1 ÚKLƆ́ KÚ AƆ́CƐ́ 4 - Ubáyíbu kú Idɔma

Ipɔ́ɔma kú Ujúda

¹ Ayí kú Ujúda wɛ Upéresi, Uhɛ́srɔn, Ukámi, Uhɔ́ɔ mɛ́mla Ussóbalu.

² Ussóbālu wɛ ádā kú Uríya nōo wɛ ádā kú Ujáhāti nōo ma Ahúmāyi mɛ́mla Uláhādi á. Aɛ́nyā wɛ aádáádā kú ācɛ nēe lā Usóra ā.

³ Étam ma Ujɛ́siríili, Íssma, Ídibāssi mɛ́mla ɔyínɛ́ uwā nɔ̄nyā Uháselelipóni á.

⁴ Upɛ́nūwɛlu ma Ugídɔ nōo ma Ésa, Ádā kú Uhússa á. Uhɔ́ɔ nōo wɛ ɔ́kplá kú Ɛ́frāti ā wɛ ádā kú Ubɛ́tilɛhɛ̄m á.

⁵ Ásshu, ádā kú Utékōwa ā lɛ anyā ɛpa, Uhɛ́la mɛ́mla Unaára.

⁶ Unaára ma Ahússam, Uhéfa, Utémɛ́ni, mɛ́mla Uháahassatári lɛ ɔ́ á.

⁷ Uhɛ́la ā ma ayínɔ̄nyīlɔ ɛta. É wɛ, Uséreti, Íssha mɛ́mla Étīnan.

⁸ Ukósi ma Ánūbu mɛ́mla Usobɛ́ba á. Anú wɛ ádáádā kú aípɔ́ɔma nēe ŋmá Aháhɛlu, ɔyí kú Uhárum ā á.

⁹ Ujábɛsi wɛ ɔ̄cɛ ojīlīma nɛ̄hi ipú ayínɛ́ nū á. Ɛ́nɛ́ nū hī ɔ̄ ka Ujábɛsi, ohígbū koó kahíníī, “N ma ɔ́ ipú ɔnɔ nɛ̄hi.”

¹⁰ Amáŋ Ujábɛsi le ɔkɔ gbā lɛ Óndú, Ɔwɔicō kú Ísrɛ̄lu ka ɔ́ɔ lɛ ɔhā hɛ́ ce anúɔ, ka ɔ́ɔ klla lɛ ajɛ nɛ̄hi je lɛ anúɔ dúú. Ó klla da ɔ́ ka ɔ́ɔ yɔ̄ mɛ́mla anúɔ, cɛ́ɛ́ ka ɔ́ɔ lɛ anúɔ gbō ŋmá ɔdōbɔ̄bí dóódu nōo géē cɛ̄ lɛ anúɔ í jé ɔnɔ. Anɔ́ɔ Óndú ā lɛ ɔdā nōó gbɔ̄ɔkɔ nū ā yá lɛ ɔ́ á.

Iyē kú ayí kú ipɔ́ɔma ohile ā

¹¹ Ukélɛ̄bu, ɔyínɛ́ kú Ussúha, ma Uméhɛ ōfōōfūnū. Uméhɛ wɛ ádā kú Ɛ́sstɔn,

¹² nōo ma Ubɛtráfa, Upásɛ mɛ́mla Utehína á. Utehína wɛ ádā kú ācɛ kú igelī kú Unahāssi á. Uwá wɛ ipɔ́ɔma nōo lā igelī kú Uréka á.

¹³ Ukénasi ma ayí ɛpa, Otínīyɛ̄lu mɛ́mla Useráya. Otínīyɛ̄lu kē ma ayí ɛpa nēe bá ā: Uhátāti mɛ́mla Umeyonótāyi.

¹⁴ Umeyonótāyi wɛ ádā kú Ɔ́fra ā. Usérāya ma Ujówābu nōo wɛ ádā kú ācoyúklábɔ̄ kú ɔpɛ́, ɛga nɛ̄ odúúdú ācoyúklábɔ̄ ā lā ā á.

¹⁵ Ukálɛ̄bu, ɔyí kú Ujɛ́fūnɛ ā ma ayí ɛtá nēe bá ā: Íru, Ɛlā mɛ́mla Unáam. Ɛlā wɛ ádā kú Ukénāsi ā.

