2 Bitru 1 - Etkwen New Testament

Fwa ebim

¹ Afketa chí ena vǝ a zǝn m, Sima Bitru, ya mochi ngge etsonchi mo Yeso Kristi. M bá mò ena no nye anga, a nye be ya e no ngge chaebi a chu Yeso abu ḿ mo je ángá. Chaebi ena no adi efka mo ebitete mo Yeso Kristi, Etivǝ́ ngge Ehwya mo je.

² Ehwya ge e bwe nye esese ngge ge e du nye, nye e ben adgye embombo adi efka mò eyim mo Ehwya ngge Yeso Etsodwe mo je.

Abu ya ekǝ̀n-etsǝ́m a no zǝno mbwe ángá

³ Ehwya adi echakpo mbwe no gu ara je binbin mo be mò a je nda anga, mo zǝno enom mo je, yishwa mo be ya e tsǝ́ekǝ̀n no a chu Ehwya ángá. Jè cha binbin mo be mò ena adi efka mo eyim mbwe, a ge hon nwene è fǝ́ je dwa bwa a zǝn ye evǝa je e ben edgwa ngge esese mbwe.

⁴ A adi efwa ena a gè no je be mò echa echa, a gè jan ekpe ekpe jan ga no je ángá, evǝa ga no mò esese a zǝn je, eno e ra ge e bwe je mò e no esese. Gè bwe mò ena enò evǝa adi efka mo be mò ena ja ben etivǝ́m a bu mo be mò esera mo zǝnchaje ena, be mò a be nobǝ mo zǝnchaje ena dgyan anga. Ekǝnggwa ja no zǝno mo je a ken anga chafya abu Ehwya dgyan anga.

⁵ A chu fwa ena, nye e bwe mò a nye bwe a ti a tswa chaebi, nye e tu e bi, esese; ngge a chu esese, nye e tu e bi eyiyi;

⁶ ngge a chu eyiyi, nye e tu e bi chuefum; ngge a chu chuefum, nye e tu e bi ekǝ̀n-ebonm; ngge a chu ekǝ̀n-ebonm, nye e tu e bi yishwa zǝno mo Ehwya,

⁷ ngge a chu yishwa zǝno mo Ehwya, nye e tú so edgyan abu mbǝgya a dgyèn eywà; ngge a chu edgyan etum abu mbǝgya a dgyèn eywà, nye e dgyan be nobǝ binbin ngge nye e bwe e jwa be gaten.

⁸ Ano nye bwe be mò ena nogwa nogwa anga, eyim a nye yi Yeso Kristi Etsodwe mo je ángá, a ti esese a bwa nye. Yishwa zǝno enom mo nye a ti esese a bwa nye gaten.

⁹ Tea ano ende akan mo nye bwe ye be mò ena ra, ge no abu ya fǝzǝn ebwibwi e diben ye zǝn ra, ge mngoda ara jan Ehwya è gwano ara ye be ebgen a gè bwe twafǝ̀ ara ángá.

¹⁰ No enona, be nwenjwa m, m bgó nye anga, nye e bwe mò a nye bwe a ti evǝa nye e tú jan nye no a engga mo be ya Ehwya è fǝ́ be dwa nè swa be ángá. Ano nye bwe be mò ena, nye twagwa a didi nye efǝ mo Ehwya ra.

¹¹ Adi ebwem enò, nya ben efǝ ti kwa a shi a tswa zǝnotì mo Etsodwe ngge Etivǝ́ mo je Yeso Kristi, e no a fwa efwam ángá.

Fwa mo Ehwya no ngge echakpo mo etivǝ́m

¹² Enona, m no ka a ben nye be mò ena anga, bi adia nye yi be ngge nye ywatsa ara a tswa echafǝju a chu fwa ebi hon ena a nyè cha ara ángá.

¹³ M di jan ge no esese me e no e ka e ben nye be fwa anga, abu m chà no angǝ a zǝnchaje ena,

¹⁴ adia m yi jan a dgyen ye fon ra ma fǝ, abu Etsodwe je Yeso Kristi è tú ara m nó enggasansan ángá.

¹⁵ Mò a m nda anga jan abu atan engǝ ra, me e bwe egwa egwa mo mò a m bwe a ti, evǝa atan a m fǝ ara, nye e mngo e da nye be ra.

Bitru è di egǝ̀n mo Yeso Kristi ngge fǝzǝn mbwe

¹⁶ Atan a jè kpèn nye hú a chu echakpo ngge ebwam mo Etsodwe je Yeso Kristi, jè tso je nye anga be hú kukwa a be nobǝ mmò a be adi enggaton mo be ángá ra. Jè di edgwa mbwe hon ezǝ.

¹⁷ Atan a Ehwya Àtà hon è tú egǝ̀n ngge echakpo a Yeso Kristi no ngge nó ángá, jè no a zǝn. Efwe jè fo aken è vǝ a zǝn Ehwya, Edgwatì e gǝ̀n ti ara, è jan, “Ena a Nwen m, m dgyan ye, m fo etkwa mbwe àywá.”

¹⁸ A je e chu je, jè fo aken hon shwa chá kpe ngge tón mo je, atan a jè no ngge Yeso a chu hwì echanwenwen ángá.

¹⁹ Enona, je yi jan mò a be efojan mo Ehwya è jan ángá, no ebi. Ano nye buton foyi engà mo be fwa ena, ga se àywá a zǝn nye, adia fwa hon no abu enggasansan e nggazǝ anga a tswafǝ ti kengga atan a zǝn ngga anga. Nò eni, Kristi nwene e no Ngǝkpe Akǝndon hon ángá, a bwa, nya di be mò no enggasansan, adi efka mbwe.

²⁰ Mò e twafǝ̀ ti ara n no kenm nye e yi ángá, a ben ye akan mo binbin mo be fwa a be efojan è jan nè bá no a tswa Afketa mo Ehwya, nwone a ejantwafwem mo nó è no adi enggaton mo be ángá ra.

²¹ Be fwa hon a be efojan hon è jan ángá è no ye adi fwa ekam mo nobǝ ra. Bi adia bè no be nobǝ ángá, a Engǝ́ mo Ehwya hon è no be echakpo bè jan be fwa éè vǝ a zǝn Ehwya bwa ángá.