Luka 13 - Etkwen New Testament

Twa etwa mo ebgen mbo eno e ra wa fǝ

¹ Ekǝnggwa, be ya ehwyà ya è no a zǝn ángá è jan fwa ngge Yeso a chu be ya a Galili, a Bilatu è du be e gu be nè ti ngǝ mo be nòtan ngge be mò etinom mo be a Àtá mo Ehwya ángá.

² Yeso è ká be eka jan, “Nye ka anga jan, be ya a Galili a bè gu ángá, è bwe ti ara mò esera a be chàshín be ya a Galili ya ehwyà, adia bè ngǝ ekan enó ángá?

³ M jan nye anga na, ge fwa ye enò ra, ano nye twa nye etwa mo ebgen mo nye, nye twanga ken nye a zǝn Ehwya ra, nya tkò a gu abu be.

⁴ Efwe, nye ka anga jan be nobǝ gwi chu chwen a ta, a àtá a kpe è bwi shwa nggwa gu be a Silowam ángá, è bwe ti ara mò esera chàshín binbin mo be nobǝ efki éè no a Urishelima ángá?

⁵ M jan nye anga na, ge fwa ye enò ra, ano nye twa nye etwa mo ebgen mo nye ra, nya tkò a gu abu be.”

Hufwa a chu tu engǝtsǝn e gwa ye ga anga ra

⁶ Ekǝnggwa, Yeso è jan be hufwa ena jan, “Nobǝ akan è shin tu engǝtsǝn no a wá enabi mbwe. Beti bishi, ge ken, evǝa ge e bga be ga mo nó, nè ben didi ye ga a ju mo tumo hon ra.

⁷ Enona, gè jan nwen a mbwe ye éè dgon kpèn hon anga jan, ‘Di, bwe ara je ta, m̀ bwa no nda ga anga a ju tu engǝtsǝn ena, m ben m ga a ju ye ra. Sen twa ye, adi ano a je gwa ye, ge no a de sǝnsen anga kukwa.’

⁸ “Kǝnggwa, nwen a mbwe ye hon è jan, ‘Yagwamo mu, gwa ye mo je akan efwe, ma gu zǝn ngàhwya ye, ma nggwa ye nga (taki) a chin.

⁹ Ano ge gwa ga adi je efwe, se ara. Ano ge gwa ye ga ra, be e sen e twa ye.’ ”

Yeso matswa ndegwa etohoho Nò nya Etkem

¹⁰ Nò nya Etkem akan, Yeso è tú mò anga a tswa àtá chuefǝnm akan mo ya a Yahuda,

¹¹ ndegwa akan è no a zǝn, gè no ngge engǝ́ esera nwone e du ye modwa a ju mo je gwi chu chwen a ta. Engǝ́ esera hon è vǝ toho ye nè bwe chashin mbwe no etutu, gè ywa ti ye eywaywaju etkyen efwe ra.

¹² Atan a Yeso è di ndegwa hon ángá, gè fǝ́ nó dwa nè jan, “Ndegwa, be matswa ara o modwa mbo.”

¹³ Gè ti bu mbwe tu ye a ju, kè akan gè ywa tén etkyen, eywaywaju nè no tàn Ehwya anga.

¹⁴ Chu mo àtá chuefǝnm hon è fku tsuruku àywá adia Yeso è matswa ya modwa hon Nò nya Etkem ángá. Gè jan be nobǝ, ya è no a zǝn ángá jan, “Je no ngge be tsǝnò chwen a ngǝ, a ba bwe mochi, nye e bwa a tswa mo be tsǝnò hon evǝa be e matswa nye, fwa ye Nò nya Etkem ra.”

¹⁵ Ekǝnggwa Etsodwe è jan ye, “A bo ya ayibangǝ̀, a engga mo nye, ara hon a fken ye ndwa mbwe, eno e ra, jaki mbwe a zǝn a ge tè nó no Nò nya Etkem evǝa ge e ti nó e ken e ngǝ mbǝ ra ángá, a ara?

¹⁶ Chú ge se ye ndegwa ena, nwen mo Ebrayi, nwene Shetan è fupe ye nyino mo je gwi chu chwen a ta, be e ma e tswa ye Nò nya Etkem, a bu mo mò e fupe ye ángá ra?”

¹⁷ Atan a Yeso è jan be fwa ena, ebgenju è fu be ya eze mbwe, tea be ya ehwyà ya è no a zǝn ángá, binbin è fo etkwa mo be moeditanm a gè no bwe anga.

