1 Bitru 1 - Etkwen New Testament

Bitru bi be nobǝ fwa

¹ Afketa chí ena vǝ a zǝn Sima Bitru, etsonchi mo Yeso Kristi, ken a zǝn be eswavǝ mo Ehwya. A nye be ya e no be ya echan a tswa zǝnchaje, ya be nobǝ bushan nye ken no a tswa be efa mo Pontu, Galati, Kapadokiya, Eshiya ngge Bitaniya ángá.

² A nye ya a Àtà Ehwya hon è swavǝ ara, adi ekwafyayim mbwe, be ya a bè bwe nye no echanwenwen adi efka mo mochi mo Engǝ́ mo Ehwya, evǝa nye e tse Yeso Kristi ngge nye e ben buhwen mo ngǝ mbwe a bè ti nggwa a chu nye ángá. Esese ngge adgye e no ngge nye nogwa nogwa.

Shwa enyim e fǝ ye anga ra

³ Etàn ge e no ḿ mo Ehwya nwene e no Ehwya ngge Ate mo Etsodwe je Yeso Kristi hon ángá. A chu fǝedwam echa a gè no ngge nó a chu je ángá, gè bwe je twanga no ara efwe ngge ya shwa enyim angǝ efka mo etkyen enyim mo Yeso Kristi a dì angǝ.

⁴ Ngge je bwa yi jan, a je ja ya a cha mò a Ehwya è ti nyi ara mbǝgya mbwe a kpe ángá, ngge mò hon a fkwa a didi ye ra, ga bwe a bgen ye ra, na hwi ye ra.

⁵ Ehwya adi echakpo mbwe dgon nye anga, a nye ya e no ngge chaebi a chu ye, evǝa be nobǝ binbin be e di ngge fǝzǝn mo be jan Ehwya a ti a vǝ́ nye no ekǝn-etkyen mo zǝnchaje.

⁶ No enona, nye e no ngge vǝtsen àywá, a chu be mò a Ehwya bwe na. Asuswana tsuruku mo nye a bgen mo ekpengga nwofyan a chu be ekan efki efki àywá a nya ngǝ ángá.

⁷ Be embwadi ena bwa anga a zǝn nye evǝa ge e tú be nobǝ jan shwa enyim mo nye a chu Ehwya no ebi ngge ge no ti ara mò chìchì a chu zinariya. Zinariya nwone e bgen anga, bi adia be mbwadi nó anga ngge fǝ̀, evǝa chaebi mo nye ge e vǝ etàn, edgwa ngge egǝ̀n e bwa nye atan a Yeso a bwa ángá.

⁸ Bi adia nye chà didi nye Yeso ngge fǝzǝn mo nye ra, nye dgyan ye. Nye di nye ye anga asuswana ra, nye tsǝ́ekǝ̀n no a chu ye ngge nye mbo ngge vǝtsen, a kpevǝ jan a ti ye ra,

⁹ adia nye cha anga engà mo chaebi mo nye, nwone e no ega mo nya mo nye ángá.

¹⁰ A chu ega hon ena, be efojan ekpe ekpe, è jan fwa a chu esese nwone a nya ben ángá. Bè chifǝ àywá ngge tsuruku akan be e di abu Ehwya a ti a vǝ́ be nobǝ ángá.

¹¹ Bè tkyan be e yi ekpengga hon ngge abu ega hon a bwa ángá. Engǝ́ mo Kristi nwene è no a ju be ángá, è jan be fwa anga a chu mo nó. Engǝ́ hon è kwafya jan ara be jan Kristi a ngǝ ekan sangǝ́ be nobǝ chà a no ye edgwa.

¹² Be ya ehwyà è fitú ara be jan, mochi a bè bwe anga è fwa ye evǝa be e bwe e jwa chu be ra, tea bè bwe nó anga a chu nye, atan a bè jan nye fwa a chu be mò hon, a bè jan nye nó anga a chu mo be asuswana na, adi efka mo be ya è jan nye Fwa Esese a tswa echakpo mo Engǝ́ mo Ehwya a bè tson shwa a chu be chá kpe ángá. Be maleka mo Ehwya è chifǝ be e di be mò ena èé be.

No zǝno echanwenwen

¹³ No enona, nye e fu e seshi chu nye ngge enotsam a tsuruku, nye e nyi e gu shwa mo nye a chu mò a Ehwya a no nye, nò nwone a Kristi a mbwi a bwa ángá.

¹⁴ Abu mbǝgya ya e fo fwa anga, nye e twa e gwa be mò esera a nyè bwe atan a nyè chà no a tswafǝ ángá.

¹⁵ Tea abu ende hon éè fǝ́ nye dwa nye e nga be nobǝ mbwe no echanwenwen ángá, nye e no echanwenwen adi binbin mo be mò a nye bwe anga,

¹⁶ adia ge no ebam adi Afketa mo Ehwya ekpe ekpe jan, “Nye e no echanwenwen adia m no echanwenwen ángá.”

¹⁷ Adia nye fǝ́ ye “Àtà,” atan a nye bgó ebgo anga, a ge hon nwene e kpèn be nobǝ kǝ́n a chu be mò a be bwe anga adi ebi, nye e no zǝno mo nye e dan ángá abu be ya echan a tswa zǝnchaje ena a tswa etsentsen mbwe.

¹⁸ Nye yi jan Ehwya è jwacha ye nye a bu mo be mokukwa a be ate nye è kpu du nye a bu ángá. Gè jwacha ye nye ngge be mò e dì anga, abu be azufa eno e ra zinariya ra,

¹⁹ tea ngge ngǝ etsannene mo Kristi, Nwen Son hon e fwa ye ngge emma ra, efki ra, ju edìm.

²⁰ Ehwya è swavǝ ara ye sangǝ́ gè chà mmò zǝnchaje, jan a di efka mbwe, ge ti a vǝ́ be nobǝ, tea bè fi ye tú adi be ekpengga ekǝn-etkyen ena a chu nye.

²¹ Adi efka mbwe nye tsǝ́ekǝ̀n no a chu Ehwya nwene è ti ye nyi etkyen a dì angǝ nè bwegǝ̀n ye ángá, enona, chaebi mo nye ngge shwa enyim mo nye, no a chu Ehwya.

²² Asuswana, adia nye kpuvǝ́ ara be mò esera è dwa a tsuruku mo nye adi etsem mo fwa ebi mo Ehwya, ngge adi ebi nye dgyan be ya e ba Ehwya anga gaten na, nye e dgyan sojunye àywá ngge tsuruku akan.

²³ Nye yi jan bè twanga mbwa ara nye efwe, fwa ye adi mò e bgen anga ra, tea adi mò e bgen ye anga ra. Bè mbwa nye adi efka mo fwa mo Ehwya e no a fwa efwam ángá.

²⁴ Adia bè bá ara nó adi Afketa mo Ehwya ekpe ekpe jan, “Binbin mo be nobǝ no abu be vǝmo, ngge egǝ̀n mo be no abu be kpwimo mo vǝmo a tswavǝ́n. Be vǝmo hon ngǝ anga, ngge be kpwimo hon yi nggwafwa anga,

²⁵ tea fwa mo Ehwya no a fwa efwam.” Ngge fwa hon ena, a Fwa Esese a bè jan nye ángá.