1 ĀCƐ UKƆ́RĪNTI 3 - Ubáyíbu kú Idɔma

Ācotɛ̄hɔ̄ ā wɛ ācɛ nēe ī cɛ̄ Ohɔ́nyɛtá ā ɛhɔ̄

¹ Amáŋ, ami ā, ayínɛ́ um, ń nwū aá ɛlā ɛ́gɛ́nɛ̄ n lɔfú nwū ācɛ nēe lɛ Alelékwū kú Ɔwɔicō ā ɛlā ā glá ŋ́. N gē kɛlā lɛ aá lɛbɛ̄ɛka ācɛ kú ipú ɛcɛ nyā ā, bɛ̄ɛka ācɛ nēe wɛ ayípɛ̄ nɛŋ́cɛ́ ɛgiyí ɛyí kú ɔtū ōce Ohɔ́nyɛtá ā ō jé ā.

² N gē je amɛ̄ lɛ aá, kú aá gwá, ń je ɔdā olɔfú lɛ aá lé glá ɛ́ɛ́ ŋ́ ohígbū ka aá jɛ̄ jɛ̄ ō lé ɛdɔ odōlé ɛ́gɔ́ɔmā glá ɛ́ɛ́ ŋ́. Ó kōō wɛ abālɔbányā aá tútū ō lē ɔdā o lɔfú glá ɛ́ɛ́ ŋ́ kpɔ́.

³ Ohígbū ka aá gē yá ɛ́gɛ́nɛ̄ ācɛ kú ipú ɛcɛ nyā gē lā ā. Aá gē má iyī aá ímálānyī, aá klla gē yíkpɛ́lā tá iyī aá. Ɔ́ɔmā mafú ka aá yɔ̄ ipú ɛcɛ kpɔ́ ɛ́ɛ́, klla gē yá ucē bɛ̄ɛka ācɛ ɔlamu ā.

⁴ Ohígbū ka eko nɛ̄ ācɛ ōhī kú aá ī ka, ‘Alɔ ā yɛce Upɔ́lu’, nɛ̄ aígwu ɔhá gē ka kahíníī, ‘Alɔ ā yɛce Apólɔsi’ ā, ayíka ɛ̄nyā í mafú ka aá gē yá ucē bɛ̄ɛka ācɛ ɔlamu ŋ́ nɛɛ?

⁵ Ó lɛ ā, ɔ̄nyɛ kōō wɛ Apólɔsi ā? Ɔ̄nyɛ kē wɛ Upɔ́lu ā? Alɔ wɛ ācɛ nēe ī cɛ̄ Ɔwɔicō ɛhɔ̄ icííci, nōo ŋmá ɛgiyí alɔ nɛ̄ aá cɛ̄ɛ̄lā Ɔwɔicō ā. Ɔnyɔ̄ɔnyɛ kú alɔ gē yúklɔ́ nɛ̄ Ɔwɔicō je lɛ ɔ́ kóō yá ā.

⁶ Úklɔ́ kú um ipú aá lɛbɛ̄ɛka ɔ̄cɛ nōo nyi ikpɔ̄dɛ̄hɔ̄ ā. Úklɔ́ kú Apólɔsi lɛbɛ̄ɛka ɔ̄cɛ nōo gē kpó éŋkpɔ̄ tū īkpɔ̄dɛ̄hɔ̄ ā. Amáŋ Ɔwɔicō yá ɛ́ɛ́ nɛ̄ īkpɔ̄dɛ̄hɔ̄ ā gē jɛ̄ á.

⁷ Ó lɛ ā, ɔ̄cɛ nōo nyi ā mɛ́mla ɔ̄cɛ nōo kpó éŋkpɔ̄ tū ɔ̄ ā, í wɛ ɔdā dúúmā ŋ́. Ɛ̄nɛ̄ o wɛ odée ā wɛ Ɔwɔicō nōo gē yá kú īkpɔ̄dɛ̄hɔ̄ ā kóō jɛ̄ ā.

⁸ Ɔdā ɛyɛ́ɛ́yí dúúmā í yɔ̄ ɔtāhɛ̄ kú ɔ̄cɛ nōo nyi īkpɔ̄dɛ̄hɔ̄ ā mɛ́mla ɔ̄cɛ nōo kpó éŋkpɔ̄ tū ɔ̄ ā ŋ́. Ɔwɔicō géē cíla ɔnyɔɔnyɛ kú uwa ulé ɛ́gɛ́nɛ̄ úklɔ́ kú nū lɛ ā.

⁹ Ohígbū ka alɔ wɛ ācoyúklɔ́ tɔ̄há mla Ɔwɔicō, anɔ́ɔ aá ā kē wɛ ɛhɔ̄ kú Ɔwɔicō á. Aá ā kē lɛbɛ̄ɛka inu nɛ̄ Ɔwɔicō gwó ā dúú.

