Luka 21 - Etkwen New Testament

Mò enom a gwafǝ́n è no ángá

¹ Yeso è ti re chu mbwe etkyen, nè diseshi abu be ya mobenben è no twa tse shi anga a tswa akpati mo mò enom a Àtá mo Ehwya.

² Gè di gwafǝ́n ya ekan akan è ti fwentse nwofyan, kobo fà, bwa no èé ge.

³ Gè jan, “Me e jan nye ebi, mò enom a gwafǝ́n ya ekan ena no ángá, tkyan ḿ mo egwa egwa e no ángá.

⁴ Be nobǝ ena binbin, tivǝ́ a tswa mo mobenben mo be embo ti no, tea ndegwa ya ekan ena ti gu mò a ge no ngge nó ángá ti no.”

Yeso è jan fwa a chu be mò ya a bwe ángá

⁵ Be etsonchi mbwe ya ehwyà è jan fwa anga e sojube a chu Àtá mo Ehwya, abu bè tsànse ti nó no ngge be ten esese ngge be mò edwe a bè tsànse ju mo nó no ángá. Tea, Yeso è jan,

⁶ “Be mò a nye di anga na, engga nyabwa, a ten akan a tu a no ye a chu ten efki ra. Binbin mo be, ba kǝn a bwi be a nggwa a sen.”

⁷ Bè ká ye eka jan, “Etumo, abu atan engǝ a be mò ena a bwe? Mò nwone a tú echi jan be mò hon tén ara a ba bwe ángá a ano?”

⁸ Gè janfwe be jan, “Nye bgeshi fǝzǝn evǝa be e ngga e de be nye ra, adia nobǝ embo a bwa adi ti mam, be no a jan anga jan, ‘A me ma a ge’, na jan gaten jan, engga ekǝn-etkyen mo zǝnchaje ne bwa tén ara. Nye e tsǝ́ nye ekǝ̀n a chu be ra.”

⁹ Atan a nye fo etkyen mo kàn ngge be etkekàn, nye e tsen nye etsentsen ra. Ge no ara jan be mò eni kwafya a bwe, tea ekǝn-etkyen hon, a bwa ye kè akan ra.

¹⁰ Kǝnggwa, gè jan be jan, “Eyasǝnsen ngge eyasǝnsen a nyo kàn eso, zǝnotì ngge zǝnotì a nyo kàn eso.

¹¹ Be sǝnsen a chìju echa, mbe a fu ngge be mò ebwe a bwe adi be zǝn efki efki. Be mò a du be nobǝ ndadin ángá ngge be echi moeditanm echa a bwe a zǝkpe.

¹² “Tea, atan a be mò e dwana chà bwe be ra, ba fu nye na tswa nye fí. Ba fu nye a du a bu mo be ya àtá chuefǝnm na twa nye a àtá ewhyatu. Ba kpu nye a ken chafya mo be tì ngge be gomna, binbin adi ti mam.

¹³ Ena a no nye efwa nwone a nye ti a jan Fwa Esese a chu m ángá.

¹⁴ Tea nye e nggwa nya mo nye a sen, nye e tsen nye tsuruku a chu abu nye jan ti a vǝ́ chu nye ángá ra,

¹⁵ adia ma no nye be fwa ngge yishwa enggaton, nwone a be ya eze mo nye twa a ti be ese, eno e ra efyan ngge nye ra.

¹⁶ Èé be ate nye, ayi nye, be nwenjwa nye, be efi mo nye, ngge be shushwa nye a tsǝ a du nye a bu mo be nobǝ, ngge be nobǝ hon a gu ya ehwyà mo nye.

¹⁷ Nobǝ binbin a ze nye adi ti mam.

¹⁸ Tea zan-a-chu mo nye akan a dì ye ra.

¹⁹ Adi echungǝ́m mo nye, nye ti a vǝ́ chu nye.

Yeso è jan abu ba tkò Urishelima ángá

²⁰ “Atan a nye di be yakàn ngàhwya ara Urishelima, kǝnggwa nye e yi jan engga mo etkom mo nó bwa tén ara.

