Luka 2 - Etkwen New Testament

Abu bè mbwa Yeso ángá

¹ Atan enò, Tì echa Kaisa Agostu mo Roma, è twa edon jan be e ka e gu be nobǝ è no a tswa zǝn a sǝnsen mo Roma kpwà ángá.

² Ena a be nobǝ ekam ekwafya a bè ká adi sǝnsen mo Roma ángá, atan a Kwirino è no gomna a Siriya ángá.

³ Egwa egwa è nya a eten mo ebǝ ata mbwe, evǝa be e bá ti mbwe.

⁴ Ekǝnggwa, Esufu è nya èé ge. Gè gwa eten a Nazarati a sǝnsen mo Galili, ken a Yahudiya, nè vǝ́ a Betalami, eten a bè mbwa Dawuda ángá. Gè ken a zǝn adia gè kpe efi no ngge Dawuda ángá.

⁵ Esufu è ken evǝa ge e bá ti mbwe ngge Meri, ndegwa a gè tè ara fù mo nó jan ga no gwa ye ángá. Ndegwa hon è no ngge jufà.

⁶ Engga a bè no a Betalami ángá, ekpengga è bwe ara a ga mbwa nwen hon.

⁷ Gè mbwa nwen ekwafya mbwe ndedon. Gè binpe nó a tswa adanmo nè ti ye twàshi no a tswa mò a be nggwa be efyomo mode a tswa mo nó ángá, adia àtá è fwa ye a mu a be ya echan dwa anga ra.

Be ya efyomo ngge maleka

⁸ A zǝn, be ya efyomo ya ehwyà è dwano a tswavǝ́n tenten Betalami, bè no dgon be efyomo mo be anga etsǝ.

⁹ Kǝnggwa kè akan, maleka è mbwibwa a zǝn be, zǝn hon è nggasan ngge egǝ̀n mo Ehwya è ngàhwya be, bè tsen etsentsen.

¹⁰ Tea, maleka hon è jan seshi be jan, “Nye e tsen nye e etsentsen ra. M ti Fwa Esese bwa ara nye, nwone a ti tsuruku etenten ti a bwa be nobǝ binbin.

¹¹ Be mbwa ara Etivǝ́ mo be nobǝ nòmo a eten efifi a bè mbwa Dawuda ángá, ga Kristi, Etsodwe.

¹² Ena a mò a tú nye echi mo fwa ena: Nye ken a di nwen a be binpe ye no adi adanmo, ti twàshi no a tswa mò nggwa mode mo be efyomo.”

¹³ Kè akan, be maleka embo a kpe è mbwibwa ben maleka ekwafya, bè no tàn Ehwya anga jan,

¹⁴ “Egǝ̀n be e ti e no Ehwya a kpe, a zǝnchaje be ya Ehwya fo etkwa mo be anga, be e no a tswa adgye.”

¹⁵ Atan, a be maleka hon è nyagwa ara be ya efyomo hon nè twabǝ nya ara a kpe ángá, be ya efyomo hon è jan e sojube jan, “Je e ken a Betalami evǝa je e ken e di mò hon ena e bwe, nwone a Ehwya jantu je fwa a chu mo nó ángá.”

¹⁶ No enona, bè ti kèn myan myan, nè ken di Meri ngge Esufu, ngge nwen hon, a bè ti twàshi no a tswa mò nggwa mode mo be efyomo ángá.

¹⁷ A bè di fwa ara ye ángá, kǝnggwa bè no jan be nobǝ fwa a bè jan be a chu nwen hon ena ángá.

¹⁸ Binbin, be ya è fo mò a be ya efyomo è jan ángá, bè tàn ebwikpe.

¹⁹ Meri è kpu gu fwa hon nyino a tsuruku mbwe, nè no ka shwa anga a chu be.

²⁰ Abu be ya efyomo è twabǝ nya anga, bè no Ehwya egǝ̀n nè tàn ye, a chu binbin mo be mò a bè fo nè di ángá. Be mò hon è no tén abu maleka è jan be ángá.

Bè tso Yeso ti

²¹ Beti bishi, adi tsǝnò e chwen a ta bè tsen nwen hon tkyà, nè tso ye ti Yeso, ti a maleka è tso ye sangǝ́ bè chà no dgyèn mbwe ángá.

Bè ti Yeso bwa a Àtá mo Ehwya

²² Atan a Esufu ngge Meri è nacha ju be bwangga ara, abu edon a Ehwya è ti no Mosa è jan ángá, bè ti Yeso ken a Urishelima, evǝa ba ti ye a no Ehwya.

²³ Bè bwe enò, adi fwa a bè bá no adi edon mo Ehwya jan, “Nwen ekwafya ndedon, be tsǝ̀pe ye a no ḿ mo Ehwya.”

²⁴ Efwe, bè no mò etinom abu edon mo Ehwya hon è jan ángá, “Eba twa fà eno e ra be eba ebgan fà.”

²⁵ Atan a enò nobǝ akan, è no a Urishelima, bè fǝ́ ye anga Simiyon. Gè no nobǝ è bwe mò a Ehwya dgyan anga. Gè no nobà ekpengga a Ehwya jan a tswa be nobǝ mbwe, be ya a Esǝrela tsuruku. Engǝ́ mo Ehwya è no ngge ge.

