Luka 6 - Etkwen New Testament

Yeso no Etsodwe mo Nò nya Etkem

¹ Nò nya Etkem mo ya a Yahuda, Yeso è twafǝ̀ nyaken ngge be etsonchi mbwe a tswa wa alkama, be etsonchi mbwe hon è no bǝ chu mo alkama hon ti chin a bu mo be nè ti be fwen mo nó kǝ́n anga.

² Be ya Farisi ya è no a zǝn ángá è ká be eka jan, “Ano bwe a ge nye bwe mò nwone a edon cha ye je dwa je e bwe Nò nya Etkem ra anga?”

³ Yeso è janfwe be jan, “Nye chà ká nye mò a Dawuda è bwe, atan a a ge ngge ya a bè no abibi è bwe, atan a mbe è fu be ángá ra?

⁴ Gè kwashi a Àtá mo Ehwya nè ti borodi a bè tsǝ̀pe nyi ara, kpwà be ekǝ́n a de nó a be, nè ti de. Gè no èé be ya a bè no abibi ángá borodi hon.”

⁵ Efwe ge twanga jan be jan, “A me Nwen Nobǝ, m no Etsodwe mo Nò nya Etkem.”

Yeso è matswa ya bu engǝfǝfǝ

⁶ Nò nya Etkem efki, Yeso è kwashi a àtá chuefǝnm mo ya a Yahuda, nè no tú mò anga. Ende akan a budgo mbwe è ngǝfǝ ara, è no a zǝn.

⁷ Be Farisi ngge be etumo mo edon ya ehwyà éè no a zǝn ángá, è nda anga be e fu Yeso ngge edan, nè no dise ye anga. Bè nda be e di ti ara, ano ge ma a tswa ya modwa hon Nò nya Etkem evǝa be e jan ge dan ara adia ge bwe mochi Nò nya Etkem ángá.

⁸ Tea Yeso è yi ara mò a bè ka anga, gè jan ya bu engfǝfǝ hon jan, “Nyi etkyen bwa ywa ana.” Gè nyi etkyen nè ken ywa a zǝn.

⁹ Yeso è jan be, “Me e ká nye eka, mò nwone edon chadwa be e bwe Nò nya Etkem ángá a ano, be e bwe mò esese nè, be e bwe mò esera, be e dgon nya nè, be e bwe e tkò nó?”

¹⁰ Gè fǝ̀n shwa di gu re be, kǝnggwa, gè jan nobǝ hon jan, “Ywa bu mbo.” Ende hon è ywa bu mbwe, bu hon è twafwe bwa gu ngge echafǝju.

¹¹ Adi enò, be Farisi ngge be etumo mo edon, è fku ara tsuruku, bè kwa ara ejanm e sojube mò a ba bwe ngge Yeso ángá.

Yeso è swa be etsonchi gwi chu fà

¹² Adi be tsǝnò eni, Yeso è tonvǝ́ a hwì evǝa ge e bgó ebgo a zǝn Ehwya. Gè no ngga tén zǝn, nè no bgó ebgo anga a zǝn Ehwya.

¹³ Anofon tàtà enó, gè fǝ́ fǝn gu be ya è ba ye anga dwa, nè swa vǝ́ ti ara gwi chu fà a engga mo be, nè tso be ti, “Be etsonchi.”

¹⁴ Ena a be ti mo be, Sima nwene a Yeso è tso ye ti jan Bitru ángá, ngge nwenjin ye Andoro, Yakubo, Yohana, Filibu, Batolomi,

¹⁵ Matiyu, Toma, Yakubo nwen Alfiyu, ngge Sima nwene a bè fǝ́ anga achifǝ eten ángá,

¹⁶ Yahuda nwen Yakubo, ngge Yahuda Eskariyoti nwene è bwa tsǝdu ye ángá.

