Zekaliya 1 - Ibbaibele 1963

Zekariya mbwaakatalika kusinsima

¹ Mumwezi wamusanu aitatu, mumwaka wabili wa-Dariyo, ijwi lyaJehova lyakasika kuli-Zekariya mwana wa-Berekiya mwana wa-Ido, musinsimi, lyakati,

² Jehova wakabakalalila loko bamauso.

³ Nkaambo kako kobaambila kuti, Mbuboobu mbwaamba Jehova wamakamu. Amuboole kulindime, mbwaamba Jehova wamakamu, lino ambebo njooboola kulindinywe, mbwaamba Jehova wamakamu.

⁴ Mutakozyani abamauso pe, nkaambo basinsimi baciindi bakaboongolweda kuti, Mbuboobu mbwaamba Jehova wamakamu, Amupiluke kuzwa kunzila zyanu zyabubi akuleka milimo yanu mibi. Nekubaboobo teebakamvwa, teebakandibikila myoyo yabo, mbwaamba Jehova.

⁵ Ino bamauso banu bali kuli? Abalo basinsimi sa balakalilila akutamani?

⁶ Pele majwi aangu amilazyo yangu njindakalailila balanda bangu basinsimi, sa teeyakeenzya bamauso banu na? Elyo bakeempwa akwaamba kuti, Jehova wamakamu mbuli mbwaakakanza kutucitila nkaambo kanzila zyesu ancito zyesu, watucitila mbubonya obo ncobeni.

Cilengano cabasimbizi bone

⁷ Mubuzuba bwamakumi obile aane, mumwezi wakumi aumwi, nkukuti mwezi wa-Syebati, mumwaka wabili wa-Dariyo, ijwi lya-Jehova lyakasikila Zekariya, mwana wa-Berekiya, mwana wa-Ido, musinsimi. Elyo Zekariya wakati,

⁸ Ndakabona masiku muntu uutantide imbizi iisalala. Wakaliimvwi akati kamisamu mumumpata, alimwi musule lyakwe kakuli imbizi zisalala ambizi zyamandondo ambizi zituba.

⁹ Lino ndakabuzya kuti, Ino ezi nzinzi, mwami? Nkabela angelo ngundakali kwaambaula awe wakati, Ndakutondezya mbuzibede.

¹⁰ Elyo oyo muntu iwakaimvwi akati kamisamu wakavuwa kuti, Nzeezi Jehova nzyaatuma kuya bulingula nyika.

¹¹ Mpawo bakavwiila angelo wa-Jehova iwakaimvwi akati kamisamu kuti, Twamana kuya bulingula nyika, nkabela nyika yoonse ilitontwede.

¹² Elyo angelo wa-Jehova wakati, O Jehova wamakamu, ulaleka lili kukaka kubafwida luzyalo, ba-Jerusalemu aminzi ya-Juda, mbokalalila myaka eyi yoonse iili makumi aali musanu aabili?

¹³ Mpawo Jehova wakatyaba angelo ngundakaambaula awe majwi aaluzyalo aakuumbulizya.

¹⁴ Lino angelo ogundakaambaula awe wakandaambila kuti, Ongolola kuti, Mbuboobu mbwaamba Jehova wamakamu. Ndasungwaalila loko Jerusalemu a-Zioni,

¹⁵ Abantu bamasi bakede cakuliiba ndabakalalila loko, nkaambo mebo ndakanyema buniini buyo pele balo bakavuzya mapenzi.

¹⁶ Nkaambo kako mbuboobu mbwaamba Jehova. Ndaboola ku-Jerusalemu caluzyalo. Iŋanda­ yangu iti yakwe mumonya, mbwaamba Jehova wamakamu, antambo yakweelesya iyootandabikwa ku-Jerusalemu.

¹⁷ Ongolola alimwi kuti, Mbuboobu mbwaamba Jehova wamakamu. Minzi yangu iyooatisigwa coolwe, nkabela Jehova ulaboola alimwi kuzooumbulizya Zioni akusala alimwi Jerusalemu.

Cilengano cameja one acabafuzi bone

¹⁸ Elyo nindakatambya meso aangu, ndakabona meja one.

¹⁹ Lino ndakabuzya angelo ngundakali kwaambaula awe kuti, Ino ezi ninzi? Wakandivwiila kuti, Ngengawo meja aakamwaisya Juda a-Israyeli a-Jerusalemu.

²⁰ Mpawo Jehova wakanditondezya bafuzi bone.

²¹ Nkabela ndakabuzya kuti, Ino aba baza kukucita nzi? Wakavuwa kuti, Aya meja ngaakamwaisya Juda akucita kuti katakwe muntu uubusya mutwe wakwe, lino aba bafuzi beza kuzooyoosya bantu. Beza kuzootambisya meja aazisi izyakasumpula meja aazyo kukulwisya nyika ya-Juda akwiimwaisya.