Titu 2 - Etkwen New Testament

Bwe mò esese evǝ mo Fwa Esese

¹ Tea adi ḿ mbo, ge no kenm we tú mò e ken anga akan ngge moetum ebi.

² Tú be ndedon nwenfi be e fku e san be tsuruku ra, be e bwe mò a vǝ egǝ̀n a bwa be, ne fu chu mo be. Be e no ngge chaebi echakpokpo, be e dgyan be nobǝ ngge be e bon-ekǝ̀n.

³ Ba anona, tú be ndegwa nwenfi be e no zǝno adi efwa nwene a no Ehwya egǝ̀n ángá. Be e fwa be, be ya e janbgen be nobǝ anga ra, eno e ra be ya a tson engǝm fupe ara be ángá ra. Tea be e tú mò e no esese,

⁴ adi ebwem enò, be chà a tú be ezon-ndegwa jan be e dgyan be don be ngge mbǝgya mo be,

⁵ be e fu chu mo be, be e bwe be mò e no esera ra, be e fu seshi mbwe be, be ya e bwe be nobǝ esese ngge be e tse be don be anga evǝa ende akan jan a pin a didi ye fwa mo Ehwya a chu be ra.

⁶ Enò gaten, we jan e bon be ezon-ndedon ekǝ̀n, be e fu chu be.

⁷ A tswa mogwa mogwa, we tú be echi fukèn mo nó adi mò esese ebwem. Adi moetum mbo, we tú ebi ngge we kwa mbo junwen ra.

⁸ Jan fwa e no ebi, evǝa ende akan a jan a pin ye nó ra, evǝa ebgenju a fu be ya eze mbo adia ba ben be mò esera a be ti a jan a chu je ra.

⁹ We tú be fí be e tse be yagwamo mu mo be a tswa mogwa mogwa. Be e tkyan evǝa be e bwe be, be e fo etkwa. Be e twa be efyan ngge be yagwamo mu mo be ra.

¹⁰ Be e zǝ́ be be mò ra, tea be e bwe be mò a du be yagwamo mu mo be hon a chadwa ngge be a tswa egwa egwa mo efwa. Evǝa adi be egwa egwa mo efwa, ba du be moetum a chu Ehwya nwene e tivǝ́ je anga, ge e no mò a be nobǝ a maju anga a chu mo nó.

¹¹ Adia Ehwya è fi tú ara esese mbwe evǝ mo etivǝm mo be nobǝ binbin.

¹² Esese hon, tú je jan je e se e gwa zǝno enom a Ehwya dgyan ye ra ngge edgyanfim mo etkwa efom mo zǝnchaje. Ge tú je jan je e no zǝno chuefum, je e no zǝno e fwa ye ngge ebgen ra, zǝno enom e vǝ etkwa efom bwa Ehwya anga adi ekpengga ena.

¹³ Abu je no zǝno yishwa ena anga, je e nobà nòmo ju eshanm a je nyishwa no a chu mo nó ángá. Nò nwone a egǝ̀n mo Ehwya echa mo je ngge Etivǝ́ mo je hon, nwene e no Yeso Kristi ángá, a mbwi a bwa.

¹⁴ Ende hon è ti chu ye ti no evǝa ge e ti e vǝ́ je a bu binbin mo be mofǝ̀ ngge ge e na e cha je, je e nga be nobǝ mbwe. Ga bwe je ja nga be nobǝ mbwe ya e maju be e bwe mò e no esese ángá.

¹⁵ Ena a be mò a wa tú be ya a Kiriti. Janbon be ekǝ̀n ngge we tkyá be etkya a tswa binbin mo emwentì. We cha mbo dwa ende akan mo be e di e pin o ra.