Marku 11 - Etkwen New Testament

Yeso è Kwashi a Urishelima abu tì

¹ Abu bè bwa tén ara a Urishelima ángá, be bwangga a zǝn be eten nwofyan a bè fǝ́ anga Betafaji ngge Betani, e no a fù mo Hwì mo Zetu ángá. Yeso è tson be etsonchi mbwe fà chi,

² jan ne, “Nye kwashi a tswa eten nwofyan e no chafya mo nye nokǝ̀n, abu nye nyashi a tswa mo nó ángá, nya a di nwen jaki a be chà tón didi be nó ra, tè no a zǝn. Nye fken ti ye bwa ana.

³ Ano nobǝ akan ká nye eka, ‘Ano bwe a ge nye fken ye anga?’ Nye e jan ye, ‘Etsodwe nda nó anga, be ti twabǝ a bwa asuswana.’ ”

⁴ Bè shi nè di nwen jaki hon tè no a buetkwa mo fǝehwen akan a tón efǝ. Abu bè fken nó anga,

⁵ be ya è ywano a zǝn ángá è ká be eka jan, “Ano a nye bwe anga? Nye fken nwen jaki hon ángá?”

⁶ Bè jan be nobǝ hon mò a Yeso è jan be ángá, enona, be nobǝ hon è gwa be bè nya.

⁷ Atan a bè ti nwen jaki hon ti bwa Yeso ángá, bè kpu mo bwi a ju mo be kpu twà a chu nwen jaki hon kǝnggwa Yeso è chu a chu mo nó.

⁸ Be nobǝ embo è kpu mo bwi a ju mo be kpu twà a efǝ, be ya ehwyà è vǝngga be bu ebgyebgye mo be tumo etswa a tswavǝ́n kpu twà a efǝ gaten.

⁹ Be ya è no chafya ngge ya è ba ye anga è tandwa no jan anga, “Etanm no ḿ mo Ehwya!” “Esese no ḿ mo ende e nyabwa adi ti mo Etsodwe ángá!”

¹⁰ “Esese a zǝnotì mo ebǝ je Dawuda e nyabwa ángá!” “Etanm a ḿ mo Ehwya e no anga a kpe!”

¹¹ Yeso è bwangga a Urishelima nè kwashi a chuukwa mo Àtá mo Ehwya. Gè di ngàhwya gu be mò è no a zǝn ángá, tea adia nò e kpo ara ángá, bè gwa eten hon nè twabǝ ken a Betani ngge gwi chu fà hon.

Yeso è tso tu engǝtsǝn dwavǝ esera

¹² Zǝngga re, abu bè nyagwa Betani anga, mbe è fu Yeso anga.

¹³ A gè di chàkǝn tu engǝtsǝn akan ngge be ekpezǝmo a ju nó ángá, gè ken a chin mo tumo hon evǝa ge e di ti ara ano ga ben ga a ju nó. Atan a gè kengga a zǝn tumo hon ángá, gè ben ye ga a ju nó ra, adia engga hon, è fwa ye engga ga egwam mo tu engǝtsǝn ra.

¹⁴ Kǝnggwa, gè jan tú engǝtsǝn hon jan, “Nobǝ akan e de e didi be ga mbo efwe ra.” Be etsonchi mbwe è fo mò a ge jan ángá.

Yeso è nyonvǝ́ be yajwa a Àtá mo Ehwya

¹⁵ A bè kengga a Urishelima ángá, Yeso è kwashi a chuukwa mo Àtá mo Ehwya nè kwa ara be ya è jwade be mò anga ngge be ya è jwa be mò anga a zǝn ángá, enyom. Gè tsǝ fka nggwa be teboro mo ya è fwe tse anga, ngge be bò mo be ya è jwade be eba anga.

¹⁶ Gè cha ye dwa jan ende akan e tso mò jwa akan e kwashi a chuukwa mo Àtá mo Ehwya nè ken e vǝ́ a je chá akan mo nó ra.

