1 Timoti 5 - Etkwen New Testament

Mò a wa bwe ngge be nwenjwa, ya ekǝ̀n-etsǝ́m ángá

¹ We tkyá mbo nwenfi akan etkya ra, tea we jan ye fwa abu ga ate o. Bwe mò ngge be ezon-ndedon abu be nwenbwa mbo.

² Bwe mò ngge be ndegwa nwenfi abu o bwe anga ngge ayi o anga, ti be ezon-ndegwa abu nwenbwa mbo. We bwe mò ena adi shwa ekam echanwenwen a chu be.

³ No be gwafǝ́n, ya e fwa didi be ngge be ya e bwejwa be anga ra, egǝ̀n.

⁴ Tea ano gwafǝ́n hon no ngge mbǝgya, eno e ra be ebi, be e kǝ́n-ekǝnkǝ́n abu ba tke mochi mo Ehwya ebwem adi ebwejwam mo be kpenmu mo be ángá. Adi ebwem enó, ba kpwa be ya è mbwa be, mò a bè bwe be ángá. A be mò yishwa ena, e du Etsodwe fo etkwa anga àywá.

⁵ Gwafǝ́n nwene e no a ge jujuye n fwa ye ngge ende e bwejwa ye anga ra, nyishwa mbwe no a chu Ehwya. Ge no kpwà adi ebgo ebgom a zǝn Ehwya ènò ngge etsǝ, jan ne Ehwya e bwe e jwa ye.

⁶ Tea gwafǝ́n e ti tsuruku mbwe nyino a chu be mò a du ye ge e fo etkwa ángá, no tén ende a engǝ́ mbwe fǝ ara bi adia ge chà no angǝ ángá.

⁷ We twa be nobǝ echa ena evǝa ende akan e ben ye mò a ga tso be efya jan be bwe ara ebgen ra.

⁸ Tea ano ende akan bwejwa ye be ya mbwe ye ra, chìchì mo nó be kpenmo mbwe, ge segwa ara chaebi ngge ge bgen twafǝ̀ ende e chà tsǝ́ ye ekǝ̀n ra ángá.

⁹ We bá mbo ti mo gwafǝ́n adi afketa mo be ti mo be gwafǝ́n ra, kpwà tén ano je mbwe kengga ara gwi chwen a ngǝ (60), ngge gè no ngge ebi adi zǝno enom mbwe ngge don ye.

¹⁰ Ge no kenm ge e no gwafǝ́n a egwa egwa no ye egǝ̀n anga, a chu be mò esese a gè bwe anga, abu be: mbǝgya efyom adi efwa esese, echam mo be ya echan, enam mo fù mo be ya ekǝ̀n-etsǝ́m, ebwejwam mo be ya e no adi zǝno ekǝnkǝn nya ngge ebwem mo be mochi esese efki efki.

¹¹ Adi ḿ mo be gwafǝ́n ya e chà ke be cho ra ángá, we du mbo ti mo be a tswa afketa mo be gwafǝ́n hon nwene a be ya aduwa bwejwa be anga ra. Adia ano tsuruku edwa ngge be ndedon twafǝ̀ ara chu be, ba dgyan be e nya don. Be twa a gwa vǝ-esenm a bè sen jan ba bwe Yeso Kristi mochi ángá.

¹² Enona, Ehwya a kpèn be kǝ́n adia be bwekǝ̀n be vǝ-esenm a bè sen ngge Yeso Kristi ángá ra.

¹³ Fwa ye ena tete ra, be kǝ́n-ekǝnkǝ́n mo zǝno kukwa enom ngge be no tkukwa be mu ken n no jan ejanbwe anga, n du vǝ anga adi fwa ya e ben be engà ra n no jan fwa anga a chu mò a be é jan be ra.

¹⁴ No enona, m dgyan anga jan be gwafǝ́n ya e chà no ezon-ndegwa be e nya don ne mbwa mbǝgya ne fu e seshi be mu mo be afwa ba no ya eze mo je, a ben efwa mo fwa esera ejanm a chu je.

¹⁵ Adi ebi, be gwafǝ́n ya ehwyà twagwa ara efǝ mo Ehwya n no ba Shetan anga.

¹⁶ Ano ndegwa ya ekǝ̀n-etsǝ́m akan no ngge be nwenjwa ye, be gwafǝ́n, ge e no e bwe e jwa be anga evǝa be ya aduwa be e fwa be ngge etkon a ba tso a chu be ra. Be ya aduwa e bwe e jwa e kpwà be gwafǝ́n ya e fwa didi be ngge be ya e bwe a jwa be anga ra.

¹⁷ Be echikǝ̀n ya e bwe mochi mo be esese anga, be e no be egǝ̀n kè fa, chìchì mo nó be ya e du edgon ne tú fwa mo Ehwya anga.

¹⁸ Adia fwa mo Ehwya jan, “We twa e pe mbo kpevǝ mo ndwa atan a ge chabá fwenfonmo anga ra,” Fwa mo Ehwya hon efwe jan, “Ge no ara jan ya mochi e de buhwen mbwe.”

¹⁹ We chadwa e buton e fo mbo kǝ́n a be dwa o a chu echikǝ̀n ra, kpwà tén ano be eyifwa fà eno e ra ta, chadwa a chu fwa hon.

²⁰ Be echikǝ̀n ya e no kpwà adi ebgen ebwem ángá, we tkyá be etkya a tswa engga mo be nobǝ binbin, evǝa be ya e dan ángá be e tsen etsentsen.

²¹ M bgó o anga adi ti mo Ehwya ngge ḿ mo Yeso Kristi tangge be maleka a Ehwya hon è swa ara ángá, jan we tse be echa etwam ena fwa ye ngge chu edgyanfim ra. Adi binbin mo be mò a o bwe anga, we cha ebgan a sǝ mbo ende akan ra.

²² We tu e san mbo be ya e bwe Yeso Kristi mochi anga, bu a chu ra, afwa ebgen mo be nobǝ efki a bin o. We no nobǝ e no zǝno echanwenwen anga.

²³ We ngǝ e kpwà mbo mbǝ kukwa ra, we ngǝ mbǝ enabi nwofyan, evǝa ge e bwe e jwa o adi dgyèn e dwa bwi o anga.

²⁴ Be ebgen mo be nobǝ ya ehwyà tú san chu be anga a je a tswa enggasansan, èé atan a ende akan chà jan ye jan be bwe ara be ebgen hon ra. Be ebgen mo be nobǝ ya ehwyà tú san be chu be anga ra, tea beti bishi be bwa yi be.

²⁵ Ba anona, be mò esese a be nobǝ bwe anga, ya ehwyà mo be, be di san be anga, ngge be ya ehwyà mo be, a be di san be be anga myan myan ra, be no engǝ̀tonton mo ekpengga nwofyan n gwa tén a je egwam.