1 ĀCƐ UKƆ́RĪNTI 2 - Ubáyíbu kú Idɔma

Olɛhɔ̄ kú Upɔ́lu lɛyíkwu Ohɔ́nyɛtá ā

¹ Eko nɛ̄ n wā ɛgiyí aá, ayínɛ́ um, ń bī okónu o jé mɛ́mla ɔdōojé nɛ̄hi wā í le tɔ́ɔna kú olɛhɔ̄ kú ɔdōtayínū nōo ŋmá ɛgiyí Ɔwɔicō ā ŋ́.

² Ohígbū ka eko nɛ̄ n yɔ̄ mla aá ā, n lɛ ɔtū kú um yéékpó ka n kwú ɛjɛ̄ɛ̄jī ɔdā ɔhá dóódu í kpó mlanyī, ɔcí tɔ́cí Ujísɔ̄si, Ohɔ́nyɛtá ā mɛ́mla ikwū kú nū ɛyí ɔcóōnyɔ́kpá ā.

³ Anɔ́ɔ eko nɛ̄ n wā ɛgiyí aá ā, n le yá gbɛnɛkɛɛ, iyē kú um yɔ̄ gē fīyégbúlú ohígbū ufi.

⁴ Ɔdā nɛ̄ n nwū aá mɛ́mla ɔ̄kōolɔhi nɛ̄ n tɔ́ɔna kú nū lɛ aá ā, ń bī ɛlā o jé ō ka mɛ́mla íjééyī kú ɔlɛɛcɛ le yá kú aá cɛ̄ɛ̄lā kú um ŋ́. Ikɔkɔ ɔ́ɔmā, n cɛ̄ ɛhɔ̄ kú um aá bū ɔdōcābɔ̄ kú ɔfú kú Alelékwū kú Ɔwɔicō ā.

⁵ Ɔtū nɛ̄ aá le ce Ohɔ́nyɛtá ā ā, í gbolóce íjééyī kú ɔlɛɛcɛ ŋ́, amáŋ ó gbolóce ɔfú kú Ɔwɔicō.

Alelékwū Ihɔ gē je íjééyī kú Ɔwɔicō lɛ alɔ á

⁶ Nááná alɔ tɔ́ɔna kú olɛhɔ̄ kú íjééyī lɛ ācɛ nēe le pīya ijímkpa ipú alelékwū ɛ́ɛ́ mā ā. Amáŋ alɔ í bī íjééyī mɛ́mla ɔfú nɛ̄ ɛcɛ nyā lɛ nōo kōō gbɔɔ́ ō mɛ dúú ɛ́ɛ́ mā ŋ́.

⁷ Íjééyī nɛ̄ alɔ gē bī le tɔ́ɔna ā wɛ íjééyī kú Ɔwɔicō nōo tayínū ŋmá ɛgiyí ɔlɛɛcɛ, amáŋ ɛnɛ ó le fu táajɛ lɛ alɔ gbɔbū nōó yá ɛcɛ ā, cɛ́ɛ́ kú alɔ lɔfú lɛ ukpɛ̄ kú ɛgahi kú Ɔwɔicō piíí ā.

⁸ Amáŋ ó lɛ ɔ̄cɛ dúú kú aɔ́cɛ́ kú ɛcɛ nyā nōo le íjééyī nyā ŋ́. Ɔ́dāŋ keé le jé nɛɛ, é géē yɛ í je Óndú nōo lɔhi klla tū ɛgahi nɛ̄hi ā nyɔ́kpá ŋ́.

⁹ Náana, ɛ́gɛ́nɛ̄ é ka ipú Ɔkpíihɔ̄ ā, “Ɔdā nɛ̄ ɔ̄cɛ dúúmā í má jéjéēē ɛ́ɛ́ ŋ́ ámāŋ pó jéjéēē ɛ́ɛ́ ŋ́, ɔdā nɛ̄ ɔ̄cɛ dúú í gbɛlá koó gáā yá glá ŋ́ mā, wɛ ɔdā piíí nɛ̄ Ɔwɔicō tútū lɛ ācɛ nōó he uwá ɔtū ā á.”

¹⁰ Amáŋ Ɔwɔicō bī Alelékwū kú nū lɛ ɔdōtayínū kú nū ā mafú lɛ alɔ. Alelékwū ā gē jila ɛjɛ̄ɛ̄jī ɔdā dóódu, ó kōō wɛ ɛlá nɛ̄ Ɔwɔicō gbo tayínū ā.

¹¹ Ɔ̄nyɛ je ɔdā dóódu lɛyíkwu ɔ̄cɛ glá ā? N táafú ŋ́ ayíka alelékwū kú ɔ̄cɛ ɔ́ɔmā nɛ. Ɔwɛ ékpó ɔ́ɔmā Alelékwū kú Ɔwɔicō ōfōōfūnū jé ɛjɛ̄ɛ̄jī ɔdā dóódu lɛyíkwu Ɔwɔicō á.

¹² Alɔ nōo wɛ ācɛ nōo ī yɛce Ujísɔ̄si ā í lɛ alelékwū nōo gē gbō ɛcɛ nyā ipú kú alɔ ŋ́. Ikɔkɔ ɔ́ɔmā, Ɔwɔicō lɛ Alelékwū kú nū tɛ̄hɔ̄ fu alɔ, cɛ́ɛ́ kú alɔ jé odúúdú ɛhi nɛ̄ alɔ mīyɛ ŋmá ɛgiyí Ɔwɔicō ā.

¹³ Eko nɛ̄ alɔ ī nwū aá ɛ̄nyā ā, alɔ í bī ɛlā nɛ̄ íjééyī kú ɔ̄cɛ ɔlamu gē nwū ā ŋ́, amáŋ alɔ gē bī ɛlā nɛ̄ Alelékwū ā ī nwū ā, abɔ̄ alɔ yɔ̄ gē ka ɛyí kú ɛlā ɔ̄kwɛ̄yi lɛ ācɛ nēe lɛ Alelékwū ā.

¹⁴ Ɔ̄cɛ dúúmā nōó lɛ Alelékwū ā ŋ́, í gáā mīyɛ ɛhi nōo ŋmá ɛgiyí Alelékwū kú Ɔwɔicō glá ŋ́. Ɔ̄cɛ ɛ́gɔ́ɔmā ī jɛ́ɛyí uwā fúlufúlu ŋ́, é wɛ ɔdāhá tū ɔ̄. Ohígbū ka ɔ̄cɛ nōo lɛ Alelékwū ōfōōfūnū jɛ́ɛyí uwā glá á.

¹⁵ Ɔ̄cɛ dúúmā nōo lɛ alelékwū kú Ɔwɔicō ā, lɔfú jɛ́ɛyí kú ɔdā dóódu glá. Amáŋ ɔ̄cɛ nōó lɛ ŋ́ mā í kɛpɔ̄ tū ɔ̄cɛ nōo lɛ ā glá ŋ́.

¹⁶ Ɛ́gɛ́nɛ̄ Ɔkpíihɔ ka ā, “Ɔ̄nyɛ jé ɔtū kú Óndú glá? Ɔ̄nyɛ nwū ō ɛlā glá ā?” Alɔ ā jé ɛ́gɛ́nɛ̄ Ohɔ́nyɛtá ā gē gbɛlá lɛ ā.