IRutu 4 - IBAYỊBỤỤ NYA OHE OLUHYE

IBowasị Ye IRutu

¹ Ụka ọọwa lẹ, iBowasị a rụ kele kaka hụhụ ọ-ọnụ ogirigba o-bwu ka epweji lẹlẹ. Ụka ká ọnyadamwụ ọlẹng ọhẹ ọlẹ kọ ya ẹla rụ chajị nyọka chị iRutu ida ye juwa jẹ chịpwụrụ kám̀ lẹ, IBowasị a wụrwọọ byoo yẹkẹẹ, “Jẹ wẹ oye ọlẹ, ká hụhụ lẹẹ wẹẹ, oligwam.” Ịnyị, ọ kele kaka hụhụ ụ-ụwa lẹlẹ.

² IBowasị wụrụ ịgabwọ angị iwo chiriri nya epweji kaka jịra lẹ, ọ byaa nyị hụhụ mẹ lẹ, ị hụhụ ịnyịnyị lẹlẹ.

³ Ọọwa lẹ, ọ byi ọnyadamwụ ọọwa yẹkẹẹ, “ỊNaomi ọlẹ kọ nya bwu ọpyị nya iMowabụ lẹẹ, jam ka hu ọpyi ọlẹ kọ ri nya ogu Elimẹlẹkị ọnyadahị ra lẹ.

⁴ M tị kụ ẹhị yọọ i-irya nyam lẹ, ọ chịla ká ka jẹ ẹlẹwẹ. Lẹẹlẹ, ra ọpyị ọọwa bwu ụbwọ nya ịNawụmi ám̀ i-ijata nya angịlẹ kị hụhụ lẹẹ ẹgẹlẹ bala a-ahị nya ịgabwọ nya alụma nyahị mẹ. Ó-ri kọ hang ịnyị lẹ aalẹ, a rọọ mẹ. Ma, ọ́ tị ri kọ hang i-irya nyọka rọọ ra ka aalẹ, a ya jem chajị kam ka jẹ mẹ. chajị ahụ ụbwọng a pwoku nyọka ra ọpyị ọọwa lẹ. Am a tị lẹẹ bang ba ịnyịnyị lẹlẹ.” Lẹ, ọlẹng ọọwa a wẹ byi iBowasị yẹkẹẹ, “M ka rọọ lẹ.”

⁵ Ọọwa lẹ, iBowasị a wẹ yẹkẹẹ, “Ó-ri ịnyị lẹ aalẹ, ẹnụ ká ra ọpyị ọlẹ bwu ẹga nya ịNawụmi bala iRutu ọla iMowabụ lẹ, a ka ye iRutu ahụ-ogu ịnyịnyị chajị ka ang-ugu nya ogu oleji ka ri ang ọ-kpa wo ẹnyị-ehe nyamwụ lẹlẹ.”

⁶ Ụka ká ọngọ ka ra ang-ugu ọọwa wo ọdawụlẹ nya ẹlẹwẹ lẹ, ọ yẹkẹẹ, “Ọ tị tị ri ịịwe aalẹ, ḿ myị ọnụ nyọka rọọ kaka. Chajị ó-ri kam myị ọnụ, m ka kụ abwabwọ ẹ-ẹga nya ang-ugu ọlala nyam ẹnẹhẹ myị wẹẹ. Ahụ a rọọ lịlọng mẹ. Amm ka jẹ-ẹ rọọ kaka.”

⁷ Ọhọhọ nya ala Isirẹlụ iloyi ọọwa ri, ene ka ẹla nya ang ọrara bala ang ku awụlẹ unu ụma ọlịịwẹ ka cheju lẹ, ọngọhẹ lẹpwụ nyaa ka pwọ ugbẹtẹ nyamwụ ha ọngọwụlẹ. Ụgbẹyị ọlịịwẹ ị kaa kpa chị ụma nya ẹla ọlịnyị eju ụ-ụwa Isirẹlụ lẹ.

⁸ Ịnyị, ọlẹng ọọwa a byi iBowasị yẹkẹẹ, “Ahụ a ra ọpyị ọwẹ mẹ.” Lẹ, ọ pwọ ugbẹtẹ nyamwụ ha iBowasị lẹlẹ.

