1 ÚKLƆ́ KÚ AƆ́CƐ́ 28 - Ubáyíbu kú Idɔma

Ɔ́da nɛ̄ Udéfīdi je táajɛ ohígbū Agblīihɔ-nɛ̄hi o gwó ā

¹ Anɔ́ɔ Udéfīdi le da odúúdú aótrɛ̄yí kú Ísrɛ̄lu ka ɛ́ɛ le jīla anúɔ eyī Ujerúsālɛm. Anɔ́ɔ odúúdú aótrɛ̄yí kú aípɔ́ɔma, aótrɛ̄yí kú aígwu kú aícɔ́ɔja nēe ī cɛ̄ ɔcɛ́ ɛhɔ̄ ā, ācɛ nēe ī leyīkwu agbénū mɛ́mla aɔ́dāajɛ kú ɔlɛ́ ɔcɛ́ mɛ́mla ayí kú nū ā mɛ́mla aígabɔ̄ kú ɔlɛ́ ɔcɛ́ ā gaá jīla anú eyī Ujerúsālɛm.

² Anɔ́ɔ Udéfīdi cāŋjɛ ɔtāhɛ̄ uwā da uwá kahíníī, “Ācɛ ɔlɛ́ um, aá jāhɔ̄ gā um. N tíne ō lɛ ɔlɛ́ gwó nōo Ikpati kú Ɛka kú Óndú ā gē yɔ̄ piyóó, nōo gē wɛ ɛga ōlɛ ikpó ce kú Óndú ā, nōo wɛ Ɔwɔicō kú Ísrɛ̄lu ā. N le tútú ká n̄ lɛ Agblīihɔ-nɛ̄hi gwó lɛ Óndú ā, nōo gē géē wɛ ɛga o je ojīlīma lɛ ɔ́.

³ Amáŋ ó lɛ um anú ci ō gwó, ohígbū ka n wɛ ícɔ́ɔ́ja, n kē lɛ ācɛ alɛwa ŋmó ɛɛ́.

⁴ Óndú ā, nōo wɛ Ɔwɔicō kú Ísrɛ̄lu ɔ́ɔmā, lɛ ami mɛ́mla ayí um fu ká ālɔ̄ lé ɔcɛ́ kú Ísrɛ̄lu piyóó. Ó kwú ipɔ́ɔma kú Ujúda ú kú ɔcɛ́ kóō yɔ̄ ī ŋmá ipú uwā piyóó. Ó klla kwú ipɔ́ɔ́nū kú um, ka abɔ́ɔ, nɛ̄ ɔcɛ́ ɔ́ɔ géē ŋmá á. Oŋmípú odúúdú ācɛ kú ipɔ́ɔ́nū kú um ā, ó kwú um ú ka amíyɔ̄ géē lé ɔcɛ́ kú odúúdú ācɛ kú Ísrɛ̄lu á.

⁵ Ó je ayí alɛwa gā um, amáŋ oŋmá ipú ayí nōó je ga um ā, ó kwú Usólōmɔn, ɔyí um ú ka anú ɔ́ɔ géē lé ɔcɛ́ kwɛyí um klla í gbō Ísrɛ̄lu, nōo wɛ ajɔ̄ɔ̄cɛ́ kú Óndú ā á.

⁶ Anɔ́ɔ Óndú ā da um kahíníī, ‘Ɔyí uwɔ Usólōmɔn géē wɛ ɔ̄cɛ nōo géē gwó Agblīihɔ-nɛ̄hi kú um á. N kwú ɔ̄ ú kóō wɛ ɔyí um, n kē í wɛ ádā nū.

⁷ Ɔ́dāŋ koó yɔ̄ gē lɛyítáajɛ gā um, ɛ́gɛ́nɛ̄ ó le táajɛ abālɔbányā, nōó klla gē yá ɔdā dóódu nɛ̄ n ka ipú íne kú um ā, n géē yá kóō cɔcɛ́ gbojī, ayááyí nū kē í lé ɔcɛ́ igbīhi nū dúú.’

⁸ Ohígbū ɔ́ɔmā, ācɛ ɔlɛ́ um, iyɔ̄bū kú Ɔwɔicō kú alɔ ɔ́ɔmā mɛ́mla odúúdú ójíla kú ācɛ Ísrɛ̄lu, ācɛ kú Óndú ā, nɛ̄ alɔ bá yɔ̄ á. N gē da áa ka aá lɛyítáajɛ lɛ Óndú ā ipú ɔdā dóódu mɛ́mla íne mɛ́mla ɔ́da dóódu nōó géē je klla í ka lɛ aá ā. Cɛ́ɛ́ ka aá géē bá ī lā ipú ajɛ olɔhi nyā, nɛ̄ aá klla í bá í je ajɛ ā lɛ ayí aá ŋmá ayááyí éyi ga ayááyí ɔhá piyóó.”

Ukɔ́ kú Udéfīdi

⁹ Anɔ́ɔ Udéfīdi da Usólōmɔn kahíníī, “Ɔyí um, jé Ɔwɔicō nɛ̄ ádā uwɔ gē gbā ā, ká ā gbā ɔ ɛ̄gbā mla ɔtū ékpónú. Ó jé odúúdú ɛlá nɛ̄ a ī gbo ā mɛ́mla ɔdā nɛ̄ a tíne ō yá ā. Ɔ́dāŋ ka a le tá ɛgiyí nū, ó géē mīyɛ awɔ. Amáŋ ɔ́dāŋ ka a kwú pīyeyī ŋmá ɛgiyí nū, ó géē cīgbīhi kwu uwɔ piyóó.

