Luka 5 - Etkwen New Testament

Abu Yeso è fǝ́ be etsonchi ekwafya dwa be e ba ye ángá

¹ Nò kè akan, atan a Yeso è ywano a tón Edan a Jenisarati (Sǝn a Galili), be nobǝ embo è bwa fa ye anga evǝa be e fo fwa mo Ehwya.

² Yeso è di ngga fà no a tón mbǝ hon. Be ya e fu gwejo anga è tè gwa nó a be, nè na acha mo be anga a tón mbǝ hon.

³ Gè kwashi adi ngga mo Sima, nè jan ye, ge e tsǝ ngga hon e kwa e chàkǝn a tswa mbǝ nwofyan. Kǝnggwa gè chu a tswa mo nó, nè tú be nobǝ mò.

⁴ Atan a gè tú fwa ara be mò ángá, gè jan Sima, “Nyi ngga ken bi chá zǝn evǝnvǝn, nye e nggwa be acha evǝa nye e fu be gwejo.”

⁵ Sima è cha ye dwa jan, “Yagwamo mu, jé tkyan gu ara etsǝ, jé fuben di je mò akan ra. Tea adia o jan enò ángá, ma nggwa be acha hon.”

⁶ Abu bè nggwa acha hon ángá, bè fu be gwejo àywá enó, be acha mo be hon è no abu be vǝ a cha.

⁷ No enona, bè mbǝgyè be ya emmeken mochi mo be adi ngga efki bu, be e bwa e bwe e jwa be. Bè bwa ké mbo be ngga fà hon ngge gwejo, be ngga hon è kwa ara edashim chá ta mbǝ.

⁸ Atan a Sima Bitru è di mò e bwe ángá, gè nggwa ekpanvǝ mbwe a chafya mo Yeso nè jan, “Etsodwe nyagwa m, ma ya ebgen.”

⁹ Gè jan enò adia Sima ngge be shushwa ye è tàn ebwikpe a chu gwejo àywá a bè fu ángá.

¹⁰ Yakubo, Yohana, mbǝgya mo Zabadi, ya emmeken mo gwejo efum mo Sima, è tàn ebwikpe gaten. Ekǝnggwa, Yeso è jan Sima, “We tsen mbo etsentsen ra, asuswana ti ken chafya, wa nda be nobǝ a bwa anga a zǝn m.”

¹¹ A bè vǝ be ngga mo be vǝ́ ara etu ángá, bè twagwa mò egwa egwa nè ba Yeso.

Yeso è matswa ya modwa-ehwyá

¹² Engga a Yeso è no a eten akan a sǝnsen mo Galili ángá, ndedon akan a modwa-ehwyá è de cha gu ti ye ju ángá è bwa a zǝn. A gè di Yeso ángá, gè bwa kpo bwi a sen a zǝn ye. Gè bgó ye jan, “Etsodwe, o ma dgyan ara, o bwe a ti m me e no enachacha.”

¹³ Yeso è ywa bu mbwe yi ye a ju nè jan, “M dgyan anga, no enachacha.” Abu fǝzǝn etwam, modwa-ehwyá hon è gwa nobǝ hon.

¹⁴ Kǝnggwa, Yeso è twa ye echa jan, “Jantu mbo nobǝ ra, tea ken tú ekǝ́n chu o, we no be mò etinom hon a Mosa è jan be ya e ben ara enachacha mo ju be, be e ti e no ángá. Ga tú be jan o ben ara enachacha.”

¹⁵ Bi adi enò, fwa a chu Yeso è kpò kwa gu zǝn. Be nobǝ embo è bwa evǝa be e fo ye, ngge ge e ma e tswa be, be modwa mo be.

¹⁶ Tea, Yeso è ken bwi anga a zǝn a be nobǝ è fwa be ra evǝa ge e bgó ebgo a zǝn Ehwya.

Yeso è matswa ndedon ya modwa-edan

¹⁷ Nò kè akan, abu è Yeso tú mò anga, be Farisi ngge be etumo mo edon, ya è vǝ bwa chá be eten nwofyan a sǝnsen mo Galili ngge Yahudiya ngge Urishelima è bwa chudwa a zǝn. Echakpo mo Ehwya è no ngge ge evǝa ge e ma e tswa be ya modwa.

¹⁸ Be nobǝ ya ehwyà è bwa ngge ya modwa-edan a di sǝ, bè tkyan be e ti ye e kwa e shi a tswa àtá hon, evǝa be e ti ye e twà a chafya mo Yeso.

