Luka 7 - Etkwen New Testament

Yeso è matswa fí mo yakàn mo Roma

¹ Atan a Yeso è jan fwa ara fwa ena ngge be nobǝ ya è fo ye anga, gè ken a Kapanahum.

² Ekpondgyen mo yakàn è no a zǝn. Gè no ngge fí mbwe a gè dgyan àywá, fí hon è dwano a sen adi modwa abu ga fǝ.

³ Atan a Chu mo yakàn hon ena è fo etkyen mo Yeso ángá, gè tson be atkwen nobǝ mo be ya a Yahuda ya ehwyà be e ken e bgó ye, evǝa ge e bwa e ma a tswa fí mbwe.

⁴ Abu bè kengga a zǝn Yeso ángá, bè bgó ye ngge vǝ edonm jan, “Ende ena kǝn ara, we bwe e jwa ye,

⁵ adia ge dgyan yamuje anga, gè mbwe je àtá chuefǝnm mo je.”

⁶ Enona, Yeso è nya ngge be. Atan a gè ten ara a mu Chu mo yakàn hon ángá, gè tson be shushwa ye, be e ken e jan Yeso jan, “Etsodwe, we du mbo chu o adi ekan ra. M chà kǝn m we bwa a mbwe m ra.

⁷ Eni a mò e bwe m ka jan m kǝn m me e bwa a zǝn o ra. Jan fwa kpwà ara, fí mam a ben ematswam.

⁸ M jan enò anga, adia m no a bu mo yagwamo mu, m no ngge yakàn a bu mam. Ano m ma jan akan, ‘Nya, ge nya anga; ano m jan akan, bwa, ge bwa anga; ano m jan fí mam, bwe mò ena, ge bwe nó anga.’ ”

⁹ Atan a Yeso è fo fwa ena ángá, gè tàn ebwikpe nè twanga jan be nobǝ ya è ba ye anga jan, “Mè jan nye, m chà ben didi m ende e no ngge chaebi echakpokpo abu nobǝ ena, èé a tswa engga mo be ya a Esǝrela ra.”

¹⁰ Abu be shushwa chu mo yakàn hon è twabǝ ken ara a mu ángá, bè di fí hon ben ara ematswam.

Yeso è fǝ́zǝ nwen gwafǝ́n bwa angǝ

¹¹ Dgyen ye fon ra, Yeso è ken a eten a bè fǝ́ jan Nayin, be etsonchi mbwe ngge nobǝ embo è ken ngge ge.

¹² Atan a Yeso è ken tén ara a fǝtsǝmo mo eten hon ángá, gè ben be ya ehwyà è tso (etwàkǝn) kǝn nobǝ akan nyagwa a je. Engǝfǝ hon è kpwà ti a ge tete, nwen ndedon mo ayi ye, ayi ye hon è no gwafǝ́n. Be nobǝ embo è du gwafǝ́n hon nyagwa a je.

¹³ Atan a Etsodwe è di ndegwa hon ángá, gè di ashi mo nó, nè jan ye jan, “Kpe mbo dwa ra.”

¹⁴ Kǝnggwa, gè ken yi bu adi etwàkǝn hon. Be ya è tso nó no ángá è ndnya gwa ara. Yeso è jan, “Enwen etsàn, m jan o, nyi etkyen.”

¹⁵ Kǝn nobǝ hon è zǝbwa angǝ nè chu shi etkyen, nè kwa ara fwa ejanm. Kǝnggwa, Yeso è fu ye bu ti no ayi ye.

¹⁶ Binbin mo be ya è no a zǝn ángá, è tsen etsentsen, nè no tàn Ehwya anga n jan, “Eshwen, efojan echa mo Ehwya bwa ara a tswa engga mo je. Ehwya shwa ara ge e fken e gwa be nobǝ mbwe.”

¹⁷ Etkyen mo Yeso è kpò ken gu a sǝnsen mo Yahudiya ngge be efa mo nó binbin.

