Marku 5 - Etkwen New Testament

Yeso nyonvǝ́ be engǝ́ esera àywá a ju ndedon akan

¹ Yeso ngge be etsonchi mbwe è penyi edan hon, nè ken a efa sǝnsen mo Garisana.

² Abu bè no nyagwa a je adi ngga hon ángá, kè akan, ndedon akan è no ngge be engǝ́ esera a ju ye, è vǝ chá afkudì nyabwa, abu ge e bwa e ben Yeso.

³ Ndedon hon è no anga a afkudì hon, nobǝ akan è tè ti ye ye efwe ra, èé ngge be awya.

⁴ Bè no hwyafu bwi ye bu tangge fù anga ngge awya, tea gè no vǝten gu be awya hon nè kǝnbǝ bwi be tutse hon anga a fù mbwe. Nobǝ akan è cha kǝn ti ye kpo, ge e fu e pe ye ra.

⁵ Ènò ngge etsǝ, nobǝ hon è no anga a engga mo be dì ngge be hwì, gè no tandwa anga nè no sen ju ye anga ngge be ten.

⁶ Atan a gè di cha kǝn Yeso adgya ángá, gè tse fǝton nè ken nggwa ekpanvǝ mbwe chafya mo nó.

⁷ Gè tandwa ngge echakpo n jan, “Mò a o nda anga a zǝn m ángá a ano Yeso, Nwen mo Ehwya Egǝ̀n ti ara? Fan efan adi ti mo Ehwya jan wa tswa m ekan ra”

⁸ Adia Yeso è jan fwa ara engǝ́ esera hon jan, “Gwa a je a ju ndedon ena, a bo engǝ́ esera.”

⁹ Kǝnggwa, Yeso è ká ye eka jan, “Ti mbo jan ara?” Gè janfwe ye, “Ti m jan Embo adia je fí ara ángá.”

¹⁰ Kǝnggwa gè no bgó Yeso anga abu ge nyo e vǝ́ ye be, a je mo zǝn hon ra.

¹¹ Atan enò, etso efifi mo be efika è de mode anga adi efa hwì tenten a zǝn hon.

¹² Kǝnggwa be engǝ́ esera hon è bgó Yeso jan, “Du je, je e ken a engga mo be efika ngge we gwa je e kwa a tswa ju be.”

¹³ Gè cha be dwa, be engǝ́ esera hon è gwa a je nè ken kwa a tswa mo be efika hon. Be efika hon è kengga echo fà (2,000) bè tse ken kposhi a tón evuru mo edan hon nè tkò gu a tswa mbǝ a zǝn.

¹⁴ Be ya e dgon be efika hon anga è tse kwa a tswa eten ngge be eten nwofyan ya è dwa a buetkwa ángá, nè jan be nobǝ mò è bwe ángá. Be nobǝ è vǝ́ a je nè ken a zǝn evǝa be e di mò hon è bwe ángá.

¹⁵ Atan a bè bwa a zǝn Yeso ángá, bè di ende éè no ngge be engǝ́ esera embo ángá chuno a zǝn ngge mokàn esese a ju ye nè no a tswa engà mbwe, bè tse etsentsen.

¹⁶ Be ya e di mò a Yeso è bwe ángá, è jan be nobǝ abu mò è bwe ngge ende éè no ngge engǝ́ esera a ju tangge mò è bwe ngge be efika hon ángá.

¹⁷ Kǝnggwa be nobǝ hon è kwa ara Yeso ebgom jan ge e nya e gwa sǝnsen mo be.

¹⁸ Abu Yeso è kwashi anga a tswa mo ngga ángá, ndedon hon nwene éè no ngge engǝ́ esera ángá è bgó ye jan ga ken ngge ge.

¹⁹ Tea Yeso è cha ye ye dwa ra, nè jan ye jan, “Ken a mu a zǝn ya mbwe o, jan gu be, be mò a Ehwya bwe o ngge abu ge di ashi mbo anga.”

²⁰ Enona, ndedon hon è nya m̀ mbwe, nè kwa ara be nobǝ a tswa eten gwi a be fǝ́ anga Dekapoli fwa ejanm a chu mo be mò echa echa a Yeso è bwe no ye ángá. Kǝnggwa, be nobǝ binbin è tàn ebwikpe.

Yeso matswa ndegwa nè fǝ́zǝ nwen ndegwa bwa angǝ

²¹ Atan a Yeso è penyi edan hon twabǝ vǝ́ ara jengǝ̀ chá akan efwe adi ngga ángá, be nobǝ embo è bwa fǝn ngàhwya ye atan a gè chà no a tón mo edan hon ángá.

