Luka 9 - Etkwen New Testament

Yeso è tson be etsonchi mbwe gwi chu fà chí vǝ́ a je

¹ Nò kè akan, Yeso è fǝ́ fǝn be etsonchi mbwe gwi chu fà. Gè no be echakpo ngge emwentì, be e ti e nyo e vǝ́ e gu be engǝ́ esera ngge ematswam mo binbin mo be modwa.

² Gè tson be vǝ́ a je evǝa be e du edgon a chu zǝnotì mo Ehwya ngge ematswam mo be ya modwa.

³ Gè jan be jan, “Nye e ti nye mò akan adi kèn hon ra. Nye e ti nye etsǝ́n kèn, echo kèn, mode, tse ngge mokàn efki ra.

⁴ Mu a nye kwa ara, nye e no a zǝn, e ken e ngga nò a nye nya a gwa eten hon ángá.

⁵ Ano be ya eten hon cha be nye ra, nye e bu e kǝ́n abubwi a kpwafu mo nye, atan a nye nyagwa eten mo be hon anga. Ga no mò echi a chu be jan be segwa fwa mo Ehwya a be.”

⁶ No enona, bè ti kèn tkukwa be eten eten. Bè no du edgon a chu Fwa Esese mo Ehwya anga nè no matswa ya modwa anga, a zǝn a bè ken binbin.

Ezhinm mo Hiridu a chu Yeso

⁷ Atan a Tì Hiridu è fo fwa a chu be mò ebwikpe a Yeso è bwe anga, fwa hon è zhin ye tón àywá adia be nobǝ è jan anga jan, “A Yohana ya Batisǝma twabǝ bwa ara angǝ.”

⁸ Be ya ehwyà è jan anga jan, “A efojan mo Ehwya, Eliya twabǝ bwa ara angǝ, be ya ehwyà efwe è jan anga jan, a akan a engga mo be efojan mo Ehwya ekpe ekpe, twabǝ bwa ara angǝ.”

⁹ Tea Hiridu è jan, “M̀ kpecho ara chu mo Yohana ya Batisǝma, ende hon a ara efwe a m fo fwa ena anga a chu ye ángá?” No enona, gè nne tén ennem evǝa ge e di Yeso.

Yeso è fi be nobǝ echo chwen

¹⁰ Atan a be etsonchi hon è twabǝ bwa ara ángá, bè jantu gu Yeso mò a bè bwe ángá. Kǝnggwa, gè vǝ́ a je ngge be, be ken jujube a eten a be fǝ́ anga Betseda.

¹¹ Tea atan a be nobǝ embo è fo ara zǝn a gè no ángá, bè ba be ken a zǝn. Gè sha be, nè jan be fwa a chu zǝnotì mo Ehwya, nè matswa be ya è nda ematswam anga.

¹² A no è tén ara a ga di kǝn ángá, be etsonchi gwi chu fà hon è bwa a zǝn ye nè jan, “Du be nobǝ embo ena be e kwa e ken a tswa be eten nwofyan ngge be kpèn e dwana evǝa be e nda mode ngge echi zǝndwa, adia nobǝ dwano be a zǝn ena ra.”

¹³ Kǝnggwa è Yeso jan, “Nye e no be mode be e de.” Bè jan, “Mò e no a zǝn je ana kpwà borodi chwen ngge gwejo fà. O nda anga je e ken e jwa mode nwone a kǝn be nobǝ embo embo ena?”

¹⁴ (Be ndedon è no a zǝn ángá è kengga echo chwen.) Yeso è jan, “Nye jan be, be e chu e fǝn adi etso etso, egwa egwa mo etso hon e no be nobǝ gwi chwen.”

¹⁵ Bè bwe abu gè jan be ángá, binbin mo be nobǝ hon è chu a sen.

¹⁶ Yeso è kpu borodi chwen ngge gwejo fà hon, nè takpa di zǝkpe. Gè chwano Ehwya, nè bwìkwa borodi ngge gwejo hon, nwofyan nwofyan nè kpu no be ya è ba ye anga, be e kpu e tan e kwa be nobǝ.

¹⁷ Egwa egwa è de mbo abu gè dgyan ángá sangǝ́, be ya è ba ye anga è tefǝn gu be ebwibwi ya è dan ángá, è mbo esha gwi chu fà.

Fwa a Bitru è jan a chu Yeso ángá

¹⁸ Nò kè akan Yeso è bgó ebgo anga a buetkwa, be ya è ba ye anga è no ngge ge. Gè ká be eka jan, “Be nobǝ jan a me ma ara?”

¹⁹ Bè jan, “Be ya ehwyà è jan ne wa Yohana ya Batisǝma, be ya ehwyà jan ne wa Eliya. Be ya ehwyà efwe jan ne wa akan a engga mo be efojan mo Ehwya è no ekpe ekpe ángá, nyi ara etkyen a dì angǝ.”