¹⁰ Úklɔ́ kú um ipú aá lɛbɛ̄ɛka ákú ɔ̄cɛ nōo jé ō gwíinu lɔɔlɔhi, nōo lɛ ikpíinu táajɛ ā. Úklɔ́ kú ɔ̄cɛ ɔhá ā lɛbɛ̄ɛka ákú ɔ̄cohɔ́ɔdɔ, nōo gē gwó inu ce ɛyí ikpíinu ā. Amáŋ ɔnyɔ̄ɔnyɛ kóō leyī kwɛcɛ ɛ́gɛ́nɛ̄ ó í gwíinu ā.

¹¹ Ohígbū ka Ɔwɔicō kwú Ujísɔ̄si ú kóō lɛbɛ̄ɛka ikpíinu ōfōōfūnū ā. É klla gáā lɛ ikpíinu ɔhá táajɛ gwō ɔ̄ tá glá gɛ ŋ́.

¹² Abālɔbányā ācɛ ōhī géē bī ugóolu ámāŋ oje nɛ̄hɛ́ ámāŋ ka ɛcɔ̄ ō gbɔɔ́lá nɛ̄hi le gwó inu cɛyí ikpíinu ā. Ācɛ ɔhá lɔfú bī ɔcí ámāŋ ka ácí amáŋ ka eko kú ácí le gwó inu ā glá.

¹³ É géē má ɛdɔ kú úklɔ́ nɛ̄ ɔnyɔɔnyɛ yá ā eko nɛ̄ ɛ̄cī kú Ohɔ́nyɛtá ā gaá lɛ ɔ́ mafú. Ohígbū keé géē bī ɔlá le jé úklɔ́ kú ɔnyɔɔnyɛ má cɛ́ɛ́ kéē má ɛdɔ kú úklɔ́ nōó yá ā.

¹⁴ Ɔwɔicō géē gbā ulé lɛ ɔ̄cɛ nɛ̄ úklɔ́ kú nū le bū ipú ɔlá nōó yi tāajɛ ŋ́ mā.

¹⁵ Amáŋ ɔ́dāŋ ka ɔlá lɛ úklɔ́ kú ɔ̄cɛ dúú yi tāajɛ, ufu lɛ ɔ́ cɛ̄. Amáŋ anú abɔ̄yī nū géē nyatá, bɛ̄ɛka ɔ̄cɛ nōo bī oyēeyī kú nū kwu bɛ̄cɛ ŋmá ipú ɔlá icííci ā.

¹⁶ Ɔkwɔ̄ɔ̄kwɛ̄yi aá jé ka aá lɛbɛ̄ɛka Agblīihɔ-nɛ̄hi nēé gē gbā Ɔwɔicō ɛ̄gbā ipú nū ā. Alelékwū kú Ɔwɔicō lā ipú aá.

¹⁷ Ohígbū ɔ́ɔmā ɔ́dāŋ ka ɔ̄cɛ dúúmā lɛ Agblīihɔ-nɛ̄hi kú Ɔwɔicō bīya, Ɔwɔicō géē je ɔ́ yíífi. Ohígbū ka Agblīihɔ-nɛ̄hi kú Ɔwɔicō ā tīihɔ, aá abɔ̄yī aá kē tīihɔ.

¹⁸ Ɔ̄cɛ dúúmā kóō pllá iyī nū ŋ́. Ɔ́dāŋ ka ɔ̄cɛ dúúmā gbɛlá ka anúɔ jé ɛdɔ íjééyī kú ɛcɛ nyā nɛɛ, ó cíkā ō le pīya olíla, o yá ɛ́ɛ́ kóō le pīya ɔ̄cojéeyi ɔkwɔ̄ɔ̄kwɛ̄yi.

¹⁹ Ohígbū ka ɔdā nɛ̄ ācɛ kú ipú ɛcɛ nyā hī íjééyī ā wɛ ɔdāhá ipéyī Ɔwɔicō. Ɛ́gɛ́nɛ̄ Ɔkpíihɔ ka ā, “Ɔwɔicō gē jē ukpa lɛ ācojéeyī kóō kwú uwā ipú íjééyī kú uwā.”

²⁰ Ɔkpíihɔ ɔhá kahíníī, “Óndú ā jé ka ɔdā nɛ̄ ācojéeyī ī gbɛlá nū ā wɛ ɔdā icííci.”

²¹ Ohígbū ɔ́ɔmā, ɔ̄cɛ dúú kóō bī ɔdā nɛ̄ ɔ̄cɛ yá glá ā le gwō ŋ́. Ɛ́gɛ́nɛ̄ ó lɛ ā, ɔdā dóódu yɔ̄ kóō tīile lɛ aá.

²² Upɔ́lu, Apólɔsi mɛ́mla Upíta, ɛcɛ nyā, oyēeyī mɛ́mla ikwū, ícɛ nyā mɛ́mla ɛ̄cɔ̄bū, ɛjɛ̄ɛ̄jī uwā wɛ ákú aá nɛ.

²³ Aá kē wɛ ákú Ohɔ́nyɛtá ā, Ohɔ́nyɛtá ā kē wɛ ákú Ɔwɔicō.