Hufwa a chu fwento musta ngge mò a be fǝ yisti ángá

¹⁸ Yeso è ká be eka jan, “Zǝnotì mo Ehwya no abu ano? Ma mbwà a di ye ngge ano?

¹⁹ Ge no abu fwento musta a ende akan ti tswa no a wa ehwyazǝmo mbwe. Gè vǝ́ nè chambo nga tumo, a be nwendnye è bwa no tsa afku mo be adi be bu mo nó ángá.”

²⁰ Efwe, gè ká eka jan, “Mò a ma mbwà a di zǝnotì mo Ehwya ngge ge anga a no?

²¹ Ge no abu yisti a ndegwa ti nòtan ngge fen-em̀ àywá a tswa mbǝ, ge nga moebgwam, yisti hon è kwa mngo gu moebgwam hon n du mò hon vi tubi ángá.”

Fǝtsǝmo efifafa

²² Yeso è kwa gu be eten nwofyan ngge efifi nè no tú nobǝ mò anga atan a gè nyashi a Urishelima ángá.

²³ Ende akan è ká ye eka jan, “Etsodwe, be nobǝ ya a ben ega ángá fwa be embo ra?” Yeso è jan be jan,

²⁴ “Nye e nne tén ennem evǝa nye e kwa e shi chá fǝtsǝmo efifafa, adia be nobǝ embo a nne tén ennem evǝa be e kwa e shi chá zǝn, be kwa a ben be ra.

²⁵ Ano yagwamo mu hon, nyi etkyen n fǝpe ara fǝtsǝmo, nya a ywa chá je, nye no a kǝn bu anga ngge vǝ edonm jan, ‘Yagwamo mu, fki je fǝtsǝmo.’ “Tea ga jan a fwe nye jan, ‘M yi m nye ra, éè ngge zǝn a nye vǝ bwa ángá.’ ”

²⁶ “Kǝnggwa, nya jan, ‘Jè de, jè ngǝ ngge bo. Efwe ò tú mò a tswa be efǝku a tswa eten mo je.’

²⁷ “Tea ga jan nye, ‘M yi m nye ra, éè ngge zǝn a nye vǝ bwa ángá. Nye e kwaju ngge me, binbin mo nye be ya mofǝ̀.’

²⁸ A zǝn, nya di Ebrayi, Eshaku, Yakubu, ngge be efojan mo Ehwya, a tswa zǝnotì mbwe, tea a nye, ba nyon nye nggwavǝ́ a je, zǝn a nya kpedwa ngge san ekǝ́nm.

²⁹ Be nobǝ a bwa chá notà, chá nodgó, chá mo Etkyen, chá mo Kpàn, ngge, ba chu a chu bò mo be na de adi esǝ a tswa zǝnotì mo Ehwya.

³⁰ Kǝnggwa, be ya e no ekǝn-etkyen ángá a bwa a fwe ekwafya, be ya e no ekwafya ángá a bwa no a fwe ekǝn-etkyen.”

Nya ebgenm mo Yeso a chu Urishelima

³¹ Dgyen ye fon ra, be Farisi ya ehwyà è bwa jan Yeso jan, “Gwa zǝn ena, we ken chá efki, adia Hiridu nda anga ga gu o.”

³² Yeso è jan be, “Nye ken jan Hiridu, kwàkpan hon, jan, ‘Nòmo ngge kpe a ma ti a vǝ́ be engǝ́ esera a ju be nobǝ, m ma a tswa be, tsǝnò adi e ta, m bwe a kǝ̀n mochi mam.’

³³ Bi adi enò, nòmo, kpe ngge tsǝnò adi e ta, ge no ara kenm me e ken chafya adi mochi, adia ge no ara kenm jan a efojan akan a fǝ ye a je mo Urishelima ra.

³⁴ “Woo! Urishelima, Urishelima, a bo ende éè gu be efojan mo Ehwya, ò twa be ya a bè tson bwa a zǝn o ángá ten. Kè mbwe, m nda anga, me e té e fǝn o abu aywa kǝ́n té fǝn mbǝgya mbwe anga a ta bwaakǝ́n mbwe, ò se mbo?

³⁵ Di, be twagwa ara nye, mu nye nga ara shinmu. M jan nye anga, nya di m efwe ra, kpwà Nò nwone a nya a jan, ‘Esese a nwene nyabwa a di ti mo Ehwya ángá.’ ”