Luka 22 - Etkwen New Testament

Yahuda Eskariyoti è senvǝ nè tsǝdu Yeso

¹ Engga mo Esǝ mo Borodi e ben ye yisti ra, a be fǝ́ anga Esǝ mo Epenyim ángá è bwa tén ara.

² Be Ekǝ́n echa ngge be etumo mo edon è nda efwa anga, evǝa be e gu Yeso. Tea bè tsen etsentsen mo be nobǝ anga. No enona, bè nda efwa evǝa be e gu ye engǝ̀tonton.

³ Kǝnggwa Shetan è kwa a tsuruku mo Yahuda, a bè fǝ́ Eskariyoti, éè no akan a tswa engga mo be etsonchi mo Yeso ángá.

⁴ Enona, Yahuda è ken a zǝn be Ekǝ́n echa ngge be chu mo be edgonzǝn mo Àtá mo Ehwya, nè pa pyoro ngge be abu ga tsǝ Yeso a du be a bu, be e fu ye.

⁵ Bè fo etkwa àywá, nè chadwa jan ba no ye tse.

⁶ A ge Yahuda è chadwa, nè nda efwa a ga du, be e fu Yeso a di zǝn a be nobǝ fwa be ra.

⁷ Kǝnggwa, nò a ba ya a gu be son adi Esǝ mo Epenyim ángá, a engga mo nó Esǝ mo Borodi e ben ye yisti ra ángá, è bwangga ara.

⁸ Yeso è tson Bitru ngge Yohana chí jan, “Nye shi té fuchin mo Esǝ mo Epenyim a ja de ángá.”

⁹ Bè ká ye eka jan, “Zǝn a o dgyan anga je e té fuchin mo mode mo esǝ hon ángá no a che?”

¹⁰ Yeso è jan be jan, “Abu nye kwa nyashi a tswa eten efifi hon, ende akan e tso hwa mbǝ nyaken ángá, a ben nye. Nye e ba ye e ken a mu a ge kwa ángá.

¹¹ Nye e jan yagwamo mu hon jan, ‘Etumo hon ká eka anga jan, tswa àtá mo ya echan a a me ngge be etsonchi mam a de mode mo Esǝ mo Epenyim ángá, no a che?’

¹² Ga tu nye àtá akpe efifi akan e no ebwetsam ngge be atkimo a tswa mo nó. Nye e té fuchin hon a zǝn.”

¹³ Bè ken di mò hon no gu tén abu Yeso è jan ángá, nè bwe mode Esǝ mo Epenyim hon a zǝn.

Yeso è de mode Esǝ mo Epenyim

¹⁴ Atan a engga hon è kan ara ángá, Yeso è shi chu a zǝn mo mode, be etsonchi mbwe è ken ben ye.

¹⁵ Gè jan be jan, “Dgyen ara fon, m̀ no dgyan anga me e de mode Esǝ mo Epenyim ena ngge nye sangǝ́, me e chà e ngǝ ekan.

¹⁶ M jan nye anga na, ma de m mode mo esǝ ena efwe ra, kpwà tén atan a engà mo nó defǝ ara a tswa zǝnotì mo Ehwya ángá.”

¹⁷ Yeso è ti kǝnggwe mbǝ enabi a kpwabu mbwe nè chwano Ehwya, nè jan, “Nye cha, nye e ngǝ e ken e sojunye.

¹⁸ M jan nye anga na, ti asuswana ken chafya, ma ngǝ m mbǝ mo ga mo enabi ena efwe ra, kpwà tén atan zǝnotì mo Ehwya a bwa ángá.”

¹⁹ Kǝnggwa, gè ti borodi nè chwano Ehwya a chu mo nó. Ge bwìkwa nó nè ti no be. Gè jan, “Borodi ena a gwe a ju m nwone a bè ti no a chu nye ángá. Nye bwe enò, nye e ti e ka e ben anga ngge me.”

²⁰ Atan a bè de fwa ara mode hon ángá, enò gaten gè ti kǝnggwe hon nè jan, “Kǝnggwe ena nwone a be ti a nggwa a sen a chu nye na, a Dwavǝ Esenm Efwe hon, adi ngǝ mam.

²¹ Di, ende hon e tsǝ a du m ángá de anga ngge me asuswana adi ekemo akan.

²² Nwen Nobǝ hon a fǝ abu bè panyi ara nó ángá, tea ebwe no a chu mo ende e tsǝ a du ye ángá.”

²³ Bè kwa ara sojube eka ekam jan ne, ara hon a bwe mò ena a ge.

Efyan etwam a chu ende e gǝ̀n ti ara

²⁴ Efyan etwam è nyi etkyen a engga mo be etsonchi hon, a chu mo ende e gǝ̀n ti ara.

²⁵ Kǝnggwa Yeso è jan be jan, “Be tì mo be ya e yi be Ehwya ra, dwa emwentì anga a chu be nobǝ mo be, ngge be chu mo be fǝ́ chu be anga, ‘Be ya e bwejwa be nobǝ.’

