Marku 4 - Etkwen New Testament

Hufwa a chu fwento etwam

¹ Chashin mo be tsǝnò nwofyan efwe, Yeso è kwa ara moetum a tón edan a Galili. Be nobǝ ya è fǝn ngàhwya ye no ángá è fifi re, enona, gè nyi etkyen nè kwashi chu a tswa mo ngga nwone è no a chu mbǝ a edan hon ángá. Binbin mo be nobǝ è no a etu, a tón edan hon.

² Gè tú be mò embo adi hufwa jan,

³ “Nye fo, yawa akan è ken a kpèn evǝa ge e twa fwento mbwe.

⁴ Abu gè no twa fwento hon anga, ya ehwyà è nggwa efǝ be nwendnye è bwa kpe de be.

⁵ Ya ehwyà è nggwa a chu mo sǝnsen ago, zǝn a bè ben be sǝnsen àywá ra. Bè vǝ́ gwa a je myan myan, adia sǝnsen hon è vǝn ye ra.

⁶ Tea atan a nò è fken be ángá, bè ngǝfǝ ara, adia kpwà mo be è shi kǝn ye a sǝnsen ra.

⁷ To ehwyà è nggwa a tswa evi nè vǝ́ gwa a je, evi hon è kpafu be, bè gwa be ga ra.

⁸ Efwe be fwento ehwyà è nggwa a chu sǝnsen esese. Bè vǝ́ gwa a je nè chambo nè gwa be ga, ya ehwyà gwi kè ta (30), ya ehwyà gwi kè chwen a ngǝ (60) ngge ya ehwyà gwé kè akan (100).”

⁹ Kǝnggwa Yeso è jan, “Ende e no ngge tón mo fwa efom, ge e fo fwa hon.”

¹⁰ Atan a Yeso è no jujuye ángá, be etsonchi mbwe gwi chu fà hon ngge be nobǝ ya ehwyà ya è ngàhwya ye no ángá, è ká ye eka a chu mo engà mo hufwa hon.

¹¹ Yeso è jan be, “Ehwya no ara nye echakpo nye e ti e yi be mò engǝ̀tonton a chu zǝnotì mbwe. Tea a zǝn be nobǝ e cha be dwa ngge ge ra, be jan gu be nó anga adi be hufwa evǝa,

¹² abu be Fwaebam jan, “Be no a di zǝn anga, n di a yi be nó ra, ngge be no a fo fwa anga, n fo a yi be engà mo nó ra. Adia ano be yi, ba twa etwa mo ebgen mo be, ba gwa a no be.”

¹³ Chukǝnggwa, Yeso è ká be eka, “Ano nye foyi nye engà mo hufwa ena ra, nye fo a yi engà mo egwa egwa mo hufwa efki engǝ?

¹⁴ Ende e twa be fwento hon anga, jan anga Fwa Esese mo Ehwya.

¹⁵ Be nobǝ ya ehwyà no abu be fwento ya è nggwa efǝ, kè akan atan a bè fo fwa hon anga, Shetan bwa kpu ara be fwa hon a bè kpu tswa no a tsuruku mo be ángá.

¹⁶ Be fwento ya ehwyà ya e nggwa a chu sǝnsen ago ángá, no abu be nobǝ ya atan a be fo Fwa Esese hon ángá, myan myan be cha nó ngge vǝtsen.

¹⁷ Tea adia kpwà mo be shi kǝn ye a sen ra ángá, be dgyen be fon ra. Atan a ekan eno e ra fí etswam ben be a chu fwa mo Ehwya a bè cha ángá, be twagwa nó myan myan.

¹⁸ Efwe, be fwento ya e nggwa a tswa evi ángá, no abu be nobǝ ya e fo fwa mo Ehwya hon,

¹⁹ tea tsuruku etsenm a chu be m̀ mo zǝnchaje, enggadem mo mobenben tangge edgyan mo be mò efki bwa hwyafu ara fwa mo Ehwya hon a tsuruku mo be, n du be gwa be ga ra.

²⁰ Be fwento ya e nggwa adi sǝnsen esese anga tú anga be ya e fo Fwa Esese mo Ehwya, n cha nó, n bwe mochi ngge nó, n ti gwa be ga. Ya ehwyà gwa be ga gwi kè ta (30), ya ehwyà gwi kè chwen a ngǝ (60) ngge ya ehwyà gwé kè akan (100) mo fwento a bè ti twa ángá.”