Yohana ya Batisǝma è tson be etsonchi mbwe chí ken a zǝn Yeso

¹⁸ Be ya è ba Yohana ya Batisǝma è jan ye binbin mo be mò a Yeso è bwe anga. Kǝnggwa, gè fǝ́ be nobǝ fà a engga mo be dwa,

¹⁹ gè tson be ken a zǝn Etsodwe evǝa be e ká ye eka jan, “A bo wa ende e nyabwa nè, eno e ra, je e ka shwa mo nobǝ efki?”

²⁰ Atan a be ya è ba Yohana ya Batisǝma è bwa a zǝn Yeso ángá, bè jan, “Yohana ya Batisǝma tson je a ge bwa a zǝn o, jan je e ká o eka jan, ‘A bo wa ende e nyabwa nè, eno e ra, je e ka shwa mo nobǝ efki?’ ”

²¹ Atan a enò Yeso è matswa ara be ya è dwa ngge be modwa, be atkigwa embo, ngge be ya è dwa ngge engǝ́ esera, nè bwe be ya fǝzǝn ebwibwi embo di zǝn anga.

²² Yeso è janfwe be ya Yohana è tson bwa ángá jan, “Nye twabǝ nya, ken jan ye fwa a chu mo mò a nye di ngge mò a nye fo ángá. Be ya fǝzǝn ebwibwi di zǝn ngge be ya ebǝbǝfu kenkèn anga, be ya modwa-ehwyá ben ematswam, be ya è ke ara tón ángá fo fwa, be engǝfǝ nyi etkyen a dì angǝ ngge be ti Fwa Esese ti jan be ya ekan.

²³ Esese a ende e vǝ ye eshin a chu m ra.”

²⁴ Atan a be ya è ba Yohana è nya ara ángá, Yeso è kwa ara be nobǝ fwa ejanm a chu mo Yohana jan, “Ende a nye vǝ́ a je, nye ken di a tswavǝ́n ángá a ara? Be gwakan a fyo kpo ken enò ken enó anga?

²⁵ Eno e ra, mò a nye vǝ́ di ángá a ano? Nobǝ e tsàn ju ye ngge mokàn mo tse àywá ángá? É yé. Be nobǝ ya e tsàn mokàn mo tse n fo etkwa anga, no anga a tem̀ mo tì.

²⁶ Ano a nyè vǝ́ di a je? Efojan mo Ehwya? Enò, me e jan nye, ge twafǝ̀ efojan mo Ehwya.

²⁷ Ga ende a bè bá mò a chu ye jan, “ ‘Ma tson etsonchi mam a kwafya mbo, nwene a bwe a se efǝ a nyi o ángá.’

²⁸ M jan nye anga, nobǝ a ndegwa mbwa a ge binbin, e tkyan Yohana ya Batisǝma ángá fwa ye ra. Èé enò, ende e no ti ara nwofyan adi zǝnotì mo Ehwya ángá tkyan Yohana.”

²⁹ Nobǝ binbin ya è no a zǝn ángá, èé ngge be ya e cha tse-eten anga è fo mò ena ángá, bè chadwa jan efwa mo Ehwya no ebi (adia gè jan be e twa etwa ángá), adia Yohana è bwe be batisǝma a ge ángá.

³⁰ Tea be Farisi ngge be etumo mo edon mo Ehwya è se be e cha mò a Ehwya è panyi be ángá, adia bè se Yohana, ge e bwe be batisǝma a ge.

³¹ Yeso è jan bishi be jan, “A ngge ano a m ti a mbwà a di be nobǝ e no asuswana? Be no engǝ?

³² Be no abu mbǝgya ya e chudwa, n no shi eshishi anga a afyan jwa e fǝ́ so dwa jan, “ ‘Je to bga mo esǝ, nye ge nye ge ra, je twa bón fǝ, nye kǝn nye dwafǝ ra.’

³³ “Yohana ya Batisǝma è bwa, nè de ye borodi ra, nè ngǝ ye mbǝ enabi ra, nyè jan, ‘Ge no ngge engǝ́ esera.’

³⁴ Asuswana, Nwen Nobǝ bwa n de n ngǝ anga. Nye jan, ‘Ge no ya de ngge ya mbǝ engǝfǝ́m. Ge bwe edwe shushwa ngge be ya e cha tse-eten anga ngge be nobǝ efki, be ya ebgen abu be.’