¹⁰ Le jé ka Óndú ā, nōo wɛ Ɔwɔicō ā lɛ uwɔ fu ká ā lɛ Agblīihɔ-nɛ̄hi kú nū ā gwó. Lɛ Agblīihɔ-nɛ̄hi ā gwó, ká ā kē gwó ɔ̄ ŋmá ɔtū mɛ́mla ɔfú mɛ́mla íkwu kú uwɔ.

¹¹ Anɔ́ɔ Udéfīdi kwú odúúdú oōmiya kú ɛ́gɛ́nɛ̄ Agblīihɔ-nɛ̄hi ā gaá lɛ ā, kwu inu okpíyó tū ɔ̄ kú nū, mɛ́mla odúúdú ínu kú áklō kú nū ā, mɛ́mla ínu ɔhá dóódu kú nū, ɛga otīihɔ fíyɛ́ dúú ā, ɛga nɛ̄ Óndú ā gē je íne nɛ̄ ɔ̄cɛ bīya yá ɔ̄cɛ ɛhi ā í lɛ Usólōmɔ̄n á.

¹² Mɛ́mla odúúdú ojuju nōó lɛ ipú ɔtū kú nū, ohígbū eyīyɛ̄ɛcɛ mɛ́mla eyīpú kú uwá ā, mɛ́mla inu okpíyó kú Agblīihɔ-nɛ̄hi tū ā, mɛ́mla ɛga okpíyó kú ɛhi kú Óndú ā dóódu tū ā, ó le kpó mafú lɛ Usólōmɔn.

¹³ Udéfīdi klla lɛ mafú lɛ ɔ́, ɛ́gɛ́nɛ̄ ó géē je úklɔ́ lɛ ācogwɛ́ɛya, ayí kú Ulífāyi, mɛ́mla ācoyúklɔ́ ipú Agblīihɔ-nɛ̄hi ā, mɛ́mla ācɛ o bī iyó kú Agblīihɔ-nɛ̄hi ā.

¹⁴ Ó klla le da ɔ́ dúú, ɛdɔ kú oje ɔdɔ mɛ́mla oje nɛ̄hɛ̄, ugóolu mɛ́mla udɔ, nōó géē bī le yá iyó kú Agblīihɔ-nɛ̄hi mɛ́mla iyó kú ɛyí ede ā.

¹⁵ Kwu ɔdā ōlɛ agege ce ɔ́,

¹⁶ Utéblu kú oje nɛ̄hɛ́ mɛ́mla Utéblu kú oje nɛ̄hɛ́ dóódu nēé géē kpó igbō kú ɛgba kú Óndú ā ce ɔ́ ā.

¹⁷ Ó klla le da ɔ́ dúú ɛdɔ oje ɔdɔ nōó géē bī le yá aójotíhi nōo lɛ abɔ̄ ɛtá ā, aógo ocɛyí, aɔ́já mɛ́mla oje ɔdɔ ugóolu mɛ́mla oje nɛ̄hɛ́ nōó géē bī le yá aócíbú ā.

¹⁸ Mɛ́mla oje ɔdɔ nōó géē bī le yá ede nēé géē gwɛ́ɛya ō yɔlá dúúdú ipú nū ā, mɛ́mla ɛ̄nɛ̄ ó géē bī le yá úgbɔ́ɔnya nōo géē bī aúcɛ́rōbim kú ɛyí kú Ikpati kú Ɛka kú Óndú ā.

¹⁹ Anɔ́ɔ Udéfīdi klla da ɔ́ kahíníī, “Óndú ma odúúdú ɔdā nēe bá nyā fú gā um lɛyíkwu ɛ́gɛ́nɛ̄ é géē gwó Agblīihɔ-nɛ̄hi ā, anɔ́ɔ n tá ɔ̄ táajɛ gā uwɔ á.

²⁰ Anɔ́ɔ Udéfīdi da Usólōmɔn kahíníī, “Ā yúúfi ɛɛ́ nɛ̄ ɔtū gē gbenyi gā awɔ ŋ́. Gbo úklɔ́ ā, ā cɛ̄ lɛ ɔdā dúúmā kwú úklɔ́ Agblīihɔ-nɛ̄hi ōgwó ā tū ŋ́. Ɔdā dúúmā kóō ci uwɔ anú ŋ́. Óndú ā, Ɔwɔicō nɛ̄ n gē gbā ā, géē yɔ̄ pī uwɔ. Ó gáā pīyigbīhi kwu uwɔ ŋ́, ó géē yɔ̄ pī uwɔ jāā gbéeko nɛ̄ a lɛ úklɔ́ kú Agblīihɔ-nɛ̄hi ō gwó kú nū nyā yá mɛ.

²¹ Ācogwɛ́ɛya mɛ́mla ayí kú Ulífāyi lɛ úklɔ́ lɛ o yá ipú Agblīihɔ-nɛ̄hi ā ɛɛ́. Ācɛ ō yá ɛdɔ úklɔ́ dóódu kwu ācoyúklábɔ̄ ā bá í gbēyī mɛ́mla ɔtūcaca kéē tá uwɔ abɔ̄. Odúúdú ācɛ kú Ísrɛ̄lu mɛ́mla aótrɛ̄yí kú uwá ā kē bá ɛháajɛ ɔ́da kú uwɔ.”