1 Timoti 4 - Etkwen New Testament

Echa etwam a chu be etumo fwafe

¹ Engǝ́ mo Ehwya è jan ara nó enggasansan jan, adi be tsǝnò ekǝn-etkyen, be ya ehwyà twa a gwa chaebi mo be a chu Ehwya, na buton a fo be engǝ́ esera ya e nggade be nobǝ anga, na ba be mò a be engǝ́ esera hon tú be anga.

² Be moetum yishwa ena, vǝ a zǝn be ya ayibangǝ̀ n chà bwa anga. Ba be nobǝ ya tswa tsuruku mo be fǝ ara n twanga no ara abu be tkòn nó ngge tsemo efkenfken.

³ Be jan be ndedon be e fǝ́ be be ndegwa ra, n jan be ndegwa be e nya be don ra, n jan be nobǝ be e de be mode ya ehwyà a Ehwya, è mmò a ge, evǝa be ya e tsǝ́ekǝ̀n no a chu ye, n yi ara ebi ángá, be e chá nó a tswa echwanom ángá ra.

⁴ Adia egwa egwa mo mò a Ehwya è mmò ángá no esese, nye e se a gwa nye mò akan ra, ano nye cha ye ngge echwanom,

⁵ adia bè tsǝ́pe ara nó adi efka mo Fwa mo Ehwya ngge ebgo ebgom.

Ya mochi ebi mo Kristi

⁶ Ano o jan bwi be ya ekǝ̀n-etsǝ́m a chu Kristi be mò ena anga, wa no ya mochi ebi mo Kristi Yeso. Wa no ende a bè fyo ye ngge fwa ebi mo chaebi hon ngge moetum esese nwone a ò base ara ángá.

⁷ We fwa mbo ngge mò ebwem ngge hu amme ngge fwa hwen nwone a du ye be nobǝ be e no Ehwya egǝ̀n ra ra, tea adi ḿ mbo, tubge chu o abu wa no zǝno abu ende e tsǝ́ekǝ̀n no a chu Ehwya ángá.

⁸ Ju nobǝ ebwetanm no esese adia ge du ju hon ben ebwejwa anga, tea zǝno enom mbo abu Ehwya dgyan anga, bwejwa ti ara a ge. Ge no ngge ebwejwa a chu zǝno a o no anga asuswana ngge zǝno a wa no atan a zǝnchaje a kǝn-etkyen ángá.

⁹ Fwa ena no ebi n setkyan a ge, a egwa egwa e cha nó ne nyishwa a chu mo nó binbin.

¹⁰ Eni a mò e bwe je bwe mochi, je chifǝ, adia je nyi ara shwa mo je a chu Ehwya e no angǝ, nwene e no Etivǝ́ mo be nobǝ binbin, chìchì mo nó be ya e tsǝ́ ara ekǝ̀n ángá.

¹¹ Twa be nobǝ echa a chu mò ena ngge we tú be nó gaten.

¹² We cha mbo dwa ende akan e di e pin o, adia o no ezon-ndedon ángá ra, tea we no echi fukèn esese a be ya ekǝ̀n-etsǝ́m no a ba anga, adi fwa ejanm mbo, adi mò ebwem, adi edgyan mo be nobǝ, adi chaebi ngge adi zǝno echanwenwen a o no anga.

¹³ We no e kpwà adi mò ekam a tswa Afketa mo Ehwya a engga mo be nobǝ. We no e kpwà adi edgon edum mo nó ngge etum mo nó ti ken a ngga atan a m bwa ara.

¹⁴ We di e pin mbo edwe a bè dwe o adi efka mo fwa a be efojan è jan, atan a be echikǝ̀n è tu o bu a chu ángá ra.

¹⁵ We chu e ngǝ́shi a chu be mò ena ebwem ngge we du chu o adi ebwem mo binbin mo be mò ena, evǝa binbin mo be nobǝ be e di abu o no tubi anga.

¹⁶ We di e seshi abu o no zǝno mbo anga ngge be moetum mbo. Chungǝ́shi a chu be, adia ano o bwe enò, wa ti a vǝ́ chu o ngge be ya e fo o anga.