē mɛ́ɛbɛ olɔhi lɛyíkwu um ŋ́ ŋ̄? Ɔdōōbɔ̄bí kú um nōó gē má klla gē ka piyóó á.”

¹⁹ Anɔ́ɔ Umikáya klla da ɔ́ kahíníī, “Jāhɔ̄ lɛ ɛlā nɛ̄ Óndú ā ka ā, ‘N má Óndú ā cīce ɛyí akpa kú nū ɔkpáncō, odúúdú alelékwū-ōtɛ̄hɔ̄ kú nū bá mɛ́mla anú.

²⁰ Anɔ́ɔ Óndú ā dɔɔ̄kā ka, ‘Ɔnyɛ géē nyɔ̄ í plla Áhābu ga ɔgbɛ́fú kú Urámɔtu nōo yɔ̄ ajɛ kú Ugílɛ̄di, cɛ́ɛ́ kéē lɛ ɔ́ ŋmó ā?’ Aóhī kú alelékwū-ōtɛ̄hɔ̄ kɛlā éyi, ɔhá kɛlā ɔhá.

²¹ Jāā gbéeko nɛ̄ alelékwū éyi ga ɛcɛ gaá da Óndú ā kahíníī, ‘N géē nyɔ̄ í plla anú’

²² Anɔ́ɔ Óndú ā da ɔ́ ɔ̄kā kahíníī, ‘Abɔ̄ a géē nyɔ̄ í plla anú lɛ a?’ Anɔ́ɔ ó tá Óndú ā ohi kahíníī, “N géē nyɔ̄ í yá ka odúúdú ācomɛ́ɛbɛ kú Áhābu ā kéē nyɔ̄ í má ɔ ɛbɛ ɛ̄kɛ̄mgbɛ̄ kéē klla kɛlā ɛ̄kɛ̄mgbɛ̄ lɛ ɔ́.” Anɔ́ɔ Óndú ā da ɔ́ kahíníī, ‘Nyɔ̄ í lɛ ɔ́ plla, a kē í yá ɔ̄ glá.’”

²³ Anɔ́ɔ Umikáya le ɛlā kú ɛbɛ nōó má ā ŋmɛ́yí abɔ̄ ó kahíníī, “Ɔdā nōo yá ā yɔ á. Óndú ā cɛ̄ lɛ ācomɛ́ɛbɛ kú uwɔ ā le ɛ̄kɛ̄mgbɛ̄ kā gā uwɔ. Amáŋ anú abɔ̄yī nū lɛ ɔ́ ka ka ífi mɛ́mla oyáŋmó ɛ́ɛ géē hɛ́jīla awɔ ɔwɛ.”

²⁴ Anɔ́ɔ ɔ̄comɛ́ɛbɛ Usédekīya nyɔ̄ gaá lɛ ɛbɛ́ tū Umikáya ahɔ̄. Anɔ́ɔ ó da ɔ́ ɔ̄kā kahíníī, “Eko nyá nɛ̄ alelékwū kú Óndú ā nyɛ̄ɛ̄ ŋmá ɛgiyí um wā í kɛlā ga uwɔ āa?”

²⁵ Anɔ́ɔ Umikáya tá ɔ̄ ohi kahíníī, “A géē jé eko nɛ̄ a géē kwu ga ipú inu eyīpú gaá je īyī uwɔ tayínū ā.”

²⁶ Anɔ́ɔ Áhābu lɛ ɔ́da je ka ɛ́ɛ lɛ Umikáya kwú kéē kwú ɔ̄ ú kwúcē gé lɛ Ámɔ̄n, igbómína kú igelī nɛ̄hi ā ga ɛga ɔyínɔ̄nyīlɔ kú ɔcɛ́ ā.

²⁷ Ó ka ɔ́ɔ le da ɔ́ kéē kwú Umikáya ú tá agbá kéē je igbō lɛ ɔ́ ka ɔ́ɔ̄ lé mɛ́mla éŋkpɔ̄ ka ɔ́ɔ̄ gwá jāā gbéeko nɛ̄ anúɔ pīyɛyi ŋmá ɔgbɛ́fú ā ɛbɔ́.

²⁸ Anɔ́ɔ Umikáya tá Áhābu ohi kahíníī, “Ɔ́dāŋ ka a pīyɛyí ŋmá ɛfú ā wā ɔlɛ́ ɛbɔ́, ayíka ó wɛ Óndú ā kɛlā bū okónu kú um ā ŋ́. Odúúdú ācɛ, aá jāhɔ̄ kú aá lɛ ɛlá kwu ɛlā nɛ̄ um ka ā.”

