Titu 3 - Etkwen New Testament

We bwe mò e no esese ángá

¹ We no e kpwà adi ekabenm mo be nobǝ jan be e buton e fo be tì ngge be ya e no ngge emwentì ángá. Be e tse be, be e no e tsa evǝa be e bwe mogwa mogwa e no esese ángá.

² Be e jan be fwa esera a chu ende akan ra, ngge be e nda zǝno adgye enom ngge egwa egwa. Be e ngǝchu mo be a sen ngge be e di egǝ̀n egwa egwa.

³ Adia adi ekpengga è twafǝ̀ ángá, a je gaten, jè no be hwen, ngge be ya chu echam. Bè nggade ara je ngge jè no zǝno anga abu be fí mo be mò a be ekǝnjuju mo je dgyan anga, ngge binbin mo be etkwa efom. Jè no zǝno mo nobǝ enyim a tsuruku ngge engǝbgen. Be nobǝ efki è ze je anga, a je jè ze be anga gaten.

⁴ Tea atan a Ehwya, Etivǝ́ mo je è tú esese mbwe ngge edgyan mbwe ángá,

⁵ gè tivǝ́ je, fwa ye a chu be mò ebitete a jè bwe ara ángá ra, tea a chu fǝedwam mbwe a chu je. Gè tivǝ́ je adi efka mo enacham mo ebgen mo je ngge etwafwem mo je adi efka mo Engǝ́ mbwe.

⁶ Ehwya è no je Engǝ́ hon ena embo embo adi efka mo Yeso Kristi, Etivǝ́ mo je,

⁷ evǝa adi esese mbwe, ge e bwe je je e no be ya ebitete a chafya mbwe, ngge je nga ara be ya a defǝ́n mo nya e no a fwa efwam a je nyishwa no a chu mo nó ángá.

⁸ Mò hon ena a m̀ jan fwa a chu mo nó ángá, no ebi. Ngge m nda anga jan we chu e ngǝ́shi adi moetum ena evǝa binbin mo be ya e nyishwa no a chu Ehwya ángá, be e chu e ngǝ́shi adi be mò esese ebwem. Be moetum ena se no àywá n bwejwa egwa egwa anga.

⁹ Tea adi ḿ mbo, we kwaju ngge efyan hwen etwam a chu abu be ebǝ ata è tke ángá. We tkyá mbo etkya ngge be nobǝ a chu edon a Ehwya è ti no Mosa ángá ra. Adia be mò ena bwe a jwa mbo ra n no be mokukwa.

¹⁰ We twa ende e vǝ enggakwam bwa anga a engga mo be nobǝ ángá, echa kè fà, ngge ano ge se ge e fo o, we kwaju ngge ge.

¹¹ We yi jan yishwa nobǝ ena twagwa ara efwa ebi mo Ehwya n nyi tsuruku mbwe no a chu mofǝ̀ ebwem. A ge e chu ye, ge yi jan ebgen mbwe kpèn ara ye kǝ́n.

Fwa mo Bulu ekǝn-etkyen ngge fwa ebim mbwe

¹² M tson Atima eno e ra Tikiku, nyabwa a zǝn o. Atan a ge bwangga ara, we bwe mò a o bwe a ti evǝa we bwa e ben m a eten a Nikopoli adia m nyi ara a tsuruku mam jan ma no a zǝn, adi ekpengga mo viejwa.

¹³ Bwe egwa egwa mo mò a o bwe a ti evǝa we e bwe e jwa Zena, ende e yi edon no àywá ngge Apolo adi kèn mo be. We di jan be ben tén binbin mo be mò a be nda anga adi kèn hon ángá.

¹⁴ We di jan be yamuje ya e ba Ehwya anga, chungǝ́ no adi ekǝnkǝ́n mo mò esese ebwem evǝa be e ti e bwe binbin mo be mò a be nda anga myan myan. Be e no be zǝno kukwa ra.

¹⁵ Egwa egwa e no ngge me ana, bi o fwa anga. Bi m binbin mo be yamuje ya aduwa ya e no a Kiriti, be ya e dgyan je anga, fwa. Esese mo Ehwya e no a chu mo nye binbin.