Luka 4 - Etkwen New Testament

Shetan è mbwadi Yeso

¹ Yeso è mbo no ngge Engǝ́ mo Ehwya, atan a gè nyagwa Kǝn a Joda anga. Engǝ́ mo Ehwya hon è ti ye ken a tswavǝ́n.

² Gè no a tswavǝ́n hon tsǝnò gwi ndwe, Shetan è mbwadi ye adi engga mo be tsǝnò hon, evǝa ge e bwe ebgen. A tswa mo be tsǝnò hon gè de ye mode ra, ekǝn-etkyen mo nó, mbe è fu ye.

³ Echukǝnggwa, Shetan è jan Yeso jan, “Ano o no tén nwen mo Ehwya, jan ten ena ge e twanga e no borodi.”

⁴ Yeso è janfwe ye, “Fwa mo Ehwya jan, ‘Fwa ye a chu mode tete a nobǝ a no angǝ ángá ra.’ ”

⁵ Shetan è ti ye vǝ́ a chu zǝn éè cha no awya, nè tú gu ye be zǝnotì mo zǝnchaje, abu fǝzǝn etwam.

⁶ Gè jan Yeso jan, “Ma no o echakpo mo be zǝnotì ena ngge emwentì mo be. Adia bè kpu be no ara m ngge m kpu be no a ti ende a m dgyan anga.

⁷ No enona, ano o hò a sen fen m, ma kpu be binbin kpu a no o.”

⁸ Yeso è janfwe ye, “Fwa mo Ehwya jan, ‘Wa fen Ehwya Etsodwe o, a ge kpwà ara, a wa fen.’ ”

⁹ Shetan è du ye efwe ti shi a Urishelima, nè ti ye vǝ́ a chu mo zǝn e cha ti ara a chu Àtá mo Ehwya, nè jan ye, “Ano o no tén nwen mo Ehwya, fǝ efǝ ana shi a sen.

¹⁰ Adia be bá no adi fwa mo Ehwya jan, ‘Ehwya a jan be maleka mbwe shwa jwa a cha o esese enó.’

¹¹ Gè jan efwe ye jan, ‘Ba fu o ngge bu mo be, evǝa wa kǝn mbo èé kpwafu mbo a chu ten ra.’ ”

¹² Yeso è janfwe ye jan, “Fwa mo Ehwya jan efwe jan, ‘Wa mbwà a di mbo Etsodwe o, Ehwya mbo ra.’ ”

¹³ Atan a Shetan è mbwadi fwa ara Yeso ángá, gè nyagwa ye mo ekpengga nwofyan.

Yeso è tke mochi mbwe a Galili

¹⁴ Ekǝnggwa, Yeso è twabǝ ken a Galili, gè no a tswa echakpo mo Engǝ́ mo Ehwya, etkyen mbwe è kpò cha gushi a tswa sǝnsen hon.

¹⁵ Gè no tú mò cha gu ti be àtá chuefǝnm mo be anga. Be ya è fo ye ángá è tàn ye.

Bè segwa Yeso a Nazarati

¹⁶ Yeso è ken a Nazarati, zǝn a bè fyo ye ángá. Abu gè bwe bwi anga, gè kwashi a tswa àtá chuefǝnm mo ya a Yahuda Nò nya Etkem. Ekǝnggwa gè nyi etkyen evǝa ge e ká mò a tswa Fwaebam mo Ehwya.

¹⁷ Bè ti Afketa mo efojan Eshaya, ti no ye. Gè fken nó, nè di zǝn a be ba jan,

¹⁸ “Engǝ́ mo Etsodwe no ngge me adia ge tsǝ̀pe ara m, me e ti Fwa Esese mbwe ti e jan be ya ekan. Ge tson m me e du edgon jan be ya e no ekenpepe anga, be fken a gwa be, ngge ya fǝzǝn ebwibwi be e di zǝn, ngge ya a be tswa be fí anga, ma no be nya etkem.

¹⁹ Me e du edgon mo engga a Ehwya a ti a vǝ́ be nobǝ mbwe ángá.”

²⁰ Ekǝnggwa Yeso è fǝ Afketa hon, nè ti nó no nwen mochi mo àtá chuefǝnm hon, nè chu a sen. Binbin be ya è no a zǝn ángá è nggwa ye fǝzǝn no a ju.

²¹ No enona, gè jan be jan, “Fwaebam ena a nye fo m ká na, defǝ fwa ara a tón mo nye nòmo.”

²² Egwa egwa, è fo ye ángá, è fo etkwa mbwe. Mò éè gwa a je a vǝ mbwe ángá è zǝ̀ be ju, bè ká eka jan, “Ena fwa ye nwen Esufu ra?”

²³ Gè jan be jan, “M yi ara jan nya jan m fwa a tase ena e jan, ‘Ematwa, má ju o, bwe mò a je fo ò bwe a Kapanahum ángá, bwe ye a eten mbo ana gaten.’ ”

²⁴ Yeso è jan, “M jan nye ebi, ben ye efojan mo Ehwya a be chadwa ngge ge a eten mbwe ra.