Ikwú kú Áhābu

²⁹ Anɔ́ɔ Áhābu, ɔcɛ́ kú Ísrɛ̄lu mɛ́mla Ujɛhóssāfāti ɔcɛ́ kú Ujúda le yɛ gaá kpɛ́fú tá Urámɔtu kú ipú ajɛ kú Ugílɛ̄di á.

³⁰ Áhābu da Ujɛhóssāfāti kā, “Abɔ̄ alɔ gē nyɔ̄ ɔgbɛ́fú ā, n géē je īyī um pīya bɛ̄ɛka ɔ̄cɛ ɔhá ā, amáŋ awɔ a géē lɛ awulú kú ɔcɛ́ kú uwɔ wiyē.” Anɔ́ɔ Áhābu le tá ɔgbɛ́fú, le iyī nū pīya bɛ̄ɛka ɔ̄cɛ ɔhá ā kwú úwé kú ofulajɛ í kpó wiyē á.

³¹ Ɔcɛ́ kú Usiríya kē da ācɛ ɔlɛ́ nū, mɛ́mla aótrɛ̄yí kú aúgbɔ́ɔnya ō bī kpɛ́fú ofu cigwɛ́ɛpa ā kahíníī, “Áá híī nuunu tá ɔ̄cɛ dúúmā ŋ́, n táafú ŋ́ Áhābu ōfōōfūnū.”

³² Ohígbū ɔ́ɔmā, eko nēé le Ujɛhóssāfāti, ɔcɛ́ kú Ujúda má ā, odúúdú uwá kwú eyī ú pīya kwu ɔ́ gbɔɔ́ ō nuunu tá ɔ̄ ka anú ɔ́ɔ wɛ ɔcɛ́ kú Ísrɛ̄lu á. Anɔ́ɔ ó lɛ ɛgba dɛ̄ tɛ́ɛcɛ ā.

³³ Abɔ̄ é le jé ka ɔ́ɔ wɛ ɔcɛ́ kú Ísrɛ̄lu ŋ́ mā, é kwú eyī ú pīya ŋmá ɛgiyí nū.

³⁴ Icɔ́ɔ́ja kú Usiríya éyi í jé ŋ́ le ɔyí tá fúuu icííci gaá le Áhābu ɔtū ɛga nɛ̄ ɔkplɛ́fú kú uwā í lɛ iyē kwu iyí uwā ā kwú. Anɔ́ɔ o da ɔ̄cɛ nōó gē pɛ́ úgbɔ́ɔnya o bī kpɛ́fú kú nū ā kahíníī, “É lɛ um yá ágbe ɛɛ́, le pīyeyī ká ā kwu um ú ŋmá ɔgbɛ́fú ā.”

³⁵ Abɔ̄ ɛfú ā yɔ̄ ī hɔ́lá nɛ̄hi ā, Áhābu gwutá ipú úgbɔ́ɔnya o bī kpɛ́fú kú nū yɔ̄ í fu oyī ŋmá ágbe ā. Oyī kú nū ā le pɛ́ klá ɔkwu kú úgbɔ́ɔnya o bī kpɛ́fú kú nū ā. Anɔ́ɔ ɔ̄nɔ̄ɔnɛ̄ ā, Áhābu gekwú.

³⁶ Ɛ́ɛ́ ka ɛnɔ kóō gaajɛ ā, é le ɛhɔ̄ tū fu odúúdú aótrɛ̄yí kú aícɔ́ɔja kú Ísrɛ̄lu ā. Anɔ́ɔ ɔnyɔɔnyɛ kú uwá kwúcē le tá ajɛ mɛ́mla igelī kú ɔlɛ́ nū á.

³⁷ Anɔ́ɔ Áhābu gekwú. É kwú okwū kú nū ú ga Usamérīya gaá kwú ɔ̄ ú nyi.

³⁸ É le úgbɔ́ɔnya o bī kpɛ́fú kú nū ā na okónū éŋkpɔ̄ ɔkpá kú Usamérīya ɛga nɛ̄ aéwō gaá le oyí kú nū planyɛ̄, aákwuna klla le iyē gwā tū abɔ́ɔ dúú, ɛ́gɛ́nɛ̄ ɛlā nɛ̄ Óndú ā tɛtɛ ka ka ɔ́ɔ̄ géē yá lɛ ā.

³⁹ Ɔdā ohile ɔhá dóódu nɛ̄ Áhābu yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

⁴⁰ Anɔ́ɔ ɔyí nū, Ahasíya kwú pīya ɔcɛ́ kwɛyí nū á.