⁹ Ọọwa lẹ, iBowasị a ya dodehe je ịgabwọ bala angịlẹ kị juwa wuu yẹkẹẹ, “Anụ wuu ri ibeenu nyori yẹkẹẹ m ra ang myị ang ịlẹ ká Elimẹlẹkị bala iKiliyọn bala ịMalọn anyị la bwu ẹpwụtụbwọ nya ịNawụmi alẹ lẹ.

¹⁰ M tị yẹ iRutu ahụ-ogu nya ịMalọn nyọka ri ahụ nyam ịnyịnyị chajị ká ẹnyị nya ogu oleji á ka byi hi ugbiyegu nyamwụ lee ego nya epweji ọlẹ kaka lẹ. Anụ wuu rim ibeenu nya ẹlẹwẹ alẹ lẹ!”

¹¹ Ọọwa lẹ, ịgabwọ bala angịlẹ kị juwa ọ-ọnụ ogirigba ọọwa wuu a myị lawụlẹ yẹkẹẹ, “Ee, Ahị ring ibeenu ịnyịlẹhị lẹ. ká Amkpaa a wahị kụrụ ọnyang ọlẹ ká wẹẹ ye wẹ ẹpwa nyang chajị kọ ka lala iRechẹlụ bala iLiya ịnịna igogo nya ala Isirẹlụ mẹ. Ohe Oluhye a wahị kụrụng la ihi ọlala ụ-ụwa ogang nya Efuratị bala ehe ọlala ám̀ e-epweji nya ịBẹtịlẹhẹm ịnyịnyị mẹ.

¹² Anyị ịlẹ ká Amkpaa ka ya hang bwula onjwo ọnyang ọlẹ ka họ ká ugbiyegu nyang ka pyẹ chakụ chakụ lala ịnya ịPẹrẹsị ọlẹ kọ ri ọnyị ọlẹng ọlẹ ká ịTamaa ma ha iJuda.”

Ego Ogbegbe nya Adịda Igogo nya IDevidi.

¹³ Ịnyị lẹ, iBowasị a kpa iRutu rụ ka ẹpwa kaka ye nya ahụ nyamwụ lẹlẹ. Amkpaa wahị kụrwọọ, ọ jẹ ẹnyị. Ọ ya ẹnyị nyamwụ ọọwa ma ọnyị ọlẹng.

¹⁴ Ọọwa, anyang ịlụwa a byi ịNawụmi yẹkẹẹ, “Ogbo ogwogwo a ri nya Amkpaa ọlẹ kọ họ dudu ká ji labwabwọ ka wẹ alẹ, kọ ya ọnyị kang ida. Oyi oruru ọnyịịla nya ọnyị ọwẹ a pyẹ yịrị ọpyị nya Isirẹlụ wuu mẹ!

¹⁵ Ọnyị ọlẹ ka nwụ iwe-ahụrụ nya ọhịhị nyang rịrị onyeewe. Ọ ka kpẹhị rịrịng yẹẹyẹẹ lụka nya ụchẹ ọchịchị nyang. Chajị iRutu ọlẹ ká họọ lụmẹ, kọ tị dọmwụ ju apyobwuna hang gụ anyị alẹng irwiye ịkụchọ-kụchọ a ma ọnyị ọọwa lẹ.”

¹⁶ Ọọwa lẹ, ịNawụmi a ye ọnyị ọọwa kpa a-ata nya ịlọmwụ lẹ, ọ juwa kpẹhị rịrọọ lẹlẹ.

¹⁷ Anyang ịlẹpwa ụ-ụwa juwa kpa ya yẹkẹẹ, “ịNawụmi ma ọnyị ọlẹng lẹ oo.” Ị wụrụ ẹnyị nyamwụ Obẹdị. Obẹdị ọọwa a ma iJesi ọlẹ kọ ri adịda nya iDevidi lẹ.

¹⁸ Jaabwọ ká anyị ịtụma nya ịPẹrẹsị la erike-erike a lẹẹ lẹ: ỊPẹrẹsị ma iHesirọn.

¹⁹ IHesirọn ma ịRam. ỊRam ma Aminadabụ.

²⁰ Aminadabụ ma ịNachọn. ỊNachọn ma ịSalụmọn

²¹ ỊSalụmọn ma iBowasị. IBowasị ma Obẹdị.

²² Obẹdị ma iJesi. IJesi ma iDevidi.