Marku 6 - Etkwen New Testament

Bè segwa Yeso a Nazarati

¹ Yeso è gwa zǝn hon nè ken a eten mbwe, be etsonchi mbwe è ken ngge ge.

² Nò nya Etkem mo be ya a Yahuda, gè kwa ara moetum a àtá chuefǝnm. Be nobǝ embo ya è fo ye ángá, è tàn ebwikpe. Bè ká eka jan, “Nobǝ hon ena ben be enggaton mo moetum ena a che? Yishwa enggaton hon a be no ye ena, no engǝ? Di, be moeditanm a ge bwe anga.

³ Ena fwa ye efwatumo hon ra? Ena fwa ye nwen Meri a be nwenjwa ye ndedon, a Yakubo, Yose, Yahuda ngge Sima ra? Be nwenjwa ye ndegwa no be anga ngge je ana ra?” Be bgen tsuruku ngge ge.

⁴ Yeso è jan be, “Kpwà a eten mbwe, a engga mo be nwenjwa ye ngge a tswa kan mbwe ye, a efojan fwa ye ngge egǝ̀n ra ángá”

⁵ Gè bwe ye moeditanm akan a zǝn ra, kpwà ge tu be ya modwa ya e fwa be àywá ra, bu a chu nè matswa be.

⁶ Gè tàn ebwikpe adi chaebi a bè fwa be ngge nó ra ángá. Kǝnggwa Yeso è tku ken a tswa be eten eten, nè no tú be mò anga.

Yeso è tson be etsonchi mbwe gwi chu fà chí vǝ́ a je

⁷ Gè fǝ́ fǝn be etsonchi mbwe gwi chu fà dwa, bwa a zǝn ye nè tson be fà fà, vǝ́ a je nè no be emwentì be e ti e nyo e vǝ́ be engǝ́ esera.

⁸ Ena a echa a gè twa be ángá: “Nye e kpu nye mò akan adi kèn hon ra, kpwà etsǝ́n ken, nye e kpwá nye mode, echo ngge tse a eshu mo nye ra.

⁹ Nye du kpumo a tkyafù a fù mo nye, tea nye e ti nye mokàn efki ra.

¹⁰ Egwa egwa mo mu a nye kwa ángá, nye e no kpwà a zǝn ti kengga nò nye nya a gwa eten hon ángá.

¹¹ Ano mu akan sha ye nye ra, n buton fo ye nye ra, nye e bu e kǝ́n abubwi a kpwafu mo nye atan a nye nyagwa eten hon anga, ga no echi a chu be jan, fù èé bu mo nye dwa a je, a chu mò a ben be ángá.”

¹² Bè vǝ́ a je nè kwa ara edgon edum jan be nobǝ be e twa etwa mo be ebgen mo be, be e twanga e bwa a zǝn Ehwya.

¹³ Bè nyonvǝ́ be engǝ́ esera embo gwa a je a ju be nobǝ, nè nggwa be ya modwa byi mo zetu a chu nè matswa be.

Abu bè kpecho chu mo Yohana ya Batisǝma ángá

¹⁴ Tì Hiridu è fo be mò e no bwe anga, adia atan enò etkyen mo ti mo Yeso è no kpò anga. Be nobǝ è no jan anga, “Yohana ya Batisǝma nyi ara etkyen a dì, a mò e bwe ge no ngge echakpo mo moeditanm àywá ángá.”

¹⁵ Be ya ehwyà è jan, “Ga Eliya.” Efwe ehwyà è jan, “Ge no efojan, abu akan mo be efojan ekpe.”

¹⁶ Atan a Hiridu è fo fwa ena ángá, gè jan, “Yohana ya Batisǝma, a m̀ du be kpecho chu mbwe ángá nyi ara etkyen a dì.”

¹⁷ Adia ekpe, Hiridu e chu ye è du ara edgon jan be e fu Yohana be e tè ye ti e twa àtá ehwyatu. Gè bwe enò a chu Hiridiya gwa nwenjin ye Filibu, a gè ti fǝ́ ángá.

¹⁸ Atan enò, Yohana è no jan Hiridu anga jan, “Edon cha ye dwa a we fǝ́ gwa nwenjin o, a ge chà no angǝ ángá ra.”

