Marku 8 - Etkwen New Testament

Yeso è fi be nobǝ echo ndwe

¹ Adi be tsǝnò hon eni, be nobǝ embo efki e bwa fǝnno a zǝn Yeso. Adia bè ben be mò a ba de ángá ra, gè fǝ́ be etsonchi mbwe dwa bwa a zǝn ye nè jan,

² “M di ashi mo be nobǝ embo ena, be bwe ara tsǝ ta ngge me n fwa be ngge mò a ba de ángá ra.

³ Ano m du be nya a mu ngge mbe, ba kpo kpì efǝ adia ya ehwyà mo be è bwa chá zǝn edgyendgyen.”

⁴ Be etsonchi mbwe è janfwe ye, “Tea a tswavǝ́n ana, ende akan ben a ti borodi nwone a kǝn be ángá?”

⁵ Gè ká be eka jan, “A bi mo borodi mbwe a nye no ngge be?” Be janfwe ye jan, “Chwen a fà.”

⁶ Gè jan be nobǝ embo hon jan be e chu gu a sǝnsen. Atan a gè kpu bi borodi chwen a fà hon nè chwano Ehwya ángá, gè bwìkwa be nwofyan nwofyan nè kpu no be etsonchi mbwe, be e kpu e no be nobǝ hon. Bè bwe enò.

⁷ Be etsonchi hon è no ngge gwejo nwofyan gaten. Gè chwano Ehwya a chu mo gwejo hon gaten nè jan be e kpu e kwa be nobǝ.

⁸ Be nobǝ hon è de mbo tén a be. Kǝnggwa be etsonchi è tefǝn gu be ebwibwi mo nó è dan ángá. Mò a bè tefǝn ángá è mbo esha chwen a fà.

⁹ Be ndedon hon ya è no a zǝn ángá è kengga echo ndwe. Kǝnggwa, a gè du be nya ara ángá,

¹⁰ gè kwashi a tswa ngga hon ngge be etsonchi mbwe, bè ken adi efa mo Dalimanuta.

Be Farisi è ká Yeso eka mo echi

¹¹ Be Farisi è bwa kwa ara Yeso eka ekam evǝa be e mbwà e di ye. Bè jan ge e tú be echi nwone e tú anga jan ge shwa chá kpe ángá.

¹² Gè kposhi tsǝ̀n echakpokpo nè jan, “Ano bwe a ge be nobǝ mo ekǝn ena ká m eka mo echi anga? M jan nye ebi anga na, ba tú be ye echi akan ra.”

¹³ Kǝnggwa gè gwa be, nè ken kwashi adi ngga hon nè penyi vǝ́ jengǝ̀ chá akan mo edan hon.

Yeso twa be etsonchi mbwe echa a chu be Farisi ngge Hiridu

¹⁴ Be etsonchi è mngoda ara be e kpu borodi e ken ngge be, è kpwà bi borodi akan a bè no ngge nó a tswa ngga hon.

¹⁵ Abu bè nyaken anga, Yeso è twa be echa jan, “Nye bgeshi fǝzǝn adi yisti mo be Farisi ngge ḿ mo Hiridu.”

¹⁶ Bè kwa ara fwa ejanm e sojube n jan, “Ge jan enò adia je fwa je ngge borodi ra ángá.”

¹⁷ A Yeso è yi ara fwa a bè jan e sojube ángá, gè ká eka jan, “Bwe engǝ nye jan fwa anga jan nye fwa nye ngge borodi ra? Bwatwa anga na nye chà diyi nye, eno e ra foyi nye ra? Tsuruku mo nye no ekenpepe?

¹⁸ Nye no ngge be fǝzǝn tea nye diben nye zǝn anga ra? Nye no ngge be ton tea nye fo ben nye fwa anga ra? Efwe, nye kaben nye fwa anga ra?

¹⁹ Atan a m̀ bwikwa bi mo borodi chwen ti no be nobǝ echo chwen ángá, esha mbwe e mbo ngge be ebwibwi mo borodi a nyè tefǝn?” Be janfwe ye, “Gwi chu fà.”

²⁰ “Atan a m̀ bwikwa bi mo borodi chwen a fà ti no nobǝ echo ndwe anga, esha mbwe e mbo ngge ebwibwi mo borodi a nyè tefǝn?” Bè janfwe ye, “Chwen a fà.”

