Luka 8 - Etkwen New Testament

Be ndegwa ya éè ken anga ngge Yeso ángá

¹ Dgyen ye fon ra, Yeso è tkukwa gu be eten efifi ngge be eten nwofyan, gè no jan Fwa Esese a chu zǝnotì mo Ehwya anga. Be etsonchi mbwe gwi chu fà è no ngge ge,

² tangge be ndegwa ya ehwyà ya a gè matswa be modwa nè nyonvǝ́ be engǝ́ esera a ju be ángá. Be ya hon a, Meri (a bè fǝ́ ye anga, Magadala), a Yeso è nyonvǝ́ ye engǝ́ esera chwen a fà ju ángá.

³ Be ya ehwyà, a Yuwana nwene a don ye Kuza, è dgon atkimo mo Hiridu anga, ngge Suzana; ngge be ndegwa embo efki. Binbin mo be ndegwa ena è bwe Yeso ngge be etsonchi mbwe mochi anga, ngge be atkimo mo be.

Hufwa a chu fwento etwam

⁴ Atan a be nobǝ embo ya è vǝ chá be eten efki efki, bwa fǝnno a zǝn Yeso ángá, gè tso be hufwa ena,

⁵ “Yawa akan è vǝ́ a je evǝa ge e twa fwento mbwe. Abu gè no twa fwento anga, be fwento ehwyà è nggwa kpo efǝku, be nobǝ è cha fù ken a chu be ngge be nwendnye è bwa kpe de gu be.

⁶ Ya ehwyà è nggwa a chu sǝnsen ago, atan a bè vǝ́ gwa ara a je ángá, dgyen ye fon ra, bè ngǝ́ fǝ ara, adia bè ben be mbǝ ra.

⁷ Ya ehwyà è nggwa a tswa mo be evi, abu bè cha nyavǝ́ ángá, be evi hon è kpafu be, nè fupe be.

⁸ Efwe, be ya ehwyà è nggwa adi sǝnsen esese, bè vǝ́ gwa a je, chambo nè gwa be ga àywá, gwé kè akan (100) mo fwento a gè twa ángá.” A gè jan fwa ara fwa ena ángá, gè jan ngge echafǝju jan, “Ende e no ngge tón mo fwa efom, ge e fo.”

⁹ Be ya è ba Yeso anga è ká ye eka mo engà mo hufwa hon.

¹⁰ Yeso è janfwe be jan, “Be no ara nye efwa, mo eyim mo mò engǝ̀tonton a tswa zǝnotì mo Ehwya, tea be ya ehwyà m jan kpwà be nó adi hufwa, evǝa, “ ‘Ba didi, n diyi a se be nó ra; ba bu tón bu bu, n fo a yi be nó ra.’

¹¹ “Ena engà mo hufwa hon: Fwento hon a fwa mo Ehwya.

¹² Be fwento éè nggwa efǝku ángá no abu be nobǝ ya e fo fwa mo Ehwya, Shetan bwa kpu ara fwa hon a tsuruku mo be, afwa ba tsǝ́ekǝ̀n abu Ehwya e ti e vǝ́ be.

¹³ Be fwento è nggwa a chu sǝnsen ago ángá, no abu be nobǝ ya e fo fwa mo Ehwya hon n cha nó ngge vǝtsen. Tea adia be fwa be ngge kpwà evǝnvǝn a tsuruku mo be ra ángá, be tsǝ́ekǝ̀n mo ekpengga nwofyan. Atan a be kwa ara a tswa embwadi, be vǝ́ eshin myan myan.

¹⁴ Be fwento ya è nggwa a tswa evi ángá, no abu be nobǝ ya e fo fwa mo Ehwya, tea abu be no zǝno mo be anga, ju emam ngge edgyan mo tse ngge etkwa efom mo zǝnchaje ena bwe be, be chambo be ra.

¹⁵ Tea be fwento ya è nggwa adi sǝnsen esese ángá, no abu be nobǝ ya e fo fwa mo Ehwya hon, n fungǝ́shi nó ngge tsuruku mo be, be bon-ekǝ̀n n gwa be ga.

Hufwa a chu mo petila

¹⁶ “Nobǝ a ton ye petila ti a nyi ye a ta mo hwa ra, ga ti nó a nyi ye a ta mo zǝndwa ra gaten. Ga ti nó a tu adi echizǝno mo nó evǝa be ya e kwa a shi a mu hon, a di zǝn no enggasansan.

¹⁷ Mò e no engǝ̀tonton asuswana ángá, nwone a ba jan nó a gwa be a je ara, fwa ye ra, mò e no etwapepe asuswana nwone a ba yi be nó ra, eno e ra a be ti a gwa be a je ra, fwa ye ra.

¹⁸ Adi enò, nye e bu e seshi tón. Ende e no ngge mò, be tu a bi ye, ende e fwa ye ngge mò ra, èé nwofyan a ge no ngge nó ángá ba cha ti ara nó.”

