Marku 10 - Etkwen New Testament

Yeso è tú mò a chu ben egum

¹ Kǝnggwa Yeso è nyagwa Kapanahum nè shi chá efa mo Yahudiya ngge chá notà mo Kǝn a Joda. Efwe be nobǝ embo è bwa a zǝn ye, gè tú be mò abu ge bwe bwi anga.

² Be Farisi ya ehwyà è bwa nda efǝ anga be e fu ye adi eka ekam, nè jan, “Edon mo je chadwa a ndedon e gu gwa ye ben?”

³ Yeso è janfwe be, “Edon a Mosa è no nye anga jan engǝ?”

⁴ Bè janfwe ye jan, “Mosa è cha ndedon dwa ge e bá afketa mo ben egum e no ndegwa hon, ge e nyo nó.”

⁵ Yeso è jan be jan, “Mosa è bá nó enò, adia tsuruku mo nye è cha fí re kpo.”

⁶ “Tea ekwafya a Ehwya è mmò be mò ángá, ‘Gè mmò ndedon ngge ndegwa.’

⁷ ‘Ena a mò e bwe, ndedon a gwa ate ye ngge ayi ye, n ken a fyàn a tan ngge gwa ye,

⁸ a be fà hon a nga amngo akan.’ Kǝnggwa, be fwa be fà efwe ra tea akan.

⁹ Enona, ende akan e fken e kwa ye mò a Ehwya bentan ara anga ra.”

¹⁰ Atan a bè no a àtá efwe ángá, be etsonchi è ká Yeso eka a chu fwa ena.

¹¹ Yeso è jan be jan, “Ndedon e nyo gwa ye n fǝ́ efki, bwe anga sen-eten a chu gwa ye ekwafya.

¹² Ano ndegwa twagwa don ye n nya don efki, ge bwe anga sen-eten a chu don ye ekwafya.”

Yeso è tso be mbǝgyashan dwavǝ esese

¹³ Be nobǝ è no kpu mbǝgyashan no bwa anga a zǝn Yeso evǝa ge e tu be bu a chu, ge e tso be dwavǝ esese, tea be etsonchi mbwe è tkyá be etkya jan, be e fa be Yeso ra.

¹⁴ Atan a Yeso è di mò è bwe anga, tsuruku mbwe è bgen ngge be etsonchi mbwe. Gè jan be jan, “Nye gwa be mbǝgyashan be e bwa a zǝn m, nye e jan e ngga nye be ra, adia zǝnotì mo Ehwya no ḿ mo be nobǝ yishwa be.

¹⁵ M jan nye ebi anga, ende e cha ye zǝnotì mo Ehwya abu nweshan bwe anga ra, a kwa a didi ye a zǝn ra.”

¹⁶ Kǝnggwa gè kan be mbǝgya hon akan akan a bu mbwe, nè tso be dwavǝ esese.

Ezon-ndedon yamo

¹⁷ Abu Yeso è ti ken nyaken efǝ ángá, ezon-ndedon akan è tse ken nggwa ekpanvǝ mbwe a sen chafya mbwe. Gè ká ye eka jan, “Etumo esese, mò e no kenm a me e bwe evǝa me e ben nya e no a fwa efwam ángá a ano?”

¹⁸ Yeso ká ye eka jan, “Ano bwe a ge o fǝ́ m esese? Nobǝ akan no ye esese ra, kpwà Ehwya tete.

¹⁹ O yi edon hon: We gu mbo nobǝ ra, we bwe mbo sen-eten ra, we zǝ́ mbo jú ra, we fe mbo fwafe a chu nobǝ ra, we bwe e de mo nobǝ ra. Digǝ̀n ate o ngge ayi o.”

²⁰ Ezon-ndedon hon è janfwe ye, “Etumo, binbin mo be edon ena, m̀ tke be etsem atan a m̀ chà no nweshan.”

²¹ Yeso è di ye ngge fǝzǝn edgyan, nè jan, “Mò akan dan shi, a o chà bwe mbo ra. Ken jwade gu be mobenben mbo, we ti mò a o ben ángá ti e no be ya ekan, wa no ngge mobenben a kpe. Kǝnggwa, bwa we ba m.”

²² Abu gè fo fwa a Yeso è jan ye ángá, fǝzǝn embǝgya mbwe è twafwe ara, gè nya a tswa tsuruku ebgenm adia gè no ngge mobenben àywá ángá.

²³ Yeso è twanga di be ya è ba ye anga nè jan be jan, “Ge no ngge ekan àywá a yamo ge e kwa a tswa zǝnotì mo Ehwya.”

²⁴ Fwa hon ena è kǝn be etsonchi mbwe nya. Tea Yeso è jan efwe, “Mbǝgya mam, ge no ngge ekan àywá yamo e kwa a tswa zǝnotì mo Ehwya.

²⁵ Ge shànfo tkyan a ge, a gwemo a be fǝ́ anga rakumi ge e kwa e vǝ́ adi edu mo ebgon-yi chàshín, a yamo ge e kwa a tswa zǝnotì mo Ehwya.”

²⁶ Fwa hon è zǝ̀ bishi be etsonchi hon ju, bè jan e sojube jan, “Ano ge no enò, ende e ben ega ángá a ara?”

²⁷ Yeso è di be nè jan, “Adi ḿ mo nobǝ, be bwe a ti be nó ra, tea fwa ye adi ḿ mo Ehwya ra. Be mò binbin no ebwetim a zǝn Ehwya.”

²⁸ Bitru è jan, “Di, je gwa gu ara be ḿ mo je, je bwa ba o.”