²⁶ Tea ge e no ye enò ngge nye ra, nwenfi mo nye, ga no nwenbwa mo nye. Ende e no chu mo nye ángá, ge e no ende a bwe nye mochi ángá.

²⁷ Ende nwene e tkyan anga, a ani? Ende nwene e chuno de mode anga a chu teboro nè, a ende nwene e ti mode bwa ye anga? Fwa ye ende e chuno de mode anga ra? Tea a me, m no a engga mo nye abu ende e kwa nye mode anga.

²⁸ Nya be ya è no ngge me a tswa embwadi mam ángá.

²⁹ Enona, abu Àtà m no ara m emwen me e ti e dwatì ángá, enò gaten, m no ara nye emwen nye e ti e dwatì a chu be nobǝ.

³⁰ Abu nya de nya ngǝ ngge me adi zǝnotì mam, nya chu a chu be botì, abu nya kpèn be efi gwi chu fà mo Esǝrela kǝ́n.

Yeso è jan abu Bitru a tson etson mbwe ángá

³¹ “Sima, Sima, bgeshi fǝzǝn, Shetan nda ara efwa, evǝa ge e dgya binbin mo nye abu be dgya kwa fwenfonmo ngge wimo anga.

³² Tea m bgó ara ebgo a chu o, Sima, afwa chaebi mbo a vǝ́ eshin. Atan a o twabǝ bwa ara a zǝn m ángá, we jan e bon be nwenjwa o ekǝ̀n.”

³³ Kǝnggwa Bitru è jan, “Etsodwe, m notsa ara, a ma kwa a àtá ewhyatu ngge bo, ma fǝ ngge bo.”

³⁴ Yeso jan, “Bitru, me e jan o, etsǝ ena, kǝndon chà a to ye dwa ra, wa tson etson mam kè ta jan, o yi m ra.”

Yeso è twa be etsonchi mbwe echa

³⁵ Yeso è ká be etsonchi mbwe eka jan, “Atan a m̀ tson nye, nye e ken e du edgon a chu Fwa Esese ángá, m̀ jan nye e kpwa nye echo tse, mode, ngge kpumo a tkyafù ra, mò a nyè ndani ángá, a ano?” Bè jan, “Fwa ye ra.”

³⁶ Gè jan be jan, “Tea asuswana, ende e no ngge echo tse, echo kèn, ge e kpu be. Ende e ben ye hwen efǝ ra, ge e jwa e de adanmo bwi a ju mbwe ge e jwa akan.

³⁷ Ge no ebam jan, ‘Bè ká ye fǝn ngge be ya ebgen,’ m jan nye anga jan, ge no kenm be fwa ena a bwe a kǝ̀n a chu m. Eshwen, mò a bè bá a chu m ángá, bwekǝ̀n anga.”

³⁸ Be etsonchi mbwe è jan, “Di Etsodwe, je no ngge hwen efǝ fà ana.” Yeso è jan, “Nye gwa fwa ena.”

Yeso è bgó Ehwya a Hwì mo Zetu

³⁹ Yeso è vǝ́ a je, nè ken tonvǝ́ a chu Hwì mo Zetu, abu gè bwe bwi anga, be etsonchi mbwe è ba ye.

⁴⁰ A gè vǝ́ngga ara a zǝn ángá, gè jan be, “Nye bgó Ehwya, afwa nya kwa a tswa embwadi.”

⁴¹ Gè gwa be, nè ken chàkǝn chafya, nè nggwa ekpanvǝ mbwe a sen nè bgó ebgo jan,

⁴² “Àtà, ano o cha ara dwa, tivǝ́ ara m ekan ena. Tea, fwa ye adi edgyan mam ra, ge e no adi edgyan mbo.”

⁴³ Kǝnggwa maleka è mbwibwa a zǝn ye chá kpe, nè janbon ye ekǝ̀n.

⁴⁴ Adia tsuruku è bgen ye anga àywá ángá, gè chungǝ́shi adi ebgo ebgom ngge engǝfen a ju ye è no twashwa anga a sen ángá, è no abu ngǝ.

⁴⁵ Atan a Yeso è bgó fwa ara ebgo ángá, gè nyi etkyen, nè ken a zǝn be ya è ba ye anga. Gè ben be adi dan, bè nì ara adi nya ebgenm.

⁴⁶ Gè ká be eka jan, “Ano bwe nye no dwa dan anga? Nye nyi etkyen nye e bgó ebgo, afwa nya kpo a tswa embwadi.”

Bè fu Yeso

⁴⁷ A ge chà jan fwa ena anga, Yahuda, akan a engga mo be etsonchi mbwe, è kpu be nobǝ embo bwa a zǝn Yeso. Gè ken tenten a zǝn ye evǝa ge e kan e fu ye.

