Luka 12 - Etkwen New Testament

Echa etwam ngge ekǝ̀n ejanbonm

¹ Atan enò, be nobǝ embo è fǝnno a zǝn, nè no chafin sojube kpwafu anga. Yeso è kwa ara fwa ejanm ngge be etsonchi mbwe jan, “Nye bgeshi fǝzǝn adi yisti mo be Farisi, nwone e no mò ayibangǝ̀ ángá.

² Mò nwone e no ebwipem a ba fki a gwa be nó ra, fwa ye ra. Mò nwone e no engǝ̀tonton a ba ti a gwa be a je ra, fwa ye ra.

³ No enona, mò a nye jan binbin a tswafǝ, ba fo nó a tswa enggasansan; èé ngge mò a nye twa eshwa mo nó a tswa be àtá, ba du edgon mo nó a chu bá mo be àtá.

⁴ “M jan nye anga na, shushwa m ya, nye e tsen nye etsentsen mo be ya a gu ekǝnjuju, kǝnggwa a chashin be bwe a ti be mò efki ra, ra.

⁵ Tea me e tú nye ende a nya tsen ángá. Nye e tsen Ehwya nwene ano ge gu ara ekǝnjuju, n no ngge emwentì a ge ti nó twa a shi a sen-ehwa gaten. Ebi, m jan nye anga, a a ge a nya tsen.

⁶ Nye yi nye jan be kpu atakpachu chwen kpu jwade anga adi kobo fà kpwà ara ra? Èé enò Ehwya mngoda ye akan mo be anga ra.

⁷ Adi ebi, be zan-a-chu mo nye binbin, no ekam, a zǝn ye. Nye e tsen nye etsentsen ra, nye gǝ̀n ti ara chashin be atakpachu embo.

⁸ “Nye bu tón, ende e jan be nobǝ jan ge yi m, Nwen Nobǝ a jan ge yi ye èé ge, a chafya mo be maleka mo Ehwya.

⁹ Tea, ende e jan be nobǝ jan ge yi m ra, ma jan èé me jan m yi m ye ra, chafya mo be maleka mo Ehwya.

¹⁰ Ende e janpin Nwen Nobǝ, be gwa a no ye nó, tea ende nwene e janpin Engǝ́ Echanwenwen be gwa a nó be ye ra.

¹¹ “Ano be kpu nye bwa a tswa be àtá chuefǝnm, a chafya mo be ekpenkǝ́n ngge be atkwen nobǝ mo eten, nye e tsen nye tsuruku abu nye ti a vǝ́ chu nye eno e ra mò a nya jan ángá ra,

¹² adia Engǝ́ Echanwenwen a tú nye mò e se nye e jan, atan enò.”

Hufwa a chu hwen yamo

¹³ Ekǝnggwa, ende akan a tswa mo be nobǝ embo hon è jan Yeso jan, “Etumo, jan nwenjin m ge e kwa mofǝ́n mo je, ge e no m cha m.”

¹⁴ Yeso è janfwe ye, “Shushwa, nwene e vǝ m, me e no ekpenkǝ́n, eno e ra efuekǝ́ndgò a chu nye ángá a ara?”

¹⁵ Kǝnggwa gè jan bishi be nobǝ ya è no a zǝn ángá, “Nye bgeshi fǝzǝn, nye e dgyen zǝn ngge moedgyanfim, adia nya mo nobǝ no ye a chu efim mo mobenben mbwe ra.”

¹⁶ Yeso è tso be hufwa jan, “Yamo akan è ben mowa àywá a kpèn mbwe.

¹⁷ Enona, gè jan chu ye, ‘Mò a ma bwe ángá a ano? M fwa m ngge zǝn àywá a ma fǝn mowa mam àywá ena ra.’

¹⁸ “Kǝnggwa, gè ka jan, ‘M̀hǝ̀m! M yi ara mò a ma bwe ángá. Ma kǝn a bwí be eben mam, ma mbwe be ya e ke tkyan be ángá, ma kpu a gu mowa mam àywá hon kpu a nggwa a tswa mo be.

¹⁹ Ma jan chu m jan, “O no ngge mowa àywá a o ti a de mo be je embo. We ka mbo fwa a chu nya mbo ra. Fo etkwa, de, ngǝ, we shánju.” ’

²⁰ “Tea Ehwya è jan ye, ‘A bo hwen, etsǝ nòmo be nda nya mbo anga a zǝn o. Be atkimo binbin a o tefǝn nyi na, a no ḿ mò ara?’