¹⁶ Ujɛhalɛ́lɛlu ma ayí ɛnɛ nēe bá ā: Usífu, Usífa, Utírīya mɛ́mla Asárɛ̄lu.

¹⁷ Ɛ́sra ma ayí ɛnɛ nēe bá ā, Ujɛ́ta, Umérɛ̄di, Éfa mɛ́mla Ujálɔn. Umérɛ̄di lɛ Ubítīya, ɔyínɔ̄nyā kú Uféro, ɔcɛ́ kú Íjīpiti ā lɛ, anɔ́ɔ ó le ɔyínɔ̄nyā éyi nēé hī ka Umírīyam ā ma. Ó klla le ayínɔ̄nyīlɔ ɛpa nēé hī ka Ussammāyi mɛ́mla Íssba ma. Íssba wɛ ɔ̄cɛ nōo lɛ igelī nɛ̄ŋcɛ́ nēé hī ka Éstēmowa ā kwaajɛ á.

¹⁸ Umérɛ̄di klla lɛ ɔnyā ɔhá lɛ ŋmá ipɔ́ɔma kú Ujúda. Ó ma ayí ɛtá nēe bá ā lɛ ɔ́: Ujérɛ̄di nōo wɛ ádā kú Ugɛ́dɔ ā, Uhɛ́ba nōo wɛ ádā kú ācɛ Usóko ā mɛ́mla Ujɛkutíyɛlu, nōo wɛ ádā kú Usánōwa ā.

¹⁹ Uhódiya lɛ ɔyínɛ́ nɔ̄nyā kú Unáham lɛ. Éyi kú ɔyínɔ̄nyīlɔ kú nū ma Ukɛyíla nōo ŋmá Ugám á. Ɔyínɔ̄nyīlɔ kú nū ɔhá ā wɛ ádā kú Éstɛmōwa nōo ŋmá ipɔ́ɔma kú Umáakati ā.

²⁰ Ussímɔn ma ayí ɛnɛ nēe bá ā: Ámnɔn, Urína, Ubenhánan mɛ́mla Utílɔn. Íssi ma ayí ɛpa nēe bá: Usóhɛ̄ti mɛ́mla Ubɛnsóhɛ̄ti.

Ayí kú Ussɛlá

²¹ Ussɛlá wɛ éyi kú ayí kú Ujúda. Ayí nu wɛ Éri nōo le igelī nɛ̄ŋcɛ́ kú Uléka kwaajɛ ā. Uláada nōo le igelī kú Umáréssa nɛ̄ ipɔ́ɔma kú ācɛ o tá īlī nēé hī ka ulínin ā kwaajɛ á. É lā Ubɛti Ássbēya.

²² Ujókím, nōo wɛ ádā kú ācɛ nēe lā Ukóséba mɛ́mla Ujówāsi mɛ́mla Usárafu nōo lɛ ɔnyā ŋmá Umówābu, nōo gaá lā Ubɛ́tlɛhɛ̄m ā.

²³ Uwá wɛ ācɛ o ma ɛtɛ́ nēe lā igelī nɛ̄ŋcɛ́ kú Unetayím mɛ́mla Ugɛdɛ́ra á. Odúúdú uwā gē yúklɔ́ lɛ ɔcɛ́.

Ayí kú Usímīyɔn

²⁴ Ayí kú Usímīyɔn wɛ Unémūwɛlu, Ujamín, Ujárību, Uséra mɛ́mla Ussɔ́wulu.

²⁵ Ussɔ́wulu ma Ussálum, nōo ma Umíssma ā á.

²⁶ Umíssma ma Uhámūwɛlu, Usáku, mɛ́mla Ussímēyi á.

²⁷ Ussímēyi ma ayínɔ̄nyīlɔ igwɛ́ɛhīlī mɛ́mla ayínɔ̄nyā ɛhīlī, amáŋ ayínɛ́ nū ɔhá ā í ma ayí lɛwa ɛ́ɛ́ nɛ̄ ípɔ́ɔmā kú uwā gē nyīla lɛwa bɛ̄ɛka ákú ācɛ kú Ujúda ā ŋ́.

