2 Timoti 2 - Etkwen New Testament

Yakàn nwene e bwe Kristi mochi ngge tsuruku akan anga

¹ Echukǝnggwa, a bo nwen m ndedon, esese a be ben anga efka mo Yeso Kristi Etsodwe ángá, e du o we ywa ngge echakpo.

² Be fwa ya ò fo, m̀ jan a tswa engga mo be nobǝ embo, ya è fo nó ngge tón mo be ángá, kpu be fwa hon jan be ya o cha ara dwa ngge be evǝa be kpu tú a ti be nobǝ efki gaten.

³ Bon-ekǝ̀n ngge je gaten, abu yakàn esese mo Yeso Kristi.

⁴ Yakàn e no a kpevǝ kàn a du ye chu ye a tswa be m̀ mo zǝnchaje ra adia ge dgyan a kpwà ge e bwe mò a ekpondgyen mbwe a fo etkwa mo nó anga.

⁵ Ba anona, ende e tse fǝton-ese anga, a cha ye mitere mo ende e devǝ́ ara anga ra, kpwà tén ano ge tse fǝton-ese hon ken adi efwa mo nó.

⁶ Yawa e bwe mochi anga àywá, ge e no ende e kwafya a ben buhwen mo moebǝm mo kpèn hon.

⁷ Ka shwa a chu mò a m jan anga, adia Etsodwe a no o ehwayim mo binbin mo be mò e dwa a tswa mo fwa hon ena.

⁸ We mngo e da mbo jan, Yeso Kristi, a bè ti ye nyi etkyen a dì ángá, è gwa a je adi efi mo Dawuda ra. Ena a Fwa Esese hon a m du edgon a chu mo nó anga.

⁹ A a chu mo nó a m ngǝ ekan anga, ken e ngga èé be ti m twa a àtá ehwyatu abu ende e bwe ara mofǝ̀, tea be hwyafu a ti be fwa mo Ehwya ra.

¹⁰ Enona, m bon-ekǝ̀n a chu mo be yishwa mo be ekan binbin, a chu mo be nobǝ a Ehwya swa ara ángá evǝa a be gaten be e ben etivǝm. Etivǝm nwone e bwa anga adi efka mo Yeso Kristi tangge egǝ̀n e no a fwa efwam ángá.

¹¹ Fwa ena no eshwen, bè bá jan, Ano jè fǝ̀ ngge ge, ja no angǝ ngge ge gaten,

¹² Ano je bon-ekǝ̀n, ja dwatì ngge ge gaten. Ano je tson etson mbwe, ga tson etson mo je gaten,

¹³ ano je tú je chaebi a chu mò a je jan ja bwe ángá ra, a ge ga no a kpwà ya chaebi, adia ga tson ye etson mo chu ye ra.

Ya mochi a Ehwya chadwa ngge mochi mbwe ángá

¹⁴ We no e ka e ben kpwà be nobǝ mo Ehwya, be mò ena anga. Twa be echa echakpokpo a chafya mo Ehwya jan, be e no e tkyá be etkya anga a chu be fwa ra, ge vǝ mò esese bwa ye anga ra. Ge tkò a kpwà be ya e fo nó anga.

¹⁵ Nne tén ennem evǝa we no nobǝ a Ehwya jan Fwa Esese anga a chu ye, ya mochi e fu ye ebgenju a chu mochi mo Ehwya ra, ende e fijan be nobǝ ebi mo engà mo fwa mo Ehwya anga, esese.

¹⁶ Kwaju ngge be ya e tkuwi vǝ, e ben be ebwejwa ra, adia be nobǝ ya e jan yishwa fwa ena anga, du be nobǝ twagwa Ehwya ken dgyen zǝn anga.

¹⁷ Moetum mo be bu a shan abu modwa apyi e de kwa a ju nobǝ, ne bge myan ye anga ra. Engga mo be nobǝ ya e tú yishwa mò ena anga, a be Himanayu ngge Filetu,

¹⁸ ya è twagwa ara efǝ ebi hon ángá. Be jan anga jan ezǝbwam angǝ nè bwe twafǝ̀ ara, n bwetko, chaebi mo be ya ehwyà anga.

¹⁹ Bi adi enò, fù mo Àtá a Ehwya è tke ángá, ywano echakpokpo, be chì a ti be nó ju ra. Be mò a bè bá no a chu mo nó ángá jan, “Etsodwe yi be ya e no ḿ mbwe ángá,” ngge, “Ge no kenm egwa egwa e jan ge no ḿ mo Ehwya ángá, ge e kwaju ngge ebgen ebwem.”

²⁰ A tswa akanmu efifi, be atkimo mo mochi dwa a zǝn: Be atkimo mo mochi a be bwe ngge tumo no, be ya ehwyà be bwe ngge embya no, be ya ehwyà be bwe ngge azufa e no e ra zinariya. Be ya ehwyà mo be atkimo-mochi hon a, ḿ mo mochi nò etu, be ya ehwyà a ḿ mo mochi nogwa nogwa.

²¹ Ende hon e nacha chu ye adi mò esera a gè bwe ángá, ge no abu atkimo-mochi a be ti bwe mochi anga no etú. Ge no etsǝpepe, atkimo-mochi esese a bu mo yagwamo mu mbwe. Yagwamo mu mbwe a bwe mochi ngge ge adi egwa egwa mo mochi esese.

²² We tse e gwa be mò a be ezon-nobǝ dgyan n tkunda anga. Tkunda zǝno ebitete a chafya mo Ehwya, chaebi, edgyan mo be nwenjwa, ngge we no zǝno a tswa adgye ngge be ya e fǝ́ Etsodwe dwa anga a tswa tsuruku echanwenwen ángá.

²³ Kwaju ngge mohwen tangge efyan kukwa etwam, adia o yi jan be du be nobǝ be tkyá etkya anga e sojube kpwà ara.

²⁴ Ge no kenm, ende e bwe bwi Ehwya mochi anga, ge e no ye ya etkya etkyam ra, tea ga no nobǝ e bwe mò esese anga ngge egwa egwa. Ga no ende e yi abu ga tú mò ngge ga no zǝno ekǝ̀n-ebonm ngge be nobǝ.

²⁵ Ge janse bwi be ya e twa ye efyan anga fwa, a tswa chu engǝm a sen, ehwyà Ehwya a du be ba twa etwa n twanga bwa a yi ebi hon,

²⁶ kǝnggwa ba kwa adi engà mo be, na tse a ga a bu mo mò etswam mo Shetan, éè fupe be no abu fí, bè no bwe mò a ge dgyan anga.