⁴⁸ Tea Yeso è ká ye eka jan, “Yahuda, o tsǝdu Nwen Nobǝ anga ngge ekǝ̀n ekanfum?”

⁴⁹ Atan a be ya è no ngge ge, è yi ara mò a be nda a ba a bwe ángá, bè ká Yeso eka jan, “Etsodwe, je engga be a ju ngge be hwen efǝ mo je?”

⁵⁰ Kǝnggwa, akan a engga mo be etsonchi hon, è kpefwa ti ara tón chá budgo mo fí mo Chu mo ekǝ́n mo be.

⁵¹ Tea, Yeso è jan, “Nye e bwe nye enò efwe ra.” Gè yi bu mbwe a tón mo fí hon nè matswa ye.

⁵² Kǝnggwa Yeso è ká be Ekǝ́n echa hon ngge be chu mo ya e dgon Àtá mo Ehwya anga ngge be atkwen nobǝ ya e bwa evǝa be e fu ye ángá, eka jan, “M du be nobǝ tke etkekàn anga a me, a nye gwa a je ngge be hwen efǝ ngge be tuetsǝ́n evǝa nye e fu m ángá?

⁵³ Nogwa nogwa m̀ no anga ngge nye a chuukwa mo Àtá mo Ehwya, nyè fu m ra. Asuswana, a ekpengga mo nye ngge be ya e no a tswafǝ ángá.”

Bitru tson etson mo Yeso

⁵⁴ Kǝnggwa bè fu Yeso nè ti ye ken a mbwe Chu mo ekǝ́n. Bitru è no chàkǝn chashin nè no ba be anga.

⁵⁵ Be ya è no a zǝn è tso ara fǝ̀ a tswa chuukwa mo mu hon nè no ge nó anga, bè chu ngàhwya gu fǝ̀ hon no, Bitru è bwa chu a engga mo be gaten.

⁵⁶ Nwen ndegwa fí akan è di Bitru chuno a engga mo be, nè nggwa ye fǝzǝn no a ju a tswa enggasansan mo fǝ, nè jan, “Ende ena è no ngge ge.”

⁵⁷ Tea Bitru è tson etson jan, “Ndegwa, m yi m ye ra.”

⁵⁸ Beti bishi nwofyan, ende akan è diyi ara Bitru, nè jan, “Eshwen, a bo o no akan a engga mo be.” Tea Bitru è jan, “Ndedon, fwa ye a me ra.”

⁵⁹ Beti bishi etsǝ hon, abu awa akan è twafǝ̀ ara, ende akan è jan, “Ebi, nobǝ ena è no ngge ge, adia ga nobǝ ya a Galili.”

⁶⁰ Kǝnggwa Bitru è jan, “Ndedon, m yi m mò a o jan fwa anga a chu mo nó ra.” Gè chà pe ye vǝ ra, kǝndon è todwa.

⁶¹ Etsodwe è twanga nè nggwa Bitru fǝzǝn a ju. Kǝnggwa Bitru è kaben ara fwa Etsodwe è jan ye ángá. Etsodwe hon è jan ara ye jan, “Kǝndon chà a to ye dwa etsǝ nòmo ra, wa tson etson mam kè ta, jan o yi m ra.”

⁶² Gè vǝ́ a je nè kpedwa ngge engǝ a fǝzǝn àywá.

Be yakàn è fke Yeso nè bu ye mò

⁶³ Be ya è dgon Yeso anga è kwa ara ye efkem ngge ebum.

⁶⁴ Bè tè pe ye fǝzǝn, nè no bu ye mò anga, nè no ká ye eka anga jan, “We fi e tu je, ara bu o mò a ge?”

⁶⁵ Bè tsu wi ye tutu áywá.

Bè ti Yeso ken chafya mo be Atkwentì mo ya a Yahuda

⁶⁶ Atan a zǝn è ngga ara ángá, be atkwen nobǝ, be Ekǝ́n echa ngge be etumo mo edon è bwa fǝn gu a tem̀. Bè ti Yeso bwa chafya mo be.

⁶⁷ Bè jan ye jan, “Jan je, a bo wa Kristi hon?” Gè janfwe be jan, “Ano m jan nye, nya tsǝ́ nye ekǝ̀n a chu mo nó ra.

⁶⁸ Ano m ká nye eka akan, nye jan a fwe m ra.

⁶⁹ Ti asuswana ken chafya, a me Nwen Nobǝ, ma chu chá budgo mo Ehwya Emwenbin.”

⁷⁰ Enona, bè ká ye eka jan, “Kǝnggwa, a bo wa nwen mo Ehwya?” Gè janfwe be, “Eshwen, a a me hon abu nye jan anga.”

⁷¹ Kǝnggwa bè jan, “Fwa ejantum a je nda anga a zǝn ye efwe anga, ani? A je e chu je, je fo ara a vǝ mbwe.”