Matiyu 1 - Etkwen New Testament

Hwyá a bè mbwa Yeso Kristi a tswa mo nó ángá

¹ Ena a fwa hon a bè bá nyino a chu efi a bè mbwa Yeso Kristi, nwen mo Dawuda ngge Dawuda, éè no nwen mo Ebrayi ángá.

² Ebrayi è mbwa Eshaku, Eshaku è mbwa Yakubu, Yakubu è mbwa Yahuda ngge be nwenjwa ye ya.

³ Yahuda è mbwa Peresa ngge Zera nwene a ayi be è no Tama ángá. Peresa è mbwa Hesuna, Hesuna è mbwa Rama.

⁴ Rama è mbwa Aminada, Aminada è mbwa Nashon, Nashon è mbwa Salmo.

⁵ Salmo è mbwa Boyaza nwene ayi ye è no Rahaba ángá. Boyaza è mbwa Obida nwene ayi ye è no Ruti ángá. Obida è mbwa Jesi,

⁶ Jesi è mbwa Dawuda nwene è bwa dwa Tì ángá. Ekǝnggwa, Dawuda è mbwa Sulemano nwene ayi ye è no Basheba, gwa Uriya a gè ti fǝ́ ángá.

⁷ Sulemano è mbwa Rehobowam. Rehobowam è mbwa Abija, Abija è mbwa Asa.

⁸ Asa è mbwa Jehoshafati, Jehoshafati è mbwa Yoram, Yoram è mbwa Uziya.

⁹ Uziya è mbwa Jotan, Jotan è mbwa Ahaza, Ahaza è mbwa Hezekaya.

¹⁰ Hezekaya è mbwa Menase, Menase è mbwa Aman, Aman è mbwa Josiya.

¹¹ Ekǝnggwa, Josiya è mbwa Jekoniya ngge be nwenjwa ye adi ekpengga a bè fu be ya a Yahuda fí ken no a tswa sǝnsen mo Babila ángá.

¹² Chashin mo zǝnofí mo be a Babila, Jekoniya è mbwa Shayatiye, Shayatiye è mbwa Zerubabe.

¹³ Zerubabe è mbwa Abiyudu, Abiyudu è mbwa Eliyakim, Eliyakim è mbwa Azo,

¹⁴ Azo è mbwa Zadoku, Zadoku è mbwa Akimu, Akimu è mbwa Eliyudu,

¹⁵ Eliyudu è mbwa Eliyaza, Eliyaza è mbwa Matan, Matan è mbwa Yakubu,

¹⁶ Yakubu è mbwa Esufu nwene è no don Meri ayi Yeso a be fǝ́ anga Kristi ángá.

¹⁷ Enona, tke a chu Ebrayi ti bwa a chu Dawuda, bè no be ekǝn gwi chu ndwe. Tke a chu Dawuda ti bwa a adi ekpengga a bè fu be fí ken no a Babila ángá, bè no be ekǝn gwi chu ndwe. Ngge tke adi zǝnofí hon ti bwangga a chu Kristi, bè no be ekǝn gwi chu ndwe.

Abu bè mbwa Yeso Kristi ángá

¹⁸ Ena a abu bè mbwa Yeso Kristi ángá. Chashin, a Esufu è tè ara fù mo Meri, ayi mo Yeso, evǝa ga no gwa ye ángá. A gè chà ti nó bwa ye a mbwe ye ra ángá, bè di Meri è no ngge jufà, a gè ben a zǝn echakpo mo Engǝ́ mo Ehwya ángá.

¹⁹ Adia Esufu, don ye è no ya ebi ngge nobǝ ebitete ángá, gè dgyan ye ge e no nó ebgenju a engga mo be nobǝ ra. Gè nyi ara a tsuruku mbwe jan ga du nó efǝ a tswa emtsǝtsǝ.

²⁰ Abu gè chà ka fwa ena anga, maleka mo Etsodwe è mbwibwa a zǝn ye adi dá, nè jan, “Esufu, nwen mo Dawuda, tsen mbo etsentsen a we ti gwa o Meri e bwa a mbwe o ra, adia nwen e no a dgyèn mbwe ángá, vǝ chá Engǝ́ mo Ehwya bwa.

²¹ Ga mbwa nwen ndedon, wa tso ye ti Yeso, adia ge ti a vǝ́ be ya mbwe ye a tswa be ebgen mo be.”

²² Binbin mo be mò ena è bwe ken tén abu Ehwya Etsodwe è jan chá kpevǝ mo efojan mbwe ekpe ekpe ángá.

²³ Gè jan, “Di, enwen-endà akan a no dgyèn na mbwa nwen ndedon, ba fǝ́ ye Emanowe.” (Engà mo Emanowe jan, “Ehwya no ngge je.”)

²⁴ Atan a Esufu è zǝbwa adi dan ángá, gè ti ekpengga nwofyan, nè ti Meri bwa a mbwe ye abu gwa ye, abu maleka mo Etsodwe è jan ye ángá.

²⁵ Tea Esufu è chà dwa ye ngge ge ra, kpwà tén atan a Meri è mbwa ara nwen ye ndedon hon ángá. Ekǝnggwa, Esufu è tso nwen hon ti, Yeso.