Zefaniya 1 - Ibbaibele 1963

Jehova mbwati beteke Juda a-Jerusalemu

¹ Ngaaya majwi aa-Jehova aakasikila Zefaniya mwana wa-Kusi, mwana wa-Gedaliya, mwana wa-Amariya, mwana wa-Hezekiya, mumazuba aa-Josiya mwana wa-Amoni mwami wa-Juda.

² Nzoomaninizya zintu zyoonse zyaansi, mbwaamba Jehova.

³ Nzoomaninizya bantu abanyama, nzoomaninizya bayuni bakujulu answi zyamulwizi, azilebyo zyabasizibi, nkabela nzoonyonyoona bantu boonse bakede anyika, mbwaamba Jehova.

⁴ Alimwi nzootandabika maanza aangu cakupenzya Juda abantu boonse bakede mu-Jerusalemu, elyo nzoonyonyoona mubusena obuno boonse ba-Baala basyeede azina lyaba-Kemari abapaizi,

⁵ abaabo bakomba makamu makamu aakujulu atala amaanda, abaabo bakomba cakukonkezya Jehova akukonkezya mwami wabo,

⁶ abaabo baleka kutobela Jehova, abaabo batana kuyandaula Jehova nanka kumulangaula.

⁷ Amuumune kubusyu bwa-Mwami Jehova, nkaambo buzuba bwaJehova buli kufwaafwi. Jehova ulibambide cipaizyo cakwe akusalazya batambe bakwe.

⁸ Nkabela mubuzuba bwacipaizyo ca-Jehova njoouma bapati abana bamwami aboonse basamide zyakusama zyeenzu.

⁹ Alimwi mubuzuba obo njoouma boonse basotokela kumanjililo akuzuzya maanda aabasimalelo babo lunya abubeji.

¹⁰ Elyo mubuzuba obo, mbwaamba Jehova, kuyooba ijwi lyakulila kuMulyango wanswi, akoomoka kumunzi wabili, ajwi ipati lyakupwaya kuzilundu,

¹¹ Amuwuule nyoonse nomukede mu-Maketesi, nkaambo bantu boonse basambazi banyonyooka, boonse balemedwe mali balikoswedwe.

¹² Lino kuciindi eco njoolangaula moonse mu-Jerusalemu amalampi, nkabela njoouma abo bantu bakede buyo mpobabede, baamba mumyoyo yabo kuti, Jehova taciti cintu niciba cibotu niciba cibi.

¹³ Imbono zyabo ziyoosaalwa, amaanda aabo ayoonyonyoonwa. Bayooyaka maanda pele tabakooyookala mulingao, bayoobyala myuunda yamasaansa pele tabakooyoonywa waini wayo.

¹⁴ Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika. Lilamvwigwa ijwi lyabuzuba bwa-Jehova. Mwaalumi singuzu ulalila loko kulimbubo,

¹⁵ Buzuba obo mbuzuba bwabukali, mbuzuba bwamapenzi abwamafwabi, mbuzuba bwalupyopyongano abwalupilingano, mbuzuba bwamudima abwakusiya, mbuzuba bwamayoba busiya mbi.

¹⁶ Mbuzuba bwamweembo abwakoongolola bwakulwisya minzi iizyungulukidwe lubaya amayake manzomwa malamfu.

¹⁷ Nkabela njoopenzya bantu, elyo bayooenda mbuli boofu, nkaambo babisizya Jehova. Bulowa bwabo buyootika mbuli lusuko anyama yabo mbuli bufumba.

¹⁸ Ingolida yabo ansiliva yabo zyoonse zilakacilwa kubavuna mubuzuba bwabukali bwa-Jehova. Inyika yoonse iyooligwa mumulilo wabbivwe lyakwe, nkaambo uyooyoosya akumanizya boonse bakede munyika.