1 ÚKLƆ́ KÚ AƆ́CƐ́ 5 - Ubáyíbu kú Idɔma

Ipɔ́ɔma kú Urúbɛ̄n

¹ Ɛ̄nyā wɛ ipɔ́ɔma kú Urúbɛ̄n nōo wɛ ɔ́kplá kú Ujékɔ̄pu ā. (Ohígbū ka Urúbɛ̄n le ikpó ɔnyā nɛ̄ ádā nū, Ujékɔ̄pu ā, gē cíkpó nū ā ce ā, ádā nū mīyɛ ukpɛ̄ kú ɔ́kplá kú nū ŋmá abɔ̄ nū, anɔ́ɔ ó kwú lɛ Ujósɛ̄fu, ɛnɛ̄ŋcɛ́ nū á.

² Amáŋ ipɔ́ɔma kú Ujúda nyīla klla lé odúúdú ɔcɛ́ kú aípɔ́ɔma kú uwā á.)

³ Nááná, Urúbɛ̄n, ɔyí kú Ujékɔ̄pu ā ma ayí ɛnɛ. É wɛ Uhánoku, Upálu, Uhɛ́srɔn mɛ́mla Ukámi.

⁴ Ɛ̄nyā wɛ ayí kú Ujówɛ̄lu ŋmá ayááyí éyi ga ayááyí ɔhá á: Ussémāya, Ugɔ́gu, Ussímēyi,

⁵ Umíka, Urewáya, Ubáalu,

⁶ mɛ́mla Ubɛɛ́ra, nɛ̄ ɔcɛ́ Utiglat Upilésa, ɔcɛ́ kú Asírīya kwú ŋmá ɔlɛ́ nū je tá agbá ajɛ éwɔhá ā.

⁷ Eko nēé tá ɛma kú Urúbɛ̄n tāajɛ ā, aɛ́nyā wɛ aótrɛ̄yí kú ipɔ́ɔma kú uwā á: Ujɛ́yɛ̄lu, Usékarīya

⁸ mɛ́mla Ubéla, ɔyí kú Asási mɛ́mla ɔyí kú ɔyí kú Usséma nōo ŋmá ipɔ́ɔma kú Ujówɛ̄lu, nōo lā Árōwɛ, ipú ajɛ kú ɛhícō kú Unébo mɛ́mla Ubáalmēyɔn ā.

⁹ É lɛ ɔdāajɛ (aálá, aɛ́na, aɛ́wū) nɛ̄hi, ajɛ kú Ugílɛdi ā. Anɔ́ɔ é gaá lā ajɛ ā jāā kwu ɛnɔ̄ɔ̄cī kú ūpū nōo tá jāā gaá kwu ísu kú Uyúfarētīisi ā.

¹⁰ Eko kú Usɔ́ɔlu, ɔcɛ́ kú Ísrɛ̄lu ā, ipɔ́ɔma kú Urúbɛ̄n kpɛ́fú tá ācɛ kú Uhágri le uwá kpó ŋmó klla mīyɛ ajɛ kú uwā jāā kwu ɛnɔ̄ɔ̄cī kú Ugílɛ̄di.

Ayí kú Ugádi

¹¹ Ayí kú Ugádi ā lā ɛhícō kú ipɔ́ɔma kú Urúbɛ̄n ipú ajɛ kú Ubássan jāā ga ɛnɔ̄ɔ̄cī kú Usaléka ā.

¹² Ujówɛ̄lu wɛ otrɛ̄yí kú ipɔ́ɔma ā, Usáfam kpokónu ce ɔ́ á, Ujánāyi mɛ́mla Ussáfati wɛ ádā kú ipɔ́ɔma kú Ubássan á.

¹³ Ayí ohile kú ipɔ́ɔma ā ŋmá ipɔ́ɔ́nū kú Umáyíkɛ̄lu, Umésúlam, Ussɛ́ba, Ujórayi, Ujákan, Usíya mɛ́mla Éba.

¹⁴ É wɛ ayí kú Abíhēlu, ɔyí kú Uhúri nɛ̄ ɛma kú ádáádā uwá gaá kwu Abíhēlu, Uhúri, Ujárōwa, Ugílɛ̄di, Umáyíkɛ̄lu, Ujessisáyi, Ujádo, Ubúsi.

¹⁵ Ahi, ɔyínɔ̄nyīlɔ kú Abudíyēlu mɛ́mla ɔyí kú ɔyí kú Ugúni nōo wɛ otrɛ̄yí kú uwā ā.

