1 Timoti 2 - Etkwen New Testament

Abu ba fen Ehwya ángá

¹ Ekwafya mo mò binbin, m bgó nye anga jan, nye e dònvǝ, nye e bgó ebgo, nye e jan e jwa ngge nye e chwa e no Ehwya evǝ mo be nobǝ binbin.

² Be e bgó ebgo evǝ mo be chutì ngge binbin mo be ya e no ngge emwentì a bu mo be ángá evǝa a je, je e no zǝno a tswa adgye, tsuruku enggwam a sen, zǝno enom yishwa a Ehwya dgyan anga nwone a vǝ egǝ̀n a bwa Ehwya adi egwa egwa mo efwa.

³ A yishwa be mò ena e no esese n du Ehwya Etivǝ́ mo je, fo etkwa anga,

⁴ adia ge dgyan jan be nobǝ binbin be e ben ega, ne bwa e yi ebi hon.

⁵ Adia Ehwya no akan ngge Ejanjwa e no a engga mbwe ngge be nobǝ binbin ángá no akan gaten. Ende hon ena a Kristi Yeso,

⁶ nwene è ti chu ye no abu mò ekpwacha a chu be nobǝ binbin. Be nobǝ è di ara mò ena adi ekpengga edefǝfǝ mo nó.

⁷ A chu fwa ena gè tsǝ̀pe ara m, me e no eduedgon ngge etsonchi a tswa mo be ya e fwa be ya a Yahuda ra. M fe m anga fwafe ra, m jan anga ebi, m tú mò anga a tswa chaebi ngge ebi.

⁸ Enona, m dgyan be ndedon atan a be bgó Ehwya anga a engga mo be nobǝ ángá, be e kpu be bu mo be etkyen evǝa be e tú jan be chà bwe be edan ra. Be e bwe mò ena ngge vǝtsen, ge e fwa ye ngge efyan etwam e sojube ra.

⁹ M dgyan anga jan, be ndegwa be e tsàn ju adi efwa esese. Be e nggwa mokàn esese afwa ebgenju a fu be, be e tsàn e se be chu ngge be zan-a-chu efki efki ra. Ge e no ye a chu be mò du a tón ngge mò twa a shwa a be bwese ngge zinariya ra. Ge e no ye a chu be mokàn motse àywá a be kpu tsàn anga a ju be ángá ra,

¹⁰ tea be e bwe e se ju be ngge mò esese ebwem, abu be ndegwa ya e jan anga a kpevǝ mo be jan be fen Ehwya anga.

¹¹ Ndegwa e kǝ́n-ekǝnkǝ́n mo be mò emtsǝtsǝ ngge a tswa binbin mo chu engǝm a sen.

¹² M cha m dwa a ndegwa akan ge e tú mò, eno e ra ge e dwa emwentì a chu ndedon akan. Ge no kenm ge e no kpwà emtsǝtsǝ a zǝn a be nobǝ fǝnno fen Ehwya anga.

¹³ Adia Ehwya è kwafya mmò Adamo, sangǝ́ gè chà mmò Awa.

¹⁴ Fwa ye Adamo a Shetan è nggade ángá ra, a ndegwa hon a bè nggade, ngge gè bwa nga ya ebgen.

¹⁵ Tea, ge ti a vǝ́ be ndegwa efka mo mbǝgya ebwam mo be, ano be no kpwà adi chaebi a chu Ehwya, n no dgyan be nobǝ, ngge zǝno echanwenwen enom ngge chuefum.