ISIKẸLỤ 3 - IBAYỊBỤỤ NYA OHE OLUHYE

¹ Ụka ọọwa lẹ Ohe Oluhye a byim yẹkẹẹ, “Ọngịnyị ehe, ya iskorol ọwẹ ri chajị ka kele kaa ya ẹla ta ala Isirẹlụ mẹ.”

² Ọọwa lẹ am pyọnụ maa lẹ ọ ya iskorol ọwa haam ri lẹlẹ.

³ Ọ byim yẹkẹẹ, “Ọngịnyị ehe, ri iskorol ọlẹ kam wẹ ya hang wu ẹpwụ kpọngkpọng.” Ụka ọọwa lẹ am ya ri lẹ ọ lam ịpyọ ringe-ringe lala ịnwa lẹlẹ.

⁴ Ọọwa, Ohe Oluhye a byim yẹkẹẹ, “Ọngịnyị ehe ee, kele ka ẹga nya ala Isirẹlụ ka ya jaa ẹla myị ẹla kam byim ma ya mẹ.

⁵ Angịnyị ịlẹ kị ya oja ọkịla lee ka oja nyaa lujwo am wẹ dung ta ka ma ala Isirẹlụ ịnyị.

⁶ Ọ ri kam dung tala ija ịkịla ịlẹ ka ẹla oyaya nyaa lujwo ọlẹ kaka je etu nyaa ka, nyịlẹhị ịnyị ịka ke ụrụ lang.

⁷ Ma ala Isirẹlụ a juwa ke ụrụ lang ka, jaabwọ ọlẹ kị kaa ke ụrụ lomi nyam ka. Ịwa wuu la egbeju-ọngịrị bala ị chị ọkịlẹtụ nyaa ori.

⁸ Yẹ mẹẹ, am ka họ a ka kpẹhị ọngịrị bala legbeju ọngịrị taa jaabwọ ọlẹ kịwa aladang legbeju ọngịrị ịnyịnyị.

⁹ Am ka họng a ka lọkịlẹtụ lọngịrị gụ ẹjwọ ọlẹ kọ lọngịrị gụ ajwọ ịkịla wuu, a ka dọmwụ lọngịrị gụ ẹjwọ ụga wẹẹ. A ju uhi lee ọ che kpakpaakpa chajị nyangị la egbeju ọngịrị ịwẹ ka.”

¹⁰ Ohe Oluhye kịnyaa juwa ya ẹla tam yẹkẹẹ, “Ọngịnyị ehe ee, kpa ẹla myị ẹla ịlẹ kam ya tang wuu ẹpwụ nya ọkịlẹtụ nyang ká tị kpa ụrụ nyang myị̀myị ịnyịnyị mẹ.

¹¹ Ọọwa lẹ, ka kele ka ẹga nya angịnyị nyang ịlẹ ka alẹwụ wuu kpa rụ ka ya ẹla ọlẹ kam Ọngọlahị Amkpaa ya taa mẹ. Ó-ri kị ke ụrụ ke lee ó-ri kị pwa ọ-ka ke ụrụ wẹwẹ, a ya jaa mẹ.”

¹² Ọọwa, olegu nya Ohe Oluhye a hum kpa ka uhye lẹ, m wo omyi ẹ-ẹkpẹ nyam ọtụka-ọtụka kọ yẹkẹẹ, “Ogbo ogwogwo ā juwa ha ụmụmẹ nya Amkpaa e-epwoohe u-uhye-ọgba!”

¹³ Omyi ọlẹ kam wo ri iru nya achwọ nya ang ịhịhị ịlẹ kị juwa kpa wu awụlẹ bala iru nya ata nyang ịrụnyẹ ịlịkịka nyaa kị juwa hiru kuuu.

¹⁴ Ọngịrị nya Ohe Oluhye wẹ uhye nyam ọtụka-ọtụka ọọwa lẹ olegu nyamwụ a hum kparụ lẹlẹ, ụka ọọwa ọ tọm olujwo bala ọ jum agbama ọtụka-ọtụka.