²⁵ Nye e fo fwa ena, adi ekpengga mo efojan Eliya, be gwafǝ́n è no embo a Esǝrela. Atan a enò chù è bwa ye ra, je ta ngge ebwikwa, mbe ekǝnkǝn nya è fu be adi sǝnsen hon.

²⁶ Èé enò, Ehwya è tson Eliya ken ye a zǝn ende akan mo be ra. Gè tson ye ken a zǝn gwafǝ́n éè no a eten mo kpenmo a Zerefa, a sǝnsen mo Sidon.

²⁷ Efwe, be nobǝ embo è no ngge modwa-ehwyá a Esǝrela atan a Elesha è no efojan ángá. Ehwya è matswa ye akan a tswa engga mo be ra, è kpwà Nayama, kpenmo, ya a Siriya.”

²⁸ Binbin mo be ya è no a àtá chuefǝnm hon ángá, è fku tsuruku àywá ngge ge atan a bè fo mò a gè jan ángá.

²⁹ Bè nyi etkyen nè ti ye twa a chafya nè tsǝ ye vǝ́ a chu hwì a bè dwa eten hon nó ángá, bè tkyan be e tsǝ ye e twa e shi a tswa evuru.

³⁰ Kǝnggwa, gè twanga kwa a tswa engga mo be, nè nya m̀ mbwe.

Yeso è nyonvǝ́ engǝ́ esera a ju nobǝ

³¹ Yeso è ken a Kapanahum, eten adi sǝnsen mo Galili. A zǝn, gè kwa ara be moetum Nò nya Etkem.

³² Bè tàn ebwikpe abu gè tú be mò ángá, adia gè jan fwa hon ngge emwentì.

³³ A tswa àtá chuefǝnm hon, ndedon akan è no a zǝn, engǝ́ esera è no ye a ju. Gè tandwa ngge echakpo jan,

³⁴ “Mò a o nda anga ngge je a no, Yeso ya a Nazarati? O bwa we tkò je? M yi ende a o no ángá. Wa Echanwenwen Akan mo Ehwya.”

³⁵ Yeso è kpon engǝ́ esera hon dgyén jan, “Pe vǝ! Vǝ́ a je a ju ndedon ena.” Ekǝnggwa, engǝ́ esera hon twa ende hon a sen a chafya mo be nobǝ binbin nè gwa a je a ju ndedon hon, nè dì ye ye ju ra.

³⁶ Binbin mo be nobǝ, è tàn ebwikpe, nè ká sojube eka jan, “Moetum ena no engǝ? Adi emwentì ngge echakpo, ge du be engǝ́ esera hon jan be e vǝ́ a je, bè vǝ́ a je.”

³⁷ Fwa a chu Yeso è kpo kǝ̀n gu zǝn a tswa binbin mo efa hon.

Yeso è matswa be nobǝ embo

³⁸ Chashin, Yeso è gwa àtá chuefǝnm hon, nè ken a mbwe Sima. Atan a enò, gwé Sima ndegwa è no a zǝn, nè fo ye etkwaju ra adi edgye echakpokpo. Bè bgó Yeso ge e ma e tswa ye.

³⁹ Ekǝnggwa, Yeso è ken a zǝn ye, hò a chu ye nè ten edgye hon dgyén. Edgye hon è gwa tén ye egwam kè akan. Gè nyi etkyen nè bwe mode no be.

⁴⁰ Atan a nò è kpo shi anga, be nobǝ è kpu be ya mu be, ya è dwa ngge be modwa efki efki, kpu bwa a zǝn Yeso. Gè ti bu mbwe tu ken a ju egwa egwa, nè matswa be modwa mo be.

⁴¹ Engǝ́ esera è gwa a je a ju be nobǝ embo, bè no tandwa anga jan, “Wa nwen mo Ehwya.” Gè ten be dgyén, nè dgyan ye a be jan fwa a chu ye ra, adia bè yi ara jan ga Kristi hon.

⁴² Anofon tàtà enó, Yeso è gwa eten hon, nè ken adi zǝn a be nobǝ è fwa be ra. Be nobǝ è tkunda ye nda nda. Atan a bè bwa a di zǝn a gè no ángá, bè tkyan be e jan ye jan ne, ge e gwa ye be ra.

⁴³ Yeso è se ye, nè jan be jan, “Ge no ara kenm me e kwa be eten ya ehwyà evǝa me e jan be Fwa Esese mo zǝnotì mo Ehwya gaten. Ena a mò è bwe bè tson m bwa a tswa zǝnchaje ena ángá.”

⁴⁴ Echukǝnggwa, gè chungǝ́shi adi fwa mo Ehwya ejanm a tswa mo be àtá chuefǝnm éè dwa a sǝnsen mo Yahudiya ángá.