Yakubo 1 - Etkwen New Testament

Fwa ebim

¹ Afketa chí ena vǝ a zǝn m, Yakubo, fí mo Ehwya ngge Yeso Kristi Etsodwe, ken a zǝn nye, be efi gwi chu fà mo ya a Yahuda ya e bushan kwa no gu a tswa zǝnchaje ángá. M bi nye fwa anga.

Chaebi ngge enggaton

² Be nwenjwa m ya, atan a nye ben be embwadi adi be efwa efki efki anga, nye e di be abu be mò vǝtsen,

³ adia nye yi jan embwadi mo chaebi mo nye, du nye, nye bon-ekǝ̀n anga.

⁴ Nye e gwa ekǝ̀n-ebonm hon ge e bwe mochi mbwe embombo evǝa nye e no edefǝfǝ ngge ebwekǝ̀nm. Nye nda a ni nye mò akan ra.

⁵ Ano ende akan a engga mo nye nda enggaton anga, ge e bgó Ehwya, ende e no egwa egwa mò ngge bu efkigwagwa, n fke ye efke anga ra, ga no ye.

⁶ Egwa egwa e bgó Ehwya mò anga, ge e nyishwa jan Ehwya a no ye. Ge e tsen ye tsuruku ra, adia ende e bgó ebgo n tsen tsuruku, no abu mbǝ e fǝ́ anga, a fyo kpo nó ken chagwa chagwa anga.

⁷ Yishwa nobǝ ena ge e ka ye jan ga ben mò akan a zǝn Etsodwe ra,

⁸ adia ge no ya tsuruku fà, ge ti tsuruku mbwe nyi ye a zǝn akan eno e ra a chu be mò ya a ge bwe anga ra.

Mobenben ngge ekan

⁹ Ende e ba Ehwya anga, n no ya ekan, ge e shánju adia a chafya mo Ehwya ga nobǝ echa.

¹⁰ Ba anona, ende e no ya mobenben ge e shánju a chu chuefum a ge no ngge nó ángá, adia mobenben mbwe a dgyen ye fon ra, abu be kpwimo a tswavǝ́n.

¹¹ Adia atan a nò gwa a je n nggazǝ àywá anga, ge fken, n du be vǝmo ngǝ́, kǝnggwa be kpwi mo be yi nggwa a sen, ba di be endà mo be efwe ra. Ba anona, ya mobenben a fǝ a tswa mò endam mbwe.

Embwadim mo be nobǝ

¹² Esese, a ḿ mo ende e chungǝ́ adi ekǝ̀n-ebonm a tswa mo be embwadi, adia atan a ge de vǝ ara a chu embwadi hon ángá, Ehwya a no ye mitere mbwe mo nya a ge senvǝ jan ga no binbin mo be ya e dgyan ye anga.

¹³ Ano be mbwadi ara ende akan, ge e jan ye jan, “Ehwya a ende e mbwadi m anga” ra. Adia be mbwa a di be Ehwya ge e bwe mò esera ra ngge a ge e chu ye mbwadi ye ende akan anga ra.

¹⁴ Embwadi ben nobǝ anga adi moedgyanfim e no a tsuruku mbwe ángá. Moedgyanfim ena a mò e du nobǝ bwe mò esera anga.

¹⁵ Moedgyanfim hon ena, ano ge fu ara tsuruku mo nobǝ, ge du ye bwe ebgen. Atan a be ebgen nga ara fukèn mbwe ángá, kǝnggwa ge vǝ fǝ bwa.

¹⁶ A nye be nwenjwa m ya, ya a m dgyan anga àywá, nye e cha nye dwa ende akan e ngga e de nye ra.

¹⁷ Egwa egwa mo be edwe esese ngge mò edefǝfǝ a nobǝ ben anga, vǝ a zǝn Ehwya Ate je nwene e mmò binbin mo be enggasansan a tswa be kpe, n chà bwa anga. Ge twafwe ye anga ra, n twanga chashin no ye je anga ra.

¹⁸ Gè dgyan a ge, ge e bwe je, je e no mbǝgya mbwe adi efka mo fwa ebi mbwe, evǝa je e no abu be ga ekwafya mo be mò binbin a gè mmò ángá.

Efom ngge ebwem

¹⁹ Be nwenjwa m ya a m dgyan anga, nye e yi e seshi fwa ena. Egwa egwa mo nye e sanshi adi fwa efom, nye e san nye adi fwa ejanm ngge nya ebgenm ra.

²⁰ Adia nya ebgenm mo nobǝ a du ye, ge bwe a ti ye be mò esese a Ehwya dgyan anga ra.

²¹ Enona, nye e twagwa e gu be mò ambǝgo ebwem, nye e fwa nye ngge mò ebwem ngge be mofǝ̀ ra. Nye e cha fwa mo Ehwya, a gè kpu tswa dwa a tsuruku mo nye ángá ngge chu engǝm a sen, adia ga no nye ega.

²² Nye e no e fo e kpwà nye fwa mo Ehwya hon tete ra, ge no kenm nye e bwe mò a be fwa hon jan anga, eno e ra nye ngga a de chu nye.

²³ Egwa egwa e buton fo be fwa hon anga n bwe ye mò a fwa hon jan anga ra, ge no abu ende e di fǝzǝn embǝgya mbwe anga adi modifǝzǝn,

²⁴ atan a ge di fwa ara fǝzǝn embǝgya mbwe, ge nya m̀ mbwe, dgyen ye fon ra, ge kaben ye abu ge no ángá ra.

²⁵ Tea egwa egwa e ká e se edon mo Ehwya nwene e tivǝ́ a ti be nobǝ adi ebgen mo be, n no ba se nó anga, n mngoda ye nó anga ra, ga ben esese adi binbin mo be mò a ge bwe anga.

²⁶ Ano egwa egwa e jan ge yi Ehwya n fupe yi ye kpevǝ mbwe ra, ge nggade anga chu ye. Efenm mo Ehwya mbwe hon bwe a jwa ye ye ra.

²⁷ Efen efenm nwone a Ate je Ehwya di no echanwenwen ngge ebi ángá, a nobǝ ge e bwe e jwa be nwepin tangge be gwafǝ́n ya e ngǝ ekan anga, ngge ge e fwa ye ngge mò ebwem ngge mò esera e no a tswa zǝnchaje ena ra gaten.