Marku 9 - Etkwen New Testament

¹ Yeso jan bishi be fwa jan, “M jan nye ebi, a engga mo nye, be ya ehwyà e ywano ana a fǝ be ra, kpwà a tén ano be di zǝnotì mo Ehwya bwa ara ngge echakpo mbwe.”

Ju etwafwem mo Yeso

² Tsǝ chwen a ngǝ chashin mo nó, Yeso è kpu Bitru, Yakubo ngge Yohana twa e ge, bè tonvǝ́ a hwì echacha akan nè vǝ́ no a zǝn e jujube. A zǝn hon, bè twafwe ye ju chafya mo be.

³ Mokàn mbwe è twafwe bwa etenten fon, nè mbgezǝ twafǝ̀ chu nwone, monamo akan a tswa zǝnchaje e nacha mò a tenten a kan enò ángá fwa ye ra.

⁴ Kǝnggwa, Eliya ngge Mosa è mbwibwa re, nè kwa ara fwa ejanm ngge Yeso.

⁵ Bitru è jan Yeso jan, “Etumo, ge se a je no ana. Je e tsa be afku ta, akan ḿ mbo, akan ḿ mo Mosa, akan ḿ mo Eliya.”

⁶ (Adia bè no a tswa etsentsen àywá, gè yi ye mò a gè jan ángá ra.)

⁷ Kǝnggwa edwe è mbwibwa gu re nè bwipe be, bè fo aken gwa a je a tswa edwe hon jan, “Ena a Nwen m, m dgyan ye àywá, nye buton fo ye.”

⁸ Kè akan, be etsonchi è di ngàhwya zǝn a bè no ángá, nè di be nobǝ efki efwe ra, è kpwà Yeso.

⁹ Abu bè nyashwa a sen mo hwì hon ángá, Yeso è twa be echa jan be e jan e didi be nobǝ mò a bè di ángá ra kpwà tén atan a be ti Nwen Nobǝ hon nyi ara etkyen a dì ángá.

¹⁰ Bè ti fwa hon nyi a tsuruku mo be, nè jan kpwà fwa a chu engà mo “etkyen enyim a dì” hon.

¹¹ Be ká ye eka jan, “Ano bwe a ge be etumo mo be edon jan ne Eliya kwafya a bwa sangǝ́ Kristi chà a bwa?”

¹² Yeso è janfwe be jan, “Eshwen Eliya kwafya a bwa a ge n bwese a gu be mò binbin.” A gè jan ara enò ángá, Yeso è ká be eka jan ne ano bwe a ge, ge no ebam jan, “Kenm Nwen Nobǝ hon a ngǝ ekan àywá, ba se ye.

¹³ Tea me e jan nye, Eliya è bwa ara, bè bwe gu ara ye mò a be dgyan ángá. Bè bwe ye mò hon ken ten abu be mò a bè bá chu ye ángá.”

Yeso è matswa nwen ndedon éè no ngge engǝ́ esera ángá

¹⁴ Atan a be vǝ chá hwì shwa ara sen a zǝn a be etsonchi ya e dan ángá, bè di be nobǝ embo è ngàhwya be no, be etumo mo edon è no twa efyan anga ngge be.

¹⁵ Kè akan abu binbin mo nobǝ hon è di Yeso ángá, bè tàn ebwikpe àywá nè tse ken bi ye fwa.

¹⁶ Yeso è ká be nobǝ embo hon eka jan, “Mò a nye twa efyan anga ngge be etsonchi a chu mo nó ángá a ano?”

¹⁷ Nobǝ akan a tswa be nobǝ embo hon è janfwe ye jan, “Etumo, m ti nwen ndedon mam bwa o. Ge no ngge engǝ́ esera nwone e bwe ye ge jan yi ye aken ra.

¹⁸ Atan a ge bwa ye a ju anga, ge vǝ ye kposhi a sǝnsen. Ge pkì efǝn a kpevǝ, ge kǝ́n san n ywakon a gu re. M̀ bgó be etsonchi mbo, be e nyo e vǝ́ engǝ́ hon, tea be bwe ti be ra.”

¹⁹ Yeso è jan binbin mo be jan, “A nye be nobǝ mo ekǝn ena ya e tsǝ́ be ekǝ̀n a chu Ehwya ra, ken a ngga abu atan engǝ, a ma no ngge nye? Ken a ngga abu atan engǝ, a ma bon-ekǝ̀n ngge nye?” Kǝnggwa gè jan, “Ti nwen ndedon hon bwa a zǝn m ana.”

²⁰ Enona, bè ti nwen hon bwa a zǝn Yeso. Atan a engǝ́ esera hon è di Yeso ángá, gè du nwen hon a tswa ju eywakonm kè akan. Gè kposhi a sǝnsen nè no tkyan anga ngge efǝ́n ekpìm a kpevǝ.

²¹ Yeso è ká ate mo nwen hon ekan jan, “Ge dgyenfon kan engǝ, a tswa mò hon ena?” Ge janfwe ye, “Tke a gè chà no nweshan,

²² gè bu kpo bwi ye anga a fǝ̀ ngge a mbǝ abu ge e gu ye. Ano o bwe a ti mò akan, dishi je, bwejwa je.”

²³ Yeso è ká fwe ye eka jan, “Bwe engǝ o jan, ‘Ano m bwe a ti?’ Mò binbin no ebwetim a zǝn ende e tsǝ́ekǝ̀n no ángá.”

²⁴ Kè akan, ate mo nwen hon è jan, “M tsǝ́ ara ekǝ̀n, bwejwa m me e tsen m tsuruku ra.”

