2 Timoti 3 - Etkwen New Testament

Abu be nobǝ a no zǝno adi ekpengga ekǝn-etkyen ángá

¹ Tea we yi mò ena: Atan a zǝnchaje tén ara ga kǝn-etkyen ángá, be nobǝ a ngǝ ekan àywá.

² Adi be tsǝ́nò hon eni, be nobǝ a dgyan chu be. Ba no be ya edgyan mo tse, fǝ́ esem, efin efinm, ba no a kpwà adi be nobǝ etsum. Ba di a pin be ya è mbwa be ángá, echwanom a fwa ye a kpevǝ mo be a chu mò a be bwe be anga ra, ba bwe be mò a Ehwya dgyan anga ra.

³ Ba dgyan be be nobǝ ra, be gwa a no be so ra, ba no ya ejanbwe, ba fu be chu be ra. Ba no ya mofǝ̀ na dgyan be be e bwe mò esese ra.

⁴ Ba no be nobǝ ya e tsǝ du nobǝ anga, be ya chu echam, n di a kpwà chu be. Ba dgyan a fí àa be e no chu be etkwa efom, chà a shín a be e dgyan Ehwya.

⁵ Chá je ba di be abu be ya e tse Ehwya anga ngge tsuruku akan, tea zǝno enom mo be tú anga jan be tse didi be Ehwya ra. We kwaju ngge mò ebwem ngge be yishwa mo be nobǝ ena.

⁶ Ya ehwyà mo be ngǝ̀ kwa ken a mu n nggade be ndegwa ya a be nggade dwa be be ra anga, be ndegwa ya e ka tashwa mo mò esera anga. Be ya e von fǝzǝn anga.

⁷ Be ndegwa ena dgyan anga be e tú be mò anga nogwa nogwa tea bi adi enò, be yi didi be mò e no ebi ángá ra.

⁸ Abu Jeni ngge Jambara éè twa ese ngge Mosa ángá, be ndedon ena gaten twa ese ngge ebi hon. Ba be ya e ka be fwa anga a tswa tsuruku mo be ra, shwa enyim mo be, a mokukwa.

⁹ Tea ba dgyen be zǝn ra, adia egwa egwa a di nó enggasansan abu be kwa hwen hon vǝn ken no ángá. Ena a mò è bwe ngge Jeni tangge Janbara ángá.

Bulu è twa Timoti echa ekǝn-etkyen

¹⁰ Adi ḿ mbo, o ba se ara moetum mam, o yi gu abu m̀ no zǝno mam ngge mò a m ti nyino chafya mam ángá. O yi chaebi mam, ekǝ̀n-ebonm mam, edgyan mam a chu be nobǝ ngge fǝechim mam a chu ekan engǝm.

¹¹ O yi abu be nobǝ è tswa m fí ngge ekan a m̀ ngǝ ángá. O yi egwa egwa mo be mò éè bwe ngge me a Antakiya, Ekoniya ngge Listra ángá gaten, ngge abu m̀ bon-ekǝ̀n ángá. Bi adi enò, Ehwya è tivǝ́ m a bu mo be mò ena binbin.

¹² Egwa egwa e ti chu ye ban ta ara ngge Yeso Kristi, n dgyan ge e no zǝno yishwa a Ehwya dgyan anga, ba tswa ye fí.

¹³ Tea be ya mofǝ̀ ngge be ya e ngà engà anga, bgen nya kpwà chafya. Be ngga a de be nobǝ, be nobǝ ngga a de be gaten.

¹⁴ Tea adi ḿ mbo, chungǝ́shi adi ebwem mo mò a bè tú o ngge a o tsǝ́ekǝ̀n no a chu mo nó, adia o yi be nobǝ ya è tú o be mò hon ángá.

¹⁵ O yi gaten, atan a ò chà no nweshan, ò yi ara be fwa mo Ehwya nwone è no o enggaton ò ti ben etivǝm adi efka mo chaebi a chu Yeso Kristi ángá.

¹⁶ Binbin mo be fwa e no a tswa Fwaebam ángá, Ehwya è fijan nó a ge a efka mo Engǝ́ mbwe. Ge bwejwa anga: adi moetum, adi echa etwam, adi ebwesem mo nobǝ ngge etubgem mo nobǝ abu ga no zǝno mbwe abu Ehwya dgyan anga,

¹⁷ evǝa ya mochi mo Ehwya ge e mbo ngge enggaton mo egwa egwa mo mochi esese ebwem.