¹⁷ Atan a gè tú be mò anga, gè jan be jan, “Be Fwaebam jan, ‘Ba fǝ Àtá mam, àtá mo ebgo mo be efi binbin.’ Tea nye bwe ye twanga no ara zǝn engǝ̀tonm mo be ya moebufkwam.”

¹⁸ Be Ekǝ́n echa ngge be etumo mo edon è fo fwa ena, nè kwa ara efwa endam abu be e gu ye, tea bè tsen ye anga adia binbin mo be nobǝ è no tàn moetum mbwe anga.

¹⁹ Edgó nò eni, Yeso ngge be etsonchi mbwe è nyagwa tswa eten efifi hon.

Tu engǝtsǝn hon ngǝfǝ ara

²⁰ Zǝn ngga re anofon tàtà, abu bè twabǝ nyaken Urishelima ángá, bè di tu engǝtsǝn hon è ngǝfǝ ara shingga a sen.

²¹ Bitru è kaben ara fwa a Yeso è jan tumo hon ángá, gè jan Yeso jan, “Etumo, di tu engǝtsǝn a wá tso ye dwavǝ esera ángá ngǝfǝ ara.”

²² Yeso è jan be etsonchi hon jan, “Nye e no ngge chaebi a chu Ehwya.

²³ M jan nye ebi anga, ano ende akan e tsen ye tsuruku ra, n no ngge chaebi, n tsǝ́ekǝ̀n jan mò a ge jan adi ebgo ángá a bwe, ga jan hwì ena, ‘Vǝ ana ken shin a kǝn. Mò hon a bwe a tén abu ge jan anga.’

²⁴ Enona, m jan nye, mò hon é ma engǝ ra a nye nda adi ebgo, nye tsǝ́ekǝ̀n jan nye ben fwa ara ye, mò hon a no ḿ mo nye.

²⁵ Atan a nye ywa etkyen evǝa nye e bgó ebgo, nye e gwa e no ende a nye no ngge fwa e so ángá, evǝa ate nye e no a kpe ángá gwa a no nye be ebgen mo nye gaten.” [

²⁶ Ano nye gwano nye be nobǝ be ebgen a be bwe ra, ate nye e no a kpe ángá gwa a no ye nye ra gaten.]

Bè ká Yeso eka a chu emwentì mbwe

²⁷ Efwe bè kwashi a Urishelima, atan a Yeso è no tku anga a tswa chuukwa mo Àtá mo Ehwya ángá, be Ekǝ́n echa, be etumo mo edon ngge be atkwen nobǝ è bwa a zǝn ye.

²⁸ Be ká ye eka jan, “Ngge emwentì ani a o bwe be mò a o bwe anga na? Ende e no o emwentì we ti e bwe be mò a o bwe anga na, a ara?”

²⁹ Yeso è jan, “Me e ká nye eka akan. Nye ma janfwe m, ma jan nye fwa a chu emwentì hon nwone a m ti bwe be mò ena anga.

³⁰ Ende éè no Yohana ya Batisǝma emwentì gè ti bwe be nobǝ batisǝma anga a ara, nye jan m, a Ehwya nè, a nobǝ?”

³¹ Bè pa nó e sojube nè jan, “Ano je jan, Yohana è ben nó a kpe, ga ká eka jan, ‘Ano bwe a ge nyè tsǝ nye ekǝ̀n a chu ye ra?’

³² Ja jan a yi ḿ mo je jan, gè ben nó a zǝn nobǝ?” (Bè tsen be nobǝ anga, adia egwa egwa è cha ara dwa jan Yohana è no efojan.)

³³ Enona, bè janfwe Yeso jan, “Je yi je ra.” Yeso è janfwe be jan, “Èé me, ma jan m nye abu m ben emwentì a m ti bwe be mò a m bwe anga na ra.”