²¹ “Ena abu ga no a chu mo ende e tefǝn mò àywá nyi chu ye, tea n fwa ye ngge mobenben chafya mo Ehwya ra.”

Moetum a chu tsuruku etsenm àywá

²² Ekǝnggwa, Yeso è jan be ya è ba ye anga jan, “No enona, m jan nye anga, nye e ka nye tashwa a chu nya mo nye, a chu mò a nya de, a chu ju nye ngge a chu mò a mokàn mo enggwam ra.

²³ Adia nya twafǝ̀ mode, ekǝnjuju gaten twafǝ̀ mokàn a ju nye.

²⁴ Nye e di be enggwà: Be da be ra n bǝ be ra, be ben be etwa mo mode ngge eben ra, èé enò, Ehwya fi be anga. Nye twafǝ̀ nye be nwendnye hon a zǝn Ehwya ra?

²⁵ A tswa engga mo nye, ende nwene adi tsuruku etsenm mbwe àywá, tubi a ti chu ye engga nwofyan a chu be tsǝnò mbwe ángá a ara?

²⁶ Ano, nye bwe a ti nye mò nwofyan yishwa ena ra, ano bwe a ge nye no ka shwa àywá anga a chu be mò edan ángá?

²⁷ “Nye e di abu be kpwimo esese no chambo anga a tswavǝ́n ángá. Be wa be wá n twa be eti mo mokàn anga ra, m jan nye anga, èé Sulemano ngge edgwa mbwe binbin è tsàn ju ye twafǝ̀ ti ye akan a engga mo be kpwimo ena ra.

²⁸ Ano ena abu Ehwya tsàn a se be vǝmo a tswavǝ́n ju, e no nòmo, kpe be kpu be nggwa a fǝ̀, Ehwya hon a no ye nye mokàn a nye nda anga ra? Gbegbe! A nye ya chaebi nwofyan.

²⁹ “Nye e nyi e gu nye shwa mo nye a chu mò a nya de, nya ngǝ ángá ra. Nye e tsen nye tsuruku a chu be ra.

³⁰ Be nobǝ mo zǝnchaje ena ya e yi be Ehwya ra, tkon etkon a chu be mò ya ena anga a be. Ate nye yi jan nye dgyan be anga.

³¹ Adi ḿ mo nye, nye e nda zǝnotì mo Ehwya, kǝnggwa ga no nye be mò ya e dwana gaten.

³² “A nye be etsonchi mam, etso nwofyan, nye e tsen nye etsentsen ra, adia ate nye cha ara nye dwa nye e no ngge ge adi zǝnotì mbwe.

³³ Nye e jwade gu atkimo mo nye, nye e ti tse a nye ben ángá ti e no be ya ekan. Bwe nyi chu nye be eshu a kpe, nwone a kpo be ehwe ra, mobenben a kpe nwone a nya ye ra. Be yaju ken a ti be a zǝn ra, be awijwen bwe a dì be nó ra.

³⁴ Adia, zǝn a mobenben mbo no anga, a zǝn a tsuruku mbo no anga gaten.

Be fí ya e nobà yagwamo mu mo be anga

³⁵ “Nye e té fuchin mo mochi ngge be petila mo nye, be e no etonm.

³⁶ Nye e no abu be nobǝ ya e nobà yagwamo mu be, ge e twabǝ e bwa adi esǝ mo ben etem, evǝa atan a ge twabǝ bwa n kǝn bu, ba fki ye tafǝmo kè akan.

³⁷ Ga no mo vǝtsen a zǝn be mbǝgya mochi a yagwamo mu mo be bwa ben be, be nobà ye anga. M jan nye ebi anga, ga tsàn ju ye, evǝa ga bwe be mochi, na jan be, be e chu a sen ga kwa be mode a ge.

³⁸ Ga no be mbǝgya mochi hon mo etkwa efom àywá, ano yagwamo mu be bwa ben be be no nobà ye anga, ge e ma bwa a tswa-tsǝ, eno e ra akǝndon.

³⁹ “Nye e yi jan, ano yagwamo mu akan è yi ara atan a yaju a ngga ye a ju, ga no ezǝngga. Ga gwa ye yaju, e kwa e shi a àtá mbwe ra.

⁴⁰ No enona, a nye gaten nye e no ezǝngga adia Nwen Nobǝ hon a bwa atan a nye ka nye ra ángá.”

Ya mochi ebi eno e ra ya mochi amme

⁴¹ Ekǝnggwa, Bitru è ká ye eka jan, “Yagwamo mu, o tso hufwa ena anga ngge je kpwà ara ne, a èé ngge be nobǝ binbin?”

