Luka 19 - Etkwen New Testament

Yeso è tivǝ́ Zaka

¹ Echukǝnggwa, Yeso è kwashi a eten a Jeriko nè twafǝ̀ nyaken a tswa mo nó.

² A tswa eten hon, ende akan è no chu mo be ya è cha tse-eten ángá, è no a zǝn. Ti mbwe è no Zaka, gè no ya mobenben.

³ Gè tkyan anga ge e di Yeso, tea gè diben ye nó ra, adia gè no nobǝ ekǝnbwabwa, tangge be nobǝ è fífí re.

⁴ No enona, gè tse ken chafya, ken tonvǝ́ a chu tumo engǝtsǝn akan, evǝa ge e di e ben ye, adia Yeso è twafǝ̀ nyaken chá zǝn ángá.

⁵ Atan a Yeso è kengga ara a zǝn tumo hon ángá, gè takpa di zǝn nè jan, “Zaka, shwa a sen myan myan, nòmo, ge no ara kenm ma dwa a mbwe o.”

⁶ Ekǝnggwa, gè shwa a sen myan myan nè cha Yeso ngge vǝtsen ken kwa a mbwe ye.

⁷ Binbin, be ya è di mò ena ángá è kwa ara fwa efim jan, “Ge ken nga ara ya echan mo ya ebgen.”

⁸ Beti bishi, Zaka è nyi etkyen nè jan Etsodwe jan, “Di, Etsodwe, ma ti ebwikwa mo mobenben mam ti a no be ya ekan. Ano m̀ de mò mo ende akan adi amme, ma kpwa ye nó ke ndwe.”

⁹ Yeso è jan Zaka jan, “Nòmo, Ehwya tivǝ́ ara be ya mu ana, adia a ge gaten, ga ebi mo Ebrayi.

¹⁰ Adia Nwen Nobǝ, è bwa evǝa ge e nda be ya è tku da ara ángá ge e ti e vǝ́ be.”

Hufwa a chu tì akan ngge mbǝgya mochi mbwe gwi

¹¹ Abu be nobǝ è no fo fwa mbwe anga, Yeso è tso be hú adia gè tén ara a Urishelima ngge be nobǝ hon è ka anga jan zǝnotì mo Ehwya hon mbwi a bwa kè akan.

¹² Gè jan, “Nobǝ egǝ̀n akan è no di ara, gè nda anga ga ken echan chá sǝnsen akan a dabonbon, evǝa be e dwa ye tì sangǝ́ ge e chà e bwa a mu.

¹³ Enona, gè fǝ́ be mbǝgya mochi mbwe gwi dwa, nè no be tse a be fǝ́ ángá mina, akan akan, kǝ̀n gu chu be, nè jan be jan, ‘Nye twanga bu ngge be ti e ken atan a m twabǝ a bwa ángá.’

¹⁴ “Tea be ya eten mbwe è dgyan be ye ra, nè tson be nobǝ be e ba ye, nè ken e jan be ya a dwa ye tì hon ángá jan, ‘Je dgyan je ende ena ge e dwatì a chu je ra.’

¹⁵ “Bi adi enò, bè dwa ye tì hon. Atan a gè twabǝ bwa a mu ángá, gè tson chí fǝ́ mbǝgya mochi mbwe a gè no be tse ángá dwa, evǝa ge e fo mò a be ben tubi a chu tse a gè no be ángá.

¹⁶ “Ekwafya è bwa jan, ‘Yagwamo mu, mina mbo ben mina gwi tubi ara a chu mo nó.’

¹⁷ “Yagwamo mu hon è jan, ‘O bwe ara esese ya mochi ebi mam. Adia o tu ebi a chu mò nwofyan, m no ara o emwentì we ti e fu be eten gwi.’

¹⁸ “Nwen mochi adi e fà è bwa jan, ‘Yagwamo mu, mina akan mbo ben mina chwen tubi ara a chu mo nó.’

¹⁹ “Yagwamo mu mbwe è jan ye, ‘Wa dwatì a chu mo be eten chwen.’

²⁰ “Ekǝnggwa, nwen mochi adi e ta è bwa nè jan, ‘Yagwamo mu, mina mbo e no na. M̀ ti ye tè adi eta adanmo ti ngǝ̀ton seshi adi zǝn akan.

²¹ M̀ tsen o anga adia fwa mbo bwe dwa àywá. O ti mò nwone e fwa ye mbo ra, ngge o bǝ mowa anga adi zǝn a o tswa mbo fwento ra.’

²² “Yagwamo mu mbwe è jan ye jan, ‘A bo nwen mochi ya mofǝ̀, ma kpèn o kǝ́n a chu fwa e gwa a vǝ mbo ángá. O yi jan fwa mam bwe dwa àywá, m ti mò nwone e fwa ye mam ra, m bǝ mowa anga a di zǝn a m tswa m fwento ra?

²³ Enona, ano bwe a ge, o ti tse mam nyi mbo a zǝn a be dgon tse anga, evǝa atan a m twabǝ bwa ara mà a ben ara etubim a chu mo nó ra?’

²⁴ “Kǝnggwa ge twanga ken chá be ya mochi mbwe ya ehwyà ya è ywano a zǝn ángá, nè jan, ‘Nye cha ti ara mina akan hon, nye e ti e no ende e no ngge mina gwi ángá.’

