IRutu 3 - IBAYỊBỤỤ NYA OHE OLUHYE

IRutu Ye Ọrụ nyamwụ

¹ Ẹnụtụrụ ookpokpo ọhẹ juwa ká ịNawụmi ịnịna-ẹpwa nya iRutu byoo yẹkẹẹ, “M̀ ka tịtọ nya ọrụ ọlẹ kọ ka jụng kpa yẹẹyẹẹ hang lẹ.

² IBowasị ọlẹ ká lẹẹ họ ụkụrwọ bala anchẹ anyang nyamwụ kiji ri ọọnahị. Ọ juwa ka kele ka hịrị ịbali nyamwụ alẹ lobyi ẹ-ẹga kịị ru ang.

³ Kele ká hyo enyi kpengkpeng, ká gu ida ochoru kwọkwọ wụ, ká go ang ịnyangga nyang kụrụ gbịlẹ-gbịlẹ mẹ. Á họ ịnyị kpá lẹ, à rụ kele ka ẹga kịị ru ang mẹ. Ma, ā tị họ ká iBowasị ā jẹ ahụ nyị juwa ụ-ụwa ka gbee kọ ka ri ang kpá.

⁴ Ụka kọ ka nọnọ lẹ, aa yẹ ẹga ọọwa ju ẹ-ẹhị mẹ. Ọọwa lẹ, ká kele ka nwụla apwụ hyoo a-ata, kaahụ ayịdang ā nọnọ ụ-ụwa ịnyịnyị mẹ. Aalẹ, ọ ka ya jeng jaabwọ ká ka họ.”

⁵ IRutu wẹ byi ịNawụmi yẹkẹẹ, “M ka họ ang myị ang ọlẹ ká byim am nyị họ.”

⁶ Ịnyị, ọ yegiri kele ka ẹga kịị ru ang lẹ, ọ họ ang myị ang ọlẹ ká ịnamwụ-ẹpwa byoo ya nyị họ wuu lẹlẹ.

⁷ Ụka ká iBowasị ri ang bala ọ-nwa ang ọnwanwa kpá, ka ịnyịrọ kpọọ nyii lẹ, ọ rụ kele kaka nọnọ ị-ịlahị nya ẹga kị ya ịbali kụ ogu lẹlẹ. Ọọwa, iRutu a jẹ kem kem kem ka ụwa lẹ, ọ nwụla apwụ ọ-dakụrụ ata nya iBowasị lẹ, ọwa ayịdang a hị nọnọ ụ-ụwa lẹlẹ.

⁸ Lụka nya epwodu o-gwene ká iBowasị gu achwọ, ọ wu gburu-gburu lẹ, ọ yẹ ká ọnyang ọhẹ nọnọ o-okwata nyamwụ lẹlẹ.

⁹ Lẹ, iBowasị a tịtọ wo yẹkẹẹ, “Oowo a tị́-ị wẹ ene?” IRutu wẹ byoo yẹkẹẹ, “Am iRutu ọnchẹ nyang ịnyị. Pyẹ apwụ ọ-dakụrụ nyang maa kụrụm mẹ, chajị ahụ a ri ọngọ ka jẹ-ẹ chịm ida ye la ang-ugu ang-ugu nyam lẹ.”

¹⁰ IBowasị byoo yẹkẹẹ, “Amkpaa a wahị kụrụng mẹ, ọnyị ọnyang nyam. Ọnahị ọlala nyang olugbẹnyị mwọọgịlẹ lụmẹ gụ ịnya ọgbanyẹ lẹ. ‘A myị yẹ ba ikolobya ịlẹ kị ri alụdụ lee ikpehika kpong-kpong ka.

¹¹ Wo mẹ, a chuko ka, ọnyị ọnyang nyam. M ka họ ang ịlẹ wuu ka bịlẹm wẹ hang. Alịnyahị wuu jẹng ká ri ọnyang olihi-ihi a-abwẹla.

¹² O-ri ịnyịlẹhị obwubwu nyahị la kpụ m ka jẹ-ẹ chịng ida ye myị. Ma, ọnyadam ọlẹng ọhẹ ọlẹ kọ ka jẹ-ẹ chịng ida ye la ang-ugu ang-ugu nyang wuu juwa ká obwubwu nyamwụ la gẹdẹ-gẹdẹ ẹga nyang gụ ịnyam wẹẹ.

¹³ Aa hụ ẹgẹlẹ gbee da ka ahị ọpyẹpyẹ mẹ. Alụtụrụ, ahị ka jẹ bwu ẹga nyamwụ lẹlẹ. Ó-ri kọ tịtọ nyọka yeng la ang-ugu ang-ugu nyang lẹ aalẹ, ọọwa hiigu, ọ yeng mẹ. Ọ tị ri kọ myị ọnụ nya ọọwa ka aalẹ, am jam nwa iro ya jaabwọ ká Amkpaa juwa hịhị ịnyịlẹhị lẹ, ḿ ka dayi la o-yeng ye kaka. Nọnọ nyang ẹgẹlẹ gbee da ka alụtụrụ mẹ.”

¹⁴ Ịnyị, iRutu a nọnọ o-okwata nya iBowasị gbee ka ahị juwa pyẹ lẹlẹ. Ma, ọ tị chị ahị wuleji ene ká ahị pyẹ kpụ ọ-ka jẹ ọngịnyị ogu. Lẹ, iBowasị a dọọ ọna yẹkẹẹ, “A họ ká ọngọngọhẹ a jẹ ya ọnyang ọhẹ nyị warị wẹ ẹga o-ru ang ọlẹ kpong-kpong koo.”

¹⁵ IBowasị myịmyị byoo yẹkẹẹ, “Nwụla apwụ ọ-dakụrụ nyang ọwẹ kpa warị, ká pyọọ maa mẹ.” Ụka ká iRutu pyọọ maa kpá, iBowasị me ome ịrwọnyẹ nya ịbali jwoo lẹ, ọ hwoo họọ lẹlẹ. Ọọwa lẹ, ọ yegiri tịrẹkpẹ ka epweji lẹlẹ.

¹⁶ Ụka ká iRutu nya pwụ ẹga nya ịNawụmi ịnamwụ-ẹpwa, ọ tọọ wo yẹkẹẹ, “Anyị ang a tị́ la wẹ mẹ, ọnyị nyam ọnyang?” Ọọwa lẹ, iRutu a tịrọnụ ya joo kpẹẹkpẹẹ ang ịlẹ wuu ká iBowasị họ họọ lẹlẹ.

¹⁷ Ọ ya joo ịnyịnyị yẹkẹẹ, “IBowasị a ya ome ịrwọnyẹ nya ịbali ham lẹẹ lẹ. Ọ ya am nyị ka rụ labwabwọ ịịwe kaka tọng ka.”

¹⁸ Ọọwa lẹ, ịNawụmi a byi iRutu yẹkẹẹ, “Aa ju ugbodu kpọọ ká yẹ jaabwọ kọ ka la mẹ, ọnyị ọnyang nyam. Chajị iBowasị ọwẹ a ka myị-ị mwụ ịnyọ ene ká ẹlẹwẹ ka gu awụlẹ alẹ kaka.”