⁴² Yeso è janfwe ye jan, “Ende nwene e no chu mo ya mochi ebi ngge enggaton, nwene a yagwamo mu mbwe kpu be mbǝgya mochi du ye a bu evǝa ge e no be tse mode, adi ekpengga edefǝfǝ ángá a ara?

⁴³ Esese no ḿ mo nwen mochi hon nwene a yagwamo mu mbwe bwa a ben ye ge bwe anga enò.

⁴⁴ Ebi m jan nye anga, yagwamo mu mbwe hon a du ye ga no chu a chu be atkimo mbwe binbin.

⁴⁵ Tea, ano nwen mochi (amme) hon jan chu ye jan, ‘Yagwamo mu mam bwa a myan ye ra.’ Enona, ge kwa ara be mbǝgya mochi hon ndedon ngge ndegwa mò ebum èé mo edem ngge tson engǝfǝ́m.

⁴⁶ Yagwamo mu mbwe a twabǝ a bwa nò nwone a ge ka ye anga ra, ngge adi tsǝnò nwone a ge yi ye ra. Yagwamo mu hon, a bu ye mò e twafǝ̀ chu ángá, na du ye ken a no a zǝn a be ya ebgen no anga.

⁴⁷ “Nwen mochi hon nwene e yi mò a yagwamo mu mbwe dgyan anga, tea ge te ye fuchin mo nó ra, eno e ra bwe ye nó ra, ba bu ye mofǝ.

⁴⁸ Tea nwen mochi nwene e yi ye mò a yagwamo mu mbwe dgyan ra, n bwe ara mò e kǝn ara be e bu ye mò ángá, ba bu ye mò nwofyan. Ende nwene a be no ye mò àywá, ba nda mò àywá a zǝn ye, a zǝn ende a be du ye mò edgonm embo, a mò embo a ba ká ye eka mo nó.”

Yeso è ti enggakwam bwa

⁴⁹ Efwe Yeso è jan, “M bwa ara evǝa me e bà fǝ̀ a tswa zǝnchaje, m dgyan fí àa, be e jan fǝ̀ hon kpo fwa ara.

⁵⁰ Tea m no ngge batisǝma a ba bwe m, ma ben m nya enggwam a sen ra, kpwà tén ano be bwe ara m nó.

⁵¹ Nye ka anga jan m̀ bwa evǝa me e ti adgye e bwa a tswa zǝnchaje? É yé, me e jan nye, m̀ bwa evǝa me e ngga e kwa be nobǝ.

⁵² Ti asuswana ken chafya, a mu a nobǝ chwen no anga a zǝn, be ngga a kwa etso fà, ta a cha be dwa ngge fà ra, eno e ra fà a cha be dwa ngge ta ra.

⁵³ Àtà a twa ese ngge nwen ye ndedon ngge nwen ndedon a twa ese ngge ate ye. Bayi nobǝ a twa ese ngge nwen ye ndegwa, nwen ndegwa twa ese ngge bayi ye. Nwen engǝ̀ ndegwa a twa ese ngge gwa nwen ye, gwa nwen a twa ese ngge nwen engǝ̀ ndegwa.”

Ediyim mo ekpengga

⁵⁴ Ekǝnggwa, Yeso è twanga nè jan be nobǝ embo hon jan, “Atan a nye di edwe kan anga chá nodgó, kè akan nye jan, ‘Chù nyabwa,’ ngge chù hon bwa tén ebwam.

⁵⁵ Atan a fyo kpo bwa anga chá mo Kpàn, nye jan, ‘Zǝn a fken,’ ngge zǝn hon fken tén efkenm.

⁵⁶ A nye be ya ayibangǝ̀, nye yi abu nya jan engà mo be echi a sǝnsen ngge a zǝkpe. Ano bwe a ge nye yi nye abu nya a jan engà mo be mò e kenkèn anga adi ekpengga ena ra?

⁵⁷ “Ano bwe a ge nye jan yi nye, chu nye mò e no esese ángá ra?

⁵⁸ Ano a bo ngge ya eze mbo no a efǝ nyaken a zǝn a be ekpenkǝ́n, chungǝ́shi ngge ge evǝa nye e kpèn e tswa fwa mo nye efǝ, eno e ra, ge vǝ o a du a bu mo ekpenkǝ́n, a ge ekpenkǝ́n a tsǝ o a du a bu mo chu mo àtá ewhyatu nwene a twa a gwa o a tswa àtá ewhyatu ángá.

⁵⁹ M jan o anga, egwam mbo a je, a kpwà tén atan a o kpwa gu ara tse a bè ká o ángá sangǝ́.”