²⁸ Jāā kwu eko nɛ̄ Udéfīdi wɛ ɔcɛ́ ā, ayí kú Usímīyɔn lā ipú aígelī nɛ̄ŋcɛ́ nēe bá ā: Ubiyɛssɛ́ba, Umóláda mɛ́mla Uhásarssúwālu,

²⁹ Ubílha, Ɛ́sɛm, Utólādi,

³⁰ Ubɛtúwɛlu, Uhɔ́ma, Usíklāgi,

³¹ Ubɛ́t-mákābɔtu, Uhasásúsim, Ubɛtibíri mɛ́mla Ussaárayim.

³² É klla lā ɛga ɛhɔ̄ ɔhá kpɔ́: Étam, Áyin, Urímɔn, Utócɛn mɛ́mla Ássan.

³³ É klla lā ipú aípɔ́lɛ́ nēe yɛ jīla uwá tá ā, jāā ga ɔtāhɛ̄ kú ɛháajɛ mɛ́mla ɛnɔ̄ɔ̄nɛ̄ kú Ubáalāti ā. Ɛnyā wɛ ɔdā nēé tá tāajɛ ohígbū ipɔ́ɔ́nū kú uwā mɛ́mla ɛga nēé lā ā á. Aɛ́nyā wɛ ɛga nēé lā mɛ́mla ɛma kú ádáádā uwā nēé tá tāajɛ ā.

³⁴ Ācɛ nēe wɛ aótrɛ̄yí kú ipɔ́ɔma kú uwā ā bá yɔ̄ á, Umesóbābu, Ujámlɛ̄ki, Ujóssa, ɔyí kú Amásīya,

³⁵ Ujówɛ̄lu, Ujéhu, (ɔyí kú Ujossíbīya, ɔyí kú ɔyí kú Useráya nōo wɛ ɔyí kú Asíyɛlu ā.)

³⁶ Ɛliyonáyi, Ujaákɔ̄ba, Ujessoháya, Asáya, Adiyélu, Ujésīmiyelu mɛ́mla Ubenáya.

³⁷ Usísa (ɔyí kú Ussífi, ɔyí kú ɔyí kú Álɔn nōo wɛ ádā kú Ujɛdáya mɛ́mla Ussímri mɛ́mla Ussemáya á.)

³⁸ Ācɛ ɛ̄nɛ̄ é hīyē nēe bá ā wɛ ayí kú aótrɛ̄yí kú ipɔ́ɔma kú ádáádā uwā, nēe gbagbénú nɛ̄hi.

³⁹ É le nyīla klá ɛnɔ̄ɔ̄nɛ̄, ɛga nɛ̄ aálá kú uwā géē má ácí lé mɛ́mla ɛnɔ̄ɔ̄cī kú ɔpɛ́ kú ɛga nēe kwú lɛ iyī uwā ā.

⁴⁰ É má ajɛ olɔhi lɛ aálá kú uwā abɔ́ɔ nɛ̄hi nēé le nyīla klá ajɛ abɔ́ɔ nɛ̄hi. Ācɛ kú Uhám lā abɔ́ɔ gbɔbū lɛ uwá á.

⁴¹ Eko kú Uhɛsɛkíya, ɔcɛ́ kú Ujúda ā, ācɛ kú Uhám le tá Ugɛ́ra gaá lɛ áklɔ̄kpɛ kú ācɛ abɔ́ɔ nēé gwó kwu ajɛ ā kpó catāajɛ. É lɛ uwá kpó nū ŋmá abɔ́ɔ, klla má lā abɔ́ɔ piyóó ohígbū ka ácí yɔ̄ abɔ́ɔ nɛ̄hi nɛ̄ aálá kú uwā géē lé.

⁴² Ācɛ úlā cofɛhɔ̄ (500) kú ipɔ́ɔma kú Usímīyɔn, ɔhá gaá lā ɛnɔ̄ɔ̄cī kú Ɛ́dɔm. Ayí nɛ̄ Íssi ma ā bá yɔ̄ á: Upélātiya, Uneyaríya mɛ́mla Uréfāya mɛ́mla Ussíyɛ̄lu ā kpó uwá trɛ̄yí nyɔ̄ á.

⁴³ É le ācɛ kú Ámālɛ̄ki nēe hile bá abɔ́ɔ ɛ́ɛ́ nēé ga abɔ́ɔ ā kpó ŋmó ŋmá ipú ajɛ ɔ́ɔmā, anɔ́ɔ é má lā abɔ́ɔ jāā kwu eko nēé tá ɔkpá nyā ā.