Ayi Yeso ngge be nwenjwa ye è bwa abu be e di ye

¹⁹ Nò kè akan, ayi Yeso ngge be nwenjwa ye è bwa evǝa be e di ye, nè diben be ye ra, adia be nobǝ e mbo shi zǝn hon no ángá.

²⁰ Ende akan è jan ye jan, “Ya mbo ngge be nwenjwa o ywano a je, be nda anga be e di o.”

²¹ Yeso è janfwe be jan, “Ya m ngge be nwenjwa m, a be ya e fo fwa mo Ehwya n bwe mochi anga ngge nó ángá.”

Yeso è kpón fyochu dgyén jan ne kpo nya

²² Nò kè akan, Yeso è jan be etsonchi mbwe jan, “Je e vǝ́ jengǝ̀ mo edan ena.” Kǝnggwa bè kwa a tswa ngga nè kwa ara enyam.

²³ Abu bè no nyi ngga hon anga, gè kwa ara dan edwam. Fyochu echakpokpo è no kpo bwa anga chafya mo be, nè du mbǝ è no fǝ́ nggwashi anga a tswa ngga hon, nè du be a tswa etí echa.

²⁴ Be etsonchi mo Yeso è ken fǝ́zǝ ye nè jan, “Yagwamo mu, Yagwamo mu, ja fǝ.” Enona, gè nyi etkyen nè kpón fyochu ngge mbǝ hon éè fǝ́ anga dgyén. Fyochu hon è ngǝ ju, zǝn hon binbin è tswa gushi dgye enó

²⁵ Ekǝnggwa gè ká be etsonchi mbwe eka jan, “Chaebi mo nye no a che?” A tswa mo etsentsen a chu moeditanm ena, bè kwa ara sojube eka ekam jan, “Ende hon ena a ara? Gè kpón èé fyochu ngge mbǝ dgyén, be tse ye.”

Yeso è matswa ndedon akan éè no ngge engǝ́ esera a ju ángá

²⁶ Yeso ngge be etsonchi mbwe è kwa ngga ken a efa mo Garisana nwone e no jengǝ̀ chá akan mo Edan a Galili ángá.

²⁷ Abu Yeso è tón vǝ́ re a etu a tón mbǝ hon ángá, ndedon akan, è no ngge engǝ́ esera a ju a eten hon, è bwa ben ye. Ende hon è dgyen ara fon nè nggwa ye adanmo anga a ju ra, nè dwa ye a àtá anga ra, Gè no kpwà a afku dì.

²⁸ Atan a gè di Yeso ángá gè tandwa nè kposhi a sen chafya mbwe, nè tandwa ngge echakpo jan, “Mò a o nda anga a zǝn m ángá a ano, Yeso, Nwen mo Ehwya e Gǝ̀n ti ara? M bgó o anga we tswa m ekan ra.”

²⁹ Gè jan enò adia Yeso è du ara engǝ́ esera hon ge e vǝ́ a je a ju ye. Adia kè embo engǝ́ esera hon è twafǝ̀ chu ye. Bè hwya ye ehwyatu nè hwyafu ye bu ngge fù tan ngge be awya evǝa be e dgon ye. Bi adi enò engǝ́ esera hon è no du ye gè kǝnten be awya hon nè ken no anga a tswavǝ́n jujuye.

³⁰ Yeso è ká ye eka jan, “Ti mbo a ara?” Gè janfwe Yeso jan, “Etso”, adia be engǝ́ esera hon è kwa no ye a ju ángá è no embo.

³¹ Kǝnggwa, be engǝ́ esera hon è no bgó Yeso anga jan ge e nggwa be, e shi ye a tswa zǝn evǝnvǝn ra.

³² Be etso mo efika embo, è tku de mò ken anga a buetkwa mo hwì a zǝn. Be engǝ́ esera hon è bgó Yeso jan ge e gwa be, be e kwa e shi a tswa mo be efika hon. No enona, gè cha be dwa.

³³ Atan a be engǝ́ esera hon è vǝ́ ara a je a ju ndedon hon ángá, bè kwashi a ju be efika hon, enona, be etso mo efika hon, è tse ken kposhi a tón evuru evǝnvǝn mo edan hon nè fǝ gu a zǝn.

³⁴ Atan a be ya è dgon be efika hon è di mò e bwe na, bè tse ken jan be nobǝ a tswa eten efifi ngge nwofyan a buetkwa.

³⁵ Be nobǝ embo è vǝ́ a je evǝa be e di mò è bwe ángá. Atan a bè bwa a zǝn a Yeso ángá, bè di ende a bè nyonvǝ́ engǝ́ esera a ju ye ángá, è chuno a ta fù mo Yeso a tswa adanmo a ju ye a tswa tsuruku adgye, bè tsen etsentsen.