²⁶ Engǝ́ mo Ehwya hon è tú ara ye jan, ga fǝ ye ra, ga di Kristi, Etsǝpepe hon, nwene a bè sen ara vǝ jan ga bwa ángá sangǝ́.

²⁷ Engǝ́ hon è du Simiyon ken a Àtá mo Ehwya. Atan a enò, ate mo Yeso ngge ayi ye è ti ye bwa a chuukwa mo Àtá mo Ehwya. Bè nda anga be e bwe ye mò abu edon a Ehwya è ti no Mosa è jan ángá.

²⁸ Simiyon è cha Yeso kpwá a bu mbwe nè tàn Ehwya jan,

²⁹ “Ehwya Etsodwe, abu ò senvǝ ángá asuswana, gwa fí mbo ge e fǝ a tswa adgye.

³⁰ Adia m di ara ega hon ngge fǝzǝn mam,

³¹ nwone o bwese nyi ara a fǝzǝn mo be binbin be nobǝ be e di ángá:

³² Ga no zǝn enggasansan nwone a ti o a tú be ya e fwa be ya a Esǝrela ra, ga ti egǝ̀n a bwa be nobǝ mbo, Esǝrela.”

³³ Fwa ena, a bè jan a chu nwen hon ángá, è kǝn ate ye ngge ayi ye nya.

³⁴ Simiyon è tso be dwavǝ esese, nè jan Meri ayi nwen hon jan, “Bu tón, nwen ena bwa ara a ga no ekpom ngge etkyen enyim mo be nobǝ embo a Esǝrela, ga no echi a be nobǝ embo a jan ebgen a chu ye.

³⁵ Adi esegwam mbwe, ba yi fwa ebi ekam mo be nobǝ embo. Tsuruku mbo a bgen àywá èé ge, abu be ke o hwen efǝ.”

³⁶ Ndegwa akan èé ge, è no efojan a Urishelima, bè fǝ́ ye anga Anatu, nwen mo Fanuwe, a efi mo Asha, gè ke ara cho, gè ngǝ́ don mo je chwen a fà.

³⁷ Don ye è fǝgwa ye abu gwafǝ́n. Kǝnggwa gè no zǝno gwafǝ́n mo je gwi chwen ata chu ndwe. Gè no ken anga a Àtá mo Ehwya ènò ngge etsǝ, nè fyàn ye anga ra, nè no tàn Ehwya anga. Gè no tse vǝ anga, nè no fen Ehwya ngge ebgo ebgom.

³⁸ Atan a enò, gè bwa a zǝn, gè chwano Ehwya nè jan fwa a chu nwen hon ngge be ya è nobà be e di abu Ehwya a jwa a cha Urishelima ángá.

Esufu, Meri ngge Yeso è twabǝ ken a Nazarati

³⁹ Atan a Esufu ngge Meri è bwe fwa ara mò a edon mo Ehwya è jan ángá, bè twabǝ ken a eten mo be, a Nazarati a sǝnsen mo Galili.

⁴⁰ Nwen hon è cha mbo nè no ngge echafǝju, ngge enggaton àywá. Esese mo Ehwya è no a chu ye.

Yeso ezon-ndedon, a Àtá mo Ehwya

⁴¹ Je ngge je, ate ye ngge ayi ye è no ken anga a Urishelima adi Esǝ mo Epenyim.

⁴² Engga a Yeso è no ngge je gwi chu fà ángá, ate ye ngge ayi ye è ken ngge ge adi esǝ hon abu bè bwe bwi anga.

⁴³ Atan a bè de fwa ara esǝ hon ángá, ayi Yeso ngge ate ye è twabǝ nyaken a mu, nwen be Yeso è ndnyano chashin a Urishelima, bè yi be ra.

⁴⁴ Bè kenkèn mo tsǝnò akan nè no ka anga jan gè no a tswa mo be nobǝ a bè nyaken eso ángá. Ekǝnggwa, bè kwa ara ye etkundam a tswa mo be ya mu be ngge be edwe shushwa.

⁴⁵ Atan a bè di be ye ra, bè twabǝ ken a Urishelima evǝa be e tku e nda ye.

⁴⁶ Tsǝnò a di e ta bè di ye a Àtá mo Ehwya, gè chuno a engga mo be etumo mo edon, no fo be, nè no ká be eka anga.

⁴⁷ Binbin mo be ya è fo fwa mbwe ángá, mò hon e zǝ̀ be ju a chu be mò ehwayim ngge ejanfwem mbwe.

⁴⁸ Atan a ate ye ngge ayi ye è di ye ángá, mò hon è kǝn be nya. Ayi ye è ká ye eka jan, “Nwen m, ano bwe a ge o bwe je enó? Ate o ngge me tsen tsuruku, je no nda o anga.”

⁴⁹ Gè ká be eka jan, “Ano bwe a ge nye no nda m anga? Nye yi nye jan ge no ara kenm ma no a Àtá mo Àtà m ra?”

⁵⁰ Bè foyi be engà mo fwa a gè jan be ángá ra.

⁵¹ Gè shi abibi ngge be a Nazarati, nè no tse be anga. Tea ayi ye, è ti fwa hon dgon gu a tsuruku mbwe.

⁵² Yeso è chambo a tswa enggaton ngge ekǝnjuju. Ehwya ngge be nobǝ è fo etkwa mbwe.