Luka 23 - Etkwen New Testament

Bè ti Yeso bwa a chafya mo Bilatu

¹ Echukǝnggwa, be nobǝ hon binbin, è ti Yeso bwa chafya mo Bilatu, evǝa be e dwakǝ́n mbwe.

² Bè kwa ara ye efya etsom jan, “Je ben ende ena no bwezhin be nobǝ mo je anga, ge no jan je anga jan nè, je e kpwa tse-eten e no je Kaisa ra, n jan ga Kristi, ga tì.”

³ No enona, Bilatu è ká Yeso eka jan, “A bo wa tì mo be ya a Yahuda hon?” Yeso è janfwe ye, “Ge no enò abu o jan anga.”

⁴ Chashin mo nó, Bilatu è jan be Ekǝ́n echa ngge be nobǝ embo hon jan, “M ben m ende ena ngge edan ra.”

⁵ Tea bè chungǝ́shi nè jan, “Moetum mbwe du tsuruku mo be nobǝ nyi etkyen anga binbin a sǝnsen mo Yahudiya. Gè tke nó a Galili, asuswana ge bwangga ara ana.”

Bè ti Yeso bwa a chafya mo Hiridu

⁶ Abu Bilatu è fo enò ángá, gè ká eka, gè e yi ano Yeso a ya a Galili.

⁷ Atan a gè fo jan Yeso a nobǝ a Galili, e no adi emwen mo Tì Hiridu ángá, gè du bè ti Yeso ken a zǝn Hiridu. Atan a enò Hiridu è no a Urishelima.

⁸ Atan a Hiridu è di Yeso ángá gè fo etkwa àywá adia dgyen ara fon gè nda anga ge e di ye, adia gè fo ara fwa a chu mo Yeso, ne nda anga ge e bwe e tú ye moeditanm a fǝzǝn mbwe.

⁹ No enona, Hiridu è ká ye eka embo, tea Yeso è janfwe ye ye a vǝ ra.

¹⁰ Be Ekǝ́n echa ngge be etumo mo edon, è ywano a zǝn nè chungǝ́shi adi echakpo ngge fwa amme ejanm a chu ye.

¹¹ Ekǝnggwa Hiridu ngge be yakàn mbwe, è bwe ye mò ebgenju, nè fke ye. Bè tsàn ye ju ngge mokàn mo be tì. Kǝnggwa Hiridu è du ye twabǝ ken a zǝn Bilatu.

¹² Nò eni, Hiridu ngge Bilatu twanga bwa no shushwa so, adia chashin bè ge fǝn be fǝ̀ anga eso ra.

Bè sen Yeso kǝ́nfǝ

¹³ Echukǝnggwa, Bilatu è fǝ́ fǝn be Ekǝ́n echa, be chutì ngge be nobǝ ya ehwyà, ya è no a zǝn ángá dwa,

¹⁴ nè jan be jan, “Nyé ti ende ena bwa a zǝn m, nyé jan moetum mbwe du tsuruku mo be nobǝ nyi etkyen anga. M ká ye eka a fǝzǝn mo nye, m fu m ye ngge edan akan a chu mo be efya a nyé tso ye ángá ra.

¹⁵ Hiridu èé ge, è fu ye ye ngge edan ra, adia ge tsǝ ye twabǝ bwa a zǝn je ángá, nye e di èé nye, ende ena chà bwe mò edan e kǝn ra ge e fǝ ángá ra.

¹⁶ No enona, ma du be e bu ye akpan, m twa a gwa ye.” [

¹⁷ Gè no ara jan ne, nò Esǝ mo Epenyim Bilatu fki a gwa nobǝ akan a àtá ewhyatu ti a no be.]

¹⁸ Tea be nobǝ hon è tandwa binbin mo be kè akan ngge vǝ akan jan, “Ti ende ena ken gu. Fkigwa Baraba no je.”

¹⁹ Baraba hon è no ekenpem adia gè no a engga mo ya è tke etkekàn twa a tswa eten ngge nobǝ egum ángá.

²⁰ Adia Bilatu è nda anga ge e twa e gwa Yeso anga, gè jan bishi be fwa efwe.

²¹ Tea be no tandwa anga jan, “Ken fu ye a chu eswafǝ, kenfu ye a chu eswafǝ.”

²² Bilatu è jan bishi be efwe adi e ta jan, “Adi ano? Edan nwone ende ena bwe anga ani? A me m fu m ye ngge edan nwone e kengga ara ba gu ye ángá ra. Ma du be e bu ye akpan, m twa a gwa ye.”

²³ Tea adi dwa etànm àywá, bè chungǝ́shi jan be e gu ye. Ekǝn-etkyen, dwa etànm mo be è devǝ́.

²⁴ No enona, Bilatu è bwe be mò a bè dgyan anga.

²⁵ Gè fkigwa Baraba, a bè dgyan anga, ende a bè ti twano a àtá ewhyatu adia gè tke etkekàn twa a tswa eten efifi ngge nobǝ egum ángá, tea gè ti Yeso no be, be e bwe ye mò a bè nda anga.

Bè kenfu Yeso a chu eswafǝ

²⁶ Abu bè ti Yeso nya anga, bè ben Sima ya a Sirini, è vǝ eten nwofyan kwa nyabwa a tswa eten. Bè fa ye, nè ti eswafǝ hon tso ye nè du ye ge e ba Yeso.

²⁷ Be nobǝ embo è ba Yeso anga, tangge be ndegwa ya è no bentsen anga ngge dwafǝ ekǝnm a chu ye.