¹⁶ É lā ipú ajɛ kú Ubássan mɛ́mla Ugílɛ̄di mɛ́mla ajɛ kú ácí kú Ussárɔn.

¹⁷ É tá ɛma kú uwā nyā, eko nɛ̄ Ujótam, ɔcɛ́ kú Ujúda, cɔcɛ́ ā mɛ́mla Ujérobōwam ɔ́mpa, ɔcɛ́ kú Ísrɛ̄lu ā.

Aícɔ́ɔja kú ipɔ́ɔma kú ajɛ kú ɛnɔ̄ɔ̄cī ā

¹⁸ Ɛwa kú aícɔ́ɔja kú ipɔ́ɔma kú Urúbɛ̄n, Ugádi, mɛ́mla ajɛ kú ɛnɔ̄ɔ̄cī kú Umanásɛ ā wɛ úlā ofɛhɔ cigwóléyi, cofigwáahātá (40,760). É le ɔwɛ nēé gē bī ɔkpacaŋgelī mɛ́mla óbō mɛ́mla ɔkplɛ́fú mɛ́mla ɔtā mɛ́mla ɔyī kpɛ́fú lɛ ā nwū uwā lɔɔlɔhi.

¹⁹ É kpɛ́fú tá aípɔ́ɔma kú Uhágri, Ujétɔ, Umápiss mɛ́mla Unódābu.

²⁰ É le ɔtū ce Ɔwɔicō kú uwā anɔ́ɔ é le ɔkɔ gbā lɛ ɔ́, anɔ́ɔ Ɔwɔicō le ɔkɔ nēé gbā ā pó, klla cɛ̄ lɛ uwá le aólɛlā kú uwā kpó yálé dúúdú á.

²¹ Iyó nēé wu ŋmá ɔgbɛ́fú kú uwá mɛ́mla aólɛlā kú uwā nēé yálé ā wɛ aínyankwūlūmī úlā ofɛhīlī cɛhɔ̄ (50,000), aálá úlā bá ɛga úlā ce úlā ofigwɛ́ɛpa cɛhɔ̄ (250,000), aíjakī úlā ɛhɔ̄ (2,000), ācɛ nēé kwú aálagbá kú ɛfú ā kē wɛ, úlā ofigwɛ́ɛpa ce ula igwó (100,000).

²² É lɛ aólɛlā kú uwā alɛwa kpó ŋmó, ohígbū ka Ɔwɔicō yɔ̄ í kpɛ́fú ā lɛ uwá á. É lā ipú ajɛ kú wā ā jāā gbéeko nēé kpó uwā aálagbá ga ajɛ aéwɔhá ā.

Ācɛ kú ɛnɔ̄ɔ̄cī kú Umanásɛ ā

²³ Ācɛ kú ɛnɔ̄ɔ̄cī kú ipɔ́ɔma kú Umanásɛ ōhī ā lā Ubássan jāā ga ɛhícō kú Ubaal-hámɔn, Usénīri, mɛ́mla ɛyí ɛfú kú Uhámɔn. É le nyīla nɛ̄hi.

²⁴ Ācɛ nēe bá nyā wɛ aótrɛ̄yí kú aípɔ́ɔma kú uwā á. É wɛ Éfa, Íssi, Ɛlíyēlu, Ásrīyɛlu, Ujeremíya, Uhódāfiya mɛ́mla Ujádīyɛ̄lu. É klla wɛ aícɔ́ɔja nɛ̄hi nēé pó ofu uwā ga ɛga dóódu.

É kwú aípɔ́ɔma kú ɛnɔ̄ɔ̄cī ā ú kpó ŋmá ajɛ kú uwā

²⁵ Amáŋ é lɛyítáajɛ lɛ Óndú, nōo wɛ Ɔwɔicō kú ádáádā uwā ŋ́. É gbɔɔ́ ō pɛcí bɛ̄ɛka aéwɔhá nɛ̄ Óndú, nōo wɛ Ɔwɔicō kú uwā nū bɛ̄cɛ ŋmá ipú ajɛ ā hīla uwá ā.

²⁶ Anɔ́ɔ Ɔwɔicō cɛ̄ lɛ Upúlu, ɔcɛ́ kú Asírīya gaá mīyɛ ɔlɛ́ uwā, kwú uwá í kpó wu, klla kwú ipɔ́ɔma kú Urúbɛ̄n, Ugádi mɛ́mla ipɔ́ɔma kú ɛnɔ̄ɔ̄cī kú Umanásɛ ā í kpó ŋmá ipú ajɛ kú uwā gaá lā Uhála, Uhábɔ, Uhára mɛ́mla okónu ísu kú Ugósan piyóó ā.