ỊSẹfaniya 1 - IBAYỊBỤỤ NYA OHE OLUHYE

¹ Ụka ọhẹ, Amkpaa du ịSẹfaniya ẹrụ ọlẹ. Ụka ká iJosaya ọnyị nya Amọn ri Adịrahụ nya ala iJuda ọ du ẹrụ ọlẹ lẹ. ỊSẹfaniya ayịdang ri ọnyị nya iKuchi. Adịda nya iKuchi ri iGedaliya. Adịda nya iGedaliya ri Amariya. Adịda nya Amariya ri iHesekaya.

Ẹnụ nya Eje Ọlala nya Amkpaa

² Amkpaa yẹkẹẹ, M̀ ka ta ang myị ang ilodehe ọlẹ wuu ayịreji.

³ M̀ ka ta angịnyị bala iyo ileji ayịreji. M̀ ka ta ịchịnụ bala iyenyi ayịreji. M̀ ka kpụ angịnyị inyibyi ẹkpẹ beji, m̀ ka ta angịnyị ehe wuu ayịreji, ọngọngọhẹ-ẹ́ ka be ka.

⁴ M̀ ka yẹ ala iJerusalẹm bala ala iJuda akama, m̀ ka ta ang ẹjẹẹ ihihi nya ịgba ọgbagba nya ojiga ịBaalụ ayịreji, m̀ ka ta angịkiliya nya ijiga wuu ayịreji.

⁵ Angịlẹ kịị kụ uhye nya ịnawụ gbịgba ha ẹnụ bala ọya bala ịdịchụ, m ka taa ayịreji. Angịlẹ wuu kịị gbịgba ham, bala ọ-myị ọnụ nya o-hu ọkịlẹtụ ham kị tịị nwa iro lẹnyị nya ọjiga ịMọlẹkị, m̀ ka taa ayịreji.

⁶ Angịlẹ wuu kị nyẹẹkpẹ dam am Amkpaa, kị myị-ị bam jẹ kaka, kị tịị tọm wo jaabwọ kam tịtọ kị ka hịhị kaka, m̀ ka taa ayịreji wuu.

⁷ Ba chịng i-ijata nyam am Ọngọlahị Amkpaa, chajị ẹnụtụrụ nya eje ọlala nya Amkpaa ju chwẹẹ lẹ. M̀ jam nwụlanọ kam ka ya angịnyị nyam kịla iya, m̀ tị diro aluji ịlẹ kị ka waa ẹpwa wụ lẹ.

⁸ Ẹnụtụrụ ọọwa, m̀ ka yẹ alegbeju ịtụkụ yi adịrahụ, bala anyị alẹng nyamwụ, bala angịlẹ kịị hịhị gbịla alụma ịkịla akama.

⁹ Angịlẹ kịị gbịgba jaabwọ ká alijiga kaa gbajị wule ọnang juwa kpụ ijiga, bala angị kpa ijẹẹhị bala agbụrụ nu angịnyị ang, kịị nwụlaa myị ẹpwa nya ayịbaa— m̀ ka yaa ịwa wuu akama.

¹⁰ Amkpaa yẹkẹẹ, Ẹnụtụrụ ọọwa, anụ ka wo ida ojeje nya angịnyị Ogirigba nya Iyenyi i-iJerusalẹm, anụ ka wo ida ọtụka-ọtụka bwu Ụpa Onyeewe nya epweji, anụ ka wo iru lala ang nyaa juwa tụrụ uhye nya ikiti.

¹¹ Anụ angị nọ ẹpwa o-oye nya ihi, anụ jida kanụ ma je mẹ, chajị alọhị ị-kpa ihi ra ụ-ụwa wuu ka gbu.

¹² Ụka ọọwa m̀ ka ya ukunggo wuru ila kpa pịlahị tụ ẹga myị ẹga nya iJerusalẹm da kam ka yẹ angịlẹ kị ri wu ịlaa ẹpwụ juwa byi ịlaa yẹkẹẹ, Amkpaa tị́ ka họhị họ ányị-ị̀?

¹³ Aluji ka wụ ang-ụdụ nyaa wụ kpa rụ, ị ka ta ẹpwa nyaa ayịreji. Ị́ nwụ ẹpwa inyeewe nwụnwụ, ị́ tị ka kụ ụ-ụwa ka. Ị́ wu alakọnụ wu, ị́ tị ka nwụ ere nya alakọnụ ịịwa ka.

¹⁴ Ẹnụtụrụ ọtụka ọlẹ ká Amkpaa ka la angịnyị eje ju chwẹẹ lẹ. Ọ ju chwẹẹ lụmẹ wẹẹ warị lagaga! Ẹnụtụrụ ọọwa ka myị̀ la ang ọjụjụ, angị ri ọgẹwụ ịtụka i-ju ugbodu ju ka chị ụbwọng ee.

¹⁵ Ọ ri ẹnụ ká Amkpaa ka ju agbama, bala ẹnụ nya akama ọyẹyẹ bala ọjụjụ. Ọ ri ẹnụ ká ẹla ọjụjụ ka họ angịnyị kị ka ji ẹpwụ nya akama. Ọ ri ẹnụ ká ukpowu ka chị ká angịnyị ka me imahị, ẹnẹwẹ ri ẹnụ ká ẹga ka chị owu kpịlẹ legbamwụ chị obiri hite-hite.

¹⁶ Ọ ka ri ẹnụ ọlẹ kị ka chị opyike nya ẹwụ, angịdẹwụ ka mwu eje nya ẹwụ, ị ka mwẹla ta epweji ịlẹ kị me egwalọ ju, kị ka tụrwaa bala ebe iluhye nyaa beji kpalị-kpalị.

¹⁷ Angịnyị họ ang onyobyi bam am Amkpaa, lẹẹ lẹ, m̀ ka họ kị ka yẹ akama onyobyi. Ị ka jẹdịyẹ kám̄-kàm̄ lala alidu. Aluji ka nwaa la ịwọ nyaa ka da ọ̀bá lala enyi, egu nyaa ka chị páta-páta màma chị ị-ịpyị.

¹⁸ Ẹnụtụrụ ọlẹ ká Amkpaa ka chị agbama nyamwụ ehe, okpoko onyoowuru lee okpoko ịgọm nyaa-á ka chaa da myị ka. Agbama nya Amkpaa ka wuru lala ila, ọ ka ta ọpyị wuu ayịreji. Lụka ọ-kpahị ju ka ọ ka ta ọng myị ọng ọlẹ kọ kụ am̀ odehe ayịreji.