²⁰ Kǝnggwa Yeso è ká be eka jan, “A nye wá, nye ka anga jan a me ma ara?” Bitru è cha ye dwa jan, “A bo wa Kristi, è vǝ a zǝn Ehwya bwa.”

Yeso è jan abu ga fǝ ángá

²¹ Yeso è twa be etsonchi e cha jan ne, be e jan tú e didi be, be nobǝ, ende a ge nó ángá ra.

²² Efwe gè jan, “Ge no ara jan, Nwen Nobǝ a ngǝ ekan mo be mò àywá. Be atkwen nobǝ, be Ekǝ́n echa ngge be ya e yi edon mo ya a Yahuda, a se a gwa ye. Ba gu ye. Tsǝnò adi e ta, Ehwya a ti ye a nyi etkyen angǝ.”

²³ Kǝnggwa, gè jan binbin mo be ya è no a zǝn ángá jan, “Ano ende akan dgyan ge e ba e bwi m anga, ga chadwa jan ge e ngǝ ekan a chu m nogwa nogwa, ge e ba m.

²⁴ Ende e dgyan ge e dgon nya mbwe, ga ben ye nó ra, ende e segwa nya mbwe a chu m, ga ben nó.

²⁵ Esese hon a ano, ano nobǝ ben gu be mò a zǝnchaje, n ben ye nya mbwe ra?

²⁶ Ano ende akan fu ebgenju a chu m ngge be mò a m tú anga, a me Nwen Nobǝ, ma fu ebgenju a chu ye èé me, atan a m twabǝ a bwa a tswa egǝ̀n mam ngge egǝ̀n mo Àtà hon, ngge ḿ mo be maleka echanwenwen hon ángá.

²⁷ M jan nye ebi anga, ya ehwyà mo nye e ywano ana, ba fǝ be ra, ba di egǝ̀n mo zǝnotì mo Ehwya sangǝ́.”

Ju etwafwem mo Yeso

²⁸ Tsǝnò chwen a ta, a Yeso jan fwa ara fwa ena ángá, gè tonvǝ́ a hwì evǝa ge e bgó ebgo a zǝn Ehwya. Gè kpu Bitru, Yohana ngge Yakubo vǝ́ ngge ge.

²⁹ Abu gè no bgó ebgo hon anga a zǝn Ehwya ángá, fǝzǝn embǝgya mbwe è twafwe ngge mokàn mbwe è twanga no etenten fon enó abu chu e mbǝgezǝ anga.

³⁰ Ekǝnggwa nobǝ fà, Mosa ngge Eliya, è mbwibwa a zǝn.

³¹ Bè mbwibwa a tswa egǝ̀n e se twafǝ̀ chu, nè no jan fwa anga ngge ge a chu abu ga gwa zǝnchaje ena nwone a dgyen ye fon ra, a be bwe a kǝ̀n nó a Urishelima ángá.

³² Bitru ngge be shushwa ye, è dwano adi dan. Tea atan a bè zǝ ara, bè di egǝ̀n mo Yeso ngge be nobǝ fà è ywano ngge ge.

³³ Atan a be nobǝ fà hon è kwa ara enyam ángá, Bitru è jan, “Yagwamo mu, ge se a je no ana, je e tsa be afku ta, akan a ḿ mbo, akan ḿ mo Mosa, ngge akan ḿ mo Eliya.” Gè yi ye mò a gè jan anga ra.

³⁴ A gè chà jan fwa hon anga, edwe è shwa bwipe be. Bè tsen etsentsen abu edwe hon è bwipe be no ángá.

³⁵ Aken è gwa a je a tswa edwe hon nè jan, “Ena a nwen m, eswavǝ mam, nye è fo ngge ge.”

³⁶ Atan a aken hon è kpo ara nya ángá, bè chà di Yeso no a ge jujuye. Be etsonchi ta hon è ti fwa ena nyi a tsuruku mo be, nè jantu didi be be nobǝ mò a bè di ángá atan enò ra.

Yeso è nyonvǝ́ engǝ́ esera a ju nwen ndedon

³⁷ Zǝngga re, atan a Yeso ngge be etsonchi è twabǝ shwa ara a sen mo hwì ángá, be nobǝ embo embo è bwa ben ye.

³⁸ Ekǝnggwa, ende akan è fǝ́dwa a tswa engga mo nobǝ embo hon jan, “Etumo, m bgó o anga, di ashi mo nwen ndedon mam ena, nwen m kpwà a ge tete.

³⁹ Engǝ́ esera bu kpo bwi ye anga, kè akan ga tandwa, n vǝ ywakon ye, emme a bu ye, ga kpì efǝn a kpevǝ. Ge gwa mya ye ye anga ra, n dì ye ju anga.

⁴⁰ M̀ bgó be ya e ba o anga, be e ti e vǝ́ engǝ́ esera hon, be bwe ti be nó ra.”