²⁵ “Be jan ye, ‘Yagwamo mu, tea ge no ngge mina gwi.’

²⁶ “Yagwamo mu hon è janfwe be, ‘Nye bu tón fo, ende bwe mò esese ngge mò a be no ye anga, ba tu a bi ye. Tea a zǝn be ya e bwe be mò akan ra, èé mò nwofyan a be no ngge nó ángá ba cha ti ara nó a zǝn be.

²⁷ Adi ḿ mo be ya eze mam ena, ya è dgyan be me e dwatì a chu be ra, kpu be bwa ana evǝa nye gu be a fǝzǝn mam.’ ”

Yeso è shi Urishelima

²⁸ Atan a Yeso è jan gu ara fwa ena ángá, gè kwafya mo be etsonchi mbwe, bè no adi kèn nyavǝ́ a Urishelima.

²⁹ Abu gè bwa ara tenten a zǝn be eten Betafaji ngge Betani a chu hwì a be fǝ́ anga Hwì mo Zetu, gè tson be nobǝ fà a engga mo be ya è ba ye anga chí, jan,

³⁰ “Nye ken a eten nwofyan e no chafya mo nye nokǝ̀n, abu nye kwa nyashi a tswa eten hon ángá, nya di ezon-jaki a be ti teno, nwone ende akan chà tón didi ye nó ra. Nye e fken ti ye e bwa ana.

³¹ Ano ende akan ká nye eka jan, ‘Ano bwe a ge nye fken ye anga?’ Nye e jan ye, ‘A Etsodwe nda nó anga.’ ”

³² Be etsonchi a Yeso è tson be ángá è ken ben tén nó abu gè jan be ángá.

³³ Abu bè fken nó anga, yagwamo mo nó è ká be eka jan, “Ano bwe a ge nye fken ezon-jaki hon anga?”

³⁴ Bè janfwe ye jan, “A Etsodwe nda nó anga.”

³⁵ Ekǝnggwa, bè ti ezon-jaki hon bwa a zǝn Yeso. Bè kpu be adanmo bwipe ju mo be kpu twà a ju mo jaki hon, nè kan Yeso chu a ju mo nó.

³⁶ Abu bè no nyaken ángá, be nobǝ è kpu adanmo mo be kpu twà a chu efǝ.

³⁷ Atan a Yeso è bwangga adi zǝn a efǝ è kpo shi chá Hwì mo Zetu ángá, be nobǝ embo ya éè ba ye anga, è no tàn Ehwya anga a tswa vǝtsen a chu binbin mo be moeditanm a bè di Yeso è bwe ángá.

³⁸ “Esese a ḿ mo tì nwene e nyabwa adi ti mo Etsodwe ángá.” “Adgye no a kpe, ngge egǝ̀n a ḿ mo Ehwya e no anga adi zǝn e cha ti ara ángá.”

³⁹ Tea be Farisi ya ehwyà engga mo be nobǝ embo è jan Yeso jan, “Etumo, tkyá be etsonchi mbo etkya be e kpo nya fwa a be jan anga na.”

⁴⁰ Yeso è janfwe be jan, “Me e jan nye, ano be kpo nya, be ten ya e dwana a tandwa.”

Yeso kpedwa a chu Urishelima

⁴¹ Atan a Yeso è bwa tén ara a Urishelima nè di chàkǝn eten efifi hon chafya mbwe ángá, gè kwa ara dwa ekpem a chu mo nó,

⁴² jan, “Woo! Be è jan nye ma yi ara nòmo mò nwone a ti adgye a bwa nye ángá, tea asuswana ge no engǝ̀tonton a zǝn nye.

⁴³ Ekpengga mo nya ebgenm nyabwa, nwone a ya eze mo nye a du nye èkwà na twa efyon ngàhwya nye, na tsǝ nye a shi a tswa mo efyon hon tsonò tsonó.

⁴⁴ Ba cha a pya a gu nye tangge èkwà e ngàhwya eten mo nye no ángá. Ba gwa be ten akan a chu mo akan ra, adia nye yi nye atan a Ehwya è bwa evǝa ge e ti e vǝ́ nye ángá ra.”

Yeso è nyonvǝ́ be yajwa a Àtá mo Ehwya

⁴⁵ Atan a Yeso è kwashi ara a Urishelima ángá, gè ken a chuukwa mo Àtá mo Ehwya. Abu gè di be ya è no jwade be mò a zǝn anga, gè nyo be vǝ́ a je.

⁴⁶ Gè jan be jan, “Ge no ebam jan, ‘Àtá mam a no àtá mo ebgo, tea nye bwe ye nga ara ahwya mo be ya moebufkwam.’ ”

⁴⁷ Kǝnggwa nogwa nogwa, gè no tumo anga a Àtá mo Ehwya. Tea be Ekǝ́n echa, be etumo mo edon ngge be atkwen nobǝ è kwa ara ekam abu ba a gu ye ángá.

⁴⁸ Èé enò, bè yi be abu ba bwe ángá ra, adia be nobǝ binbin è fo etkwa mo fwa a Yeso è jan be anga àywá.