¹⁵ Ụka ọọwa, m̀ jẹ kele ka pwụ ịTẹlụ-abiibu ọlẹ kọ juwa ịkịka nya Ihu ịKẹbaa ẹga ka ala iJuda ịlẹ kị wu kpa ka agba kụ. M̀ hụ ụwa taa ẹnụtụrụ irwiye gbẹgbịlẹ. Ang ịlẹ kam yẹ bala ịlẹ kam wo pyẹm ọnụ.

Ọngọlahị Chụ ISikẹlụ nya Ọngọgbeji

¹⁶ Ụka ká ẹnụtụrụ irwiye chịpwụrụ lẹ, Amkpaa a ya ẹla tam yẹkẹẹ,

¹⁷ Ọngịnyị ehe ee, m chụng nya ọngọgbeji ha alẹpwụma nya Isirẹlụ lẹ, ụka myị ụka ka wo ẹla bwu ọnụ nyam, aa kpa ẹla ịịwa gbilaa ụbwọ ụ-ụrụ.

¹⁸ Ụka ọlẹ kam byi ọlọhọbịrị ya nyị ka gbu pyii lẹ, kọ ri ka pwọka yalibyi tọọ jaabwọ kam ya chajị kọ ka yẹ irya da chajị ka ọhịhị nyamwụ ka chịda ka, ọri ka alịhọbịrị ịwa a gbu am ka tịtọ nya ịwọ nyaa bwụbwọ nyang.

¹⁹ Ma ori ka yalibyi ta alịhọbịrị kị tị pwa ọ-ka yẹ irya da, ị ka gbu ẹ-ẹpwụ nya ịhọbịrị nyaa ma ọhịhị nyang ka chịda.

²⁰ Ori ka angịlẹ kị ri alabwẹla ịnyịịla ine a ji kpata kaka hang inyibyi, ụka ọlẹ kam yang ọkịlata da ụ-ụgbẹyị nyaa, ori ka yalibyi taa ka ị ka gbu ẹ-ẹpwụ nya ịhọbịrị nyaa, ang ịnyịịla ịlẹ kị họọ bwu ẹkpẹ kpẹ wuu, m ka kpịtịya nyaa ka, ma am ka tịtọ nya ịwọ nyaa bwubwọ nyang.

²¹ Ori katị gbile alabwẹla ịnyịịla ụbwọ ụrụ chajị kị ka cheji ba hi ịhọbịrị kị myị ke ụrụ lang, ị ka chịda chajị nyọlẹ kị ke ụrụ lang ọhịhị nyang tị ka chịda ịnyịnyị.

ISikẹlụ Ku Ọnụ

²² Ọngịrị nya Amkpaa wẹ uhye nyam ọtụka-ọtụka. Ọọwa, ọ byim yẹkẹẹ, “Wuleji ka kele ka ọkpọọ mẹ. Ụ-ụwa m ka ya ẹla tang lẹ.”

²³ Ọọwa, m wuleji lẹ, m rụ kele ka ọkpọọ lẹ, m yẹ ụmụmẹ nya Amkpaa jaabwọ kam yọọ lụka nya ọgbanyẹ ịkịka nya Ihu ịKebaa lẹlẹ. Ọọwa, m yahị kụrụ eji lẹlẹ.

²⁴ Ma olegu nya Ohe Oluhye ju wẹ ẹpwụ nyam ọọwa lẹ owulem eji godayị kọkọ lẹ, Amkpaa a byim yẹkẹẹ, “Rụ kele ka ẹpwa nyang ka tu ụgbẹyị nyang ku ilọng.

²⁵ Ị ka chịng iri, ọngịnyị ehe, ọlẹ ka ka jẹ-ẹ̀ kpehe ka ugbododa myị ka.

²⁶ Am tị ka họ ẹlẹlẹ nyang ka gbuba ọnụ nyang chajị ka ka jẹ-ẹ̀ kpa da angị legbeju ịngịrị ịwẹ ọna ka.

²⁷ Ma ụka ọlẹ kam myịmyị ya ẹla tang kam wụrụ ọnụ nyang, a ka ya jaa jaabwọ kam am Ọngọlahị Amkpaa ya. Angịhyẹ nyaa ka ke ụrụ, angịkịla-á tị ka myị ke ụrụ lang ka, chajị ị ri ẹpwụma ọ-la egbeju-ọngịrị.”