¹⁹ Enona, Hiridiya è nyi Yohana no a tsuruku nè nda anga ge e gu ye. Tea gè ben ye efwa ge e bwe enò ra,

²⁰ adia Hiridu è tsen Yohana anga àywá. Gè yi jan Yohana è no nobǝ esese nè no nobǝ ebitete a chafya mo Ehwya, enona gè cha ye dwa be e gu ye ra. Abu atan engǝ ra a Hiridu è ma fo Yohana anga, mò hon è no kǝn ye nya anga àywá, tea gè dgyan ge e no buton e fo nó anga.

²¹ Hiridiya è ben efwa ge e bwe mò a gè ka no a chu Yohana ya Batisǝma ángá, nò ekabenm mo embwam mo Hiridu. Nò eni, be atkwen nobǝ mo gomnatì, a Hiridu è bo ángá, be ya mochi, be chu mo yakàn tangge be atkwen nobǝ a Galili è bwa ara adi esǝ hon.

²² Atan a nwen Hiridiya è kwashi nè no ge ge anga ángá, Hiridu ngge be ya gè bo be bwa ángá è fo etkwa mo ge mbwe àywá. Tì hon è jan nwen ndegwa hon jan, “Bgó m mò nwone a o dgyan anga, ma no o.”

²³ Gè senvǝ nè fan efanm ngge nwen ndegwa hon jan, “Binbin mo mò a o nda anga, ge è ma kengga chá akan mo ebwikwa fà mo zǝnotì mam, ma no o ye.”

²⁴ Gè vǝ́ a je, nè ká ayi ye eka jan, “Mò a me e nda ángá a ano?” Ayi ye è janfwe ye, “Chu mo Yohana ya Batisǝma.”

²⁵ Kè akan, nwen ndegwa hon è tse kwashi a zǝn Tì nè jan, “M nda anga we no m chu mo Yohana ya Batisǝma adi kpere asuswana.”

²⁶ Fwa ena è bgen Tì hon nya àywá, tea adia gè fan ara efan, ngge be ya echan a gè bo bwa ángá, gè dgyan ye ge e dòn ye ye nó ra.

²⁷ Enona, kè akan gè tson ekpechochu ge e ken a àtá ehwyatu ge e kpe e cho chu mo Yohana ya Batisǝma e bwa ye. Ekpechochu hon è ken a àtá ehwyatu nè kpecho chu mo Yohana ya Batisǝma,

²⁸ ti bwa a tswa mo kpere. Gè ti no nwen ndegwa hon, ngge nwen ndegwa hon è ti ken no ayi ye.

²⁹ Atan a be etsonchi mo Yohana è fo fwa ena ángá, bè bwa ti kǝn mo Yohana ti ken di.

Yeso è fi be nobǝ echo chwen

³⁰ Be etsonchi a Yeso è tson be chí ángá, è twabǝ bwa fǝ́n a zǝn ye nè jantu gu ye mò a bè bwe ngge mò a bè tú ángá.

³¹ Tea adia be nobǝ embo è no bwa anga nè no nya anga, bè ben be engga be ti e de mode ra. Kǝnggwa Yeso è jan be etsonchi mbwe gwi chu fà jan, “Je e ken adi zǝn e no etswatswa ju abu nye e tke nya nwofyan.”

³² Enona, be kwa ngga nè ken adi zǝn e no etswatswa ju abu be e no jujube.

³³ Tea be nobǝ embo ya è di be bè nya anga, nè yi ara be ángá, è vǝ chá be eten embo, tse kwafya mo be, nè kengga a zǝn hon chàshín be.

³⁴ Atan a Yeso è gwa a je adi ngga ángá, gè di be nobǝ embo ya è no a zǝn hon ángá, gè di ashi mo be, adia bè no abu be son ya e ben be ya efyomo e dgon be anga ra, enona, gè kwa ara be mò embo moetum.

³⁵ Atan enò, nò è tén ara ga kpo, enona, be etsonchi mbwe è bwa a zǝn ye nè jan, “Zǝn ena no a tswavǝ́n, di zǝn shi anga,

³⁶ du be nobǝ ena be e ken a tswa be eten nwofyan e dwana abu be e ken e jwa mò a ba de ángá.”

