1 ÚKLƆ́ KÚ AƆ́CƐ́ 29 - Ubáyíbu kú Idɔma

Ɛhi oōbī le gwó Agblīihɔ-nɛ̄hi ā

¹ Anɔ́ɔ Udéfīdi, ɔcɛ́ ā, le ka tɛ́ɛcɛ lɛ odúúdú ācɛ kú Ísrɛ̄lu kahíníī, “Ɔyí um, Usólōmɔn wɛ ɔcɛ́ nɛ Ɔwɔicō fu á, amáŋ ó wɛ ɔyípɛ̄ klla lɛ ohílīpú ɔyípɛ̄. Úklɔ́ nɛ̄ lɛ̄ ō yá ā wɛ ɛnɛ̄hi, ohígbū ka ɛ̄nyā í wɛ ɔlɛ́ ō lā kú ɔ̄cɛ ŋ́, amáŋ Agblīihɔ-nɛ̄hi kú Óndú ā, nōo wɛ Ɔwɔicō kú alɔ ā.

² N le yá lɛ iyó mɛ́mla ɔdā ō bī gwó Agblīihɔ-nɛ̄hi ā túbá ɛɛ́. Kwu oje ɔdɔ (ugóolu), oje nɛ̄hɛ́, oje, ɔcí, ɛcɔ̄, ɛcɔ̄ ɔwɔ.

³ Blá aɔ́ɔmā, n lɛ oje nɛ̄hɛ́ mɛ́mla oje ɔdɔ kú ami abɔ̄yī um kpó lɛ ɔ́, kóō le gwó Agblīihɔ-nɛ̄hi kú Óndú ā. N yá lɛ ā ohígbū ihɔtū nɛ̄ n lɛ lɛ Óndú ā.

⁴ N klla lɛ oje ɔdɔ (ugóolu) ɛ́nɛ́nɛ̄, mɛ́mla oje nɛ̄hɛ́ ɛ́nɛ́nɛ̄ nɛ̄ ogbɛnú kú uwá wɛ ukílōgram úla ɛhīlī (3,000) nɛ̄ a géē bī le hijā tū eyīyɛ̄ɛcɛ kú Agblīihɔ-nɛ̄hi ā mɛ́mla eyīpú nū.

⁵ Ɔ̄nyɛ ɔhá kē yɔ̄ amānyā nōo géē je ɛhi kú Agblīihɔ-nɛ̄hi ō gwó kú Óndú ā kpɔ́?”

⁶ Anɔ́ɔ aótrɛ̄yí kú aípɔ́ɔma, aótrɛ̄yí kú aícɔ́ɔja, aígabɔ kú ɔlɔ́cɛ́ ka aá ɔ́ɔ klla géē je ɛhi ā ŋmá ɔtū kú uwā tū ɔ̄ɔ kpɔ́.

⁷ É je ɛhi nyā tū ɔ kpɔ́, ohígbū ō gwó kú Agblīihɔ-nɛ̄hi kú Óndú ā. Igbō oje ɔdɔ (ugóolu) úlā igwɛ́ɛpa ce igbō ofigwó (5,000) ce. Igbō oje nɛ̄hɛ́ úlā ofucɛ̄hɔ̄ (10,000). Igbō oje udɔ úlā ofɛpa cɛ̄hɔ̄ (18,000) mɛ́mla oje ɔlamu úlā ofigwɛ́ɛpa cigwó (100,000).

⁸ Ācɛ nēe lɛ ɛcɔ̄ ōgbɔɔ́lá ā le kpó wā í kpó tū ɛga ō kpó agbénú kú oōgwó kú Agblīihɔ-nɛ̄hi tū ā, ipú abɔ̄ kú Ujɛ́hīyɛlu, nōo ŋmá ipɔ́ɔma kú Ulífāyi, ŋmá ipɔ́ɔ́nū kú Ugɛ́ssɔn, nōo gē leyīkwu ɔ́ á.

⁹ Ācɛ ā je ŋmá ɔtū ékpónú lɛ Óndú ā, ɔtū kē he uwá nɛ̄hi ɛ́gɛ́nɛ̄ é je lɛ Óndú ā nɛ̄hi lɛ ā.

Udéfīdi cɛ̄tra Ɔwɔicō

¹⁰ Iyɔ̄bū odúúdú ojīla abɔ́ɔ ā, Udéfīdi cɛ̄tra Ɔwɔicō kahíníī, “Óndú ā, awɔ nōo wɛ Ɔwɔicō kú aádáádā alɔ, Ujékɔ̄pu ā, alɔ géē yɔ̄ ī cɛ̄tra awɔ piyóó.