²⁵ Atan a Yeso è di be nobǝ embo hon no tu bi bwa anga myan myan ángá, gè kpon engǝ́ esera hon dgyén jan, “A bo engǝ́ mo tón ekem ngge vǝ epem, m du o, gwa a je a ju ye, we kwa e didi mbo a ju ye efwe ra.”

²⁶ Engǝ́ hon è du ye gè tandwa, nè zon ye zon zon ngge echakpo nè gwa a je a ju ye. Nwen hon è dwano a sen a zǝn abu ge fǝ ara. Be nobǝ embo è jan, “Ge fǝ ara.”

²⁷ Tea Yeso è fu ye ngge bu nè vǝ nwen ndedon hon ywa etkyen.

²⁸ Atan a Yeso è kwashi ara a mu hon ángá, be etsonchi mbwe ká ye eka jan, “Ano bwe a ge jé nyonvǝ́ ti je ye ra?”

²⁹ Gè janfwe be, “Enyonvǝ́m mo engǝ́ esera yishwa ena kpwà tén a tswa ebgo ebgom.”

Yeso è fijan efwe abu ga fǝ ángá

³⁰ Yeso ngge be etsonchi mbwe è gwa zǝn eni, nè nya ken twafǝ̀ a tswa Galili. Gè dgyan ye ende akan e yi zǝn a bè no ángá ra,

³¹ adia gè tú be etsonchi mbwe mò anga. Gè jan be, “Ba ti Nwen Nobǝ hon ti tsǝ a du a bu mo be nobǝ. Ba gu ye, tsǝnò adi e ta chashin mo nó, ga nyi etkyen.”

³² Tea bè foyi be fwa a gè jan be anga ra, nè tsen etsentsen a be e ká ye eka a chu mo nó.

Ende e gǝ̀n ti ara anga a ara?

³³ Atan a bè bwangga a Kapanahum ángá, bè kwashi a mu akan. Yeso è ká be eka jan, “Mò hon a nyé twa efyan anga a chu mo nó a efǝ ángá a ano?”

³⁴ Tea bè jan be ye a vǝ ra adia bè twa efyan anga a efǝ a chu ende e gǝ̀n ti ara a engga mo be ángá.

³⁵ Yeso è chu a sen, nè jan be gwi chu fà hon jan, “Ano ende akan dgyan ge no chu, ge no ara kenm ga no ende e kǝn-etkyen ngge ga no ya mochi mo be nobǝ binbin.”

³⁶ Gè ti nweshan, nè du ye ge ywa etkyen chafya mo be. Gè kan nwen hon kpwá a bu mbwe nè jan be jan,

³⁷ “Ende e cha akan mo mbǝgyashan ena a di ti mam cha anga a me, ende e cha m, cha ye anga a me tete ra, tea ge cha ende è tson m bwa ángá gaten.”

Ende e segwa ye je ra no ḿ mo je

³⁸ Yohana è jan, “Etumo, je di nobǝ akan no nyonvǝ́ engǝ́ esera anga adi ti mbo, jè jangga ye adia gè fwa ye akan a engga mo je ra.”

³⁹ Yeso è jan ye, “Nye e jan e ngga nye ye ra.” Ende e bwe moeditanm adi ti mam, a twanga a jan ye fwa ebgen a chu m ra,

⁴⁰ ende e segwa ye je ra, a ḿ mo je.

⁴¹ M jan nye ebi anga, ende e no nye kǝnggwe akan mo mbǝ adia nye no be ya e ba Kristi anga, a ben a tén buhwen mbwe ebenm.

Ende e du nobǝ bwe edan anga

⁴² Efwe ano ende akan du akan mo be mbǝgyashan ena e tsǝ́ekǝ̀n no a chu m na bwe edan, ga se a tkyan a ge, a zǝn ye, ano be è ti hywá ekeke ti hwyafu ye shwa nè ti ken twashi a tswa sǝn.

⁴³ Ano bu mbo, du o o bwe edan, sen twa ye. Ge se a tkyan a ge we ben nya a zǝn Ehwya ngge bu esentwam chàshín a be e ti o ngge be bu mbo fà, e twa e shi a sen-ehwa, zǝn a fǝ̀ din ye anga ra. [

⁴⁴ A zǝn a be kpǝkpǝmo e de be anga fǝ be anga ra, fǝ̀ nwone e tkòn be anga, din ye anga ra.]

⁴⁵ Ano kpwafu mbo du o o bwe edan, sen twa ye. Ge se a tkyan a ge we ben nya a zǝn Ehwya ngge kpwafu esentwam chàshín a be e ti o ngge kpwafu mbo fà e ti e twa e shi a tswa fǝ̀ a sen-ehwa. [

⁴⁶ A zǝn a be kpǝkpǝmo e de be anga fǝ be anga ra, fǝ̀ nwone e tkòn be anga, din ye anga ra.]

⁴⁷ Ano fǝzǝn mbo du o o bwe edan, chawya ti ara ye. Ge se a tkyan a ge we kwa a tswa zǝnotì mo Ehwya ngge nwen fǝzǝn akan, chàshín a we no ngge be nwen fǝzǝn fà, be e ti o e twa e shi a tswa fǝ̀ a sen-ehwa.

⁴⁸ A zǝn a be kpǝkpǝmo e de be anga fǝ be anga ra, fǝ̀ nwone e tkòn be anga, din ye anga ra.

⁴⁹ Abu be na a cha egwa egwa mo nye ngge fǝ̀ mo ekan ángá, enò be na a cha egwa egwa mo mò etinom ngge nga.

⁵⁰ Nga se àywá, tea ano enyonyo mbwe hon, fwa ye efwe ra, wa bwe ye engǝ ge, o chà ben enyonyo hon efwe? Nye e no abu nga e sojunye ngge nye e no a tswa adgye ngge egwa egwa.