1 AƆ́CƐ́ 21 - Ubáyíbu kú Idɔma

Ɛhɔ̄ kú ufáyin kú Unábɔtu

¹ Ɔ̄cɛ éyi nēé hī ka Unábɔ̄tu ā lɛ ɛhɔ̄ ufáyin éyi nōo kwu pī agblɔ́cɛ́ kú Áhābu, ɔcɛ́ kú Ísrɛ̄lu nōo yɔ̄ Ujɛsiríili ā.

² Ɛ̄cī éyi Áhābu da Unábɔ̄tu ka ɔ́ɔ̄ kwú ajɛ ɛhɔ̄ kú ɔcí ufáyin kú nū ā ú lɛ anúɔ ká anúɔ lɛ ɛ́hɔ̄ kú ēpū hí ipú nū, ohígbū ka ɔ́ɔ kwu ɔlɛ́ anúɔ ajaajɛ. Ó ka anúɔ géē je ajɛ ɔhá nɛ̄ ɔ́ɔ lɔhi fíyɛ́ ɔ́ɔmā lɛ ɔ́. Ó klla da ɔ́ ka ɔ́dāŋ ka ɔ́ɔ he ɔ́ ɔtū, anúɔ géē cíla ije nū lɛ ɔ́.

³ Anɔ́ɔ Unábɔ̄tu tá ɔ̄ ohi ka Ɔwɔicō ká ɔ̄ ŋmó ɔwɛ nū, ká anúɔ je ɔdā úgwū kú aádáádā anúɔ lɛ ɔ́.

⁴ Anɔ́ɔ Áhābu kwúcē ga ɔlɛ́ nū le cɔ̄nū nɛ̄hi, ohígbū ɛlā nɛ̄ Unábɔ̄tu da ɔ́ ā. Ó gaá gwutá agōdō kú nū lɛ eyī pīya tá ɔdɔ, anɔ́ɔ ó cɛ̄ ō lé ɔdōlé dúúmā ŋ́ má.

⁵ Anɔ́ɔ Ujɛ́sēbɛlu, ɔnyā nū le tá ɛgiyí nū, gaá da ɔ́ ɔ̄kā ka ɔdíyá nɛ̄ ɔ́ɔ cɔ̄nū nɛ̄hi lɛ āa, nɛ̄ ɔtú ɔ́ɔ gē wú ɔ́ nɛ̄ ɔ́ lé ɔdōlé glá ŋ́ mā ā?

⁶ Anɔ́ɔ ó ta ɔnyā nū ohi ka ɔtū ɔ́ɔ gē wú anúɔ ohígbū ɛlā nɛ̄ Unábɔ̄tu ɔ́ɔ da anúɔ ā. Ó ka anúɔ da ɔ́ ká ɔ̄ kwú ajɛ ɛhɔ̄ kú ɔcí ufáyin kú nū, nōo kwu ɔlɛ́ anúɔ ajaajɛ ā ú lɛ anúɔ, ká anúɔ kwú ajɛ ɛhɔ̄ kú ɔcí ufáyin ɔhá nɛ̄ ɔ́ lɔhi fíyɛ́ ɔ́ɔmā ú lɛ ɔ́, ámāŋ ká anúɔ lɛ ije nū cíla lɛ ɔ́, amáŋ ɔ́ɔ ka anúɔ í gáā je lɛ anúɔ ŋ́.

⁷ Anɔ́ɔ Ujɛ́sēbɛlu tá ɔ̄ ohi kóo anú wɛ ɔcɛ́ kú Ísrɛ̄lu ā ŋ́ nɛɛ? Ó ka ɔ́ɔ̄ cāŋjɛ kóō lé ɔdōlé, ka anúɔ géē mīyɛ ajɛ kú Unábɔ̄tu ɔ́ɔmā lɛ ɔ́. Ɔtú kóō he ɔ́. Ó klla da ɔ́ ka ɔ́ɔ̄ cɔ̄nū ŋ́.

⁸ Anɔ́ɔ Ujɛ́sēbɛlu bī iyē kú Áhābu, le ɔkpá tá klla lɛ ɔdā ōbá ɔkpá kú Áhābu bá ɔ̄. Anɔ́ɔ ó le ɔ́ gwū. Anɔ́ɔ ó kwú ɔkpá ā ú kpó tɛ̄hɔ̄ fu aígabɔ̄ mɛ́mla ācɛ ojīlīmā nēe lá Ujésiríili mɛ́mla Unábɔ̄tu ā á.