Be esese ngge be ebwe

¹⁷ Atan a è Yeso shwa ara sen mo hwì ngge be ángá, gè ndnya ngge be a tswa etebwa sǝnsen akan. Be nobǝ embo è no a zǝn. Efwe, be nobǝ embo è vǝ bwa chá sǝnsen mo Yahudiya, eten a Urishelima ngge be efa mo ebgà a Taya ngge Sidon,

¹⁸ Bè bwa evǝa be e fo moetum mbwe ngge ge e ma e tswa be modwa mo be. Gè matswa èé ngge be ya engǝ́ esera è tswa be ekan anga.

¹⁹ Binbin be nobǝ hon è tkon etkon evǝa be e yi ye a ju, adia echakpo è gwa anga a je a ju ye nè no matswa gu be modwa mo be anga.

²⁰ Ekǝnggwa, Yeso è di be ya è ba ye anga, nè jan, “Esese a ḿ mo nye, a nye ya ekan, adia zǝnotì mo Ehwya no ḿ mo nye.

²¹ Esese a ḿ mo nye ya a mbe fu nye anga asuswana adia dgyèn mo nye a mbo. Esese a ḿ mo nye ya e kǝndwafǝ anga asuswana adia nya a tson tsen.

²² Esese a ḿ mo nye atan a be nobǝ ze nye, atan a be segwa nye, n tsu nye, n janpin nye, adi fwa a nye cha ara dwa ngge Nwen Nobǝ ángá.

²³ “Adi ekpengga eni nye e shánju. Nye e fǝ efǝ ngge vǝtsen adia mò a Ehwya nyi nye no a kpe ángá no àywá. Adia eni, abu be ebǝ ata mo be è bwe ngge be efojan mo Ehwya ekpe ekpe ángá.

²⁴ “Tea ebwe no a chu mo nye, ya e no ngge mò asuswana adia nye fo fwa ara etkwa mo nye.

²⁵ Ebwe no a chu mo nye, ya e no ngge mode àywá asuswana, adia mbe a fu nye. Ebwe no a chu mo nye, ya e tson tsen anga asuswana, adia nya bgen nya, nya kǝndwafǝ ngge engǝ a fǝzǝn.

²⁶ Ebwe no a chu mo nye, ya nobǝ egwa egwa tàn nye anga adia eni a abu be ate be è bwe ngge be efojan ame ángá.

Dgyan ya eze mo nye

²⁷ “Adi ḿ mo nye ya e fo m anga, me e jan nye, nye e dgyan be ya eze mo nye, bwe esese ngge be ya e ze nye anga.

²⁸ Bwe be ya e janbgen nye anga esese. Bgó Ehwya mò esese a chu mo ya e bwe nye mò esera anga.

²⁹ Ano ende akan bu o efya a hwi, twanga chá akan no ye efwe. Ano ende akan fkwacha ara mokàn efifi mbo, gwano ye mokàn nwofyan mo nó gaten.

³⁰ Egwa egwa e bgó o mò anga, no ye. Ano ende akan fkwacha ara m̀ mbo, we ká mbo eka mo nó efwe ra.

³¹ Bwe mò ngge be nobǝ abu wa dgyan be e bwe ngge bo ángá.

³² “Ano nye dgyan kpwà be ya e dgyan nye anga, mò esese a nya ben ángá a ano? Èé be ya ebgen dgyan be ya e dgyan be anga.

³³ Ano nye bwe kpwà mò esese ngge ya e bwe nye mò esese anga, mò esese a nya ben ángá a ano? Èé be ya ebgen bwe anga enò.

³⁴ Ano nya no be nobǝ kpo, nye e no e kpwà nye be ya a nye yi ara jan ba kpwa nye kpo hon ángá ra, mò esese a nya ben ángá a ano? Èé ya ebgen no kpo n ka anga jan be e kpwa e gu be nó.

³⁵ Nye e dgyan ya eze mo nye, nye e bwe be mò esese. Nye e no nye be kpo ngge shwa ekam jan be e kpwa nye kpo hon ra. Eno, nya tú jan nye no tén mbǝgya mo Ehwya e twafǝ̀ gu ángá. Kǝnggwa buhwen mo nye a kpe a no àywá. Adia ge bwe mò esese anga ngge ya e chwano be ye anga ra, tangge ya e bwe mofǝ̀ anga.

