2 Timoti 4 - Etkwen New Testament

¹ M bgó o anga adi ti mo Ehwya ngge ḿ mo Yeso Kristi, nwene a kpèn be ya e no angǝ ngge be ya e fǝ ara kǝ́n ángá. M jan o anga adia ge twabǝ a bwa a dwatì gaten ángá,

² jan we jan be nobǝ Fwa Esese mo Ehwya hon. We no e kpwà ye a ju, ge é ma no a tswa ekpengga eno e ra fwa ye a tswa ekpengga ra. Vǝ tsuruku mo be bwa, we tkyá be etkya ngge we jan e bon be ekǝ̀n. We bon e ngǝshi ekǝ̀n abu o tú be nobǝ be mò ena anga.

³ Adia ekpengga nyabwa atan a be nobǝ a buton a fo be moetum esese ra. Tea adia tón mo be wi be anga, ba fǝ́ a fǝn be etumo embo, evǝa be e jan be be mò a be dgyan anga be e fo ángá.

⁴ Be twa a nga tón mo be a ken be chá buetkwa mo chaebi ra, be dgyan a fí àa be e fo be hú a be tso be anga.

⁵ Tea adi ḿ mbo, fu chu o a chu egwa egwa mo be mò, we bon-ekǝ̀n adi ekan engǝm ngge we bwe e kpwà mochi mo eduedgon a chu Fwa Esese mo Ehwya edum, bwekǝ̀n binbin mo be mò a mochi mbo hon nda anga.

⁶ Adi ḿ mam, be ti m ti a nggwavǝ́ anga abu mò etinom mo engǝm a zǝn Ehwya. Engga a ma twa a gwa zǝnchaje ena anga, bwa ten ara.

⁷ M bu ara tsǝ esese hon, m tse fwa ara fǝton-ese hon, m fuse ara shwa enyim mam a chu Ehwya.

⁸ Asuswana, mò e dan ángá a mitere mo mò esese ebwem e nobà m no, nwone a Kristi Etsodwe, ekpenkǝ́n ebi hon, a no m nò a ge twabǝ a bwa ángá. Fwa ye a me tete ra, tea binbin mo be ya e nobà be e di abu ge twabǝ a bwa ángá gaten.

Bulu è jan fwa a chu ye

⁹ Nne tén ennem evǝa we bwa a zǝn m myan myan,

¹⁰ adia Dima twagwa ara m, n nya ara a Tasalonika adi edgyan mo be mò mo zǝnchaje ena. Karaska nya ara a sǝnsen mo Galati ngge Titu nya ara a Dalmatiya.

¹¹ Kpwà Luka e no ngge me ángá. Tkunda Marku, we ti ye e bwa ngge bo adia ge bwejwa m anga adi mochi mam ena.

¹² M tson Tikiku chí nya ara a Afisa.

¹³ Atan a o nyabwa ángá, ti mokàn echuvǝ mam a m̀ gwa no a zǝn Karbu a eten a Torowa ángá, bwa m ngge bo. Kpu be afketa (a be fǝ efǝm) mam, chìchì mo nó, nwone a be bwe ngge be kpumo ángá, kpu bwa m.

¹⁴ Alezanda, ekendwa, bwe m mò esera no àywá. Etsodwe a kpwa ye kpo mo mò a gè bwe m ángá, a ge.

¹⁵ A bo gaten, we bgeshi fǝzǝn a chu ye, adia gè twa efyan echakpokpo a chu fwa a jè du edgon mo nó ángá.

¹⁶ Atan a m̀ kwafya janfwe be fwa a chu eka a bè ká m atan a bè kpèn m kǝ́n anga, nobǝ akan è cha ye chu m ra, egwa egwa è twagwa m. M bgó ebgo anga jan Ehwya a ti ye nó abu ebgen a chu be ra.

¹⁷ Tea Etsodwe è ywano chashin mam nè no m echafǝju, evǝa me e du edgon a chu Fwa Esese hon, me e twagwa m mò akan ra, evǝa binbin mo be ya e fwa be ya a Yahuda ra, be e fo nó. A a chu be fwa ena, bè tivǝ́ m a kpevǝ mo be èni.

¹⁸ Yeso Etsodwe a bwe a jwa m a chu binbin mo be mò esera a be nobǝ dgyan anga be e bwe m ángá. Ga ti m a ken a tswa zǝnotì mbwe a kpe, a tswa adgye. A no a fwa efwam, be nobǝ be e tàn ye. Ge e no enò.

Bulu jan gu fwa mbwe ngge fwa ebim

¹⁹ Bi Biskila ngge don ye Akila, tangge be ya e no a mu Onisifaru ángá, fwa.

²⁰ Erastu è ndnyano a Korinti, ngge m̀ gwa Tarofimo a Miletu adia ge dwano adi modwa.

²¹ Tkyan tén etkyanm evǝa we bwa ana sangǝ́ je e chà e kwa adi ekpengga mo viejwa. Be Ayubulu, Buden, Lina, ngge Kaladiya, bi o fwa anga. Binbin mo be nwenjwa je ya aduwa, ya e no ana ángá, bi o fwa anga gaten.

²² Etsodwe ge e no ngge engǝ́ mo nye. Esese mo Ehwya e no ngge nye binbin.