²¹ Gè ká be eka jan, “Bwa twa anga na, nye chà foyi nye ra?”

Yeso è matswa ya fǝzǝn ebwibwi a Betseda

²² Atan a Yeso ngge be etsonchi mbwe è bwangga a Betseda ángá, be nobǝ ya ehwyà è ti ya fǝzǝn ebwibwi bwa, nè bgó Yeso ge e yi nó bu a ju evǝa ge e ma e tswa nó.

²³ Gè vǝ ya fǝzǝn ebwibwi hon ngge bu tivǝ́ a je a chashin mo eten hon. Atan a Yeso è tsǝ́ ara nobǝ hon afǝtkwa a fǝzǝn nè yi ara ye bu a fǝzǝn ángá, gè ká nó eka, “O di mò akan anga?”

²⁴ Ya fǝzǝn ebwibwi hon, è fǝnshwa di zǝn ngàhwya nè jan, “M di be nobǝ, tea be no abu tumo no ken anga.”

²⁵ Efwe, Yeso yi nobǝ hon be bu mbwe a fǝzǝn. Ekǝnggwa be fǝzǝn mbwe è no ebwibwi ángá è fkigwa, gè di gu be mò no enggasansan.

²⁶ Yeso è jan ye jan, “Nya a mu, tea we ba mbo tswa eten ra.”

Fwa a Bitru è jan a chu Kristi ángá

²⁷ Yeso ngge be etsonchi mbwe è nyagwa Galili nè vǝ́ a tswa be eten nwofyan è no efa mo Kesariya Filibi ángá. A bè chà no efǝ anga, gè ká be etsonchi mbwe eka jan, “Be nobǝ jan ma ara?”

²⁸ Bè janfwe ye, “Nobǝ ya ehwyà jan wa Yohana ya Batisǝma, be ya ehwyà jan wa efojan Eliya, be ya ehwyà efwe jan a bo wa akan mo be efojan ekpe ekpe.”

²⁹ Tea Yeso è ká be eka jan, “Tea a nye wá, nye jan ma ara?” Bitru è janfwe ye jan, “A bo wa Kristi hon.”

³⁰ Yeso è twa be echa jan be e jan e didi be nobǝ ende a ge no ángá ra.

Yeso è fijan be etsonchi mbwe abu ga fǝ ángá

³¹ Kǝnggwa, Yeso è kwa ara be moetum jan, “Ge no ara kenm a a me, Nwen Nobǝ hon ma ngǝ ekan mo be mò àywá. Be atkwen nobǝ, be Ekǝ́n echa ngge be etumo mo be edon a se m. Ba gu m, tsǝ ta chashin ma nyi etkyen a dì angǝ.”

³² Gè jan fwa enggasansan a chu be mò a bwe ngge ge ángá. A chu fwa ena, Bitru è ti ye ken a buetkwa nè kwa ara ye etkya etkyam.

³³ Tea atan a Yeso twanga n di be etsonchi ya ehwyà ángá, gè tkyá Bitru etkya jan, “Ken chashin mam, Shetan, o nyi mbo shwa mbo a chu be mò mo a Ehwya ra, tea be mò mo be nobǝ.”

³⁴ Kǝnggwa gè fǝ́ be nobǝ embo éè fǝnno a zǝn ángá ngge be etsonchi mbwe dwa, bwa a zǝn ye. Gè jan be binbin jan, “Egwa egwa e dgyan anga ge e no etsonchi mam, ge no kenm ge e se chu ye ngge ge e chadwa jan ga ngǝ ekan, ge e ba m.

³⁵ Adia ende e nda ge e dgon nya mbwe anga, a ben ye nó ra, tea ende e twagwa nya mbwe a chu m ngge a chu Fwa Esese, a dgon nó.

³⁶ Mò esese hon nwone a nobǝ a ben ángá, a ano, ano ge ben gu be mò a tswa zǝnchaje ena n tivǝ́ ti ye nya mbwe ra?

³⁷ Efwe, mò hon a nobǝ ti a no efwe a chu nya mbwe ángá a ano?

³⁸ Ano ende akan fu ebgenju mam ngge be fwa mam adi ekǝn mo ebgen ngge mofǝ̀ ena, Nwen Nobǝ a fu ebgenju mbwe atan ga twabǝ a bwa a tswa edgwa mo Ate ye ngge be maleka echanwenwen mbwe ángá.”