Ujɛhóssāfāti, ɔcɛ́ kú Ujúda

⁴¹ Ipú iháyí ɔ́mɛnɛ nɛ̄ Áhābu lé ɔcɛ́ kú Ísrɛ̄lu ā, Ujɛhóssāfāti, ɔyí kú Ása kwu pīya ɔcɛ́ kú Ujúda.

⁴² Ó wɛ iháyí ofu cigwɛ́ɛhɔ̄ ɛ́ɛ́ nōó lé ɔcɛ́ kú Ujúda á. Ó cɔcɛ́ kú Ujúda Ujerúsālɛm, igelī nɛ̄hi ā, iháyí ofu cɛhɔ̄. Ɛ̄nɛ̄ nū lé ka Asúba, ɔyínɔ̄nyā kú Ussílhi.

⁴³ Ujɛhóssāfāti yá ɔdā nōo le kpaakpa ɛgiyí Óndú ā bɛ̄ɛka ádā nū ā Ása. Amáŋ ó je aíkpɛ́cí kpó catāajɛ ŋ́. Ācɛ bá ī gwɛ́ɛya lɛ ɛcí klla bá gē yi ɔtulalí ɔlá lɛ ɛcí abɔ́ɔ kpɔ́.

⁴⁴ Ujɛhóssāfāti le ɛbɔ́ yá mɛ́mla ɔcɛ́ kú Ísrɛ̄lu.

⁴⁵ Ɔdā ohile ɔhá dóódu nɛ̄ Ujɛhóssāfāti yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

⁴⁶ Ó le aákwuna kú ɛga ō pɛ̄cí dóódu nēe hile ŋmá eko kú ádā nū, Ása ā, kpónū ā, kwu ācɛnyā kwu ācɛnyīlɔ ā kpó yíífi ŋmá ajɛ ā.

⁴⁷ Ajɛ kú Ɛ́dɔm í lɛ ɔcɛ́ ŋ́. Ɔ̄cɛ nɛ̄ ɔcɛ́ kú Ujúda fu ā gē gbō abɔ́ɔ á.

⁴⁸ Ujɛhóssāfāti klla lɛ aúgbéenyi gwó nōo gē yɛ ga ajɛ kú Ófɛ́ri ohígbū oje ɔdɔ (ugoolu). Amáŋ uwá kwú gbayibó Ɛ́siyɔngɛ́ba, é klla yɛ glá ɛ́ɛ́ gɛ ŋ́.

⁴⁹ Amáŋ Ahasíya ɔcɛ́ kú Ísrɛ̄lu cɛ̄ ka ācɛ ɔlɛ́ Ujɛhóssāfāti kéē yɛ mɛ́mla ācɛ aúgbéenyi kú anúɔ, amáŋ Ujɛhóssāfāti tá.

⁵⁰ Ujɛhóssāfāti gekwú anɔ́ɔ é kwú ɔ̄ ú nyi únóji kú aɔ́cɛ́ ā ipú igelī nɛ̄hi kú Udéfīdi. Anɔ́ɔ ɔyí nū Ujɛhóram, le ɔcɛ́ lé kwɛyí nū á.

Ahasíya, ɔcɛ́ kú Ísrɛ̄lu

⁵¹ Ipu iháyí igwáahāpa kú eko nɛ̄ Ujɛhóssāfāti wɛ ɔcɛ́ kú Ujúda ā. Ahasíya, ɔyí kú Áhābu kwú pīya ɔcɛ́ kú Ísrɛ̄lu. Ó klla gbāajɛ Usamérīya iháyí ɛpa.

⁵² Ó le ɔ́bíipú bī tū Óndú ā. Ó klla le yɛ tá ikpó kú ɔ́bíipú kú ádā nū, Áhābu ā, mɛ́mla ákú ɛ́nɛ́ nū Ujɛ́sēbɛlu mɛ́mla ákú Ujérobōwam, nōó bī ācɛ kú Ísrɛ̄lu ga ipú ɔ́bíipú ō bī tū Ɔwɔicō ā.

⁵³ Ó gē gbā ubáalu ɛ̄gbā klla gē cɛ̄ ɔ̄ ɛhɔ̄. Anɔ́ɔ ó lɛ Óndú ā, Ɔwɔicō kú Ísrɛ̄lu ɔtū bīya bɛ̄ɛka ádáádā nū nēe tɛtɛ bá gbɔbū lɛ ɔ́ ā.