²¹ Atan enò, ge no kenm a nye ya e no a Yahudiya ángá, nye e tse e vǝ chá chu be hwì. Be ya e no a tswa eten efifi hon ángá, e tse e vǝ́ a je, be ya no chá je mo eten ángá be e kwa e shi be a tswa mo nó ra.

²² Adia ena a be tsǝnò a Ehwya a tswa Urishelima ekan, nwone a tú edefǝm mo be mò a bè bá no a tswa afketa ángá.

²³ Ebwe no a chu mo be ndegwa ya jufà ngge ya e kpwa mbǝgya amme no a bu ángá adi be tsǝnò hon. Ekan a no àywá a chu sǝnsen hon ngge engo mo Ehwya a shwa a chu be nobǝ ena.

²⁴ Ba gu be ya ehwyà ngge hwen efǝ na kpu be ya ehwyà a bu be fí a ken a sǝnsen mo be kpenmo binbin. Be ya e fwa be ya a Esǝrela ra, a cha a pya Urishelima, ti ken a ngga ekǝn-etkyen mo ekpengga a Ehwya è no be ángá de a fǝ.

Etwabǝbwam mo Nwen Nobǝ hon

²⁵ “Ba di be mò ezǝzǝju adi nò, adi fka ngge be ngǝkpe. Binbin mo be eyasǝnsen a tswa zǝnchaje a tsen etsentsen ngge tsuruku ekǝnkǝn nya, a chu aken mo efǝ́m mo mbǝ a sǝn.

²⁶ Be nobǝ a kpokǝn a tswa etsentsen àywá, ngge tashwa emme ekam a chu be mò e nyabwa a chu zǝnchaje, adia ba du be mò ya e dwa a kpe anga a chìju.

²⁷ Ekǝnggwa be nobǝ chagwa chagwa a di Nwen Nobǝ nyashwa a zǝnchaje a tswa edwe ngge echakpo ngge egǝ̀n edgwadgwa.

²⁸ Engga a nye di be mò ena bwe anga, nye e di zǝn a kpe, nye e ywa e seshi adia efkavǝm mo nye bwa tén ara.”

Hufwa a chu mo tu engǝtsǝn

²⁹ Ekǝnggwa Yeso è tso be hufwa ena jan, “Nye e kǝ́n-ekǝnkǝ́n a chu mo tu engǝtsǝn ngge be tumo binbin.

³⁰ Engga a be kwa ara be zǝmo etom ángá, nya yi jan ne jo tén ara.

³¹ Enò gaten, ano nye di be mò e dwana bwe anga, nye e yi jan zǝnotì mo Ehwya bwa tén ara.

³² “Ebi m jan nye anga, be nobǝ e no asuswana ángá a fǝ be ra, kpwà tén a no be mò ena bwe ara binbin.

³³ Kpe ngge zǝnchaje mbwi a da, tea ge no kenm be fwa mam bwe a kǝ̀n a tén ebwekǝ̀nm.”

Nye e no e tsashi

³⁴ “Nye e no e tsashi, nye e gwa nye mò edem ngge mò engǝm tangge be mò tsen tsuruku mo zǝnchaje e twa e pe tashwa ekam mo nye ra. Efki ra, nò hon bwa a pe nye a ju kè akan.

³⁵ Adia nò hon a bwa a tén ebwam, a chu nobǝ binbin e no a tswa zǝnchaje ena.

³⁶ Nye e dwa nye dan ra. Nye e no e bgó ebgo anga, evǝa nye e ben echakpo nwone a nye ti tse a ga a bu mo be mò a bwe ángá, ngge a nye ti a ywa a chafya mam, Nwen Nobǝ.”

³⁷ Nogwa nogwa, Yeso è no tú mò anga a Àtá mo Ehwya, tea edgo gè vǝ́ a chu Hwì mo Zetu, nè vǝ no dwa anga a zǝn.

³⁸ Anofon tàtà, be nobǝ binbin è no bwa fǝn anga a zǝn ye a chuukwa mo Àtá mo Ehwya evǝa be e fo moetum mbwe.