³⁵ Enona, enggaton a Ehwya no be nobǝ anga, tú chu ye anga adi mò a be nobǝ hon bwe anga.”

Abu ndegwa akan e nggwa Yeso byi a kpwafu ángá

³⁶ Nobǝ akan adi etso mo Farisi, è fǝ́ Yeso dwa jan ge e ken a mbwe ye evǝa be e de mode abibi. Enona Yeso è ken a mbwe nobǝ hon nè chu, abu be e de mode hon a chu mo teboro.

³⁷ A tswa eten hon ndegwa ya ebgen akan è no a zǝn. Gè fo jan Yeso de mode anga a mbwe Farisi akan. Gè ti byi mo tse àywá, e no ngge yoben adi etsǝn a bè mbwe ngge yishwa ten a bè fǝ́ anga alabasǝta, è no mbǝgezǝ anga.

³⁸ Gè bwa ywa a chashin mo Yeso tenten a zǝn kpwafu mbwe, nè no kpedwa anga. Engǝ a fǝzǝn mbwe è nggwa pya gu kpwafu mo Yeso. Gè fwe ngǝ́ be ngge zan-a-chu mbwe, nè mmo kpwafu hon nè nggwa ye byi yoben hon a kpwafu evǝa ge e tsǝ̀ e pe be.

³⁹ Atan a Farisi è fǝ́ Yeso dwa ángá è di mò a ndegwa ena bwe ángá, gè ka a tashwa mbwe jan, “Be è jan ende ena é no tén efojan mo Ehwya eshwen, ge é yi ara abu ndegwa e yi ye a ju na no ángá, ge é yi ara jan, ndegwa hon a ya ebgen.”

⁴⁰ Yeso è jan ya Farisi hon jan, “Sima, m nda anga me e jan o fwa.” Sima è janfwe ye, “Etumo jan m̀ mbo, m fo o anga.”

⁴¹ Kǝnggwa, Yeso è jan, “Be nobǝ fà è cha kpo a zǝn nwene éè no kpo ángá. Ende akan a tswa engga mo be, è cha kpo mo tse dinari gwé chwen. Adi e fà è cha dinari gwi chwen.

⁴² Ende akan a engga mo be nwene è kpwa ti kpo hon ángá è fwa ye ra. No enona, ya kpo enom hon è gwano be nó. Abu ge no na, a tswa engga mo be nobǝ fà ena, ende nwene a dgyan ye a tkyan ángá, a ara?”

⁴³ Sima chadwa jan, “M ka anga ende è cha kpo àywá ángá.” Yeso jan ye, “O jan ebi.”

⁴⁴ Yeso è twanga ken chá ndegwa hon nè jan Sima, “O di ara ndegwa ena? Atan a ḿ kwa bwa a mbwe o ana, o no m mbǝ me e na fù mam ra. Ndegwa ena nggwa pya fù mam ngge engǝ a fǝzǝn mbwe n fwe nó ngge zan-a-chu mbwe.

⁴⁵ O mmo mbo vǝ mam abu moefì mo je tú anga ra. Tea abu ḿ kwa bwa a mbwe o ana, ndegwa ena no mmo m fù anga.

⁴⁶ O nggwa m byi a chu evǝa we tsǝ̀ e pe m ra. Ndegwa ena nggwa m byi yoben a kpwafu.

⁴⁷ No enona m jan o, be gwano ara ye be ebgen mbwe àywá, adia ge tú ara m edgyan àywá. Ende a be gwano ara ye ebgen nwofyan, a edgyan nwofyan a ge tú anga.”

⁴⁸ Kǝnggwa Yeso è jan ndegwa hon jan, “Be gwano no ara o be ebgen mbo.”

⁴⁹ Kǝnggwa be nobǝ ya è de mode anga ngge ge ángá è jan e sojube jan, “Ende ena a ara, e gwano èé be ebgen anga?”

⁵⁰ Yeso è jan ndegwa hon jan, “Chaebi mbo tivǝ́ ara o, ken a tswa adgye.”