1 Timoti 6 - Etkwen New Testament

¹ Binbin mo be ya e no zǝnofí anga, be e no be yagwamo mu be egǝ̀n e defǝ ara, evǝa be nobǝ be e jan e bgen be ti mo Ehwya ngge mò a je tú anga ra.

² Be ya e no ngge be yagwamo mu ya tsǝ́ekǝ̀n no ángá, be e di e pin be be ra, adia ba be nwenjwa adi efwa mo Ehwya. Tea be e bwe be mochi hon ngge echafǝju àywá, adia be ya e ben esese mo mochi a be bwe anga, a be ya ekǝ̀n-etsǝ́m, ya e dgyan be fí hon anga àywá. Ena a be mò e no kenm we tú ngge we jan be ángá.

Ebam mo Ehwya ngge edgyan mo tse

³ Ano ende akan tú mò e no ye mò akan ngge fwa ebi mo Yeso Kristi Etsodwe ra, ngge moetum a je tú a chu zǝno enom e ken anga akan ngge ḿ mo be ya aduwa ra,

⁴ ga ya chu etum, ge yi ye mò akan ra. Ge no ngge edgyan esera mo efyan etwam ngge etkya etkyam, a chu be fwa ya e vǝ engǝbgen, tsǝ ebum, aken ajwafwa ejanm ngge shwa ekam jan ende akan bwe ara mò esera,

⁵ ngge etkya etkyam nogwa nogwa. Be ya ena, a ya e no ngge tsuruku esera, ya a be kpu vǝ ara shwa ebi ekam a tsuruku mo be. Be ka anga jan, zǝno enom abu ya aduwa a efwa mo tse ebenm.

⁶ Eshwen, efen efenm mo Ehwya a tswa ekǝ̀n-ebonm, a buhwen echa.

⁷ Jè bwa je a tswa zǝnchaje ena ngge mò akan ra, ngge ja ti mò akan, a nya je ngge je ra.

⁸ Enona, ano je no ngge mode tangge be mokàn enggwam a ju, je e mbo ngge ekǝ̀n-ebonm a chu be.

⁹ Be nobǝ ya e dgyan be e nga yamo ángá, ben embwadi anga a zǝn Shetan. Ge du be be e bwe mohwen àywá ngge be e dgyan mo be mò a tkò be ángá. Ena a be mò e vǝ ekan ngge etkò bwa be nobǝ anga.

¹⁰ Adia edgyan mo tse a kpwà mo binbin mo be mò esera. Be ya ehwyà adi ju emam mo tse ebenm, be twagwa ara chaebi a chu Ehwya n vǝ nya ebgenm efki efki àywá, bwa ara a chu be.

Bulu twa Timoti echa

¹¹ Tea adi ḿ mbo, nobǝ mo Ehwya, tsegwa binbin mo be mò ena ngge we tku e nda abu wa no zǝno edwe, zǝno e no esese chafya mo Ehwya. We no ende e no ngge chaebi a chu Ehwya n dgyan be nobǝ anga. We no ende e no ya ekǝ̀n-ebonm ngge chuefum.

¹² Tkyan tén etkyanm a chu chaebi ena a je no ngge ge a chu Ehwya ángá. Fu ngǝ́shi nya e no a fwa efwam a o ben ara na, adia ena a zǝno enom nwone a Ehwya è fǝ́ o dwa atan a ò jan a tón mo be nobǝ embo jan o nyi ara tsuruku mbo a chu Yeso Kristi ángá.

¹³ M jan o anga adi ti mo Ehwya, nwene e no mò egwa egwa nya anga, ngge Yeso Kristi nwene è jan fwa ebi atan a Bilatu è ká ye eka ángá,

¹⁴ jan we tse binbin mo echa a bè twa o ángá, evǝa ende akan e jan e didi ye jan o bwe ara ebgen ra, ken a ngga atan a be fi a jan Yeso Kristi Etsodwe ángá.

¹⁵ Yeso Kristi a bwa atan a Ehwya è nyi ara ángá. Ehwya hon nwene a be nobǝ binbin tàn ye anga, a ge tete e no Tì. Ga Tì mo be tì ngge Etsodwe mo be etsodwe.

¹⁶ Ehwya tete a ende a fǝ a didi ye ra, ge no anga a tswa enggasansan a nobǝ akan kengga a ti ye tenten a zǝn nó ra. Ende akan chà didi ye ye ngge fǝzǝn ra, ngge ende akan a di a didi ye ye ra. No a fwa efwam, egǝ̀n ngge edgwa, be e no ḿ mbwe. Ge e no enò.

¹⁷ Jan be ya mobenben a tswa zǝnchaje ena jan, be e sé be fǝ́ ra. Be e nyi be shwa mo be a chu mobenben hon nwone a no a fwa ye efwam ra ra, tea be e nyishwa mo be a chu Ehwya nwene e no je mogwa mogwa a je nda anga, evǝa je e fo etkwa ángá.

¹⁸ Jan be jan be e bwe mò esese. Be e mbo ngge be mò esese ebwem àywá a chu be mò a be bwe anga. Be e fwa be be ya to ewyam ra, tea be e no be nobǝ ya e kwa be mobenben mo be ngge be ya e ben be ra ángá.

¹⁹ Adi ebwem enò, ba té a fǝn be mò a nyi chu be, nwone a be ti tke fù esese mo mò nwone e bwe a jwa be nòya, ekǝnggwa ba ben nya. Nya hon nwone e no tén nya adi ebi ángá.

²⁰ Timoti, fuseshi mò a Ehwya è ti du o no a bu ángá. Kwaju ngge fwa ejanfim e fwa ye ngge mò ebwem ngge ekǝ̀n-etsǝ́m a chu Ehwya ra ángá. Kwaju ngge be efyan etwam a be ya ehwyà fe fwafe jan na eyiyi ángá.

²¹ Be nobǝ ya ehwyà twagwa ara chaebi ena a bè no ngge nó a chu Ehwya adia be buton fo yishwa fwa ena anga. M bgó ebgo anga jan esese mo Ehwya ge e no a chu nye binbin.