⁴¹ Yeso è jan, “A nye be nobǝ ya e tsǝ́ be ekǝ̀n ra ngge ya mofǝ̀ mo ekpengga ena. Ken a ngga abu atan engǝ, a ma no ngge nye? Ken a ngga abu atan engǝ, a ma bon-ekǝ̀n ngge nye? Ti nwen o hon bwa ana.”

⁴² Abu nwen hon è bwa tén ara a zǝn Yeso ángá, engǝ́ esera hon è bu ye kpo a sen, nè ywakon gu re ye. Ekǝnggwa, Yeso è kpón engǝ́ esera hon dgyén, gè matswa nwen hon nè ti ye ti no ate ye.

⁴³ Binbin mo be nobǝ è tàn ebwikpe abu bè di mò echakpo echa mo Ehwya ángá. Atan a be nobǝ binbin è chà ka tashwa anga a chu mò ebwikpe a Yeso è bwe na, gè jan be ya è ba ye ángá jan,

Yeso è jan adi e fà abu ga fǝ ángá

⁴⁴ “Nye e bu e seshi tón adi fwa a ma jan na. Ba tsǝ a du Nwen Nobǝ a bu mo be nobǝ.”

⁴⁵ Tea be ya hon è ba ye anga è foyi be fwa a Yeso è jan be anga ra, engà mo fwa hon è no engǝ̀tonton a zǝn be, enona, bè hwayi be nó ra. Bè tsen etsentsen, be e ká Yeso eka a chu mo nó.

Ende e gǝ̀n ti ara a ara?

⁴⁶ Bè kwa ara efyan etwam e sojube a chu mo ende a gǝ̀n ti ara a engga mo be ángá.

⁴⁷ Adia Yeso è yi ara mò a be ka anga, gè ti nweshan ywa tenten ngge ge.

⁴⁸ Gè jan be jan, “Ende e cha nweshan ena anga adi ti mam, cha anga a me, ende e cha m anga, cha anga ende nwene è tson m bwa ángá. Ende e ngǝ ti ara chu mbwe a sen a engga mo nye ángá, a gǝ̀n ti ara a ge.”

⁴⁹ Yohana è jan Yeso jan, “Yagwamo mu, jè di ende akan è tivǝ́ engǝ́ esera anga adi ti mbo, jè tkyan je e jan e ngga ye adia gè fwa ye akan a engga mo je ra.”

⁵⁰ Kǝnggwa Yeso è jan, “Nye e jan e ngga nye ye ra, adia ende e twa ye ese ngge nye ra, a ḿ mo nye.”

Be ya eten a Samariya è twa ese ngge Yeso

⁵¹ A no è tén ara a Yeso twabǝ a vǝ́ a kpe ángá, gè nyi tén a tsuruku mbwe ga ken a Urishelima.

⁵² Yeso è tson be etsonchi mbwe ya ehwyà be e kwafya a ken a tswa eten nwofyan mo ya a Samariya, evǝa be e té fuchin mo be mò e nyi e bá ye.

⁵³ Tea, be ya eten nwofyan hon è cha be dwa a Yeso ge e bwa ra, adia gè du ara chu mo ekenm chá Urishelima ángá.

⁵⁴ Atan a be etsonchi mbwe Yakubo ngge Yohana, di enò ángá, be ká Yeso eka jan, “Etsodwe, o dgyan je e fǝ́dwa fǝ̀ e shwa chá kpe, ne de e tkò e gu be?”

⁵⁵ Tea, Yeso è twanga nè tkyá be etkya adi fwa a bè jan na.

⁵⁶ No ara enona, bè nya ḿ mo be adi kèn mo be chá eten efki.

Ende e nda anga ge e ba Yeso ángá

⁵⁷ Abu Yeso ngge be etsonchi mbwe è nyaken a efǝ ángá, ende akan jan Yeso, “Ma ba o, a ken chá engǝ ra a o ken anga.”

⁵⁸ Yeso è jantu ye, “Be kwàkpan no ngge be edu a be dwa anga a zǝn, be nwendnye no ngge be afku mo be, tea Nwen Nobǝ hon fwa ye ngge zǝn a ga dwa ra.”

⁵⁹ Beti bishi, Yeso jan nobǝ efki jan, “Bwa ba m.” Nobǝ hon è janfwe ye jan, “Etsodwe mam, gwa m, me e kwafya ken e di àtà m sangǝ́.”

⁶⁰ Yeso è jan ye jan, “Gwa be ya e fwa be ngge ega efwe ra, be e di sojube, a bo ken du edgon a chu fwa mo zǝnotì mo Ehwya.”

⁶¹ Efwe nobǝ efki è jan, “Etsodwe mam, ma ba o, tea gwa m me e ken e dwa be ya kpenmu mam kèn sangǝ́.”

⁶² Yeso è jan ye jan, “Ende e ti kpwabu mbwe fu ara adi keke mo wá ewam, n fǝ̀n shwa n di zǝn anga chashin, chà kǝn ye ge e kwa a tswa zǝnotì mo Ehwya ra.”