Luka 15 - Etkwen New Testament

Hufwa a chu son éè tku da ángá

¹ Nò kè akan, be ya tse-eten echam ngge be ya ebgen efki, è bwa fǝnno a zǝn Yeso evǝa be e fo fwa mbwe.

² Tea be Farisi ngge be etumo mo edon mo ya a Yahuda, è kwa ara fwa efim jan, “Ki! Ende ena sha be ya ebgen n de èé mode anga ngge be.”

³ No enona, Yeso è tso be hufwa ena jan,

⁴ “Ano ende akan a engga mo nye no ngge son e fí kengga gwé akan, akan a engga mo be tku da ara, mò a ga bwe ángá a ano? Chú ga gwa ye be son gwi chwen a ndwe chu chwen a ndwe hon a zǝn, n ken tku a nda ye akan hon, kpwà tén ano ge di ara nó sangǝ́ ra?

⁵ Atan a ge di ara nó ángá, ngge vǝtsen ga ti nó a bwi a embǝgashwa,

⁶ ti a bwa a mu. Atan a ge bwa ara a mu ángá, ge fǝ́ a fǝn be shushwa ye ngge be needwe mbwe dwa na jan be jan, ‘Nye bwa je e shánju, je e fo etkwa abibi adia m di ara son mam éè tku da ángá.’

⁷ M jan nye anga na, ba shánju a kpe àywá a chu ya ebgen akan e twa etwa mo ebgen mbwe, twa a fǝ̀ a chu mo be nobǝ gwi chwen a ndwe chu chwen a ndwe ya e ka jan ba be ya ebitete ángá.”

Hufwa a chu fwentse éè twada ángá

⁸ “Efwe, ano ndegwa akan e no ngge fwentse azufa gwi, n twa da ara akan, chú ga ton ye petila, ge e jwa a se àtá, n tku a nda a gu tswa àtá hon, kpwa tén ano ge di ara fwentse hon sangǝ́ ra?

⁹ Atan a ge di ara nó ángá, ga fǝ́ be shushwa ye ngge be needwe mbwe dwa jan, ‘Nye bwa je e shánju, je fo etkwa abibi adia m di ara fwentse m akan éè twada ángá.’

¹⁰ M jan nye anga na, ge no enó, be maleka shánju anga a chafya mo Ehwya, atan a ya ebgen akan twa etwa mo ebgen mbwe ángá.”

Hufwa a chu mo nwen éè kán ayinó mo mò a gè bwe ángá

¹¹ Efwe Yeso è tú bishi be mò adi hufwa jan, “Ende akan è no ngge mbǝgya ndedon fà.

¹² Nwenbwa mo be ezon-ndedon hon è jan ate be hon jan, ‘Àtà, no m atkimo fǝ́n e no mam ángá, asuswana.’ No enona, ate be è kwa gushi be mbǝgya hon, be atkimo mbwe.

¹³ “Dgyen ye fon ra, nwenbwa hon è tefǝn gu atkimo mbwe a bè kwa no ye ángá nè tku nya m̀ mbwe adi eyasǝnsen efki adabonbon, nè bwedì gu mobenben mbwe hon a zǝn adi zǝno hwen enom.

¹⁴ Atan a gè gu gu ara be mobenben mbwe hon ángá, mbe ekǝnkǝn nya è fu a eyasǝnsen hon, gè ben ye mò a ga de ángá ra.

¹⁵ No enona, gè ken bgó ge e no fí mo nobǝ akan ya eyasǝnsen hon ángá. Ende hon è ti ye ti du adi mochi mo efika efyom.

¹⁶ Mbe è fu ezon-ndedon hon àywá, gè nda ge e de èé be ga tumo a bè ti fi be efika hon anga. Tea bè no didi be ye mò akan ra.

¹⁷ “Atan a gè twanga bwa adi engà mbwe ángá, gè jan chu ye jan, ‘Di, binbin mo be ya e bwe àtà m mochi anga, de mbo anga a be èé mode ya ehwyà dàn anga. A me m no ana no fǝ mbe anga.

¹⁸ Ma twabǝ a ken a zǝn àtà m, ma jan ye jan, Àtà, m bwe ara edan a chafya mo Ehwya ngge bo.

¹⁹ M kǝn m a be e ti m jan ma nwen o efwe ra. M bgó anga we ti m abu akan mo be mbǝgya mochi mbo.’

²⁰ No enona, gè nyi etkyen nè ti kèn twabǝ ken a zǝn ate ye. “Abu gè chà nyabwa adgya, ate ye è diyi ara ye, nè di ashi mbwe. Gè tse ken ben nwen ye hon, nè kanfu nó ban a ekǝ̀n mbwe a tswa vǝtsen.

²¹ “Nwen hon è jan ye jan, ‘Àtà, m bwe ara Ehwya ebgen, m bwe ara o ebgen gaten. M kǝn m a be e fǝ́ m nwen o efwe ra.’

²² “Tea, ate ye è jan be mbǝgya mochi mbwe, ‘Myan myan, nye ken ti mokàn efifi e se ti ara ti bwa nggwa ye. Nye e du ye ehwa a sen-e-bu ngge kpumo a tkyafù.

²³ Nye ken e fu ezon-ndwa a je fi no ekeke ángá, ti bwa yagu, nye bwese ye je e fo etkwa, je e shánju.

²⁴ Adia nwen m ena è no abu ge fǝ ara, ngge ge twabǝ bwa ara angǝ, gè tku da ara, asuswana je di ara ye.’ No enona, be kwa ara mò ebum ngge ge egem.

²⁵ “Atan a eno, nwen ye nwenfi hon è chà no a kpèn. Atan a nwen hon è bwa tén ara a mu ángá, gè fo bè no bu etòn ngge bè no shánju anga.

²⁶ No enona, gè fǝ́ ende akan a engga mo be mbǝgya mochi mo be nè ká nó eka jan ne mò e kenkèn anga a mu ángá a ano?

²⁷ Nwen mochi hon è janfwe ye, ‘Adia nwenjin o nwenbwa twabǝ bwa ara a mu ángá, àtá mbo yagu ara ezon-ndwa a jè fi no ekeke ángá, adia a ge twabǝ bwa ara esese a tswa nya mbwe.’

²⁸ “Nwen nwenfi hon è fku tsuruku àywá nè se a ge e kwa e shi a tswa akanmu. No enona, ate ye è vǝ́ a je nè bgó ye.

²⁹ Tea gè janfwe ate ye jan, ‘Àtà, o yi jan m bwe o mochi mo ekpengga embo, m chà difu didi mbo ra. Èé nò, o chà no di m nwen bwí evǝa me e ti e gu e fo etkwa ngge be shushwa m ra.

³⁰ Atan a nwen o ndedon ena twabǝ bwa a mu, ende e bwedì atkimo mbo ngge be ndegwa ya ekacha, o ti ezon-ndwa ekeke, yagu no ye.’

³¹ “Ate ye è jan, ‘Nwen m, o no kpwà ngge me, mò binbin a m no ngge ge ángá, a ḿ mbo.

³² Ge se ara jan je e shánju, je e ge ge abibi adia nwenjin o nwenbwa ena è no abu ge fǝ ara, ge twabǝ bwa ara angǝ, gè tku da ara, be di ara ye.’ ”