³⁶ Nye e di ashi mo be nobǝ abu ate nye no ende e di ashi anga.

Nye e kpèn nye nobǝ kǝ́n ra

³⁷ “Nye e kpèn nye be nobǝ kǝ́n ra, abu Ehwya a kpèn ye nye kǝ́n ra. Nye e kpèn nye be nobǝ kǝ́nfǝ ra, abu Ehwya a kpèn ye nye kǝ́nfǝ ra. Nye gwano be nobǝ ebgen abu Ehwya gwa a no nye ebgen mo nye.

³⁸ Nye e no be nobǝ mò, Ehwya a no nye. Mò nwone Ehwya a no nye ángá a mbo àywá, ba se nó, ba chin nó, ge no a nggwa anga, o no jwa a cha ye anga. Yishwa mombwamo a nye ti mbwà nobǝ anga, a gè hon nwone a Ehwya ti a mbwà nye.”

³⁹ Yeso è tso be hufwa ena jan, “Ende a fǝzǝn bwi ara ye vǝ a yi ya fǝzǝn ebwibwi efki etsǝ́n mbwe? A be fà hon ba kpo a shi be a ahwya ra?

⁴⁰ Ende e kǝ́n moetum anga twafǝ̀ ye etumo mbwe anga ra. Ano be ma tú yi ara ye, ga no abu etumo mbwe.

⁴¹ “Ano bwe a ge o diben abubwi e no a fǝzǝn mo nwenjin o, tea o diben mbo ekǝntumo e no a fǝzǝn mbo ángá ra?

⁴² Bwe engǝ wa jan nwenjin o, ‘Nwenjwa, me e ti e vǝ́ o abubwi e no a fǝzǝn mbo.’ Kǝnggwa a bo e chu o, o di mbo ekǝntumo e no a fǝzǝn mbo ángá ra? Gbegbe! A bo ya ayibangǝ̀, kwafya tivǝ́ ekǝntumo e no a fǝzǝn mbo ángá sangǝ́ o chà diben a se zǝn, o ti ti a vǝ́ abubwi e no a fǝzǝn mo nwenjin o ángá.

Be diyi tumo anga adi ga mbwe

⁴³ “Tumo esese e gwa ga esera anga fwa ye ra, èé no tumo esera gwa ye ga esese anga ra.

⁴⁴ No enona, be diyi tumo anga adi ga mbwe. Nobǝ bga be ga mo tu ngǝtsǝn anga a ju tu evi ra, ga mo tu enabi be bga be nó anga a ju tu san-ekǝn ra.

⁴⁵ Nobǝ esese ti mò esese gwa anga a je adi be mò esese e no a tsuruku mbwe ángá, nobǝ esera hon ti mò esera gwa anga a je adi be mò esera e no a tsuruku mbwe ángá. Mò e gwa anga a je a kpevǝ ángá, a mò e mbo no tsuruku ángá.

Be nobǝ fà ya éè mbwe be àtá ángá

⁴⁶ “Ano bwe a ge nye fǝ́ m, ‘Etsodwe, Etsodwe,’ tea nye bwe nye mò a m jan nye anga ra?

⁴⁷ Me e tú nye abu nobǝ hon no ángá. Ende nwene e bwa a zǝn m, n fo fwa m anga, n bwe mochi ngge be,

⁴⁸ ge no abu ende è mbwe àtá, gè gu vǝn shi a sǝnsen nè tke fù mo àtá embwem hon a chu ten. Atan a chu è bwa fí ara, mbǝ è mbo embobin ngge echakpo, bwa bu a ju àtá hon, nè chì ti ye nó ju ra, adia bè mbwe yi ara nó.

⁴⁹ Tea ende e fo fwa mam n bwe ye mochi ngge nó ra, no abu ende è mbwe àtá a chu akwabǝ. Atan a chu è bwa fí ara, mbǝ è mbo embobin ngge echakpo, bwa bu a ju ata hon, nè kǝnbwí gu nó, ebwim mo àtá hon è bgen twafǝ̀ chu.”