¹⁹ Bè ben be efwa a be ti kwa a shi a àtá hon ra, adia be nobǝ è fí no embo. Enona, bè tonvǝ́ a chu mo bá, nè tkofwi chu bá hon, nè ti ye a chu sǝ mbwe du shi, a tswa akan mo be nobǝ a chafya mo Yeso.

²⁰ Abu Yeso è di chaebi mo be ángá, gè jantu ende hon jan, “Shushwa, be gwano ara o be ebgen mbo.”

²¹ Be Farisi ngge be etumo mo edon è kwa ara fwa ejanm e sojube jan, “Nobǝ ena ti chu ye mbwà anga ngge Ehwya. Ara gwano a yi ebgen a ge, ano ma fwa ye Ehwya tete ra?”

²² Yeso è yi ara mò a bè ka anga, gè ká be eka jan, “Bwe engǝ nye ka be mò enò anga a tsuruku mo nye?

²³ Nwone e shànfo tkyan a ge ángá a ani, be e jan, ‘Be gwano ara o be ebgen mbo,’ eno e ra be e jan, ‘Nyi etkyen we kenkèn?’

²⁴ Tea adia nye e yi jan, Nwen Nobǝ no ngge echakpo a zǝnchaje, ge e gwa e no be nobǝ be ebgen ángá.” Kǝnggwa gè jan ya modwa-edan hon, “M jan o, nyi etkyen, ti sǝ mbo we nya a mu.”

²⁵ Abu Yeso è jan fwa ara fwa ángá, ya modwa hon è nyi etkyen a chafya mo be, nè ti sǝ mbwe, nya a mu, nè no tàn Ehwya anga.

²⁶ Egwa egwa mo be nobǝ, è tàn ebwikpe nè tàn Ehwya. Bè mbo ngge etsentsen, nè jan, “Je di ara mò ekpwikpe nòmo.”

Yeso è fǝ́ Lawi dwa

²⁷ Ekǝnggwa, Yeso è vǝ́ a je nè di ende akan è cha tse-eten anga, bè fǝ́ ye anga Lawi, chuno a afku mbwe, zǝn gè cha tse-eten anga, nè jan ye, “Ba m.”

²⁸ Lawi è nyi etkyen nè twagwa be mò binbin nè ba Yeso.

²⁹ Dgyen ye fon ra, Lawi è té fuchin mo esǝ echa nyi Yeso a mbwe ye. Be ya tse-eten echam embo, ngge be nobǝ ya ehwyà è bwa chuno de mode anga ngge be.

³⁰ Tea be Farisi ngge be etumo mo edon ya éè no adi etso akan ngge be ángá, è kwa ara fwa efim, nè ká be ya è ba Yeso anga eka jan, “Ano bwe a ge nye de nye ngǝ ngge be ya tse-eten echam, tangge be ya ebgen ya efki?”

³¹ Yeso è janfwe be, “Fwa ye be ya etkwaju e nda ematwa anga ra, be ya modwa nda ematwa anga a be.

³² M bwa m a chu mo be ya ebitete ra, m bwa evǝa be ya ebgen be gwa ebgen mo be.”

Eka ekam a chu mo vǝ etsem

³³ Bè ká ye eka efwe jan, “Be ya e ba Yohana ngge be ya e ba be Farisi anga, fyàn be vǝ etsem ngge ebgo ebgom a zǝn Ehwya ra. Ano bwe a ge be ya e ba o anga de n ngǝ anga abu atan engǝ ra?”

³⁴ Yeso è janfwe be, “Nye ka anga jan, nye jan a ngga be ya echan mo edon-gwa mode edem, atan a edon-gwa hon chà no ngge be ángá? Be bwe be nó anga enò ra.

³⁵ Ekpengga nyabwa ba ti edon-gwa hon a nya, engga hon ba tse vǝ.”

³⁶ Gè tso be hufwa ena jan, “Be vǝ a ngga be mokàn efwe ti a ban be adi mokàn ehwe ra. Ano be bwe enò, mokàn efwe hon bwe a bgen, eta adanmo efwe hon a bé vǝngga ángá, de a fǝ ye ngge adanmo ehwe hon ra.

³⁷ Efwe ba ti be tson efwe ti a gu be adi be etsǝn kpumo ehwe ra. Ano be bwe enò, tson efwe hon a vi n kǝn a bwi be etsǝn kpumo ehwe hon. Tson efwe hon a nggwa a fwa, etsǝn kpumo hon bwe a dì.

³⁸ É yé, ge no kenm be e ti tson efwe ti e gu adi etsǝn kpumo efwe.

³⁹ Ende e ngǝ di ara tson ehwe, a chadwa a ngǝ ye tson efwe ra. Adia ge jan anga jan, ‘Tson ehwe hon setkyan a ge.’ ”