⁹ Ó tá ipú ɔkpá ka ɛ́ɛ̄ lɛ ɛ̄cī kú okónu ōgwū tū, kéē lɛ ācɛ kpó hīgwú tɔ̄há, cɛ́ɛ́ kéē kwú ɛga ocīce kú ojílímā ú lɛ Unábɔ̄tu.

¹⁰ kéē lɛ ācokɛ̄kɛ̄mgbɛ̄ ɔdāhá ɛpa kpó kéē lɛ ije cē bá Unábɔ̄tu ka ɔ́ɔ le ɛcá cá ɔcɛ́ mɛ́mla Ɔwɔicō. Cɛ́ɛ́ kéē kwū ɔ̄ ú ga eyīyɛ̄ɛcɛ kú igelī nɛ̄hi ā, cɛ́ɛ́ kéē lɛ ɛcɔ̄ tá klá anú kéē lɛ ɔ́ ŋmó.

¹¹ Anɔ́ɔ aígabɔ̄ mɛ́mla ācɛ ojīlīmā kú Ujésiríili le ɔdā nɛ̄ Ujɛ́sēbɛlu tá tū ɔkpá gé lɛ uwá ā yá ā á.

¹² É le ɛ̄cī kú okónu ōgwū tū, le ācɛ kú igelī ā hīgwú tɔ̄há klla le ɛga ocīce kú ojīlīmā je lɛ Unábɔ̄tu.

¹³ Anɔ́ɔ ācɛ ɔdāhá ā mɛ́mla ācobɔ́bíipú ɛpa ā le ije cē bá ɔ̄ ipú ɛwa ā ka, ɔ́ɔ le ɛcá cá Ɔwɔicō mɛ́mla ɔcɛ́. Anɔ́ɔ é kwú ɔ́ ú ga eyīyɛ̄ɛcɛ kú igelī nɛ̄hi gaá lɛ ɛcɔ̄ tá klá anú le ɔ́ ŋmó á.

¹⁴ Anɔ́ɔ é lɛ ɛhɔ̄ tū fu Ujɛ́sēbɛlu ka aá ɔ́ɔ le Unábɔ̄tu ŋmó ɛɛ́.

¹⁵ Obōōbū nɛ̄ Ujɛ́sēbɛlu mīyɛ olɛhɔ̄ kú uwá ā, ó da Áhābu ka Unábɔ̄tu ɔ́ɔ gekwú ɛɛ́. Anɔ́ɔ ó da ɔ́ ka ɔ́ɔ̄ nyɔ̄ gaá kwú ajɛ ɛhɔ̄, nɛ̄ ɔ́ɔ tá ō je lɛ ɔ́ ā ú mɛ́ɛ́ nɛ.

¹⁶ Anɔ́ɔ Áhābu le tá ipú ɛhɔ̄ kú ɔcí ufáyin kú Unábɔ̄tu ā bōōbū ka ɔ́ɔ̄ gaá mīyɛ ajɛ ā.

¹⁷ Anɔ́ɔ Óndú ā gā ɛgiyí Ɛláyíja nōo ŋmá ajɛ Utíssbe ā gaá da ɔ́ ka ɔ́ɔ̄ cāŋjɛ ka ɔ́ɔ̄ ga Usamérīya gaá jīla mɛ́mla Áhābu, ɔcɛ́ kú Ísrɛ̄lu.

¹⁸ Ó ka ɔ́ɔ géē má ɔ̄ ipú ajɛ ɛhɔ̄ kú ɔcí kú ufáyin kú Unábɔ̄tu nɛ̄ ɔ́ɔ nyɔ̄ gaá mīyɛ ā.

¹⁹ Óndú ā da Ɛláyíja ka ɔ́ɔ̄ da Áhābu, ɔcɛ́ ā, ka anúɔ Óndú ā kahíníī, “A lɛ ɔ̄cɛ ŋmó klla gaá mīyɛ ajɛ mɛ́mla ɔdā úgwū kú nú dúú ɛɛ́?” Ó ka ɔ́ɔ klla lɛ ka lɛ ɔ́ kahíníī, “Ɛga nɛ̄ ewō pla oyī kú Unábɔ̄tu nyɛ̄ ā, abɔ́ɔ nɛ̄ ewō géē pla oyī kú uwɔ nyɛ́ dúú á.”