²⁸ Tea Yeso è twanga nè jan be ndegwa hon, “A nye ndegwa ya a Urishelima, nye e kpe nye dwa a chu m ra, nye e kpedwa a chu nye ngge mbǝgya mo nye.

²⁹ Adia ekpengga nyabwa a nya jan, ‘Esese a mo be ndegwa efǝn, ya e chà mbwa di be ra ngge ya e chà mmó di be mbǝgya ra.’

³⁰ Atan a enò, “ ‘be nobǝ a jan be hwì, “Nye shwa nggwa je a ju,” efwe ba jan be etu, “Nye bwipe je.” ’

³¹ Ano be nobǝ bwe enò anga ngge me, e no abu tumo etswa, ga no engǝ ngge nye, e no abu tumo e ngǝ́ ara ángá.”

³² Bè kpu ndedon fà ya ebgen, vǝ́ a je ngge Yeso evǝa be e ken e fu be èé be.

³³ A be bwangga ara adi zǝn a be fǝ́ anga “Fǝchu” ángá, be kenfu ye a zǝn ngge be ya ebgen fà hon, egwa egwa a chu be eswafǝ mbwe Akan chá budgo mo Yeso, akan cha buhwyá mbwe.

³⁴ Yeso è jan, “Àtà gwano be adia be yi be mò a be bwe anga ra.” Ekǝnggwa be yakàn è twa mò etwadem evǝa be e tan e kwa be mokàn mbwe.

³⁵ A be nobǝ è ywa dwa a zǝn nè no di ye anga, be atkwen nobǝ mo be ya a Yahuda è jan ye aken edifu, jan, “Ge tivǝ́ be ya ehwyà, ge e ti e vǝ́ chu ye, ano ge no tén Kristi éè vǝ a zǝn Ehwya bwa, Eswavǝ Akan hon.”

³⁶ Be yakàn èé be è fke ye. Bè ti mbǝ enabi ebonbon ti bwa ye,

³⁷ nè jan, “Ano o no tén tì mo be ya a Yahuda hon, bwe ga chu o.”

³⁸ Bè bá a chu afkaba ti mò ban no chá chu eswafǝ hon jan, Ena a Tì mo ya a Yahuda.

³⁹ Akan mo be ya mò ebgen a bè kenfu be no ngge ge ángá, è jan Yeso aken edifu jan, “O fwa mbo Kristi hon ra? Tivǝ́ chu o, we ti e vǝ́ je.”

⁴⁰ Tea ya ebgen efki hon, è tkyá ye etkya jan, “O tsen mbo Ehwya ra, adia be kenfu o no ngge ge ángá?

⁴¹ Ekenfum mo je no edefǝfǝ. Adia je ben anga buhwen mo mò a jè bwe ángá. Tea ende ena chà bwe ye ebgen ra.”

⁴² Gè twanga jan, “Yeso, kaben ngge me atan a wa no adi zǝnotì mbo ángá.”

⁴³ Yeso è janfwe ye jan, “M jan o ebi, nòmo o no ngge me adi zǝn a Ehwya no anga.”

Abu Yeso è fǝ ángá

⁴⁴ A no è sen ara kpe ángá, zǝn è twa gu fǝ kengga tse ta mo edgo.

⁴⁵ Atan a enò nò è ngga ye zǝ ra, ejenpe è no a Àtá mo Ehwya è nggakwa fà.

⁴⁶ Kǝnggwa, Yeso è tandwa ngge echakpo jan, “Àtà, m ti nya mam du no a bu mbo.” Abu gè jan fwa re enò ángá, fǝ è ti ara ye.

⁴⁷ Atan a chu mo yakàn è di be mò e bwe ángá, gè tàn Ehwya nè jan, “Eshwen, nobǝ ena è fwa ye ngge edan ra.”

⁴⁸ Atan a binbin mo be nobǝ ya è fǝnno a zǝn evǝa be e di ekenfum mo Yeso, è di mò è bwe ángá, bè kanfu ekǝ̀n mo be a tswa nya ebgenm, nè twabǝ nya m̀ mo be a mu.

⁴⁹ Tea be ya è yi ye ngge be ndegwa ya è vǝ ngge ge a Galili bwa ángá, è ywano adgya nè no di mò è bwe anga.

Abu bè di Yeso ángá

⁵⁰ Nobǝ akan, bè fǝ́ ye anga Esufu, gè bwe be nobǝ ebi ngge esese anga. Gè no a engga mo be Atkwen nobǝ mo be ya a Yahuda.

⁵¹ Tea gè cha ye dwa ngge pyoro a bè pa ngge mò a be Atkwen nobǝ mo be ya a Yahuda è bwe ángá ra. Gè no ya Arimatiya a sǝnsen mo Yahudiya ngge gè no nobà ebwam mo zǝnotì mo Ehwya anga.

⁵² Kǝnggwa, gè ken bgó Bilatu ne no ye kǝn mo Yeso.

⁵³ Gè ti kǝn hon shwa a sen nè bónpe nó ngge bu adanmo linin, nè ti twà a tswa dì, a bè chà di didi be nobǝ a zǝn ra. Dì hon, bè gu nó no a ju ten.

⁵⁴ Nò eni, è no Nò fuchin Etem mo Nò nya Etkem mo ya a Yahuda. È dan shi nwofyan be e kwashi a tswa Nò nya Etkem hon.

⁵⁵ Be ndegwa ya è vǝ ngge Yeso a Galili bwa ángá, è ba Esufu, ken di dì hon, ngge abu bè ti kǝn mbwe twà ángá.

⁵⁶ Ekǝnggwa, bè twabǝ bwa a mu, nè bwe mò yoben, nè vǝ́ byi yoben. Nò nya Etkem, bè tke nya, abu edon jan anga.