³⁷ Tea gè janfwe be jan, “A nye, nye no be mò be e de.” Be jan ye, “Ano ge no enò, ja jwa a tén borodi mo dinari gwé fà (200), ti a no be be e ti e de?”

³⁸ Yeso è ká eka jan, “Bi mo borodi a nye no ngge be ángá no mbwe? Nye ken di ti ara.” Atan a bè ken di ara nó ángá, bè twabǝ bwa jan, “Bi mo borodi chwen ngge gwejo fà.”

³⁹ Kǝnggwa Yeso è jan be e du be nobǝ hon be e chuefǝnm a sen adi be etso etso a chu mo be vǝmo etswa éè dwa a zǝn ángá.

⁴⁰ No enona, bè chu a sen adi be etso gwé akan akan ngge be etso gwi chwen chwen.

⁴¹ Yeso è kpu be bi chwen mo borodi ngge gwejo fà hon nè ta kpà vǝ́ cha kpe, nè chwano Ehwya, nè bwìkwa be bi borodi hon nwofyan nwofyan. Gè kpu no be etsonchi mbwe be e kpu e no be nobǝ hon. Gè bǝkwa be gwejo fà hon kpu no be gaten.

⁴² Binbin mo be nobǝ hon, è de mbo tén dgyèn mo be.

⁴³ Kǝnggwa, be etsonchi è tefǝn gu be ebwibwi mo borodi ngge gwejo hon, éè dan ángá mboshi esha gwi chu fà.

⁴⁴ Be ndedon ya éè de mode a zǝn ángá è no echo chwen.

Yeso è kenkèn a chu mbǝ

⁴⁵ Kè akan, Yeso è du be etsonchi mbwe be e kwashi a tswa ngga, be e kwafya e nya a Betseda, abu ge e du be nobǝ embo hon efǝ.

⁴⁶ Atan a gè du ara be efǝ ángá, gè tonvǝ́ a buetkwa mo hwì evǝa ge e bgó ebgo.

⁴⁷ Beti bishi etsǝ nò eni, ngga hon è ken ara chá tswa akan mo edan hon, Yeso è no jujuye a etu.

⁴⁸ Gè di be etsonchi mbwe no chifǝ anga adi ngga e enyim adia fyo è no kpo bwa anga chafya mo be. Atan enò, è no tse ta mo akǝndon. Kǝnggwa Yeso è no kenkèn nyabwa chá zǝn be a chu mbǝ, nè bwe abu ge twa a kwa be.

⁴⁹ Tea atan a bè di ge no kenkèn anga a chu mo mbǝ hon ángá, bè ka anga jan ga kpǝ. Bè tandwa,

⁵⁰ adia binbin mo be, bè di ye nè tsen etsentsen. Kè akan gè jan fwa ngge be jan, “Nye bonshi ekǝ̀n, a a me, nye e tsen nye etsentsen ra.”

⁵¹ Kǝnggwa gè ken kwashi ben be a tswa ngga hon, fyo hon è kposhi nya. Binbin mo be, è tàn ebwikpe àywá,

⁵² adia bè chà hwayi be mò a Yeso è tú a chu borodi hon ra, ngge bè dgyan be be e cha mò a bè tú be anga a tsuruku mo be ra.

Yeso matswa ya modwa a Jenisarati

⁵³ Atan a bè nyi ngga hon vǝ́ ara jengǝ̀ mo edan hon ángá, bè kengga a Jenisarati nè hwyafu ngga mo be a zǝn.

⁵⁴ Abu bè vǝ́ gu re a je mo ngga hon ángá, be nobǝ è diyi ara Yeso.

⁵⁵ Be nobǝ è tse kwa gu efa hon nè tso be ya modwa adi sǝ ti ken gu adi zǝn a bè fo gè no ángá.

⁵⁶ Chá binbin mo be zǝn a gè ken anga, be eten nwofyan, be eten efifi tangge buetkwa mo eten, bè kpu ya modwa twà a tswa be afyan. Bè bgó ye ge e gwa be ya modwa be e yi ti re bu mo be kpwà ara a tón mokàn mbwe. Binbin mo ya è yi ye a ju ángá è ben ematswam.