1 Timoti 3 - Etkwen New Testament

Abu be echikǝ̀n ngge be dikon a no zǝno mo be anga

¹ Fwa ena a fwa ebi. Ano ende akan dgyan anga ge e no echikǝ̀n a àtá aduwa, ge nda anga mochi esese.

² Nobǝ e nda anga ge e no echikǝ̀n mo be ya ekǝ̀n-etsǝ́m ángá, ge no kenm ge e no ye ende a ba tú be ye sen-e-bu jan ge bwe ara edan ra. Ge e no ende e no ngge ebi adi zǝno enom mbwe ngge gwa ye akan, ende e fu chu ye anga, ende a be nobǝ no ye edgwa anga, ende e cha be ya echan shi anga a mbwe ye, ngge ende e tú a yi be nobǝ mò ángá.

³ Ge e no ye ende e ngǝfǝ́ tson anga ra, ge e fwa ye ya fwa endam ra, tea ge e no ende a bwe mò nwene e ti tsuruku edwam a sen bwa anga, ge e fwa ye ya etkya etkyam ra, ge e fwa ye ende e dgyan tse anga àywá ra.

⁴ Ge e no ende e fu yi kpenmu mbwe, na di jan mbǝgya mbwe bwe mò a ge jan be anga ngge be e di e gǝ̀n ye anga adi be mò binbin.

⁵ Adia ano ge no ende e fuse a ti ye kpenmu mbwe ra, bwe engǝ ga fu a ti be ya a àtá aduwa mo Ehwya?

⁶ Ge e no ye ende è chà tsǝ́ekǝ̀n efwe efwe a chu Ehwya ángá ra, afwa ga fìn efinm, na vǝ kǝ́n ekpènm a bwa a chu ye abu bè kpèn Shetan kǝ́n ángá.

⁷ Ge no kenm ge e no ende a be ya e tsǝ́ be ekǝ̀n a chu Ehwya ra, no a jan esese anga a chu ye, afwa ge kpo a shi a tswa ebgenju ngge motswam mo Shetan.

⁸ Ba anona, be dikon, be e no be ya a be nobǝ no be egǝ̀n anga. Be e no be, be ya e jan kpevǝ fà anga ra, be e no be, be ya e ngǝfǝ́ tson anga ra ngge be e no be nobǝ ya e tkyan, be e ben etubim e fwa ye adi ebi ra ra.

⁹ Ge no kenm be e fu e ngǝ́shi mò e no engǝ̀tonton a chu chaebi ngge tashwa ekam echanwenwen.

¹⁰ Be e kwafya e mbwà e di be sangǝ́, ngge ano be fwa be ngge mò a ba tso be efya a chu mo nó ra, kǝnggwa be e gwa be, be e bwe mochi hon.

¹¹ Ba anona, be gwa be, be e no be ndegwa ya be no be egǝ̀n anga, ngge be e fwa be be ya ejanbwe ra. Ge no kenm be e no be ndegwa ya e fu chu be anga, ngge ebi a chu egwa egwa mo mò.

¹² Ge no kenm dikon ge e no zǝnoebi ngge gwa ye, ngge ge e fu e seshi mbǝgya mbwe ngge be ya e no a mu ye ángá.

¹³ Adia be ya ehwyà mo be ya e bwe ara mochi esese ángá, ba ben ti esese a zǝn be nobǝ ngge ba ben echakpo a chu shwa enyim mo be a chu Yeso Kristi.

Ebi mo chaebi mo je

¹⁴ Bi adi m nyishwa no jan a dgyen ye fon ra ma bwa a zǝn o ángá, m bá afketa chí ena no o anga, evǝa,

¹⁵ ano mò akan fundnya m, m bwa san m a zǝn o ra, wa yi abu be nobǝ ya e no a Àtá mo Ehwya a no zǝno mo be ángá. Àtá hon ena a be nobǝ mo Ehwya hon e no angǝ ángá. Ba be etwacha ngge fù mo Àtá hon ngge ebi hon.

¹⁶ Ebi hon ena nwone a Ehwya fijan a chu efwa mbwe a je ba anga na, a mò echa. Ge fwa ye mò a nobǝ a twa efyan a chu mo nó ángá ra. Kristi è bwa a tswa zǝnchaje ena adi ekǝnjuju mo nobǝ. Engǝ́ è tú ara jan a ge hon, nwene e fwa ye ngge ebgen a chu ye ra, be maleka è di ara ye, ngge fǝzǝn mo be. Be nobǝ è du ara edgon mbwe a tswa mo ya e fwa be ya a Esǝrela ra a zǝnchaje. Be nobǝ embo a tswa zǝnchaje, è tsǝ́ ara ekǝ̀n a chu ye. Bè ti ye nyi etkyen vǝ́ ara a kpe a tswa egǝ̀n mo Ehwya.