³⁶ Be ya è di ara mò è bwe ángá, è jan be nobǝ abu ndedon hon è ben e ematswam mbwe ángá.

³⁷ Echukǝnggwa, binbin mo be nobǝ a sǝnsen mo Garisana è bgó Yeso jan ge e nya e gwa be, adia etsentsen è bwipe ara be ángá. No enona, gè nyi etkyen nè kwa ngga a mbǝ nè nya m̀ mbwe.

³⁸ Ende hon a bè nyonvǝ́ engǝ́ esera hon a ju ye ángá, è bgó Yeso jan ga ba ye. Tea Yeso è cha ye ye dwa ra, nè jan ye jan,

³⁹ “Twabǝ ken a mu, we jan be, binbin mo be mò a Ehwya bwe o ángá.” Enona, ndedon hon è nya nè ken jantu gu be a tswa eten hon, mò a Yeso è bwe ye ángá.

Yeso è fǝ́zǝ nwen ndegwa bwa angǝ nè matswa ndegwa akan

⁴⁰ Ekǝnggwa atan a, Yeso è twabǝ gwa ara jengǝ̀ mo edan hon ángá, be nobǝ embo ya è nobà ye anga, è sha ye.

⁴¹ Ndedon akan, bè fǝ́ ye anga Jayiru, éè no chu mo àtá chuefǝnm akan ángá, è bwa nggwa ekpanvǝ mbwe a sen a chafya mo Yeso. Gè bgó nó ngge vǝ edonm jan, nè ken a mbwe ye,

⁴² adia nwen ye akan tete, ndegwa, je mbwe è no gwi chu fà, è no adi modwa abu ga fǝ. Abu Yeso è nyaken ngge ge ángá, be nobǝ embo è no fa ye anga àywá.

⁴³ Ndegwa akan è no a tswa be nobǝ embo hon, nwene a ngǝ è no vǝ́ ye anga mo je gwi chu fà, nobǝ akan è matswa ti ye ye ra.

⁴⁴ Gè bwa chashin mo Yeso nè bwa yi bu a tón mo mokàn mbwe, kè akan, ngǝ evǝ́m mbwe hon è kǝ̀n ti ara.

⁴⁵ Yeso è ká eka jan, “Ende e yi m a ju ángá a ara?” Atan a bè twa gu efyan mo nó ángá, Bitru è jan, “Etsodwe, be nobǝ embo ngàhwya o chagwa chagwa, n no fa o anga.”

⁴⁶ Tea Yeso è jan, “Eshwen, ende akan yi m a ju. M yi adia echakpo vǝ́ a je a ju m.”

⁴⁷ Kǝnggwa, ndegwa hon è yi ara jan ge ngǝ̀ton a ti ye ra, a tswa emme ebum, gè bwa nggwa ekpanvǝ mbwe chafya mo Yeso. Gè jan a chafya mo be nobǝ binbin ya è no a zǝn ángá, mò è bwe gè yi Yeso a ju ngge abu gè ben ematswam kè akan ángá.

⁴⁸ Yeso è jan ye, “Nwen m ndegwa, chaebi mbo matswa ara o, ken a tswa adgye.”

⁴⁹ Yeso è chà jan fwa anga, ende akan è vǝ a mbwe Jayiru, chu mo àtá chuefǝnm hon, bwangga re. Gè jan Jayiru jan, “Nwen o ndegwa hon fwa ye ara. We fa mbo etumo efwe ra.”

⁵⁰ A gè fo enò ángá, Yeso è jan Jayiru jan, “We tsen mbo etsentsen ra, tsǝ́ekǝ̀n kpwà ara, ga ben ematswam.”

⁵¹ Atan a Yeso è bwangga ara a mu Jayiru ángá, gè cha ye dwa ende akan e kwa e shi ngge ge a tswa àtá ra, kpwà Bitru, Yohana, Yakubo ngge ate mo nwen hon ngge ayi ye.

⁵² Atan enò, be nobǝ ya è no a zǝn ángá, è no tandwa nè kǝndwafǝ anga a chu nwen ndegwa hon. Yeso è jan be jan, “Nye e kpo nya dwafǝ ekǝnm, ge chà fǝ ye ra, ge dwa anga dan.”

⁵³ Bè tson ye tsen, adia bè yi jan gè fǝ ara ángá.

⁵⁴ Yeso è fu nwen hon bu nè jan, “Nwen m, nyi etkyen.”

⁵⁵ Engǝ́ mo nwen hon è twabǝ bwa, gè nyi etkyen kè akan. Kǝnggwa Yeso è jan be jan be e no nwen hon mò, ge e de.

⁵⁶ Ate ye ngge ayi ye è tàn ebwikpe àywá a chu moeditanm hon. Tea Yeso twa be echa jan ne, be e jan e tú be ende akan mò e bwe na ra.