Marku 16 - Etkwen New Testament

Ehwya è ti Yeso nyi etkyen a dì

¹ Atan a Nò nya Etkem mo ya a Yahuda è twafǝ̀ ara ángá, Meri ya a Magadala, Meri ayi Yakubo ngge Salomi, è jwa byi yoben a be ti kpwá anga a ju kǝn nobǝ, evǝa be e ti ken e kpwá a ju kǝn mo Yeso.

² Anofon tàtà enó, adi tsǝnò ekwafya mo etu, abu nò è gwa anga a je enó, bè no nyaken a zǝn dì hon.

³ Bè ká sojube eka jan, “Ende e dgyén a vǝ je ten hon a kpevǝ mo dì hon ángá a ara?”

⁴ Tea abu bè ti re chu mo be etkyen, bè di bè dgyén vǝ ara ten ekeke hon a zǝn.

⁵ Abu bè kwa nyashi a tswa dì hon ángá, bè di ezon-ndedon éè tsàn ju ye no adi mokàn etenten, è chuno chá budgo. Mò hon è zǝ̀ be ju.

⁶ Ende hon è jan be jan, “Nye e tsen nye etsentsen ra, nye nda anga Yeso ya a Nazarati, a bè kenfu a chu eswafǝ ángá. Ge nyi ara etkyen. Ge fwa ye ana ra, di zǝn a bè twà ye ángá.

⁷ Tea, nye ken jan be etsonchi tangge Bitru jan, ‘Ge no chafya mo nye nyaken a Galili, a zǝn nya di ye, abu gè jan nye ángá.’ ”

⁸ Mo ena è kǝn be ndegwa hon nya àywá, enona, ju be è bu emme, bè tse vǝ́ a je mo dì hon. Bè jan be fwa ngge ende akan ra, adia bè no a tswa etsentsen ángá.

Yeso è mbwibwa a zǝn Meri ya a Magadala

⁹ Atan a Yeso è nyi ara etkyen a dì anofon mo tsǝnò ekwafya mo etu ángá, gè kwafya mbwibwa a zǝn Meri ya a Magadala a gè nyonvǝ́ engǝ́ esera chwen a fà a ju ye ángá.

¹⁰ Gè ken jan be ya è ba Yeso ángá, atan a bè no adi nya ebgenm ngge dwafǝ ekǝnm ángá.

¹¹ Atan a bè fo jan Yeso nè no angǝ ngge a gè di ara nó ángá, bè tsǝ́ be ekǝ̀n a chu mo nó ra.

¹² Beti bishi, Yeso mbwibwa a tswa ju etwafwem a zǝn be nobǝ efki fà, engga mo be ya è ba ye anga. Be nobǝ fà hon è vǝ a Urishelima nyaken a eten nwofyan akan.

¹³ Be nobǝ fà hon ena è twabǝ bwa jantu be ya e dan ángá, tea bè tsǝ́ be ekǝ̀n a chu be ra gaten.

¹⁴ Beti bishi, Yeso è mbwibwa a zǝn be etsonchi gwi chu akan, atan a bè de mode anga. Gè tkyá be etkya adia be tsǝ́ bè ekǝ̀n ra nè cha be dwa ngge be ya è jan be jan be di ara ye, chashin a gè nyi ara etkyen a dì ra ángá.

¹⁵ Gè jan be jan, “Nye e kwa a tswa zǝnchaje binbin, nye e jan egwa egwa Fwa Esese hon.

¹⁶ Egwa egwa e tsǝ́ekǝ̀n, n bwe ara batisǝma a ben ega, tea egwa egwa e tsǝ́ ye ekǝ̀n ra, Ehwya a kpèn ye kǝ́n.

¹⁷ Ehwya a no be ya e tsǝ́ekǝ̀n no a chu m ángá echakpo be e ti e bwe be moeditanm. Ba nyo a vǝ́ be engǝ́ esera adi ti mam, ba jan fwa adi be hwi kpèn,

¹⁸ ba fu be mokan a bu mo be ngge ano be ngǝ kwà, ga bwe ye be mò akan ra. Ba tu be ya modwa bu a ju, be ya modwa hon a ben ematswam.”

¹⁹ Atan a Yeso Etsodwe jan fwa ara fwa ngge be etsonchi mbwe ángá, bè ti ye vǝ́ chá kpe, vǝ́ chu chá budgo mo Ehwya.

²⁰ Kǝnggwa be etsonchi hon è vǝ́ a je nè kwa ara be nobǝ edgon mo Fwa Esese edum a tswagwa a tswagwa. Ehwya hon è bwe mochi ngge be nè tu ebi mo fwa mbwe a bè jan anga, a chu mo be moeditanm echa echa a be etsonchi hon è bwe anga.