Hufwa a chu petila

²¹ Yeso è ká be eka jan, “Be nobǝ a ton petila n ti a nyi a ta mo ehwan nè, eno e ra a ta mo etwà zǝndwa? É yé, be ti nó a nyi etkyen adi echizǝno mo nó, evǝa ge e nggazǝ.

²² Mò e no engǝ̀tonton, be ti no a gwa a je, mò a be yi be ra, ba bwe nó ga no enggasansan.

²³ Ende e no ngge tón mo fwa efom ge e fo fwa hon.”

²⁴ Gè jan bishi be jan, “Nye bu e seshi tón adi fwa a nye fo anga. Yishwa mombwamo a nye ti mbwa be nobǝ anga, a gè hon nwone a Ehwya ti mbwa nye, èé ngge etubi.

²⁵ A zǝn egwa egwa e no ngge mò, ba tu a bi ye ngge ende e fwa ye ngge mo ra, èé nwofyan a ge no ngge nó ángá, ba cha ti ara nó a zǝn ye.”

Hufwa a chu mo fwento e chambo anga

²⁶ Yeso è jan efwe, “Zǝnotì mo Ehwya no abu ende akan e twa bwi fwento anga a sǝnsen.

²⁷ Ge dwa dan, n zǝ anga ènò ngge etsǝ, be fwento hon vǝ́ gwa a je n no chambo anga, tea ge yi ye abu mò hon bwe anga ra.

²⁸ Sǝnsen hon e chu ye bwe be fwento hon vǝ́ gwa a je ti ken adi mo ga egwam: ge tke adi kpen tumo mo nó ti ken adi ga, kǝnggwa ti ken adi fwen hon a tswa mo nó.

²⁹ Myan myan abu be ga hon bge defǝ ara enó, ge ti ekpo twa nó a ju, adia engga moebǝm bwangga ara ángá.”

Hufwa a chu fwento musta

³⁰ Efwe Yeso è ká be eka jan, “Mò a ja jan zǝnotì mo Ehwya no abu ge ángá a ano, eno e ra hufwa a ja bwe mochi ngge nó ti jan a se nó ángá, a ani?

³¹ Ge no abu fwento musta nwone e no ti ara nwofyan a engga mo be fwento a zǝnchaje.

³² Tea atan a be tswa ara nó sǝnsen ángá, ge vǝ́ gwa a je n ke twafǝ̀ gu be fǝtu a tswa wa ehwyazǝmo hon ángá, n swa be bu ekeke nwone a be nwendnye bwa tsa afku mo be anga a ju mo be ángá.”

³³ Ngge hufwa àywá yishwa ena, Yeso è jan be nobǝ fwa hon abu be e fo a yi ángá.

³⁴ Gè tu didi ye be mò anga ra, kpwà adi hufwa. Tea atan a gè no a buetkwa ngge be etsonchi mbwe ángá gè jan gu be engà mo be hufwa hon.

Yeso è ten fyochu dgyén

³⁵ Nò eni, atan a nò è di kǝn anga, gè jan be etsonchi mbwe jan, “Je e vǝ́ jengǝ̀ mo edan hon.”

³⁶ Atan a bè nyagwa be nobǝ embo chashin anga, bè etsonchi hon è kwa a tswa ngga nwone a Yeso è no a tswa mo nó ángá, nè nya ngge ge. Be nobǝ a tswa be ngga ya ehwyà, è ba be anga.

³⁷ Kè akan fyochu echakpokpo è kwa ara ekpom, dgyén mo mbǝ è no du mbǝ bwa bu anga a ju ngga hon nè no nggwashi anga a tswa mo nó, abu ngga hon fka a bwi be.

³⁸ Atan enò, Yeso è no adi dan chá yi mo ngga hon nè tu chu mbwe no adi motuchu. Be etsonchi hon è fǝ́zǝ ye nè ká ye eka jan, “Etumo, o ká mbo a jan ngga fka a bwi je ra?”

³⁹ Gè nyi etkyen nè tén fyochu hon dgyén, nè jan echakpo mo dgyén mbǝ hon jan, “Kpo nya, no ashi.” Myan myan, fyo hon è tswa gushi dgye enó.

⁴⁰ Kǝnggwa gè ká be etsonchi mbwe eka jan, “Ano bwe a ge nye tsen etsentsen àywá? Bwatwa anga na nye fwa nye ngge chaebi ra?”

⁴¹ Emme è bu be etsonchi hon a ju àywá, bè ka sojube eka jan, “Ende ena a ara, a èé fyochu ngge echakpo mo mbǝ tse ye anga?”