¹¹ A jáglīmā, a klla lɔfú nɛ̄ɛ̄nɛ̄hi, a lóofu klla tū ɛgahi nɛ̄hi, a klla lɛ ojīlīmā kú ɔcɛ́. Odúúdú ɔdā nēe bá ɛcɛ mɛ́mla ɔkpáncō ā wɛ ákú uwɔ. Awɔ wɛ ɔcɛ́ kú odúúdú ɛcɛ á. Awɔ kē fíyɛ́ dúú ipú ɛcɛ mɛ́mla ɔkpáncō á.

¹² Awɔ gē je agbénú mɛ́mla ojīlīmā dóódu lɛ ɔ̄cɛ á. Awɔ kē lɛ íkwu ō gbō ɔdā dóódu á. Awɔ kē ī je ācɛ pīya ācɛ nɛ̄hi, nēe lɛ ágbénú, lɔfú, klla lóofu á.

¹³ Ɔwɔicō kú alɔ, alɔ gē tá uwɔ ahínyá, alɔ klla ī cɛ̄tra iyē ōgbɔ̄ɔlá kú uwɔ.

¹⁴ Náaná ā, ami mɛ́mla ācɛ ɔlɛ́ um í je ɔdā dúúmā ga uwɔ gla ŋ́, ohígbū ka ɔdā dóódu nɛ̄ alɔ wɛ klla lɛ ā wɛ ɛhi ŋmá ɛgiyí uwɔ nɛ. Ɔdā nōo wɛ ákú uwɔ ā nɛ̄ alɔ je ga awɔ á.

¹⁵ Óndú, a jé ka alɔ gē bū ipú oyēeyī bɛ̄ɛka aúgbɔga nōo wā í yɛ ā, bɛ́gɛ́nɛ̄ ádáádā alɔ lɛ ā. Ɛ̄cī kú oyēeyī kú alɔ lɛbɛ̄ɛka ojiji nōó gē yɔ̄ gbojī ŋ́ mā nɛ. Alɔ í kwú ānānā.

¹⁶ Óndú ā, awɔ nōo wɛ Ɔwɔicō kú alɔ ā, alɔ kpó odúúdú agbénú nyā wā kéē bī le gwó Agblīihɔ-nɛ̄hi kú uwɔ. Cɛ́ɛ́ ka iyē kú uwɔ kóō lɛ ojīlíma lɛ. Amáŋ awɔ je odúúdú nū lɛ alɔ á. Awɔ lɛ á.

¹⁷ N jé ka a jé ɔtū kú ɔ̄cɛ dóódu, ɔtū kē í he uwɔ mɛ́mla ɔ̄cɛ nōo wɛ ɔ̄cɛ ɔkwɔ̄ɔ̄kwɛ̄yí. N kpó odúúdú ɔdā nēe bá nyā gé uwɔ ŋmá ɔtū ékpónú. N má ɛ́gɛ́nɛ̄ ɔtū he ācɛ ɔlɛ́ uwɔ nēe jīla bá ā abɔ̄ uwá bá í bī ɛhi nyā gé lɛ uwɔ ā.

¹⁸ Óndú ā, awɔ nōo wɛ Ɔwɔicō kú aádáádā alɔ, Ébrahām, Áyísīki mɛ́mla Ujékɔ̄pu ā, lɛ ɛdɔ ɔtū nyā je lɛ alɔ ká ālɔ̄ je ga awɔ, ká ālɔ̄ klla háyi kpaakpa mɛ́mla awɔ piyóó. Cɛ́ɛ́ ká ācɛ ɔlɛ́ uwɔ kéē yɔ̄ ī gbā uwɔ ɛ̄gbā kpaakpa eko dóódu.

¹⁹ Lɛ ɔfú tū Usólōmɔn, ɔyí um iyē, nōó géē yɔ̄ í lɛyítáajɛ lɛ íne mɛ́mla ɔ́da, mɛ́mla ukɔ́ kú uwɔ mla ɔtū ékpónú eko dóódu. Cɛ́ɛ́ kóō lɛ Agblīihɔ-nɛ̄hi kú uwɔ, nɛ̄ n lɛ iyó kú nū tútū ɛɛ́ mā gwó.”