²⁰ Eko nɛ̄ Áhābu lɛ Ɛláyíja má ā, ó da ɔ́ kahíníī, “Olɛlā kú um, a klla lɛ um pīyɛ tɛcɛ ɛɛ́ gɛɛ?” Anɔ́ɔ Ɛláyíja tá ɔ̄ ohi kahíníī, “N lɛ uwɔ pīyɛ tɛcɛ ɛɛ́ gbóó, ohígbū ka a kwú īyī uwɔ ú lá lɛ ɔdōbɔ̄bí mɛ́mla ɔ́bíipú ō bī tū Ɔwɔicō.

²¹ Ɛlā nɛ̄ Óndú ā ka ā yɔ̄ á. ‘N géē bī ɔdōbɔ̄bí wā í klá awɔ, n klla í je uwɔ gwu bónū ŋmá Ísrɛ̄lu. N klla í je odúúdú ācɛnyīlɔ kú ɔlɛ́ uwɔ, kwu ayípɛ̄ mɛ́mla anyākwɔ́cɛ, kwu ɔfīyɛ mɛ́mla ɔyí ajɛ kú ɔlɛ́ uwɔ kpó yíífi.”

²² Óndú ā klla kahíníī, “N géē je ɔlɛ́ uwɔ yá bɛ̄ɛka, ɔlɛ́ kú Ujérobōwam, ɔyí kú Unébati ā, mɛ́mla ɔlɛ́ kú Ubássa, ɔyí kú Ahíja ā, ohígbū ka a lɛ um ɔtū bīya, klla lɛ Ísrɛ̄lu ikpó tū ɔ́bíipú ō bī.’

²³ Óndú ā kɛlā lɛyíkwu Ujɛ́sēbɛlu ā kahíníī, “Ewō gēe je okwu Ujésēbɛlu lé ipú igelī kú Ujésiríili.”

²⁴ Óndú klla ka kpɔ́ kahíníī, ‘Ācɛ ɔlɛ́ Áhābu dúúmā nōo géē kwú ipú igelī nɛ̄hi ā, ewō géē je okwú kú nū kpó lé. Ācɛ ɛ̄nɛ̄ e kē í kwú ipácí ā, aígbáanɔ nēe ī wu icō ā géē je okwū kú uwá kpó lé á.’”

²⁵ Ɔ̄cɛ dúúmā í yɔ̄, nōo je īyī nū lá lɛ ɔdōōbɔ́bí ō yá ɛgiyí Ɔwɔicō bɛ̄ɛka Áhābu, nɛ̄ ɔnyā nū Ujɛ́sēbɛlu gē nwū ɔ̄ klla ī kwu ɔ́ ga ipú ɔdōōbɔ́bí ō yá ā ŋ́.

²⁶ Ó bī ɛdɔ kú ɔ́bíipú nōo tū uwēyī fíyɛ́ dúú ā. O ŋmá le ɛcí nōó pā bɛ̄ɛka ācɛ kú Ámɔ̄ri, nɛ̄ Óndú ā kpó nū bɛ̄cɛ hīla uwá nēe nɛ̄ wɛ ācɛ kú Ísrɛ̄lu eko nēé bá ī bɛ̄cɛ ŋmá Íjīpiti ā.

²⁷ Eko nɛ̄ Áhābu le ɛlā nɛ̄ Ɛláyíja ka ā pó kwɛyí ā, ó kwú īlī kú nū ú híla klla kwú īlī ekwu ú kpó klá iyē, klla le okónu gwū, bī īlī ekwu wiiyē yɔ̄ ī yɛ tuútuú mla ɔtúnōbí.

²⁸ Anɔ́ɔ Óndú ā da Ɛláyíja ɔ̄kā kahíníī,

²⁹ “A má ɛ́gɛ́nɛ̄ Áhābu tá īyī nū wā ajɛ iyɔ̄bū um lɛ ā? Ɛ́gɛ́nɛ̄ ó lɛ īyī nū tū wā ajɛ iyɔ̄bū um ɛɛ́ mā, ń gáā bī ɔdōbɔ̄bí nyā wā eko nōó yēeyī ā ŋ́, amáŋ n géē bī ɔdōbɔ̄bí ā wā í klá ɔyí nū nɔ̄nyīlɔ eko kú oyēeyī kú nū.”