²² Nobǝ akan éè no chu mo àtá chuefǝnm akan mo ya a Yahuda, a bè fǝ́ anga Jayiru ángá, è bwa a zǝn. Abu gè di gu Yeso eno, ge nggwa ekpanvǝ mbwe a sen a chafya mbwe,

²³ nè bgó ye ngge tsuruku akan jan, “Nwen m ndegwa nwofyan fǝ anga. M dònvǝ, bwa tu ye bu a ju abu ge e ben ematswam ngge nya.”

²⁴ Yeso è nya ngge ge. Be nobǝ embo è ba ye nè no fa ye anga finfin.

²⁵ A tswa mo be nobǝ embo hon, ndegwa akan è no a zǝn, a ngǝ è no vǝ́ ye anga. Atan enò, ngǝ evǝ́m hon e kengga ara je gwi chu fà.

²⁶ Gè ngǝ ara ekan àywá a bu mo be ematwa, nè gu gu ara mò a kpwabu mbwe, nè ben ye ematswa ra, tea modwa hon è tubi kpwà etubim.

²⁷ A tan a gè fo fwa a chu Yeso ángá, gè bwa chashin mbwe a engga mo be nobǝ embo hon nè bwa yi a ju mokàn mbwe,

²⁸ adia gè ka anga jan, “Ano m yi a ju mokàn mbwe kpwà ara, ma ben ematswam.”

²⁹ Kè akan, ngǝ evǝ́m mbwe hon è kǝn tén ekǝnm, gè fo a ju ye jan ge kwa ara ju ngge modwa hon.

³⁰ Kè akan, Yeso è fo jan echakpo vǝ́ ara a je a ju ye, nè bwe ara mochi. Gè twanga a tswa engga mo be nobǝ embo nè ká eka jan, “Ende e yi adi mokàn mam ángá a ara?”

³¹ Be etsonchi mbwe jan, “O di be nobǝ embo e no fa o anga na mbo, tea o ká eka jan, ‘Ende e yi m a ju ángá a ara?’ ”

³² Tea Yeso è no dise be nobǝ éè ngàhwya ye no anga, evǝa ge e di ende hon éè yi ye a ju ángá.

³³ Kǝnggwa ndegwa hon è yi ara mò è bwe a ju ye ángá, gè bwa hò shi a chafya mbwe, ju ye è no bu emme anga a tswa etsentsen. Gè jantu gu ye ebi mo be mò è bwe ye ángá.

³⁴ Yeso è jan ye, “Nwen m ndegwa, chaebi mbo matswa ara o. Ken a tswa adgye, ekan mbo gwa ara o.”

³⁵ Atan a Yeso chà jan fwa ngge ndegwa hon anga, be nobǝ ya ehwyà è vǝ a mbwe Jayiru chu mo àtá chuefǝnm, bwa jan ye, “Nwen o ndegwa fǝ ara, we fa mbo etumo efwe ra.”

³⁶ Tea abu Yeso è fo fwa mo be anga, gè jan Jayiru jan, “Tsen mbo etsentsen ra, tsǝ́ekǝ̀n kpwà ara.”

³⁷ Gè cha ye dwa ende akan e ba ye ra kpwà Bitru, Yakubo, ngge Yohana Nwenjin Yakubo.

³⁸ Atan a be bwangga ara a mu Jayiru ángá, Yeso è di zǝn bgen gu ara, be nobǝ è no kǝndwafǝ nè no kpedwa anga ngge dwa etànm àywá.

³⁹ Gè kwashi a tswa mu hon, nè ká eka jan, “Ano bwe a ge zǝn ena bgen no ngge dwa ekpem? Nwen hon chà fǝ ye ra, ge dwa anga dan kpwà ara.”

⁴⁰ Tea bè tson ye tsen. Chashin a gè du be vǝ́ gu ara a je ángá, gè ti ate mo nwen hon ngge ayi ye ngge be etsonchi mbwe ta hon ya è no ngge ge ángá, bè kwashi a tswa àtá a zǝn a bè twà kǝn hon no ángá.

⁴¹ Gè fu bu mo nwen hon, nè jan ye, “Talita kum.” (Engà mo nó jan, “Nwen ndegwa nweshan, m jan o nyi etkyen”).

⁴² Kè akan, nwen ndegwa hon è nyi etkyen nè kwa ara kèn ekenm. (Je mbwe è no gwi chu fà.) A chu mo mò ena, be nobǝ è tsen etsentsen nè tàn ebwikpe àywá.

⁴³ Gè twa be echa echakpokpo jan be e jantu e didi be ende akan mò ena ra, nè jan be e no ye mode ge e de.