²⁰ Anɔ́ɔ Udéfīdi je ɔ́da lɛ ācɛ ā kahíníī, “Áá cɛ̄tra Óndú ā, nōo wɛ Ɔwɔicō kú aá ā.” Anɔ́ɔ odúúdú ójīla a cɛ̄tra Óndú ā, nōo wɛ Ɔwɔicō kú ádáádā uwā ā á. Anɔ́ɔ odúúdú uwā túkpɛɛ́ klla je ojīlīmā lɛ Óndú ā, nōo wɛ Ɔwɔicō kú uwā mɛ́mla Udéfīdi, nōo wɛ ɔcɛ́ kú uwā ā á.

Usólōmɔn má cɔcɛ́

²¹ Oŋmɔ́ɔ̄cī nū, ācɛ Ísrɛ̄lu ŋmó aɔ́dāajɛ le gwɛ́ɛya lɛ Óndú ā. Aɛ́bɛ́ nēé kpó gwɛ́ɛya ō yɔlá dúúdú le Óndú ā wɛ aɛ́na úlā ɛpa cofigwó (1,000), aómlede úlā ɛpa cofigwó (1,000), aálá úlā ɛpa cofigwó (1,000). É kwú odúúdú uwā í kpó gwɛ́ɛya mɛ́mla ɛyá kú ejé nēe ī bla uwā iyē ā. É ŋmó aɛ́bɛ́ lɛ odúúdú ācɛ Ísrɛ̄lu kéē lé dúú.

²² Ɛ̄cī ɔ́ɔmā, ɔtū he uwá nɛ̄hi, anɔ́ɔ é lé klla gwá iyɔ̄bū Óndú ā á. É klla kwú Usólōmɔn ú cɔcɛ́ igbɔɔ́mpa kpɔ́, anɔ́ɔ Usádɔ̄ku, ɔ̄cogwɛ́ɛya ā lɛ anɔ̄ tū ɔ̄ ɛyí á.

²³ Anɔ́ɔ Usólōmɔn lɛ ɔcɛ́ lé kwɛyí ádā nū gaá cīce akpa kú ɔcɛ́ kú Ísrɛ̄lu nɛ̄ Óndú ā le kwajɛ ā á. Usólōmɔn wɛ ɔcɛ́ abɔ̄ dóódu, kē yɔ̄ ī yá lɔhi. Odúúdú ācɛ kú Ísrɛ̄lu ī lɛyítáajɛ lɛ ɔ́.

²⁴ Odúúdú aótrɛ̄yí, aígabɔ̄, aícɔ́ɔja mɛ́mla odúúdú ayí kú Udéfīdi ohile ā, cokónu ka aá ɔ́ɔ géē lɛyítáajɛ lɛ Usólōmɔn.

²⁵ Anɔ́ɔ Óndú ā le ojīlīmā nɛ̄hi je le Usólómɔn, nōo cɛ̄ lɛ odúúdú ācɛ kú Ísrɛ̄lu kéē le hídáagó kú nū. Óndú ā klla cɛ̄ lɛ ɔ́ le lóofu nɛ̄ɛ̄nɛ̄hi mɛ́mla ɛgahi fíyɛ́ odúúdú aɔ́cɛ́ kú Ísrɛ̄lu.

Oŋmɛ́yí kú ɛlā kú Udéfīdi, ɔcɛ́ ā

²⁶ Udéfīdi, ɔyí kú Ujése gbō ācɛ kú Ísrɛ̄lu

²⁷ iháyí ofɛpa. Ó wɛ ɔcɛ́ Uhɛ́brɔn iháyí ahāapa, ó kē wɛ ɔcɛ́ kú odúúdú Ísrɛ̄lu Ujerúsālɛm iháyí ofu cigwɛ́ɛtá.

²⁸ Ó kwú eko nōó kwú hīla ókplící dúúdú ā. Ó lɛ agbénú mɛ́mla ojīlīmā. Anɔ́ɔ ɔyí nū Usólōmɔn lɛ ɔcɛ́ lé kwɛyí nū á.

²⁹ É le odúúdú ɔ̄kā kú Udéfīdi, ɔcɛ́ ā tá tāajɛ ipú ɔkpá kú ɔ̄kā kú ācomɛ́ɛbɛ ɛtá nyā: Usámūwɛ̄lu, Unátan mɛ́mla Ugádi.

³⁰ É tá lɛyíkwu ɛ́gɛ́nɛ̄ ō bī ɔfú le gbo ācɛ kú Ísrɛ̄lu lɛ ā ā, mɛ́mla ɔdā dóódu nōo yá anú mɛ́mla ɔdā dúúdú nōo yá ācɛ Ísrɛ̄lu mɛ́mla aéwɔhá nēe lā jīla uwá tá ā.