²⁹ Yeso è janfwe ye, “M jan nye ebi, ende nwone e gwa ara mbwe ye, be nwenjwa ye ndedon ngge be nwenjwa ye ndegwa, ngge ayi ye, ate ye, mbǝgya èé be sǝnsen mbwe a chu m, ngge a chu Fwa Esese,

³⁰ na ben ye be nwenjwa ndedon, be nwenjwa ndegwa, be yaà, be mbǝgya èé be sǝnsen, kè gwé akan kpwakpo chu mò a gè gwa ángá ra, fwa ye ra. Bi adia ga ngǝ ekan adi ekǝn ena ángá, tea adi ekǝn e nyabwa ángá, ga ben nya e no a fwa efwam ángá.

³¹ Be ya e no ti ara chu asuswana anga twabǝ a bwa a no ti ara nwofyan, tea be ya e no ti ara nwofyan asuswana ángá bwa a no chu.”

Yeso è jan adi e ta abu ga fǝ ángá

³² Abu be no efǝ nyaken a Urishelima ángá, Yeso è no chafya. Be etsonchi mbwe e no adi shwa ezǝzǝju ekam a chu be mò a gè tú anga ngge be nobǝ embo ya è ba be anga è no adi etsentsen àywá. Gè kpu be gwi chu fà hon ken a buetkwa efwe nè jan be mò a bwe ngge ge ángá.

³³ Gè jan, “Je nyavǝ́ a Urishelima, ba ti Nwen Nobǝ tsǝ a du a bu mo be Ekǝ́n echa ngge be etumo mo edon. Ba kpèn ye kǝ́nfǝ jan be e gu ye, na ti ye a du a bu mo be ya e yi be Ehwya ra.

³⁴ Ba jan ye aken chi, na tsǝ́ ye afǝtkwa, na bu ye akpan, na gu ye. Tsǝ ta chashin, ga nyi etkyen a dì angǝ.”

Mò ebgom mo Yakubo ngge Yohana a zǝn Yeso

³⁵ Kǝnggwa, Yakubo ngge Yohana mbǝgya ndedon mo Zabadi, è bwa tenten a zǝn Yeso, nè jan, “Etumo, je bgó anga we no je mò e no engǝ ra, a je ma bgó o.”

³⁶ Ge ká be eka jan, “Mò a nye nda me e bwe nye ángá a ano?”

³⁷ Bè janfwe ye, “Atan a wa chu a chu botì mbo ángá, akan mo je a chu chá budgo mbo, akan chá buhwyá mbo.”

³⁸ Yeso è janfwe be jan, “Nye yi nye mò a nye bgó anga ra. Nye bon a ti ekǝ̀n mo ekan a ma ngǝ ángá? Nya dgyan be nobǝ be bwe nye batisǝma mo ekan a ba bwe m ángá?”

³⁹ Be jan, “Je bwe a ti,” Yeso è janfwe be, “Eshwen, nya ngǝ ekan a ma ngǝ ángá ngge ba bwe nye batisǝma yishwa a ba bwe m ángá,

⁴⁰ tea echum chá budgo mam eno e ra chá buhwyá mam, fwa ye a bu m ra. Be zǝn eni no ḿ mo be ya Ehwya bwese nyi ara be ángá.”

⁴¹ Atan a be etsonchi gwi e dan shi ángá è fo fwa ena ángá, bè bgen tsuruku a chu Yakubo ngge Yohana.

⁴² Yeso è fǝ́ fǝn binbin mo etsonchi mbwe dwa nè jan, “Nye yi jan be chutì mo be ya e yi be Ehwya ra tswa be ekan anga. Be nobǝ echa mo be, tu emwentì anga a chu be.

⁴³ Ge e fwa ye enò a engga mo nye ra. Tea ende e dgyan ge e no egǝ̀ngǝ̀n a engga mo nye, ge no ye kenm ga bwe nye mochi anga a ge.

⁴⁴ Efwe ende e dgyan ge e no chu mo nye, kenm ga no fí mo nye binbin.

⁴⁵ Adia Nwen Nobǝ è bwa ye evǝa be e bwe ye mochi ra, tea ge e bwe be mochi ngge ge e ti nya mbwe e no efwe-echi a chu be nobǝ embo.”

Yeso è matswa Batimao ya fǝzǝn ebwibwi

⁴⁶ Kǝnggwa Yeso ngge be etsonchi mbwe è bwa a Jeriko. Abu bè nyagwa eten a Jeriko anga, be nobǝ embo embo è ba ye anga. Ya fǝzǝn ebwibwi akan, ti mbwe a Batimao (tú anga nwen mo Timao) è chuno bgó mò anga a buetkwa mo efǝ.

⁴⁷ Atan a gè fo jan a Yeso ya a Nazarati è twafǝ̀ nya ken a ge ángá, gè kwa ara dwa etànm jan, “Yeso Nwen Dawuda, di ashi m.”

⁴⁸ Be nobǝ embo è tkyá ye etkya jan ge e kpo nya, tea gè tangǝ́shi dwa jan, “Yeso Nwen Dawuda di ashi m.”

⁴⁹ Yeso è ndnya nè jan, “Jan ye ge e bwa.” Enona, bè fǝ́ ya fǝzǝn ebwibwi hon dwa jan, “Tsen mbo etsentsen ra. Nyi etkyen. Ge fǝ́ o dwa anga.”

⁵⁰ Gè twagwa mo bwi a ju mbwe a zǝn nè fǝ etkyen nè bwa a zǝn Yeso.

⁵¹ Yeso è ká ye eka jan, “Mò a o dgyan me e bwe o anga a ano?” Ya fǝzǝn ebwibwi hon è jan, “Etumo, m dgyan me e di zǝn efwe.”

⁵² Yeso jan, “Nya, chaebi mbo matswa ara o.” Kè akan gè kwa ara zǝn edim nè kwa ara Yeso ebam adi kèn hon.